Read West Ambae MATIU 22 Bible Online

MATIU 22 - West Ambae bible

MATIU 22

¹I Jisas mo kwahakwaha mana tangaloi mo viti na tavaluileo taliku,

²mo viti kwara, “A hala hinea i God u kware na tangaloi kwara rana mulemai kina tangaloi hinea u hugwe korora, aia hoki na hugwe lakua hinea u vai rarai na kanikani huri na lakiana noi natuna.

³Mo hora na nona tangaloi boloki kwara rana viti lakwa na tangaloi hinea u kwarera ba, kwara rana vanamai huri na kanikani, vae rahe lengaia tea kwara rana vanamai.

⁴Hikani mote hora na nona tangaloi boloki dolua vake mana leo hika. Mo viti kwara, ‘Tulu viti lakwara hinea nu kwarera ba kwara, “A nogu kanikani u raraiana ba hika. A buluki mana natu na buluki rau damoi rau uaana ba. Vataha na kinau u raraiana ba. Tulu vanamai huri na kanikani na lakiana.” ’

⁵Vae a tangaloi vano hi rahe domi huri na leo te hi, ra va vano laliki vaki lo noga boloki. Katukwale u vano vaki lo bulana agoago*, kairuaki u vano vaki lolo ingwa na nona hokahokaki.

⁶Vunu ratuaki ramo kwiribibi na tangaloi boloki vano hini, ramo kwohira ramo kwohi matemateira.

⁷A hugwe lakua hi u lologute haburu, mo hora na nona tangaloi na vuro, ramo vano ramo kwohi matematei na tangaloi na ua tangaloi vano hini, ramo hura letiuki na gwatui-vanuaga.

⁸Vunu mote kware na nona tangaloi boloki maira mo viti ‘A nogu hinaka na lakiana u raraiana ba, vae a tangaloi nu kwarera rahe taritarisa tea.

⁹Hika tulu vano vaki lo hala lalakua, vae te hava tangaloi te tulu mo hagwea, tulu mo kwarea vanamai vaki lolo nogu kanikani.’

¹⁰Hikani a tangaloi boloki ramo ngwalua vaki lo hala lalakua ramo vileki tabulutaki savi na tangaloi hinea ramo hagwera, aira hinea rau karea maira hinea rau hati vake. Vae a ingwa na kanikani na lakiana mo kukwere kina tangaloi.

¹¹“Hikani a hugwe lakua mo soro tilolo ingwa kwara ne tagai na tangaloi hinea rau vanamai huri na kanikani, mo tagahagwe na tangaloi katukwale he lugwaki na lugwa na lakiana tea.

¹²A hugwe lakua mo uduhuri kinia mo viti kwara, ‘?Tua, ku soro kworohokinia vaki hike kohe lugwaki na lugwa na lakiana tea?’ Vae a tangaloi hi he viti na kinau te vohoki.

¹³Vunu a hugwe lakua hi mo kwaha mana tangaloi boloki vano hini mo viti kwara, ‘Tulu gwaru na kabana mana garuna, tulu vohokinia tivarea vaki lo dodoki. Ne va toko ngara takwahini ne toko va kati raharahaki na livona.’ ”

¹⁴Vunu i Jisas mo viti “I God u kware na tangaloi u rusa, vae aia u matai kwahekinira te kairua vohoki.”

¹⁵A Varisi* maira ramo vano, ramo tovotovo kwara rana tiusina i Jisas kina leo uhiuhi maira.

¹⁶Vunu ramo hora na noga ngwalagelo tuaki mana tangaloi noi Herot [26] ramo vano vaki mai Jisas, ramo viti kwara, “Tisa, keu kikilai kwara i nigo a tangaloi bakoto, ku tuku huhui na tangaloi savia kina hala noi God lo hala bakoto. Kohe mataku te kina tangaloi, huri kohe domi huri tea kwara a tangaloi u lakua diko he lakua tea.

¹⁷Ko viti lakwakami. ?Ko domi kworohokinia? ?Diko tana voli a takis lakwai Sisa*, a hugwe lakua Rom, tana galo lo noda Tangwata* diko hetea?”

¹⁸Vae i Jisas u kikilai na noga tovotovo hati, mo viti kwara, “I kamu a tangaloi kurakura, tulu viti kinau kina ringomiu vohoki. ?Kworoho tulu mo vai kwara tulu ne tiusineau?

¹⁹Tulu vosangiau kina mane* na voli takis.” Ramo lavi na mane lakwae.

²⁰Vunu mo uduhuri kinira mo viti “?A nakohe mana hinahe hika luna?”

