Read West Ambae MATIU 23 Bible Online

MATIU 23 - West Ambae bible

MATIU 23

¹Vunu i Jisas mo kwaha mana vao mana nona ngwalagelo mo viti kwara,

²“A tangaloi* kikikila na Uliuli* Kokona mana Varisi* rau bakoto kwara rana matangwasaraki na Tangwata* noi Mosis.

³Vae huri hi tulu ne rongohuri savi na kinau rau viti lakwakamu kwara tulu ne vai. Aia vae tulu hatu huri na doridoriga, huri rahe vai te havakinau hinea ramo heretuva luna.

⁴Rau kwetibibi na hagohago mava ramo taura tilo tigwa na tangaloi hinea u madi lakwa na tangaloi kwara rana kwali, vae rahe vai na kinau te vohoki kwara rana hago te maira rana kwali na hagohago vano hi.

⁵Rau vai savi na noga boloki lo mata na tangaloi kwara a tangaloi ra va tagaira. Rau uli na mahigwa na Uliuli Kokona tilo kaikweti hinea a vinu na boboroa, rau kweti gwatuga kinira ramo lisi tilo kabaga vake. Vae tulu tagaira. Rau vai noga rau lalakua sileti na nona tangaloi ratuaki. Vunu vake a vuluvulu na lugwaga rau gwagwaravu sileti na vuluvulu na lugwa na tangaloi ratuaki. [27]

⁶Rau lagwa kwara rana lai a hagele karekarea nona tangaloi lalakua lolo kanikani, vake rau lengaia kwara rana hugu lolo vale* na tiutangaroa lo hagehagele hinea rau karea karakara.

⁷Vunu rau lengaia kwara a tangaloi rana vai mavakinira lo nako na tangaloi maira na sara, vunu vake kwara a tangaloi rana kwarekinira kwara, ‘Tisa.’

⁸Vae tulu hatu tiraki na tangaloi kwara rana kwarekikamu kwara, ‘Tisa’, huri vunuhikamu tulu vituatua vae a nomiu Tisa katukwale vohoki.

⁹Tulu hatu kwarekinia te katukwale lo varamana kwara, ‘Mama’, huri i Tamamiu katukwale vohoki lolo taetae.

¹⁰Vake tulu hatu tiraki na tangaloi ramo kwarekikamu kwara, ‘Kaitomuaki’, huri a nomiu Kaitomuaki katukwale vohoki, i Vurae*.

¹¹Te tangaloi hinea u lakua karakara lolo livukamiu ne kwareki a nomiu tangaloi boloki.

¹²Ihe te ne lailai hakekinia vae i God ne hivokinia, ihe te hinea ne lailai hivokinia vae i God ne tabe hakekinia ne lakua.”

¹³Vunu i Jisas mo viti kwara, “I kamu a tangaloi* kikikila na Uliuli* Kokona mana Varisi*, a rongoana hati lakua lakwakamu. I kamu a tangaloi kwetukwetutu, tulu viti kinau ki ringomiu vohoki. Aia hokinia kwara tulu hogoi koro na katama lo nako na tangaloi hinea rau lengaia kwara rana mulemai kina tangaloi hinea i God u hugwe korora. I kamu tulu bemiu kwara i God ne hugwe korokamu, vunu tulu tuku tu koro na tangaloi ratuaki kwara rana hatu vanamai vaki mai God kwara ne hugwe korora. [28]

¹⁴

¹⁵“I kamu a tangaloi kikikila na Uliuli Kokona mana Varisi, a rongoana hati lakua lakwakamu. I kamu a tangaloi kwetukwetutu, tulu viti kinau ki ringomiu vohoki. Tulu mo kwalao laliki lo aga, tulu mo vano utuhi na ureure maira tulu mo tinakaki tavaluki vaki tavaluki, tulu mo soro haro na tangaloi kwara te katukwale ne bohi ne huri na nomiu huhuiana. Vae lolona mo hurikamu tulu mo vaia mo mulemai kina tangaloi hati hinea u taritarisa kwara ne vano vaki lo kabu na kakadiki hokikamu, huri u hati, u hati vakairua siletikamu.

¹⁶“I kamu a kaitomuaki a matamiu rau dodo, a rongoana hati lakua lakwakamu. Tulu viti kwara, ‘Diko a tangaloi u hahariki tilo Ingwa Kokona noi God nona hahariki he madi tea, vae diko u hahariki tilo kol lolo Ingwa Kokona noi God a nona hahariki u madi.’

¹⁷A matamiu rau dodo, tulu reraka. ?Makive u lakua karakara, a kol diko a Ingwa Kokona noi God aia u vai na kol mo kokona?

¹⁸I kamu vake tulu viti kwara, ‘Diko a tangaloi u hahariki tilo voda [29], nona hahariki he madi tea, vae diko a tangaloi u hahariki tilo hokohoko hini lo voda, nona hahariki u madi.’

¹⁹!A matamiu rau dodo haburu! ?Makive u mava karakara, a hokohoko diko a voda aia u vai na hokohoko mo kokona?

²⁰Huri hi a tangaloi hinea u hahariki tilo voda u hahariki tiluna, vake tilo hokohoko savia hi luna.

²¹A tangaloi hinea u hahariki tilo Ingwa Kokona noi God u hahariki tiluna, vake tilui God aia u hugu takwahini.

²²A tangaloi hinea u hahariki tilo taetae u hahariki tilo hagehagele i God, vake tilui God a Hugwe Lakua hini u hugu luna.

