Read West Ambae MATIU 10 Bible Online

MATIU 10 - West Ambae bible

MATIU 10

¹I Jisas mo kware tabulutaki na nona ngwalagelo hangavulu dongwana kairua, mo bete a huirana lakwara kwara rana bakoto kinia rana livu letiuki na tanungwe hati, vake rana vakahiki na lengeana vatahae.

²A hina na kaihora* kokona hangavulu dongwana kairua aira hika. Tomuaki i Saemon, u kwareki i Pita, mai tuana i Aduru. Vunu i Semis mai tuana i Sione, i rarua i raranatu i Seveti.

³Vunu i Viliv, i Batolomiu, i Tomas, mai Matiu a tangaloi* na vilevile mane* a takis nona kavman. Vunu i Semis i natu i Alveas, i Tateas,

⁴mai Saemon hinea aia katukwale tina tangaloi* aira hi ramo karohuri na vanua noi God, a vanua Isrel*. Vunu i Sutas Iskariot, aia hini mo tovo kai Jisas lakwa na nona tavaluivuro.

⁵I Jisas mo hora na tangaloi hi hangavulu dongwana kairua tivarea mana leo hokinia hika. Mo viti lakwara kwara, “Tulu hatu vano vaki lo vanua na tangaloi tavalavarea tina gwaloana noi Isrel, diko vaki lo gwatuivanua na ngwera Sameria*.

⁶Vae tulu vano vaki mana gwaloana noi Isrel*. Aira hoki na sivsivi hinea rau sala.

⁷Tulu vano tulu heretuva tulu viti ‘A taro hinea i God ne hugwe koro na bulana tangaloi u garagarani.’

⁸Tulu vakahikinira hinea rau lenga, tulu rakatira hinea rau mate, tulu vai a tangaloi hinea a lengeana hati na vinu [12] u vaira rana ngwasara, vake tulu livu letiuki na tanungwe hati maira. A huirana hi lumiu tulu he volia tea, vae tulu ne boloki kinia a tangaloi rana hatu volikamu huri.

⁹Tulu hatu hago mane* lolo nomiu baos.

¹⁰Tulu hatu hago tanga huri halamiu, diko te lugwamiu vake, diko te kaikwokwori na garumiu vake, diko te kaitiko. A tangaloi mo boloki lakwa na tangaloi, u taritarisa lakwa na tangaloi vano hi kwara rana vangania.

¹¹“Lolona tulu mo vano vaki lo gwatuivanua lakua diko kelekele, tulu ne taga kwara ihe tea u lagwa kwara ne lai tabetabekikamu tulu ne hugu maia tarisaki hi tulu ne vano tina vanua hi.

¹²Lolona tulu mo soro tilolo ingwa, tulu mo viti kwara, ‘A magemuana ne eno maikamu.’

¹³Diko a tangaloi lolo ingwa hini ramo lai tabetabekikamu, tulu tiraki na nomiu leo karekarea na magemuana ne eno maira. Vae diko rahe lai tabetabekikamu tea, tulu tuku nomiu leo karekarea tiura.

¹⁴Vae diko te tokakivanua, diko te gwatuivanua nehe lai tabetabekikamu tea, tulu mo tiraki na vanua hini, tulu mo gahaki na gwia tina garumiu tau eia, vae rana kikilai kwara tulu halebohi tiura.

¹⁵Kareaki na viti lakwakamu, lo Rani na Arekiana [13] i God ne areki na tangaloi lo gwatuivanua Sotom maia Gomora vae ne areki na tangaloi lo gwatuivanua hi siletirarua.”

¹⁶Vunu i Jisas mo viti kwara, “Tulu rongo. Nu horakamu hoki na sivsivi vaki mana kwiriu ovi maira. Tulu tagahuri ne karea hoki na ngwata, vae tulu loli tabetabeki hoki na ngwaki.

¹⁷Tulu tagahuri, huri a tangaloi rana kwiribibikamu rana lavikamu vaki lo nako na tangaloi tovotovo kwara rana arekikamu rana takwilikamu lolo noga vale* na tiutangaroa maira.

¹⁸Rana lavikamu rana kahi haro na doridorimiu koro na nako na tangaloi lalakua mana hugwe lalakua huriau. Vunu tulu ne matangwasaraki lavi na Roro Karea lakwara mana tangaloi tavalavarea tina gwaloana noi Isrel*.

¹⁹Diko rana lavikamu kwara rana kahi haro na doridorimiu hokinia hi, a domimiu ne hatu kwalao laliki kwara tulu ne viti aha, diko tulu ne viti kworohokinia. Tulu ne viti a hava leo a Tanungwe Kokona ne bete lakwakamu lo taroki hi vohoki,

²⁰huri a leo vano hi tulu ne viti hete nomiu, rana vanamai tina Tanungwe noi Tamamiu hinea ne kwaha lalahikamu.

²¹“A tangaloi rana tovo matematei ratuaga vohoki kwara rana va mate. A tama rana vai kwehini lakwai raranatuga. A raranatu rana halebohi vovohi ratamaga mai raretahiga rana tovo matemateira.

