Read West Ambae MATIU 11 Bible Online

MATIU 11 - West Ambae bible

MATIU 11

¹I Jisas mo viti na leo aira vano hi lakwa na nona ngwalagelo hangavulu dongwana kairua mo rovo, vunu mo tiraki na vanua hini mo vano mo huhui mo heretuva lolo gwatuivanua maira garagarani takwahini.

²I Sione a tangaloi na bavtaes tangaloi aia lolo ingwa na gwarugwaru vae mo rongo na roro huri na boloki noi Vurae*, mo hora na nona ngwalagelo ratuaki vaki maia.

³Ramo uduhuri ki Jisas ramo viti “?I nigo hinea i Sione mo viti kwara vae kona vanamai, diko keu tuku hugu tarae te dolua?”

⁴I Jisas mo daraki mo viti “Tulu mule taliku tulu viti lakwai Sione a havakinau hini tulu mo rongo, tulu mo taga.

⁵A matadodo, hikani rau tagataga lai. Aira hi a garuga rau hati, hikani rau lakao lai. A tangaloi hinea a lengeana hati na vinu [14] u vaira, hikani rau ngwasara. Aira hi a gweroga rau vono, hikani rau rongorongo lai. A tangaloi rau mate, hikani rau ahi taliku. A tangaloi kakaravi, hikani nu kwalahaki na Roro Karea lakwara.

⁶Aia hi he domi kairua tea kiau vae aia u havutia.”

⁷Lolona a ngwalagelo noi Sione ramo mule, i Jisas mo vitiviti huri i Sione lakwa na vao. Mo viti “?Lolona tulu mo vano vaki mai Sione lo vanua vuroki, tulu tuku domi kwara tulu ne tagai na havakinau? ?A rau na duvu hinea ramo toko malilibe kina langi? Hetea.

⁸?Vae tulu vano huri aha? ?Tulu vano kwara tulu ne tagai na tangaloi hinea u lugwaki na lugwa karea haburu? Hetea. Kareaki a tangaloi hinea rau lugwalugwa kwehini, rau hugu lolo ingwa karekarea na hugwe lalakua.

⁹?Vae tulu vano huri aha? ?Tulu vano kwara tulu ne tagai na tangaloi* duruduruki, a? Io, vae na viti lakwakamu, a tangaloi hi u sileti na tangaloi duruduruki.

¹⁰I Sione aia hi nga a Uliuli* Kokona mo viti huria kwara, ‘I God u viti “Hika a nogu kaihora. Na horae tomuakinigo, ne takahi na hala huriko.” ’ ”

¹¹Vunu i Jisas mo hoke na leona vake mo viti “Kareaki na viti lakwakamu, i Sione a tangaloi na bavtaes tangaloi u lakua sileti na tangaloi hinea ramo vora lo varamana. Vae te tangaloi haro hinea hete tangaloi vitiviti huri luna, u kelekele sileti na tangaloi doluaki hinea i God u hugwe korora, aia hi u lakua sileti i Sione.

¹²U tinakaki lo taro hinea i Sione a tangaloi na bavtaes tangaloi mo heretuva, mo maravuti lo rani hika karagwa, vae a tangaloi rau tuku vai vuro mana tangaloi hinea i God u hugwe korora. Vake a tangaloi hinea rau vai vuro rau vai kwara rana revei na tangaloi vano hi kwara rana mulemai ki noga tangaloi.

¹³Lo buku* na Tangwata*, i Mosis u tuku duruki na leo ti God, vake a tangaloi duruduruki savia rau tuku vai kwehi, mo vanovano rovonaki lui Sione.

¹⁴Vae diko tulu lengaia kwara tulu ne hauhuri lo noga leo, i Sione aia i Elaesa hinea rau viti terekaki kwara vae ne vanamai.

¹⁵A gweromiu eia. Tulu rongohuri tabetabeki na leo vano hi.

