Read West Ambae MATIU 2 Bible Online

MATIU 2 - West Ambae bible

MATIU 2

¹I Jisas u vora lo gwatuivanua Betlehem lolo vanua Sutia lo taro hinea i Herot [3] aia a hugwe lakua. Mo vora vunu he tuai tea a tangaloi lolorani huri na vitu ramo vanamai tina vanua vakahao lo hala na mataniaho giri vaki lo gwatuivanua lakua Serusalem.

²Ramo uduhuri ramo viti kwara, “?A Hugwe Lakua nona gwaloana noi Isrel* hinea u vora karagwa aia ave? Keu tagai na nona vitu lo hala na mataniaho giri, vae kemo vanamai kwara kena sovi hivo vovohia kena kaluhakinia.”

³A hugwe lakua i Herot mo rongo kwehini a domina mo rongo hati, aira Serusalem vunuhira vake.

⁴Mo kware tabulutaki na tangaloi* lingilingi lalakua mana tangaloi* kikikila na Uliuli* Kokona doluaki, mo uhira kwara i Vurae* ne vora ave.

⁵Ramo viti lakwae kwara, “Lo gwatuivanua Betlehem lo vanua Sutia, huri a tangaloi* duruduruki u uli ba kwara,

⁶‘I kamu a ngwera Sutia lo gwatuivanua Betlehem, tulu nehe viti lai tea kwara, “A tomutomuai-tangaloi laliki Sutia aira a tangaloi lalakua, i kami hete tangaloi vitivitihuri,” huri a tomuai-tangaloi ne vanamai tikamu hinea ne tomuaki na bulagu tangaloi a gwaloana noi Isrel, ne tagahurira ne karea.’ ”

⁷Vunu i Herot mo kware tavuniki na tangaloi lolorani huri na vitu vano hi, mo uhi raravekinira kwara rana viti bakotoki na taro na vitu hi kwara u ngwalua kihokua.

⁸Vunu mo horara vaki Betlehem, mo kwaha maira mo viti kwara, “Tulu vano, tulu soro haro tabetabeki na natu hi, tulu mo hagwea, tulu mo hora leo lakweau, vae i nau vake na vano na sovi hivo vovohia na kaluhakinia.”

⁹Ramo rongo na leo nona hugwe lakua hi, ramo vano. Ramo lakao, ramo tagai na vitu hi mo kwaka taliku, hinea ramo tagaia tomua lo taro hinea mo ngwalua tomua halaradu lo hala na mataniaho giri. Lolona ramo tagai na vitu hi taliku, u havutira vae u havutira vohoki. A vitu hi mo tomuakinira vaki lo tanotano hinea a natu mo ngwalulu eia. Vae mo tu butu mo kwaka bakotoki hivoulu lo ingwa katukwale.

¹¹Ramo soro tilolo ingwa hi, ramo tagai na natu hi mai retahina i Meri. Ramo sovi hivo vovohia ramo kaluhakinia. Vunu ramo kakwo noga tanotano na vivilagoki, ramo bete noga hokohoko lakwae, a kol, a kinau* boniboni hinea rau kwarekinia a vraginsen*, mana vurae rau kwarekinia a mir* hinea a maneki u madi haburu.

¹²Hikani i God mo kwahabibira lolo boborea kwara rana hatu mule taliku vaki mai Herot. Vae ramo mule lo hala dolua vaki tataga.

¹³Ramo mule tiua, vunu a kaihora nona Hugwe tina taetae mo maravuti ki Sosev lolo boborea, mo kwaha maia mo viti kwara, “Ko maraka, ko lavi na natu hi mai retahina, ko kwalao mairarua vaki Isiv. Tulu hugu takwahini rovonaki nari viti tulu mo mulemai, huri i Herot* vae ne soro haro na natu hi kwara ne kwohi mateia.”

¹⁴Vunu i Sosev mo maraka mo lavi na natu hi mai retahina lolo bongi hi, ramo kwalao vaki Isiv.

¹⁵Ramo hugu takwahini rovonaki i Herot mo mate. A kinau hika u mule luna lo leoki hinea a tangaloi* duruduruki mo viti vae u kworo, hinea a Hugwe i God mo viti “Nu kwareluahi Natugu tina vanua Isiv.”

¹⁶Lolona i Herot* mo kikilai kwara a tangaloi lolorani huri na vitu vano hi rau sinae, mo lologute haburu. Mo hora kwara rana kwohi matematei na sakwarigi ngwera Betlehem, maira hinea garagarani takwahini, a hukaoga kairua maira hi evina tina hukao kairua. I Herot mo huri na taro hi a taro na vitu mo ngwalua, hinea mo uhi tabetabeki na tangaloi lolorani vano hini huria.

¹⁷A leo hi a tangaloi* duruduruki i Seremaea mo vitia u kworo kwara,

¹⁸“A tangaloi rau rongo na hahakaviana lakua mo roro lo vanua Rama. I Resel u tangi huri i raranatuna. He lengaia tea kwara a tangaloi rana amohi na domina, huri i raranatuna rau mate vunu.”

¹⁹I Herot* mo mate, vunu a kaihora nona Hugwe tina taetae mo maravuti ki Sosev lo vanua Isiv lolo boborea,

²⁰mo viti “Maraka, ko lavi na natu hi mai retahina tulu mule vaki lo vanua Isrel*, huri aira hinea rau vai kwara rana kwohi matei na natu hi vae rau mate ba.”

²¹Hikani i Sosev mo maraka mo lavi na natu kelekele hi mai retahina, ramo mule taliku vaki lo vanua Isrel.

²²Vae lolona mo rongo kwara i Akeleas u kwani i tamana i Herot mo hugwe koro na vanua Sutia, i Sosev mo mataku kwara ne hugu takwa-hi. Hikani i God mo kwahabibia lo boborea, vunu i Sosev mo vano vaki lo vanua Galili*,

²³mo vai tokakivanua lo gwatuivanua Nasaret. Mo vai luna vae a leoki hi a tangaloi* duruduruki ramo vitia u kworo, hi mo viti kwara, “Ne kwareki a ngwera Nasaret.”