Read West Ambae MATIU 12 Bible Online

MATIU 12 - West Ambae bible

MATIU 12

¹Takuni tina kinau hi, i Jisas mo lakao utuhi na agoago* na uit* lo Rani* na Mabuana. A nona ngwalagelo u marakatira, vae ramo maraka hika ramo rarahi na biuki na uit ramo kani.

²Lolona a Varisi* maira ramo tagaira ramo kwaha mai Jisas ramo viti “!Tagaia! A nomu ngwalagelo rau vai na kinau hinea a noda Tangwata* he tirakikita tea kwara tana vai lo Rani na Mabuana.”

³I Jisas mo daraki lakwara mo viti “?I kamu tulu he valuki na kinau tea lo Uliuli* Kokona huri i Devit hinea mo vai lolona aia mana nona ngwalagelo mo marakatira?

⁴Vae mo soro tilolo Ingwa Kokona noi God, mo lavi na bereti* hinea u hileana ba lakwai God, vunu aia mana nona ngwalagelo ramo kani. Aia a bereti hi, a noda Tangwata u viti kwara a tangaloi* lingilingi aira kehekeheki rana kani, i Devit mana nona ngwalagelo, hetea.

⁵?Vake tulu he valuki na leo tea lo Tangwata noi Mosis hinea u viti kwara a tangaloi lingilingi lolo Ingwa Kokona noi God rau galo lo Tangwata na Rani na Mabuana kareaki vataha na Rani na Mabuana, vae rahe vakasile tea?

⁶Na viti lakwakamu, katukwale hike u lakua sileti na Ingwa Kokona noi God.

⁷Nu domi kwara tulu he kikilai na domiana na Uliuli Kokona te hika hinea i God mo viti kwara, ‘Nahe lengai na hura boniboni tea kina kairoroi*, vae nu lengai na domi hahakavi.’ Kwara vae diko tulu kikilai kareaki tulu nehe areki na tangaloi tea hinea rahe vakasile tea.

⁸Hikani i nau a Natu* na Tangaloi nu hugwe koro na Rani na Mabuana.”

⁹I Jisas mo tiraki na vanua takwahini mo vano vaki lo noga vale* na tiutangaroa katukwale.

¹⁰A tangaloi takwahini a kabana u gogo. A tangaloi tuaki takwa-hi rau lengaia kwara rana tu te lo kinau, rana vai na leo huri i Jisas kwara aia u vai kinau rau hati, vae ramo uduhuri kinia ramo viti kwara, “?U taritarisa kwara tana vakahiki na tangaloi lo Rani* na Mabuana diko tau galo lo noda Tangwata*?”

¹¹I Jisas mo daraki mo viti kwara, “?Kworohokinia, diko te katukwale tikamu a bulana sivsivi u sovi tilolo kwalukwalu bua lo Rani na Mabuana? ?Nehe hago te luna kwara ne haua tivarea?

¹²Vae a tangaloi u karea sileti na sivsivi. Vae a noda Tangwata u tirakikita kwara tana hago mana tangaloi lo Rani na Mabuana.”

¹³Vunu mo kwaha mana tangaloi hinea a kabana u hati, mo viti lakwae kwara, “Vukeri na kabamu.” Mo vukeria mo karea taliku hokinia kairuaki.

¹⁴A Varisi* ramo tiraki na vale na tiutangaroa, ramo vai na tovotovo huri i Jisas kwara rana kwohi mateia.

¹⁵I Jisas u kikilai na kinau hi vae mo vano tina vanua hini. A vao rusa ramo huria, mo vakahiki savi na tangaloi rau lenga.

¹⁶Mo surira kwara rana hatu viti huria lakwa na tangaloi ramo kikilaia.

¹⁷A kinau hi u mule luna lo leoki hinea a tangaloi* duruduruki i Aesaea mo viti vae u kworo, hinea i God mo viti kwara,

¹⁸“Hikani a nogu tangaloi boloki hinea nu mataia, aia hi nu tabea, nu lagwa maia haburu. Na tau na nogu Tanungwe luna, vae ne viti huri nogu bakotoana lakwa na tangaloi tavalavarea tina gwaloana noi Isrel*.

