Read West Ambae MATIU 15 Bible Online

MATIU 15 - West Ambae bible

MATIU 15

¹Vunu a Varisi* tuaki mana tangaloi* kikikila na Uliuli* Kokona rau vanamai tina gwatuivanua lakua Serusalem, vaki mai Jisas ramo uduhuri kinia ramo viti kwara,

²“?Kworoho a nomu ngwalagelo ramo rongo bulakiki na haharaana mo hagobibiana vanamai tuai kinia ti ratubuda? Rahe huri tea lo halaki kwara rana sasavula vunu rari kanikani.”

³I Jisas mo daraki lakwara mo viti “?Kworoho i kamu tulu rongo bulakiki na tulikileo noi God tulu huri na nomiu huhuiana sibomiu?

⁴I God u viti ‘Ko domi mavaki i tamamu mai retahimu.’ Vunu vake mo viti ‘Ihe tea ne kwahakwaha hati vovohi tamana diko i retahina rana kwohi mateia.’

⁵Vae i kamu tulu viti kwara diko a tangaloi a kinau maia kwara ne hago mai tamana diko i retahina kinia, vae ne viti ‘Hika a hilehile lakwai God,’ karea u rovo.

⁶Nehe domi mavaki tamana tea. Hokinia hini tulu domi hahae na leo noi God tulu huri na nomiu huhuiana sibomiu.

⁷I kamu a tangaloi kurakura, tulu viti kinau kina ringomiu vohoki. Lolona i Aesaea mo duruki na leo ti God u viti hurikamu bakotoki hinea mo viti

⁸‘I God mo viti “A tangaloi vano hikani rau domi mavakiau kina leoga vohoki, vae a domiga u vakahao haburu tiau.

⁹Venaha ramo toko domi mavakiau, huri aira rau huhui na tangaloi kina huhuiana nona tangaloi, vunu ra va viti kwara a nogu leo.” ’ ”

¹⁰Vunu i Jisas mo kware na vao vaki maia, mo viti lakwara kwara, “Tulu rongohuri ne karea, tulu lai tabetabeki na leogu.

¹¹Hete kinau hinea a tangaloi u kani mo vaia mo hogora koro na nako i God, vae a havakinau hinea u vanamai tina domi na tangaloi aia hi mo vaia mo hogora.”

¹²Vunu a nona ngwalagelo ramo vanamai vaki maia ramo uduhuri kinia ramo viti “?Ku kikilai kwara a Varisi* rau rongo hati kina havakinau hini komo viti?”

¹³I Jisas mo daraki mo viti “Vunuhi na rivurivu hinea i Tamagu lolo taetae he rivu tea, ne vurakinira letiu.

¹⁴Tulu hatu domi hurira. Aira a kaitomuaki vae a mataga rau dodo. Diko a tangaloi matadodo kairua, vae kairuaki ne tagaokinia kairuaki, i rarua vunu vae raru ne sovi tilolo kwalu.”

¹⁵I Pita mo kwaha mo viti kwara, “Ko viti na domiana na tavaluileo hi lakwakami.”

¹⁶I Jisas mo daraki mo viti “?Kworohokinia? Nu domi kwara tulu kikikila ba. Vae hete radu nga.

¹⁷?Tulu he kikilai tea? A kinau hinea a tangaloi u kani u vano tilolo tagwangina vunu mo vano tina tarabehina.

¹⁸Vae a leo hi rau vanamai tina kwakwa rau vanamai tina domi, a kinau aira vano hini rau vai na tangaloi mo hogora koro na nako i God,

¹⁹huri a domi hati rusa rau vanamai tina domi na tangaloi. A tangaloi u ua mate tangaloi. A ngwera u tiutokakivanua mana vavinehi na tangaloi dolua, vunu a vavine hinea u laki ba u tiutokakivanua mana ngwera dolua. A ngwera u vai a doridori hati mana vavine ngwalagelo, a tangaloi rau babalu, rau kurakura, rau uveuve.

²⁰A kinau aira vano hikani rau vanamai tina domi, vae aira rau vai na tangaloi mo hogora. Vae diko a tangaloi ne kanikani vae he sasavula tea hokinia ramo viti kwara ne vai, hini nehe vai na tangaloi tea kwara ne hogora.”

