Read West Ambae MATIU 21 Bible Online

MATIU 21 - West Ambae bible

MATIU 21

¹Ramo garagarani mana gwatuivanua lakua Serusalem, vae rau maravuti ba lo gwatuivanua Betvas lo Vuti na Vikai* a Violev. Lo taro hi i Jisas mo hora na nona ngwalagelo kairua,

²mo viti lakwararua kwara, “Kuru vano vaki lo gwatuivanua kelekele hinea mo tu koro na nakomiru. Kuru ne hodilai na dogi, a natuki aia maia, rau saniki-bibirarua. Kuru mo teri na karo tirarua, kuru mo lavirarua vanamai vaki maiau.

³Diko te tangaloi mo viti na kinau tea, kuru mo viti lakwae kwara, ‘A Hugwe* u lengairarua,’ vae ne tirakirarua vakatukwale raru ne vanamai.”

⁴A kinau hi u mule luna hoki na leo hinea a tangaloi* duruduruki mo vitia tuai kwara,

⁵“Tulu viti lakwa na tangaloi na gwatuivanua lakua Saeon* kwara, ‘Hikani a nomiu Hugwe Lakua u vanamai vaki maikamu. Aia a tangaloi domi magemu u kwalao lo dogi, u kwalao lo dogi kelekele, a natuki.’ ”

⁶Hikani a ngwalagelo raru mo vano raru vai a havakinau hi i Jisas mo viti lakwararua kwara raru ne vai.

⁷Raru mo lavi na dogi mana natuki, raru mo teri na kakavugaru raru mo verakira hivoulu lo dogi kairua hi, vunu i Jisas mo hugu luna kairuaki.

⁸A vao u lakua haburu ramo vola kakavuga lo hala, tuaki rau tai a rangai-vikai ramo taura lo hala.

⁹A vao hinea ramo lakao tomuaki i Jisas mana vao hinea ramo hurihuri takuni ramo maraka ramo vingaraki ramo viti “!Keu kaluhakinigo a Gwaloana noi Devit! Hugwe i God. Ko vai tabetabeki na tangaloi hinea u vanamai lo hinamu. Aira vunu hinea lolo taetae rau kaluhakinigo.”

¹⁰Lolona i Jisas mo soro vaki Serusalem, a tangaloi doluaki na vanua hi ramo vikwahaki haburu. Ramo uduhuri ramo viti kwara, “?Ihe hi?”

¹¹A vao ramo daraki ramo viti kwara, “I Jisas, aia a tangaloi duruduruki tina gwatuivanua Nasaret lo vanua Galili*.”

¹²I Jisas mo soro tilolo Vanua* Kokona noi God, mo livu letiuki savira hinea rau hokahokaki kinau rau volivoli lolona, mo hale bohiki na tevo na riririri mane* mana hagehagele na tangaloi na hokahokaki kwiba.

¹³Mo viti lakwara kwara, “U uliana lo Uliuli* Kokona kwara i God u viti ‘A Ingwagu ne kwareki a ingwa na tiutangaroa.’ Vae i kamu tulu mo bohikinia mo mulemai ki hilihili na tangaloi babalua.”

¹⁴A tangaloi a mataga rau dodo mana tangaloi rau lukuluku ramo vanamai vaki mai Jisas lolo loloiara* na Vanua* Kokona noi God mo vakahikinira.

¹⁵A tangaloi* lingilingi lalakua mana tangaloi* kikikila na Uliuli Kokona ramo tagai na kinau karekarea hinea i Jisas mo vai. Vake ramo rongo na sakwarigi ramo kwaha karakara lolo Vanua Kokona noi God ramo viti kwara, “!Kaluhaki na Gwaloana noi Devit!” Vae a tangaloi aira vano hi ramo lologute.

¹⁶Hikani ramo kwaha lui Jisas ramo viti kwara, “?Ku rongo na havakinau hi ramo viti?” I Jisas mo daraki mo viti kwara, “Io kareaki, nu rongo. ?Tulu he valu tea lo Uliuli Kokona hini mo viti kwara, ‘A sakwarigi maira hinea rau kanikani ti retahiga radu, ku vaira ramo kaluhakinigo lo hala bakoto’?”