¹⁹Nehe vai te viroroa diko nehe kware karakara tea, diko nehe kwaha te karakara na sara.

²⁰Aia nehe vai te ne madi haburu lakwa na tangaloi hinea rahe huira tea, vake nehe vai bulakikinira tea aira hi a noga huirana tikei. Aia ne seseaka ne boloki tarisaki ne vai na bakotoki ne gui na hatiki, ne tu ne madi.

²¹Savi na tangaloi tavalavarea tina gwaloana noi Isrel rana tau noga domidomi luna.”

²²Vunu a tangaloi ramo lavi na tangaloi katukwale vaki mai Jisas. A tangaloi hi a matana u dodo, he kwahakwaha lai tea huri a vono u vaia. I Jisas mo vakahiki na tangaloi hini, mo kwaha lai, mo tagataga.

²³A vao savia ramo idila ramo viti “!Ei! A tangaloi hika kwara aia a Gwaloana noi Devit hinea tamo toko hugu tarae.”

²⁴Lolona a Varisi* ramo rongo hokinia hi ramo viti kwara, “A hugwe nona tanungwe hati i Bielsebal u bete na huirana lakwae kwara ne livuti na tanungwe hati maira tina tangaloi.”

²⁵I Jisas u kikilai a havakinau hi ramo toko domi, mo viti lakwara kwara, “Te vanua haro nga ne kwahekinia sibona a gwatuki ne rusa hinea rana vai vuro mulekinira, vae a vanua hi nehe tu lai tea kwara ne tuai. Te gwatuivanua, diko a vakabela te haro nga, ne kwahekinia sibona a gwatuki ne rusa hinea rau vai vuro mulekinira, rana makwahekwahe.

²⁶Kareaki i Setano* nehe livu lavia tea sibona. ?Kwara vae diko a nona tangaloi rana makwahe a gwatuki ne rusa hinea rana vai vuro mulekinira, vae ne hugwe kworohokinia korora kwara ne tuai?

²⁷I kamu tulu viti kwara a hugwe nona tanungwe hati, i Bielsebal, u bete na huirana lakweau nomo livuti na tanungwe hati maira kinia. ?Karea, vae i kamu a nomiu tangaloi rau livu kworohokinira letiu? A nomiu tangaloi rau vosangi kwara tulu vakasile haburu.

²⁸Vae diko nu livutira letiu kina Tanungwe noi God, hikani u vosangi kwara i God u hugwe koro na vanuamiu ba.

²⁹“Hete tangaloi kwara ne vai lai ne magaraki na ingwa na tangaloi huira vunu ne lavi na nona vivilagoki. Vae kehekeheki ne gwarua tomua, vunu neri vai lai ne magaraki na ingwana.

³⁰“A tangaloi he huriau tea, kareaki aia a nogu tavaluivuro. Vake a tangaloi he bulu tea maiau kwara ne vileki nogu tangaloi maiau, kareaki u livu girigirikinira.

³¹Huri hi na viti lakwakamu, i God ne vai lai ne domidomi koro na hatiana nona tangaloi mana noga kwahakwaha hati hinea ramo viti vovohia. Vae diko a tangaloi ne kwahakwaha hati vovohi na Tanungwe Kokona, i God nehe domidomi koro lai tea.

³²Ihe te ne viti na leo vovohiau, i nau a Natu* na Tangaloi, vae i God ne domidomi koroa, vae ihe te ne viti na kinau hati vovohi na Tanungwe Kokona, i God nehe domidomi koroa tea lo taro hika vaki tuai.”

³³Vunu i Jisas mo viti vake kwara, “Diko a vikai u karea, a kwaiki ne karea. Diko a vikai u hati, a kwaiki ne hati, huri tau kikilai a vikai lo kwaina.

³⁴!I kamu hoki na ngwata! ?I kamu a tangaloi vaivai hati vae tulu ne viti kworohoki na kinau karea? A tangaloi mo kwaha, u viti huri na kinau hinea a domina u kukwere kinia.

