Read West Ambae MATIU 18 Bible Online

MATIU 18 - West Ambae bible

MATIU 18

¹Lo taro hini a ngwalagelo ramo vanamai vaki mai Jisas, ramo uduhuri kinia ramo viti “?Ihe tangaloi kwara u lakua karakara tiura hinea i God u hugwe korora?”

²I Jisas mo kware na natu kelekele mo taua mo tu lo livukaga,

³mo viti kwara, “Kareaki na viti lakwakamu, diko tulu nehe bohi tea kwara tulu ne mulemai hoki na sakwarigi, tulu nehe hugu lai te vohoki tavuti na kaba na Hugwe Lakua i God.

⁴A tangaloi hinea ne hivokinia hoki na natu kelekele hika aia u lakua karakara sileti na tangaloi ratuaki hinea i God u hugwe korora.

⁵Vake te tangaloi hinea ne lai tabetabeki na natu kelekele katukwale hokinia hikani lo hinagu, u lai tabetabekiau.”

⁶Vunu i Jisas mo viti “Diko te tangaloi katukwale ne sinasina na natu kelekele tiura hikani hinea rau hauhuri lugu ba, vaki lo hatiki, a tangaloi hi ne kwali na kakadiki u huira haburu. Vae diko te tangaloi ne likoti na vatu dongwolingwoli lakua lo kusuna, ne vohokinia tilolo tahi bua ne dono, hi u hati haburu. Vae a kakadiki hinea kwara vae ne kwalia lo taroki, ne huira haburu siletia hi.

⁷U hati haburu lakwa na tangaloi na varamana huri a kinau eia rau sina na tangaloi kwara rana sovi tilo hatiki. A sinasina vano hini vae rana vai rongohi na tangaloi kareaki, vae ne hati haburu lakwa na tangaloi hinea mo tinakakinira.

⁸“Vae diko a kabamu diko a garumu tavaluki u vaiko komo halebohi tilo hatiki, ko tai utuhia ko vohokinia letiu. U karea lakwako kwara kona hagwe na ahiana vaki tuai mana kabamu diko a garumu katukwale vohoki siletia hinea kwara kona kwiribibi savi na kabamu mana garumu vae rana vaiko kona vohokiana tilolo kabu hinea u kao, toko va kao vaki tuai.

⁹Vunu diko a matamu u vaiko komo halebohi tilo hatiki ko dangea ko vohokinia letiu. U karea lakwako kwara kona hagwe na ahiana vaki tuai mana matamu katukwale vohoki siletia kwara kona kwiribibi savi na matamu vae raru ne vaiko kona vohokiana tilolo kabu na kakadiki.”

¹⁰Vunu i Jisas mo viti vake kwara, “Tulu tagahuri ne karea tulu ne mai domi bulakiki na natu vano hi kwara te katukwale. Na viti lakwakamu, a noga kaihora lolo taetae, tigwaravu rau tu koro na nako i Tamagu lolo taetae.

¹¹I nau a Natu* na Tangaloi, nu vanamai kwara na vakahikinira hinea rau sala. [24]

¹²“?Tulu domi kworohokinia? ?Diko a tangaloi a bulana sivsivi vidolua vae katukwale tiura u sala, vae ne vai kworoho? Ne tirakinira hinea ngavu kaihikwa dongwaki kaihikwa lo ngwarasa na vuti rana kanikani, vae ne vano ne soro haroa hinea katukwale mo sala.

¹³Na viti lakwakamu, lolona mo hagwea, u rongo u havutia haburu kinia hi katukwale, siletira hi ngavu kaihikwa dongwaki kaihikwa hinea rahe sala tea.

¹⁴Lo halaki hokinia hini i Tamamiu lolo taetae he lengaia tea kwara te katukwale tina sakwarigi vano hi ne sala.”

¹⁵Vunu i Jisas mo viti “Diko i tuamu mo vaivai hati vovohiko ko vano vaki maia, vae lolona kuru mo hugu kahekamurua komo viti nona vakasileana lakwae hinea mo vai vovohiko. Vae diko mo rongohuriko kona kwarekinia kwara i tuamu taliku.

¹⁶Vae diko nehe rongohuriko tea, ko lai te tangaloi katukwale diko kairua vake rana huriko kwara rana hago maiko. Vae ne hokinia a Uliuli* Kokona mo viti kwara, ‘A hava leo te ko tau vovohi na tangaloi, vae a hagoleo kairua diko kaitolu rana vai na nomu leo vunuhia ne tu.’