²¹I Jisas mo tiraki na vanua hini mo vano tiua vaki lo vanua garagarani mana gwatuivanua lalakua Taea maia Saeton.

²²A vavine Kenan u hugu lo vanua hini mo vanamai vaki maia. Mo kwaha karakara mo viti “Hugwe*, Gwaloana nona Hugwe Lakua i Devit, ko hakaviau. I natugu a vavine a tanungwe hati u vaia, u rongo hati haburu.”

²³Vae i Jisas he viti na leo tea kwara te katukwale lakwae. A nona ngwalagelo ramo vanamai vaki maia ramo kwaha maia ramo viti “Ko horae ne vano. U hurikita mo toko kurekurere.”

²⁴Vunu i Jisas mo daraki mo viti “I God u horeau kwara na vano vaki mana gwaloana noi Isrel* kehekeheki, aira hoki na sivsivi rau sala.”

²⁵Vunu hika a vavine hi mo vanamai mo sovi hivo vovohia kina domi mavakiana mo viti kwara, “Hugwe, ko hago maiau.”

²⁶I Jisas mo daraki mo viti “He taritarisa tea kwara na lavi na hinaka kana sakwarigi na vohokinia lakwa na kwiriu.”

²⁷A vavine mo daraki mo viti “Kareaki Hugwe, vae a kwiriu vake rau kani na mavuri hinaka hinea rau sovi tina tevo na kanikani nona tabulaga.”

²⁸Hikani i Jisas mo daraki lakwae mo viti kwara, “I nigo a nomu hauhuriana u lakua. A havakinau hi ku lengaia, nana vai lakwako.” Lo taroki hini vohoki a natu na vavine hi mo rongo karea.

²⁹I Jisas mo tiraki na vanua hini mo vano vaki mana Kwai* Tokatoka Lakua Galili*. Mo galo hake lo vuti mo hugu takwa-hi.

³⁰A vao ramo vanamai vaki maia rau lai a tangaloi rau hau tikoki mana matadodo, a tangaloi a tarabehiga rau gwaroto, a tangaloi a meaga rau bulu, mana lengeana rusa ratuaki vake, ramo taura garagarani mana garu i Jisas, mo vakahikinira.

³¹A tangaloi meabulu ramo kwaha, a tangaloi a tarabehiga rau gwaroto ramo doluaki taliku, aira hi rau hau tikoki ramo lakao, a matadodo ramo tagataga. Vae lolona a tangaloi ramo tagaia, ramo idila, ramo kaluhaki i God hinea a God nona gwaloana noi Isrel*.

³²I Jisas mo kware na nona ngwalagelo vaki maia mo viti lakwara kwara, “Nu hakavi na tangaloi vano hikani vohoki, huri rau hugu maiau a rani kaitolu, vae hika a hinaka tikei kwara rana kani. Nohe lengaia tea kwara na horara tiau hinea nohe vanganira tea, huri ramai matemateki vula lo hala mule.”

³³A nona ngwalagelo ramo uduhuri kinia ramo viti kwara, “?Tana hagwe na hinaka ave ne taritarisa kwara tana vangani na vao hika hike lo vanua vuroki, huri rau rusa haburu?”

³⁴I Jisas mo uduhuri kinira mo viti “?Tulu hago a bereti* kaivihe?” Ramo daraki ramo viti “Kaibitu, mana ikaki te kaivihe te kwaririgi.”

³⁵Vunu i Jisas mo kwaha mana vao ramo hugu evina.

³⁶Vunu mo lavi na bereti kaibitu hi mana ikaki, mo lagwaki God huri, vunu mo volo utuutuhira mo bete lakwa na nona ngwalagelo, a nona ngwalagelo ramo bete lakwa na vao.

³⁷Aira vunu rau kani, rau kugwa. Vunu a nona ngwalagelo ramo vileki na bereti vano hi hinea a tangaloi ramo kani dore, ramo hokonira a kete kaibitu rau kukwere kehe nga.

³⁸A gwira na ngwera hinea ramo kanikani u tari vakaivati, vae rahe valuki na ravavine te mana sakwarigi.

³⁹Vunu i Jisas mo hora na vao tiua, mo galo tilo aga, mo vano vaki lo vanua Magadan.