³⁵A tangaloi hinea u bakoto u viti kinau rau bakoto, huri a domina lo kinau rau bakoto kehe. A tangaloi hati u viti kinau rau hati, huri a domina lo kinau rau hati kehe.

³⁶“Na viti lakwakamu, lo Rani hinea i God ne taga kwaheki na doridori na tangaloi savia, [17] a tangaloi rana viti lakwae kwara kworohokinia ramo viti na leo hinea rahe domidomi te luga, rau viti haro nga.

³⁷I God ne taga kwaheki na doridorimiu lo leomiu kwara ne viti i kamu a nomiu hatiana tikei, diko a nomiu hatiana eia.”

³⁸A tangaloi* kikikila na Uliuli* Kokona tuaki mana Varisi* maira ramo kwaha ramo viti kwara, “Tisa, keu lengaia kwara kona vai na kaivosangi kena taga.”

³⁹Vae i Jisas mo daraki mo viti “I kamu a tangaloi lo taro hika tulu lengaia kwara tulu ne tagai na kaivosangi. Vae i kamu a tangaloi hati tulu tuku veveki rera vovohi God. Tulu nehe tagai na kaivosangi tea. A kaivosangi lo tangaloi* duruduruki i Sona aia kehekeheki tulu ne tagaia.

⁴⁰I Sona mo hugu lolo tagwangi na ika lakua a rani kaitolu, mana bongi kaitolu, vae lo hala hokinia hi i nau a Natu* na Tangaloi na ngwalulu lolo buaitano a rani kaitolu mana bongi kaitolu.

⁴¹Lo Rani na Arekiana [18] a tangaloi na gwatuivanua Nineve rana tu hake rana viti kwara tulu hati, huri lolona ramo rongo i Sona mo heretuva, rau halebohi tina noga hatiana. !Vae tulu tagaia! I nau nu lakua sileti i Sona.

⁴²Lo Rani na Arekiana vae a vavine hugwe lakua tina ngwahukui-vanua talumabeo ne tu hake ne viti kwara a tangaloi na rani hika rau hati, huri u lakao dali na duvi na varamana hikani kwara ne rongo na lolorani noi Solomon. !Vae tulu tagaia! I nau nu lakua sileti i Solomon.”

⁴³Vunu i Jisas mo viti kwara, “Lolona a tanungwe hati mo vano tina tangaloi, mo lakao laliki lo vanua vuroki, u tuku soro haro a tanotano kwara ne mabu eia. Vae diko nehe hagwe te kwara te katukwale, vae ne toko kwahakwaha kahea,

⁴⁴ne viti kwara, ‘!A! Na mule taliku vaki lolo ingwagu hinea nomo salatiua tomua.’ Hikani mo mule taliku mo hagwe na ingwa hini u eno vuroki, u ngwasara, rau tau tabetabeki na kinau lolona u rovo ba.

⁴⁵Vunu mo soro tivarea mo lavi na tanungwe hati dolua kaibitu vake rau hati siletia, ramo vanamai ramo toko takwahini. Hikani a tangaloi hini mote hati vakevake nga siletia tomua. Vae ne hokinia hi lakwa na tangaloi hati hinea rau toka lo taro hika.”

⁴⁶Lolona i Jisas mo toko kwaha radu nga mana tangaloi, i ratuana mai retahina ramo maravuti. Rau tu varea ramo uduharoa kwara rana kwaha maia.

⁴⁷Hikani katukwale tiura takwahini mo kwaha mai Jisas mo viti “!Ei! I retahimu mai ratuamu rau tu varea, rau lengaia kwara rana kwaha maiko.” [19]

⁴⁸Vae i Jisas mo darakinira mo viti kwara, “?I retahigu ihe? ?I ratuagu ihe maira?”

⁴⁹Vunu mo tihu na nona ngwalagelo mo viti kwara, “I retahigu, i ratuagu, aira hika,

⁵⁰huri a tangaloi hinea u vai a havakinau i Tamagu lolo taetae u lengaia kwara ne vai, aia u kwareki i tuagu, i hagwegu, i retahigu.”