¹⁷Vae diko he rongohurira tea, vunu ko viti na kinau savia lakwa na kwarelua*. Vae diko nehe rongohuri na kwarelua tea, ko vaia hokinia aia te tangaloi hinea he kikilai God tea, diko a tangaloi* na vilevile mane* a takis nona kavman.”

¹⁸Vunu i Jisas mo viti vake kwara, “Hikani na viti lakwakamu doluaki, a havakinau hinea tulu suri hike lo varamana i God lolo taetae ne suria vake. A havakinau hinea tulu tiraki hike lo varamana, i God lolo taetae ne tirakinia vake.

¹⁹“Na viti lakwakamu vake, diko kairua tikamu lo varamana raru ne masinge lo kinau tea raru mo tiutangaroa huri, i Tamagu lolo taetae ne vai kwehini lakwararua,

²⁰huri takwanahavaki kairua diko kaitolu rau vileki tabulutaki lo hinagu i nau maira.”

²¹Vunu i Pita mo vanamai vaki mai Jisas mo uduhuri kinia mo viti kwara, “Hugwe*. ?Diko i tuagu u tuku vaivai hati vovohiau tigwaravu vae na domidomi koro lakwae vakaivihe? ?Vakaibitu?”

²²I Jisas mo daraki mo viti “Hete vakaibitu, vae kona domidomi koro lakwae tigwaravu a gwereki tikei,

²³huri a bohiana na tangaloi hinea i God u hugwe koroa aia hokinia hika. A hugwe lakua katukwale u vai kwara ne taga ngwakutaki na buku na nona tangaloi boloki.

²⁴Vae mo tinakaki mo vai kwehini, ramo lavi na tangaloi katukwale vaki maia a bukuna a vatu u tari mulemule vakarusa.

²⁵A nona mane* he taritarisa tea kwara ne vai na bukuna, hikani a hugwe hi mo viti kwara ne hokakinia mai vavinehina, i raranatugaru, rana kwareki a tangaloi* boloki vuroki. Vake ne hokaki a nona vivilagoki vunuhia kwara ne vai na bukuna kinira.

²⁶A tangaloi boloki hi mo sovi hivo koro na nako na nona hugwe hi, mo seseaka luna mo viti kwara, ‘Hugwe, ko bete te taro lakweau nana vai savi na bukugu.’

²⁷A hugwe hi lolo domina u hakavia haburu vohoki, mo domidomi koroa mana bukuna, mo tirakinia mo vano.

²⁸“Vae a tangaloi hini mo ngwalua mo vano mo hagwe na buluina katukwale. A buluina hi a bukuna maia a vatu tari vakavidolua. Mo kwiribibia mo maraka mo kwisia, mo viti kwara, ‘Ko vai bukumu maiau.’

²⁹A buluina mo sovi hivo mo seseaka luna mo viti kwara, ‘Ko bete te taro lakweau nana vai na bukugu lakwako.’

³⁰Vae he rongohuria tea, mo lavia mo taua tilolo ingwa na gwarugwaru kwara ne hugu eia rovonaki ne vai na bukuna.

³¹Lolona a tangaloi boloki ratuaki ramo tagai na kinau hi mo vai, rau rongo hati haburu, ramo vano vaki mana noga hugwe, ramo viti savi na kinau lakwae.

³²Hikani a hugwe hi mo kware na tangaloi boloki vaki maia, mo kwaha luna mo viti ‘!I nigo a tangaloi boloki hati! I nau nu domidomi koro lakwako huri na bukumu savia huri i nigo ku seseaka kwara na domidomi koro lakwako.

³³I nigo kwara kona va hakavi buluimu, hokinia i nau nu hakaviko.’

³⁴A hugwe hi u lologute haburu mo tau na tangaloi boloki hi tilolo ingwa na gwarugwaru kwara rana vaia ne rongo hati rovonaki ne vai savi na bukuna.”

³⁵Vunu i Jisas mo gweregwerei na nona leo mo viti “Vae ne hokinia lakwakamu. Diko tulu he domidomi koro lakwai ratuamiu te tigwaravu vunuhia mana domimiu, vae i Tamagu lolo taetae nehe domidomi koro te lakwakamu hokinia vake.”