Read West Ambae MATIU 20 Bible Online

MATIU 20 - West Ambae bible

MATIU 20

¹Vunu i Jisas mo viti kwara, “A bohiana noi God lakwa na tangaloi hinea u hugwe korora aia hoki na hugwe na talu na karo hinea ramo toko kihikihi waen lo kwaiga. A hugwe hi mo vano sirovobongi bise vaki na sara kwara ne soro te tangaloi rana boloki lolo nona talu hi.

²Ramo kwahakwaha tabulutaki mo masinge kwara ne volira hoki na kaivoli tigwaravu, a vatu tari lo rani, vunu mo horara ramo boloki lolo talu.

³Mo vano taliku vaki na sara lo mataniaho galo mo tagai na tangaloi tuaki rau tu takwahini rahe vai te kinau.

⁴Hokinia mo kwaha maira mo viti kwara, ‘I kamu vake tulu va boloki lolo nogu talu vae na volikamu ne bakoto.’ Ramo maraka, ramo vano.

⁵Hikani mo vano lo mataniaho aulu, vunu lo mataniaho dori lakua mo vai hokinia nga.

⁶Lo mataniaho evina mo vano vaki lo sara mo tagai na tangaloi tuaki dolua rau tu takwahini radu. Mo uduhuri kinira mo viti kwara, ‘?Kworohokinia tulu mo mahuki na rani dolua haro vuroki hikeni, tulu he vai na kinau tea?’

⁷Ramo daraki ramo viti kwara, ‘Huri a tangaloi he kwarekami te kwara kena boloki nona.’ Mo kwaha maira mo viti kwara, ‘Karea, i kamu vake tulu va boloki lolo nogu talu.’

⁸“Lolona mo toko raviravi, a tangaloi na talu hi mo viti lakwa na nona tangaloi tagahuri boloki kwara, ‘Ko kware na tangaloi boloki vanamai ko bete kaivoliga. Ko tinakaki luga hinea nomo kwarera rovonaki, komo gweregwereki luga hinea nomo kwarera tomua.’

⁹A tangaloi hinea rau tinakaki noga boloki lo mataniaho evina rau lai kaivoliga a vatu tari vatahakinira.

¹⁰Hikani a tangaloi hinea rau boloki tomua ramo vanamai kwara ne volira, rau domi kwara rana lai te vakevake, vae aira vake rau lai a kaivoliga a vatu tari kehe nga vatavatahakinira.

¹¹Ramo lai noga mane* ramo maraka ramo kwaha ruturutuki na hugwe hi.

¹²Vunu ramo kwaha maia rau viti kwara, ‘A tangaloi aira vano hikani ku kwarera vaki takuni rau boloki a taro gwanugwanu vohoki, vae i kami kemo boloki a rani dolua, u ahoikami, vunu ku volira u taritarisa hokinia komo volikami.’

¹³A hugwe na talu hi mo daraki lakwae katukwale tiura mo viti ‘Tua, ko rongo. Nahe balu te tiuko. Ku masinge kwara kona boloki a rani katukwale huri na vatu tari.

¹⁴Karea, ko lai kaivolimu ko mule vaki tatamu. Nu lengaia kwara na bete lakwa na tangaloi hika nu kwarea ki rovonaki hokinia hini nomo bete lakwako.

¹⁵I nau nu bakoto kwara na vai hokinia nu lengaia kina nogu mane. ?I nau nomo vai tabetabeki na tangaloi vano hi, vae kworohokinia mo kadiko huri?’ ”

¹⁶Vunu i Jisas mo gweregwerei na nona leo mo viti kwara, “Lo hala hokinia hi aira hinea rau takuni vae rana tomua, vunu aira hinea rau tomua vae rana takuni.”

¹⁷Lolona i Jisas mo galo hake vaki Serusalem, mo lai gegeaki na nona ngwalagelo hangavulu dongwana kairua. Ramo lakao mo kwaha maira raraveki

¹⁸mo viti kwara, “!Tulu rongo! Hika tau tuku vano tagaulu vaki Serusalem. Vae i nau a Natu* na Tangaloi vae rana tirakiau tilo kaba na tangaloi* lingilingi lalakua mana tangaloi* kikikila na Uliuli* Kokona, rana arekiau rana viti kwara vae nana mate.