²³“I kamu a tangaloi kikikila na Uliuli Kokona mana Varisi, a rongoana hati lakua lakwakamu. I kamu a tangaloi kwetukwetutu, tulu viti kinau ki ringomiu vohoki. Tigwaravu tulu kwiribibi na tangwata hika. Tulu valuki na rau kwaririgi hinea tulu tuku tau lo hinaka kwara ne boniboni, hoki na rau na min*, a rau na dil*, mana rau na kamin*, kwara vae tulu ne bete a rau katukwale lakwai God, tulu ne kwiribibi na rau kaihikwa. Vae tulu he domi huri tea kwara tulu ne rongohuri na huhuiana na tangwata hinea rau mava karakara aira hika, kwara tulu ne vai kinau rana bakoto lakwa na tangaloi, tulu ne hakavi na tangaloi, vunu vake kwara tulu ne kwiribibi na nomiu tulikileo. A kinau mava aira vano hi u taritarisa kwara tulu ne vai, vae tulu hatu domi bulakiki na kinau ratuaki aira vano hi vake.

²⁴I kamu a kaitomuaki a matamiu rau dodo. Tulu lavi na kanono tina memiu inuinu, vae i kamu tulu donomi na buluki tulu he kikilai tea.

²⁵“I kamu a tangaloi kikikila na Uliuli Kokona mana Varisi, a rongoana hati lakua lakwakamu. I kamu a tangaloi kwetukwetutu, tulu viti kinau ki ringomiu vohoki. Tulu vakahaki na gula na nomiu laha mana beleti, vae lolona u kukwere kina kwai na nomiu bohiana hinea rahe taritarisa tea, tulu babalu, tulu domi hurikamu kehekeheki.

²⁶I kamu a Varisi a matamiu rau dodo kareaki. Tulu vakahaki na lolo na laha tomua, vunu tavalavarea neri ngwasara vake.

²⁷“I kamu a tangaloi kikikila na Uliuli Kokona mana Varisi, a rongoana hati lakua lakwakamu. I kamu a tangaloi kwetukwetutu, tulu viti kinau ki ringomiu vohoki. I kamu hoki na tabu. Tavalavarea rau buruira rau lotu rau karea haburu, vae lolona rau kukwere kina hui na tangaloi rau mate rau madamada.

²⁸Lo halaki hokinia hini, lo doridorimiu tavalavarea a tangaloi rau tagaikamu rau domi kwara i kamu a tangaloi bakoto, vae a domimiu rau kukwere kina kurakura mana hatiana rusa.”

²⁹Vunu i Jisas mo hoke na leona mo viti kwara, “I kamu a tangaloi* kikikila na Uliuli* Kokona mana Varisi*, a rongoana hati lakua lakwakamu. I kamu a tangaloi kwetukwetutu, tulu viti kinau ki ringomiu vohoki. Tulu vai a tabu karekarea huri na tangaloi* duruduruki, tulu vulehi [30] na vatu hinea a tangaloi rau taura kwara rana domidomi-bibi na tangaloi bakoto tuai.

³⁰Tulu viti ‘Kwara vae diko tau hugu tuai vanamai evina lo taro i ratubuda, tanahe vai na kinau tea hinea ramo toko vai ramo kwohi matematei na tangaloi duruduruki.’

³¹Lo leo hi tulu viti bakotoki kwara i kamu tulu gwalo vanamai luga hinea rau kwohi matematei na tangaloi duruduruki.

³²Va, tulu vai vunuhi na kinau hi i ratubumiu ramo tinakaki.

³³!I kamu hoki na ngwata! !I kamu hoki na raranatu na ngwata! !Tulu matamataku hokinira! ?Tulu domi kwara tulu ne kwalao kworohokinia tina arekiana noi God kwara vae tulu nehe vano tea vaki lo kabu na kakadiki?

³⁴Vae huri hi na viti lakwakamu, na hora na tangaloi duruduruki, a tangaloi na lolorani, mana tangaloi kikikila na Uliuli Kokona vaki maikamu. Tuaki tulu ne kwohi mateira, tuaki tulu ne durura tilo kaibetu, vunu tuaki tulu ne takwilira lolo nomiu vale* na tiutangaroa, tulu ne livu lalikinira tina gwatuivanua katukwale vaki lo gwatuivanua dolua.

³⁵Huri na kinau hi tulu ne kwali na kakadiki huri na tangaloi bakoto savira hinea a tangaloi ramo kwohi mateira, u tinakaki lo tangaloi bakoto hi i Evol, mo rovo lui Sekaraea i natu i Barakia hinea tulu mo kwohi mateia lolo livuka na Ingwa Kokona noi God mana voda. [31]

³⁶Kareaki na viti lakwakamu, i kamu a tangaloi na taro hika vae tulu ne kwali na kakadiki huri na mateana nona tangaloi aira vano hi savia.”

³⁷Vunu i Jisas mo viti kwara, “!Ee, i kamu a ngwera Serusalem! I kamu tulu tuku kwohi matematei na tangaloi* duruduruki maira, tulu voho matematei na kailai na leo hinea i God mo horara vaki maikamu. Vakarusa nu lengaia kwara na haka korokamu savia, hoki na toa hinea mo kokovi koro i raranatuna, vae i kamu tulu he lengaia tea kwara na vai hokinia hi.

³⁸Vae u karea, hika tulu ne hugu kwehi. Tulu taga. Hika i God u tiraki na nona Ingwa Kokona lo vanuamiu u eno vuroki.

³⁹Vae na viti lakwakamu hika, i kamu vae tulu nehe tagaiau te taliku tarisaki a taroki ne maravuti kwahaia hi tulu ne viti kwara, ‘A Hugwe i God ne vai tabetabekinia hi u vanamai lo hinana.’ ”