¹⁷Vunu i Jisas mo tirakinira, mo ngwalua tina gwatuivanua lakua hi mo vano vaki lo gwatuivanua Betani mo hugu takwa-hi bongi.

¹⁸Mavukona sirovobongi i Jisas mo mule taliku vaki lo gwatuivanua lakua, mo marakatia.

¹⁹Mo tagai na vikai* a hinaki a vivik u tu behi na hala, mo vano vaki garagarani vae he hagwe na kwaiki te luna, aia a rauki kehekeheki. Vae mo kwaha mana vikai hi mo viti kwara, “Konahe kwai te taliku vohoki.” Heheriki a vikai hi mo goru.

²⁰A nona ngwalagelo ramo tagai na kinau hi ramo idila. Ramo uduhuri ramo viti “?A vikai hi u goru heheri kworohokinia?”

²¹I Jisas mo daraki mo viti kwara, “Kareaki na viti lakwakamu, diko tulu hauhuri, tulu he domi te kairua, vae tulu ne vai lai hokinia nomo vai lakwa na vikai hika. Hetea aia hika kehekeheki, vae tulu ne vai lai kwara tulu ne viti lakwa na vuti hika kwara, ‘Ko maraka ko rovo tilolo tahi sibomu,’ vae ne mule luna kwehini.

²²Diko tulu hauhuri, tulu ne lai a havakinau hi tulu mo uduhuri lo tiutangaroa.”

²³I Jisas mo mulemai taliku vaki lolo Vanua* Kokona noi God, mo huhui. Vae lolona hi a tangaloi* lingilingi lalakua mana ngwarasea* nona gwaloana noi Isrel* ramo vanamai vaki maia ramo uduhuri kinia ramo viti kwara, “?Ku hagwe na nomu bakotoana ave komo toko vai na kinau vano hi? ?Ihe u rivukiko kinia?”

²⁴I Jisas mo daraki lakwara mo viti kwara, “I nau vake na uduhuri na leo katukwale kikamu. Diko tulu ne daraki lakweau vae i nau nari viti lakwakamu kwara nu hagwe na nogu bakotoana ave nomo toko vai na kinau vano hi.

²⁵?Ihe u rivuki i Sione kwara ne bavtaes na tangaloi? ?I God diko a tangaloi?” Hika ramo toko vikwahaki luna aira muleki ramo viti kwara, “?Tana viti kworoho? Diko tana daraki kwara, ‘I God u rivukia,’ ne viti lakwakita kwara, ‘?Kworohokinia tulu he va hauhuri te lui Sione?’

²⁶Vae diko tana viti kwara, ‘A tangaloi rau rivukia,’ vae tau mataku kina tangaloi, huri aira vunu rau hago lo leoki kwara i Sione aia a tangaloi* duruduruki kareaki.”

²⁷Hikani ramo daraki lakwai Jisas ramo viti kwara, “Kehe kikilai tea.” Vunu i Jisas mo kwaha maira mo viti kwara, “I nau vake nahe viti te lakwakamu kwara nu hagwe na nogu bakotoana ave nomo vai na kinau vano hi.”

²⁸Vunu i Jisas mo kwaha maira taliku mo viti kwara, “Tulu domidomi lo kinau hika. A tangaloi katukwale i natuna kairua. Mo vano vaki mana natu tomua mo kwaha maia mo viti kwara, ‘Mama, hika karagwa ko vano ko va boloki lolo bulada agoago*.’

²⁹A natu hi mo daraki mo viti ‘Nohe lengaia tea,’ vae vaki takuni mo bohi na domina mo vano vaki lolo agoago.

³⁰Vunu i tamagaru mo vano vaki mana natu kairuaki mo kwaha maia mo viti hokinia mo viti lakwa na natu tomua. A natu hi mo daraki mo viti ‘Karea, Mama, na vano,’ vae he vano tea.

³¹?Vae makive tirarua u tabe na leo i tamagaru?” Ramo daraki ramo viti “A natu tomua.” Vunu i Jisas mo kwaha maira mo viti “Kareaki na viti lakwakamu, a tangaloi* na vilevile mane* a takis nona kavman mana ravavine tu huri hala rau vanamai vaki mai God u heheri siletikamu kwara aia ne hugwe korora.

