Read West Ambae MATIU 14 Bible Online

MATIU 14 - West Ambae bible

MATIU 14

¹Lo taro hi i Herot, [22] a hugwe lakua na vanua Galili*, mo rongo na roro i Jisas.

²Mo viti lakwa na nona tangaloi lalakua kwara, “I Sione a tangaloi na bavtaes tangaloi aia u ahi taliku, vae huri hi u vai na bolokiana vano hi lo huirana.”

³I Herot mo viti kwehi huri aia u lavi Herotias i vavinehi i tuana i Viliv. Vunu i Sione a tangaloi na bavtaes tangaloi u viti lakwai Herot tigwaravu kwara, “He taritarisa tea kwara kona laki mai Herotias.” Vae huri hi i Herot mo hora na nona tangaloi ramo kwiribibi i Sione, ramo gwarua ramo taua lolo ingwa na gwarugwaru huri i Herotias aia u viti.

⁵I Herot u lengaia kwara ne kwohi mateia, vae u mataku kina gwaloana noi Isrel* takwahini huri rau hauhuri kwara i Sione aia a tangaloi* duruduruki.

⁶Lo rani a hukao i Herot mo diu, i natu i Herotias a vavine mo vai hakwana lolo nako na tangaloi doluaki. I Herot u lagwa haburu,

⁷mo tauki na leo terekaki lakwae kwara, “Nu hahariki kwara na bete na kinau lakwako te haro nga hinea kona uduhuri.”

⁸Lo domiana noi retahina mo longi ti Herot mo viti kwara, “Ko bete lakweau hika lai nga a gwatu i Sione a tangaloi na bavtaes tangaloi, lo rova.”

⁹A hugwe lakua hi u rongo hati, vae huri u hahariki u rovo ba lakwae tomuaki koro na nako na nona vao doluaki hinea rau vanamai huri kanikani, mo hora kwara ne vaiana hoki na natu vavine mo lengaia.

¹⁰Hokinia ramo sio utuhi na gwatu i Sione lolo ingwa na gwarugwaru.

¹¹Vunu ramo lavia lo rova, ramo betea lakwa na vavine hi, mo lavia lakwai retahina.

¹²A ngwalagelo noi Sione ramo vanamai, ramo lavi na tarabehina ramo tanomia, vunu ramo vano ramo viti lakwai Jisas.

¹³Lolona i Jisas mo rongo na roro i Sione, mo tiraki na vanua hini lo aga, mo vano vaki lo vanua vuroki aia kahea. A tangaloi rusa ramo rongoa, ramo tiraki na gwatui-vanuaga ramo huria auta.

¹⁴I Jisas mo galo hake tina aga, mo tagai na vao lakua hi, lolo domina u hakavira haburu vohoki, mo vakahikinira hinea rau lenga.

¹⁵Lo mataniaho evina a nona ngwalagelo ramo vanamai vaki maia ramo viti “Hikani u raviravi, a vanua hike a vanua vuroki. Ko hora na vao rana vano vaki lo gwatugwatui-vanua rana voli te kaga hinaka.”

¹⁶I Jisas mo daraki mo viti kwara, “?Rana vano huri aha? I kamu tulu bete te hinaka lakwara rana kani.”

¹⁷Ramo daraki ramo viti kwara, “Hike maikami a bereti* kailima mana ika kairua vohoki.”

¹⁸I Jisas mo viti “Tulu lavira vanamai.”

¹⁹Mo viti lakwa na vao kwara rana hugu lolo duvu, vunu mo lavi na bereti hi kailima mana ikaki kairua, mo lalangao vaki lolo taetae, mo lagwaki God huri. Mo volo utuutuhi na bereti vano hi mo betekira lakwa na nona ngwalagelo, a nona ngwalagelo ramo hileki lakwa na vao.

²⁰Aira vunu rau kani vae rau kugwa. Vunu a nona ngwalagelo ramo hokoni na hinaka hinea a tangaloi ramo kani dore, a kete hangavulu dongwana kairua rau kukwere.

²¹A gwira na ngwera hinea ramo kanikani u tari vakailima, vae rahe valuki na ravavine te mana sakwarigi.

²²Vunu i Jisas mo hora na nona ngwalagelo ramo galo tilolo agaga, ramo vano tomua vaki tavalakwai tokatoka lakua tavaluki, vunu mo hora na tangaloi rusa ramo mulemule.

²³Mo hora na tangaloi tiua mo rovo, vunu mo galo hake vaki lo vuti aia kahea kwara ne tiutangaroa. Vae mo bongi i Jisas aia kahea takwahini.

²⁴Lo taro hi a aga aia varea sea lolo kwai tokatoka lakua, a navo mo toko vohoki lalikinia, huri a langi u here u huira haburu vovohira.

²⁵Luirani, i Jisas mo lakao hivoulu lo kwai vaki maira.

²⁶Lolona a ngwalagelo ramo tagaia mo lakao hivoulu lo kwai, ramo mataku haburu, ramo viti kwara, “!Ii! !A tamate!” Ramo vingaraki rau mataku.

²⁷I Jisas mo kwaha maira heheri mo viti kwara, “A domimiu ne hatu kilukilu. I nau hika. Tulu hatu mataku.”

²⁸Vunu i Pita mo kwaha mo viti kwara, “Hugwe*, diko i nigo kareaki, ko viti lakweau kwara na venatu hivoulu lo kwai vaki maiko.”

²⁹I Jisas mo daraki mo viti “Vanamai.” Hikani i Pita mo ngwalua tina aga mo tinakaki mo lakao hivoulu lo kwai vaki mai Jisas.

³⁰Vae lolona mo rongo na langi mo here u huira, mo mataku haburu, mo tinakaki mo dono tegetano tilolo kwai. Mo ngara mo viti “!Hugwe! !Vakahikiau!”

³¹Heheriki i Jisas mo hokaki na kabana mo kwiribibia mo viti kwara, “A nomu hauhuriana u kelekele haburu. ?Kworohokinia komo domi kairua?”

³²I rarua vunu raru mo galo tilolo aga, a langi hi mo hivo.

³³A ngwalagelo lolo aga ramo sovi hivo kina domi mavakiana vovohi Jisas. Ramo viti kwara, “Kareaki i nigo i Natu i God.”

³⁴Ramo kao utuhi na kwai tokatoka lakua hi ramo vano vaki lo vanua Genesaret.

³⁵Takwahini a tangaloi ramo taga kikilaki i Jisas. Hikani ramo hora leo huri na lengeana dali na vanua takwahini ramo lavira aira vunu vaki mai Jisas.

³⁶Ramo kwaha maia kwara ne tirakinira rana kihi na gweregwere na lugwana. Vae aira vunu hinea rau kihia ramo rongo karea.