¹⁹Rana tauau tilo kaba na tangaloi tavalavarea tina gwaloana noi Isrel* kwara rana vaivai tagaiau, rana takwiliau, rana duruau tilo kaibetu, vae lo rani kaitoluki i God ne rakatiau na ahi taliku.”

²⁰Vunu i retahi i raranatu i Seveti mo vanamai vaki mai Jisas, aira mai raranatuna kairua, mo sovi hivo koro na nakona, mo kwaha maia mo viti “Nu lengaia kwara kona vai te kinau lakweau.”

²¹I Jisas mo uduhuri kinia mo viti kwara, “?Ku lengai na havakinau?” Mo daraki mo viti “Ko tau na leo tea lakweau, hokinia kona mulemai ki Hugwe Lakua, i raranatugu kairua hikani, kairuaki ne hugu lo matuamu, kairuaki lo ngwairimu.”

²²Vunu i Jisas mo daraki lakwara mo viti “Tulu he kikilai tea a havakinau tulu mo uduhuri. ?Kuru ne vai lai kwara kuru ne rongo hati lo tarabehimiru hokinia hinea i nau nana rongo hati?” Raru mo daraki raru mo viti kwara, “Keru ne vai lai.”

²³I Jisas mo viti lakwararua kwara, “Io kareaki, vae kuru ne rongo hati hokinia hinea i nau nana rongo hati, vae kwara kuru ne hugu kairuaki lo matuagu kairuaki lo ngwairigu, hete nogu kwara na bete, huri i Tamagu u matai terekaki na tangaloi kairua ba, vae ne bete lakwararua.”

²⁴Lolona aira hi hangavulu ramo rongo, ramo lologute kina ratua kairua hi.

²⁵Hikani i Jisas mo kwarera vanamai vaki maia, mo kwaha maira mo viti “Tulu kikilai kwara a tangaloi lalakua nona tangaloi hinea rahe kikilai i God tea rau hugwe koro na noga tangaloi, vae a noga tomuai-tangaloi rau hugwe koro na noga tangaloi, vae a noga tomuai-tangaloi rau hago huirana korora.

²⁶Vae i kamu tulu hatu vai hokinia. Diko te katukwale tikamu u lengaia kwara ne lakua, aia ne kwareki nomiu tangaloi boloki.

²⁷Diko te katukwale tikamu u lengaia kwara ne tomua, vae aia ne kwareki a nomiu tangaloi* boloki vuroki.

²⁸Vae ne hokinia hi i nau nomo vai. I nau, a Natu* na Tangaloi, vae nu vanamai hete kwara a tangaloi rana boloki maiau, vae i nau kwara na boloki maira, na tirakiau sibogu na mate kwara na volitukuhi na tangaloi rusa tina noga hatiana.”

²⁹Lolona i Jisas mana nona ngwalagelo ramo ngwalua tina gwatuivanua Seriko, a vao u lakua ramo hurira.

³⁰A matadodo kairua raru hugu behi na hala, raru mo rongo kwara i Jisas u lakao utu, vae raru mo kwarekware raru mo viti “!Hugwe*! !Gwaloana noi Devit! !Ko hakavikamirua!”

³¹A vao ramo kwaha lugaru, ramo viti lakwararua kwara raru ne hugu butu. Vae raru mo kware karakara siletia tomua raru mo viti kwara, “!Hugwe! !Gwaloana noi Devit! !Ko hakavikamirua!”

³²I Jisas mo tu butu, mo kwarerarua. Mo uduhuri kirarua mo viti kwara, “?Kuru lengaia kwara na vai aha maikamurua?”

³³Raru mo daraki raru mo viti kwara, “Hugwe, keru lengaia kwara kona vai na matamaru rana karea.”

³⁴I Jisas lolo domina mo hakavirarua haburu mo kihi na matagaru, vae vakatukwale vohoki raru mo tagataga lai, raru mo huria.