²¹Ramo daraki ramo viti “A nako i Sisa mana hinana.” Hikani i Jisas mo daraki mo viti kwara, “U karea, a kinau hinea a noi Sisa tulu bete lakwai Sisa. A kinau hinea a noi God, tulu bete lakwai God.”

²²Lolona ramo rongo na leo hi rau idila haburu, ramo tirakinia ramo vano tiua.

²³Lo raniki aia hini a Satiusi* ratuaki ramo vanamai vaki mai Jisas. Aira hini rau tuku viti kwara a tangaloi rau mate vae ranahe maraka te taliku tina mateana.

²⁴Ramo uduhuri kinia ramo viti “Tisa, i Mosis u viti kwara, ‘Diko a tangaloi he bava te natu mo mate, i tuana ne laki mana gwatina raru ne bava natu ne lai tanotano i tamana hi mo mate.’

²⁵A tangaloi rau vituatua aira kaibitu rau hugu hikeni. A natu tomua mo laki mo mate he bava te natu, hikani i tuana mo lavi na gwatina.

²⁶Vae mo mate hoki i tuana, vunu kaitoluki, vae aira kaibitu hi aira vunu rau hokinia.

²⁷Ki rovonaki a vavine hi mo mate.

²⁸?Vae lo rani kwahaia hi a mateana rana ahi taliku lo Rani na Marakaana vae ne kwareki i vavinehihe? Aira vunu rau laki maia.”

²⁹I Jisas mo daraki lakwara mo viti kwara, “Tulu vakasile vohoki, huri i kamu tulu he kikilai na Uliuli* Kokona tea mana huirana noi God vake.

³⁰Lolona a mateana rana maraka taliku vaki lo ahiana, rana hoki na kaihora maira lolo taetae, a ravavine mana ngwera ranahe laki tea.

³¹Vae huri na mateana kwara rana maraka taliku, nu domi kwara i kamu tulu he valu tea a havakinau hinea i God mo viti lakwakamu lo Baevolu kwara,

³²‘I nau a God noi Evraham, a God noi Aesik, vake a God noi Sekov.’ Aia a God na tangaloi rau ahi, hete God na tangaloi rau mate.”

³³Lolona a vao ramo rongo na leo hika rau idila haburu kina nona huhuiana.

³⁴Lolona a Varisi* ramo rongo kwara i Jisas u voho koro na leo nona Satiusi* ramo hugu butu, a Varisi ramo vanamai tabulutaki.

³⁵Katukwale tiura, aia a tangaloi kikikila na Tangwata* mo vai kwara ne tiusina i Jisas kina leo uhiuhi.

³⁶Mo uduhuri mo viti “?Tisa, a tulikileo makive u lakua karakara tina tulikileo ratuaki lo Tangwata?”

³⁷I Jisas mo daraki lakwae mo viti “ ‘Ko lagwa mana nomu Hugwe i God kina domimu vunuhia, mana mamaurianamu vunuhia, mana domidomimu vunuhia.’

³⁸A tulikileo hi u lakua karakara u mava haburu.

³⁹Kairuaki u mava haburu hokinia nga. Aia u viti ‘Ko lagwa mana tangaloi laliki maiko, komo vai tabetabekinira hokinia komo vai tabetabekinigo sibomu.’

⁴⁰A Tangwata doluaki noi Mosis mana huhuiana nona tangaloi* duruduruki, rau tu lo tulikileo hi kairua.”

⁴¹Lolona a Varisi* ramo vileki tabulutaki, i Jisas mo uduhuri kinira

⁴²mo viti kwara, “?Tulu domi kworohokinia huri i Vurae*? ?U gwalo vanamai luihe?” Ramo daraki ramo viti kwara, “Aia u gwalo vanamai lui Devit.”

⁴³I Jisas mo uduhuri kinira mo viti kwara, “?Vae kworohokinia a Tanungwe Kokona mo lalahi i Devit kwara ne kwarekinia kwara ‘a nogu Hugwe*’? I Devit u viti kwara,

⁴⁴‘A Hugwe i God u viti lakwa na nogu Hugwe kwara, “Ko hugu hikeni lo matuagu, ko mabu, tarisaki hi na vai na nomu tavaluivuro rana hugu tavutimu, rana kwareki a nomu tangaloi* boloki vuroki.” ’

⁴⁵?Vae diko i Devit u kwarekinia kwara, ‘a nogu Hugwe’ ne viti kworohokinia kwara i Vurae aia a nona gwaloana?”

⁴⁶Hete kwara te katukwale u vai lai kwara ne daraki na leo i Jisas. Vae tina rani hini rau mataku kwara rana uduhuri te leo uhiuhi ki Jisas taliku.