Read West Ambae MATIU 16 Bible Online

MATIU 16 - West Ambae bible

MATIU 16

¹A Varisi* maira mana Satiusi* ramo vanamai vaki mai Jisas. Rau lengaia kwara rana tiusinae, ramo uhia huri na kaivosangi tina taetae kwara ne vosangi kwara i God aia maia.

²Vae i Jisas mo kwaha maira mo viti “Lolona a mataniaho mo soro, tulu mo viti kwara, ‘A taro ne karea huri u mera.’

³Sirovobongi bise tulu mo viti kwara, ‘Vae ne uha, huri a taetae u mera u dodoka.’ Tulu mo tagai na mahaleki, tulu viti lavia kwara a domianaki hoki na havakinau, vae tulu he kikilai na domiana na kaivosangi tea huri na taro aira vano hikani.

⁴I kamu a tangaloi hati, tulu tuku veveki rera vovohi God. Tulu nehe tagai na kaivosangi tea. A kaivosangi lo tangaloi* duruduruki i Sona, aia kehekeheki tulu ne tagaia.” Hikani mo tirakinira mo vano.

⁵Lolona a ngwalagelo ramo vano utu vaki tavalakwai tokatoka lakua tavaluki, rau domihagwe kwara a lologa bongi kwara rana lai te bereti*.

⁶I Jisas mo kwaha maira mo viti kwara, “!Tulu tagahuri ne karea! A is nona Varisi* maira, mana nona Satiusi* maira u hati.”

⁷Ramo maraka hika ramo toko vitiviti huri na leo hi siboga ramo viti kwara, “U viti na leo hi huri tahe lai te bereti.”

⁸I Jisas u kikilai kwara rau tuku viti aha vae mo uduhuri kinira mo viti “?Kworoho tulu mo vikwahaki kwara tulu he lai te bereti? !A nomiu hauhuriana u kelekele haburu!

⁹?Tulu he rongo kikilakinia te radu? ?A lolomiu bongi kina bereti kailima hinea nomo bete lakwa na tangaloi u tari vakailima mana kete kaivihe hinea tulu mo hokoni na bereti tilologa takuni tina kanikani?

¹⁰?A lolomiu bongi vake kina bereti kaibitu hinea nomo bete lakwa na tangaloi u tari vakaivati, mana kete kaivihe hinea tulu mo hokoni na bereti tilologa takuni tina kanikani?

¹¹?Kworohokinia hika tulu he va rongo kikilakinia te kwara nohe kwaha te maikamu huri na bereti? Tulu tagahurikamu ne karea tina is nona Varisi mana Satiusi maira.”

¹²Vunu a ngwalagelo ramo rongo kikilakinia kwara he viti te lakwara kwara rana tagahurira ne karea tina is hinea ramo toko tau lolo vulaoa, vae tina huhuiana nona Varisi mana Satiusi maira.

¹³Hikani i Jisas u vano vaki lo vanua garagarani mana gwatuivanua lakua Sisaria Vilivae. Takwahini mo uduhuri kina nona ngwalagelo mo viti kwara, “?A tangaloi rau vitiau, i nau a Natu* na Tangaloi, kwara i nau ihe?”

¹⁴Ramo daraki ramo viti “Tuaki rau viti kwara i nigo i Sione a tangaloi na bavtaes tangaloi. Tuaki rau viti kwara i nigo i Elaesa, vake tuaki rau viti kwara i nigo i Seremaea, diko a tangaloi* duruduruki te katukwale.”

¹⁵Vunu mo uduhuri kinira mo viti “?Vae i kamu tulu viti kwara i nau ihe?”

¹⁶I Saemon Pita mo daraki mo viti kwara, “I nigo i Vurae*, i Natu i God Tatoka.”

¹⁷Vunu i Jisas mo daraki mo viti kwara, “Saemon, natu i Sione, ne havutiko, huri hete tangaloi kwara u viti na kinau hi lakwako, vae i Tamagu lolo taetae u vosangia lakwako bakotoki.

¹⁸Vae hikani na viti lakwako, i nigo i Pita, i nigo a vatu. Vae hivoulu lo vatu hikani na tabe na nogu kwarelua* ne tu, vae a huirana na mateana nehe vai lai te kwara ne guia.

¹⁹Na beteki na ki lakwako, aira a ki na Vanua Karagwa hinea i God u hugwe koroa. A havakinau hinea kona kwaha suri hike lo varamana, i God lolo taetae ne kwaha suria vake. A havakinau hinea kona tiraki hike lo varamana, i God lolo taetae ne tirakinia vake.”

²⁰Vunu i Jisas mo suri na nona ngwalagelo kwara rana hatu viti lakwa na tangaloi kwara aia i Vurae.

²¹Mo tinakaki lo taro hi i Jisas mo viti matangwasaraki lakwa na nona ngwalagelo maira kwara, “Na vano vaki lo gwatuivanua lakua Serusalem, vae a ngwarasea* maira, a tangaloi* lingilingi lalakua mana tangaloi* kikikila na Uliuli* Kokona rana vaiau na rongo hati haburu. Rana kwohi mateiau, vunu lo rani kaitoluki i God ne rakatiau na ahi taliku.”

²²Vae i Pita mo lai gegeakinia mo suria mo viti kwara, “Hugwe*, i God ne tu koro na kinau hi. He taritarisa tea kwara a tangaloi rana vai kwehini lakwako.”

²³Vunu i Jisas mo halebohi mo kwaha lui Pita mo viti “!Setano*, ko vano tiau! I nigo hoki na vatu hinea u saro koro halagu kwara nana tatu na sovi luna, huri a domidomimu vano hi a domidomi nona tangaloi vohoki, hete domidomi noi God.”

²⁴Vunu i Jisas mo kwaha mana nona ngwalagelo maira mo viti kwara, “Diko te tangaloi u lengaia kwara ne huriau, ne tiraki na nona domidomi sibona, ne kwali na kaibetuna, ne huriau.

²⁵Diko te tangaloi ne uti na mamaurianana vae ne vai salakinia, vae ihe hinea ne tiraki na mamaurianana huriau neri hagwe na ahiana.

²⁶Diko te tangaloi u lai savi na vivilagoki na varamana doluaki vae diko a mamaurianana ne sala, vae nehe hagwe na kinau te vohoki. A kinau tikei kwara a tangaloi ne volitukuhi na mamaurianana kinia.

²⁷I nau, a Natu* na Tangaloi, u garagarani kwara na vanamai lo hahaviada noi Tamagu mana nogu kaihora maira tina taetae, vunu na malai savi na tangaloi ne taritarisa mana noga boloki.

²⁸Kareaki na viti lakwakamu, ratuaki rau tu hike maiau ranahe mate tea tarisaki hi rana tagaiau, i nau a Natu na Tangaloi, na vanamai, i nau a Hugwe Lakua.”