²²Savi na tangaloi rana bega kikamu huriau. Vae ihe hi ne tu madimadi vaki lo gwereki aia ne ahi.

²³Lolona rana vai bulakikikamu lo gwatuivanua katukwale, tulu kwalao vaki luna kairuaki. Na viti lakwakamu, tulu nehe vai vunuhi na nomiu bolokiana tea lo gwatuivanua savia Isrel, vae i nau, a Natu* na Tangaloi, na vanamai.

²⁴“A ngwalagelo he lakua sileti na nona tisa tea, vake a tangaloi boloki he lakua sileti na nona hugwe tea.

²⁵Vae u karea kwara a ngwalagelo hi ne mulemai hoki na tangaloi hi mo toko huhuia. Vunu vake, u karea kwara a tangaloi boloki hi ne mulemai hoki na nona hugwe. Diko a tangaloi rau kwahakwaha hati vovohi na hugwe na ingwa, rau kwarekinia i Bielsebal, hinea a hina na hugwe na tanungwe hati maira, vae rana kware na raranatu na hugwe na ingwa hi kina hina rau hati siletia hi.”

²⁶I Jisas mo viti vake kwara, “Tulu hatu mataku kina tangaloi maira. A havakinau hinea a tangaloi u gui koroa vae i God ne ragahia, vatavataha na kinau a tangaloi rau tavunikinira vae i God ne taura vaki na ngwasara.

²⁷A havakinau hini nu viti lakwakamu lolo bongi tulu ne viti taliku lolo rani, a havakinau hi tulu mo rongo tavuniki tulu viti talahaki tivarea lakwa na tangaloi rana rongo.

²⁸Tulu hatu mataku kinira hinea rana kwohi matei na tarabehi, vae ranahe kwohi lavi na tanungwe tea, vae tulu mataku ki God, hinea ne vai lai ne magaraki na tarabehi mana tanungwe lolo kabu na kakadiki.

²⁹Tulu domidomi lo kinau hika. Tulu ne voli lavi na manu kairua kwaririgi kina selen kaiono, vae diko i Tamamiu he tirakinia tea, hete kwara te katukwale tiura ne sovi tilo tano.

³⁰Vae i kamu, a vulu na gwatumiu vake i God u valu savira u rovo ba.

³¹Vae tulu hatu mataku. I kamu tulu karekarea sileti na manu rusa.”

³²Vunu i Jisas mo viti kwara, “Ihe tea hinea rau viti matangwasarakiau lolo nako na tangaloi kwara aira a nogu, na vai kwehini vake hurira koro na nako i Tamagu lolo taetae.

³³Vae ihe tea hinea rau viti tivarea lolo nako na tangaloi kwara aira hete nogu, i nau na viti tivarea vake kwara aira hete nogu, koro na nako i Tamagu lolo taetae.”

³⁴I Jisas mo viti “Tulu hatu domi kwara nu vanamai kwara na bete na magemuana lakwa na tangaloi na varamana. Nohe vanamai tea kwara na bete na magemuana kehekeheki, vae nu vanamai vake kwara na vai na tangaloi rana makwahekwahe rana vai vuro.

³⁵Nu vanamai kwara a raranatu ngwera rana domi bulakiki i ratamaga, a raranatu vavine rana domi bulakiki i raretahiga, a ragwelika vavine rana domi bulakiki i ratubuga vavine.

³⁶A tangaloi a nona tavaluivuro rana hati karakara, aira hinea lo nona vakabela vohoki.

³⁷“Ihe hi u lagwa mai tamana diko i retahina siletiau, he taritarisa tea kwara ne kwareki nogu tangaloi. Ihe hi u lagwa mai natuna a ngwera diko a vavine siletiau, he taritarisa tea kwara ne kwareki nogu tangaloi.

³⁸Ihe hi he kwali na kaibetuna tea kwara ne huri na tanoi-garugu, he taritarisa tea kwara ne kwareki nogu tangaloi.

³⁹Ihe hi u domidomi haburu huri na mamaurianana ne vakasalakinia, vae ihe hinea ne tiraki na mamaurianana huriau ne lavi na ahiana.”

⁴⁰Vunu i Jisas mo viti lakwara kwara, “Ihe hi u lai tabetabekikamu, u lai tabetabekiau. Ihe hi u lai tabetabekiau, u lai tabetabekinia hinea mo horeau.

⁴¹“Ihe hi u lai tabetabeki na tangaloi* duruduruki huri u kikilai kwara aia a tangaloi duruduruki, vae ne lai a kaitakwe ne taritarisa mana tangaloi duruduruki. Ihe hi u lai tabetabeki na tangaloi bakoto huri u kikilai kwara aia a tangaloi bakoto, vae ne lai a kaitakwe ne taritarisa mana tangaloi bakoto.

⁴²Kareaki na viti lakwakamu, ihe hi u bete a laha na kwai kangwkangwa vohoki lakwa na tangaloi vuroki te katukwale tiura hika hinea ramo huriau, huri u kikilai kwara aia a nogu ngwalagelo, kareaki aia ne hagwe na kaitakwena huri.”