³²Nu viti kwehini, huri i Sione a tangaloi na bavtaes tangaloi u vanamai vaki maikamu u vosangikamu kina hala bakoto kwara tulu ne huria, vae tulu he hauhuri te luna. Vae a tangaloi na vilevile mane a takis nona kavman mana ravavine tu huri hala ramo hauhuri luna. Tulu mo tagai na kinau vano hi vae vaki takuni tulu he bohi na domimiu tea kwara tulu ne hauhuri luna.”

³³Vunu i Jisas mo kwaha maira taliku mo viti “Tulu rongo na tavaluileo hika vake. A hugwe katukwale u rivuki na karo aira hi ramo toko vaivai waen lo kwaiga, a talu katukwale. Mo hau na ara dalia, mo keli na kwalu huri na kaigwole na waen, mo tabe na ingwa na kaitagahuri u tu aulu kwara ne tagataga mana talu hi. Vunu mo tirakinia lakwa na tangaloi kwara rana boloki luna rana tava lakwae, mo tiraki na tatana mo vano mo lagalaga lo vanua dolua vakahao.

³⁴Lo taro na makuriana mo hora na nona tangaloi boloki vaki mana tangaloi tava tano vano hi kwara rana lai te kaitava tiura.

³⁵A tangaloi na tava tano vano hi ramo hagobibi na nona tangaloi boloki maira. Katukwale rau takwilia, katukwale rau kwohi mateia, katukwale rau vohoia ki vatu.

³⁶A hugwe hini mo hora na tangaloi boloki vake u rusa siletira hi tomua, vae a tangaloi na tava tano vano hi ramo vaira hokinira tomua.

³⁷Vunu rovonaki mo hora i natuna vaki maira. Mo viti kwara, ‘Rana domi mavaki i natugu.’

³⁸Vae lolona a tangaloi na tava tano vano hi ramo tagai na natu hini, ramo kwahakwaha kinira siboga ramo viti kwara, ‘!Tagaia! !A natu na hugwe hi aia hi! Vae te taroki a vanua noi tamana ne kwareki a nona. !De! !Ta kwohi mateia! Vae i kita tana lavi na nona vanua.’

³⁹Hikani ramo kwalibibia ramo vohokinia tivarea tina talu hi ramo kwohi mateia.”

⁴⁰I Jisas mo uduhuri kinira mo viti kwara, “?Vae lolona a hugwe na talu hi ne vanamai ne vai kworoho lakwa na tangaloi tava tano vano hini?”

⁴¹Ramo daraki ramo viti kwara, “Kareaki ne kwohi matei na tangaloi hati vano hini, ne tau na talu hi tilo kaba na tangaloi tava tano dolua, vae rana tava lakwae lo taro na makuriana bakotoki.”

⁴²I Jisas mo kwaha maira mo viti “A leo eia lo Uliuli* Kokona hinea mo viti kwara, ‘A beru hinea a kaitabe na ingwa ramo bega kinia rau domi kwara u hati, vae mo mulemai mo kwareki a beruberu aulu. Hika a Hugwe i God aia u vaia, keu tagaia u karea haburu.’ ?Tulu he valuki na leo te hi radu?”

⁴³“Vae huri hi, a nomiu Hugwe Lakua i God ne taukamu letiu vae nehe kwareki te nomiu Hugwe Lakua. Vunu ne takahi na hala lakwa na tangaloi dolua kwara rana mulemai ki bulana tangaloi hinea ne hugwe korora. Aira rana bohibohi ne taritarisa lo nakona.

⁴⁴Vae ihe hinea ne sovi tilo beru hikani, a tarabehina ne mavurivuri. Vake, diko a beru hi ne sovi tilo tangaloi te katukwale, ne biha vurivuria ne mule ki gwia.” [25]

⁴⁵A tangaloi* lingilingi lalakua mana Varisi* maira ramo rongo na tavaluileo hinea i Jisas mo vitira, vae rau kikilai kwara i Jisas u tuku viti hurira.

⁴⁶Hokinia ramo vai kwara rana kwiribibia, vae rau mataku kina vao, huri a vao rau hago lo leoki kwara i Jisas aia a tangaloi* duruduruki.