¹⁶“?Nana viti na hava leo kwara na vosangi na bohiana na tangaloi lo taro hika? Aira hoki na natu kwaririgi hinea rau hugu na sara rau tuku vakovako. A bulubulu gwatu katukwale mo koleki lakwai gwatu kairuaki

¹⁷ramo viti ‘I kami keu horo a bolo na lakiana lo bue horohoro hurikamu, vae tulu he vai te hakwana. Keu kahoki na bolo na tulaki tamate, vae tulu he tangi tea. ?Tulu vai kworoho?’

¹⁸I Sione u vanamai u rete, he inu te waen, vae a tangaloi savia rau viti kwara, ‘!Aia a tanungwe hati luna!’

¹⁹Vae i nau a Natu* na Tangaloi nu vanamai, nu kanikani, nu inuinu. Vae a tangaloi savia rau viti ‘!Tagai na tangaloi hika! U domi huri a kanikani kehe nga, aia a kaiinu na waen, aia a buluana nona tangaloi* vaivai hati tavalavarea mana tangaloi* vilevile mane* a takis nona kavman.’ Vae a kwai na lolorani na kikikila noi God u vosangi kwara a lolorani hi u kareaki.”

²⁰Vunu i Jisas mo tinakaki mo kwaha lo tangaloi na gwatuivanua lalakua hinea u vai na nona vaisea rusa eia. U kwaha luga kwara ne vaira rana maemae huri rahe bohi tea tina noga hatiana.

²¹Mo viti “!A rongoana hati lakua lakwakamu lo gwatuivanua Korasin! !A rongoana hati lakua lakwakamu vake lo gwatuivanua Betsaeta! A vaisea maira nomo vai lakwakamu, kwara vae diko u vaiana hokinia lo gwatuivanua lalakua Taea maia Saeton tuai, kwara vae a tangaloi takwahini ranahe hugu tea lo noga hatiana. Kwara vae rana lugwaki na lugwa na hahakaviana, rana rasu a gwia tiluga siboga kwara rana vosangi kwara rau bohi tina noga hatiana.

²²Vae na viti lakwakamu, lo Rani na Arekiana [15] i God ne areki na tangaloi lo gwatuivanua lalakua Taea maia Saeton vae ne arekikamu siletira.

²³?Aia i kamu a tangaloi Kavaneam, tulu lengaia kwara tulu ne tabe hakekikamu sibomiu vaki lolo taetae? I God ne vohokikamu tegetano tilolo kwalu bua. Kwara vae diko a vaisea maira hinea nomo vai maikamu u vaiana lo gwatuivanua Sotom kwara vae a gwatuivanua Sotom ne eno vaki hika karagwa.

²⁴Vae na viti lakwakamu, lo Rani na Arekiana i God ne areki na tangaloi lo gwatuivanua Sotom vae ne arekikamu siletira.”

²⁵Lo taroki hini Jisas mo tiutangaroa mo viti “Mama, Hugwe na taetae mana varamana, nu lagwa haburu maiko huri komo tavuniki na kinau aira vano hi tina tangaloi kikikila, maira hinea rau domidomi sea, vae komo vosangira lakwa na tangaloi hinea rahe kikikila tea, aira hoki na raranatu.

²⁶Kareaki Mama, a domimu, vae u mule luna hokinia hi komo lengaia.”

²⁷Vunu i Jisas mo kwaha mana tangaloi taliku mo viti kwara, “Rabela. I Tamagu u bete na kinau savia lakweau. I nau i Natuna, vae hete kwara te katukwale u kikilaiau. I Tamagu kehekeheki u kikilaiau. Hete kwara te katukwale u kikilai i Tamagu. I nau mana tangaloi hinea nu mataira kwara na vosangia lakwara, i kami kehekeheki keu kikilaia.”

²⁸Vunu i Jisas mo viti “I kamu vunu hinea u rahakikamu, tulu kwali na hagohago mava, [16] tulu vanamai vaki maiau vae na bete a mabuana lakwakamu.

²⁹Tulu masinge mana boloki na bete lakwakamu, vunu tulu ne huhui tiau, huri i nau a tangaloi magemu, nu hivokiau lolo domigu, vae tulu neri hagwe a mabuana.

³⁰Tulu ne vai kwehini huri a hala na tomuakikamu luna u magemu, a hagohago na tau lumiu u mamarae.”