Read West Ambae MATIU 19 Bible Online

MATIU 19 - West Ambae bible

MATIU 19

¹I Jisas mo viti na kinau vano hikani mo rovo, vunu mo tiraki na vanua Galili*, mo vano taliku vaki lo vanua Sutia, tavaluki tina Kwai Sotan.

²A vao lakua ramo huria, mo vakahikinira takwahini.

³A Varisi* tuaki ramo vanamai vaki maia ramo vai kwara rana tiusinae kina leo uhiuhi, ramo viti “?A noda tangwata u tiraki kwara a ngwera ne talahi na nona lakiana huri na kinau te haro nga?”

⁴I Jisas mo daraki mo viti “?Tulu he valuki na Uliuli* Kokona te hikani? Aia u viti kwara lo tinatinakakiki i God mo kihi na tangaloi kairua, a ngwera mana vavine.

⁵Vae i God mo viti ‘Huri hini a ngwera ne tiraki i tamana mai retahina ne bulu mai vavinehina, i rarua raru ne kwareki tarabehi katukwale.’ ”

⁶Vunu i Jisas mo kwaha taliku mo viti “Hokinia hi raru nehe kwareki tea kairua, vae a tarabehi katukwale. A havakinau hi i God mo hariki tabulutaki, a tangaloi ne hatu talahi.”

⁷A Varisi ramo uduhuri kinia ramo viti “?Kworohokinia i Mosis mo tuliki na leoki mo viti kwara a ngwera ne bete a veva na talahi lakiana lakwai vavinehina ne horae letiu?”

⁸I Jisas mo daraki mo viti “I Mosis u tau na tulikileo kwara tulu ne talahi lakiana huri a gwatumiu rau madi haburu. Vae lo tinatinakakiki aia hete kwehini.

⁹Na viti lakwakamu, diko te ngwera ne tiraki i vavinehina vae i vavinehina he veveki rera te kinia, vunu a ngwera hi nete laki mana vavine dolua, aia u veveki rera ki vavinehina vohoki.”

¹⁰A nona ngwalagelo ramo kwaha maia ramo viti “Diko a hala na lakiana u madi hokinia, he karea tea kwara a tangaloi rana laki.”

¹¹I Jisas mo daraki mo viti “A huhuiana hika hete lakwa na tangaloi vunuhia, vae lakwa na tangaloi kehekeheki aira hinea i God u betea lakwara kwara rana kwiribibia.

¹²A tangaloi rahe laki lai tea huri na kinau a gwatuki u rusa. Tuaki rahe laki lai tea huri aira rau vora kwehini, tuaki huri a tangaloi rau vai banikinira kwara ranahe laki tea. Tuaki rahe laki tea huri kwara rana boloki noi God hinea a noga Hugwe Lakua. A tangaloi mo vai lai kwara ne lavi na huhuiana hika ne lavia.”

¹³Hikani a tangaloi tuaki rau lavi na sakwarigi vanamai vaki mai Jisas kwara ne tau kabana luga ne tiutangaroa, vae a nona ngwalagelo ramo tu korora.

¹⁴Vae i Jisas mo viti kwara, “Tulu tiraki na sakwarigi rana vanamai vaki maiau. Tulu hatu tu korora, huri a natu kwaririgi aira vake i God u kwarera kwara ne hugwe korora.”

¹⁵Mo tatagao luga vunu mo vano.

¹⁶Vakatukwale a tangaloi u vanamai vaki mai Jisas mo uduhuri kinia mo viti kwara, “?Tisa, a havakinau hinea u karea kwara na vai, vae na lavi na ahiana vaki tuai?”

¹⁷I Jisas mo daraki mo viti “?Kworohokinia komo uhiau huri na kinau hi u karea? Katukwale kehekeheki aia u karea. Diko ku lengaia kwara kona lavi na ahiana, ko kwiribibi na leo na Tangwata*.”

¹⁸Mo uduhuri mo viti kwara, “?A hava leo?” I Jisas mo daraki mo viti “Hatu ua mate tangaloi. Hatu vai doridori hati mana vavine. Hatu babalu. Hatu kurakura.

¹⁹Ko domi mavaki i tamamu mai retahimu. Ko lagwa mana tangaloi laliki, kona vai tabetabekinira hokinia komo vai tabetabekinigo sibomu.”

²⁰A ngwalagelo hi mo daraki mo viti kwara, “Nu rongohuri savi na leo na Tangwata vano hi ba. ?Na vai na havakinau vake?”

²¹I Jisas mo daraki mo viti “Diko ku lengaia kwara kona bakoto vohoki, ko vano ko hokaki savi na nomu vivilagoki, ko lavi na kaivoliki ko bete lakwa na tangaloi kakaravi, vunu lo taroki konari hagwe nomu vivilagoki karekarea rusa lolo taetae, vae ko vanamai ko huriau.”

²²Lolona a ngwalagelo mo rongo kwehini, mo lakao tiua u rongo hati, huri a nona vivilagoki u rusa lengalenga.

²³Vunu i Jisas mo kwaha mana nona ngwalagelo mo viti kwara, “Kareaki na viti lakwakamu, ne madi haburu lakwa na tangaloi hugwe kwara ne soro tilo Vanua Karagwa hinea i God u hugwe koroa.

²⁴Na viti na kinau vake lakwakamu. U madi haburu lakwa na boboroa lakua hi u kwareki a kamel kwara ne soro lalahi na mata na nitili. Vae u madi siletia lakwa na tangaloi hugwe kwara ne hivokinia ne hugu tavuti na Hugwe Lakua i God.”

²⁵Lolona a nona ngwalagelo ramo rongo na leo hi ramo idila haburu. Ramo uduhuri kinia ramo viti kwara, “?Vae ihe ne va ahi te hika?”

²⁶I Jisas mo tagataga hurira, mo viti kwara, “A kinau hi u madi mana tangaloi, vae i God u vai lai vataha na kinau.”

²⁷Vunu i Pita mo kwaha mo viti “?Kworohokinia maikami? Keu tiraki savi na kinau kemo huriko. ?Kena lavi na havakinau?”

²⁸I Jisas mo viti lakwara kwara, “Kareaki na viti lakwakamu, lo taro karagwa i nau a Natu* na Tangaloi na mulemai ki Hugwe Lakua, na hugu lo hagehagelegu hinea u hahaburuka. Lo taro hi i kamu hi hangavulu dongwana kairua hinea tulu mo huriau, i kamu vake tulu ne kwareki a hugwe lalakua, tulu ne hugu lo hagehagelemiu. Vae tulu ne hugwe koro na tangaloi lo gwatuidamu hangavulu dongwana kairua nona gwaloana noi Isrel*.

²⁹Vae aira vunu hinea rau tiraki na ingwaga, diko i ratuaga, diko i rahagwega, diko i tamaga, diko i retahiga, diko i raranatuga, diko a vanuaga huri aira a nogu tangaloi rana hagwe vidolua kehe tiluga vae ranari ahi vaki tuai.

³⁰Vae u rusa hika rau tomua vae rana takuni, rau takuni hika vae rana tomua.”