Read West Ambae MATIU 26 Bible Online

MATIU 26 - West Ambae bible

MATIU 26

¹I Jisas mo huhui na nona ngwalagelo kina kinau aira vano hi mo rovo, vunu mo kwaha maira mo viti kwara,

²“I kamu tulu kikilai kwara a rani kairua vake vunu a taro na Kanikani* na Tivekiana. Vae i nau a Natu* na Tangaloi, a tangaloi rana tirakiau tilo kaba na nogu tavaluivuro kwara rana duruau tilo kaibetu.”

³Hikani a tangaloi* lingilingi lalakua mana ngwarasea* nona gwaloana noi Isrel* rau vileki tabulutaki lolo ingwa i Kaeavas, a hugwe na tangaloi* lingilingi.

⁴Ramo tovotovo kwara rana kwiribibi i Jisas tavuniki, rana kwohi mateia.

⁵Vae ramo viti kwara, “Ta hatu vaia lolo taro na kanikani lakua, vae a vao ramai vikwali maikita.”

⁶I Jisas mo hugu lo gwatuivanua Betani lolo ingwa i Saemon hinea tuai a lengeana hati na vinu [33] mo vaia.

⁷Lolona mo toko kanikani a vavine mo vanamai vaki maia mana botele u kihiana kina vatu a hinaki a alabasta*, u kukwere kina vurae boniboni lolona, a maneki u lakua haburu, mo lilingia tilo gwatu i Jisas.

⁸A ngwalagelo noi Jisas ramo tagaia ramo lologute ramo viti kwara, “?Kworohokinia mo vai behiki na vurae boniboni hi?

⁹Hi kwara ne hokakinia a maneki ne lakua, ne bete na maneki lakwa na tangaloi kakaravi.”

¹⁰Vae i Jisas u kikilai na havakinau hi ramo viti, mo kwaha maira mo viti “?Huri aha tulu mo vai na vavine hi mo rongo hati? Aia u vai na kinau karea lakweau.

¹¹I kamu a kakaravi rau hugu maikamu tigwaravu, vae i nau nahe hugu tea maikamu tigwaravu.

¹²A vavine hi mo lilingi na vurae boniboni tilo tarabehigu, u vurae rarai na tarabehigu huri kwara vae rana tauau tilo gwaru-malanga*.

¹³Kareaki na viti lakwakamu, takwanahavaki a tangaloi rana kwalahaki na Roro Karea hika doluaki na varamana, vae rana viti huri na kinau hika a vavine hi mo vai, rana domihagwea luna.”

¹⁴Vunu katukwale tina ngwalagelo hangavulu dongwana kairua, a hinana i Sutas Iskariot, u vano vaki mana tangaloi* lingilingi lalakua.

¹⁵Mo viti kwara, “?Diko na tiraki i Jisas lakwakamu, tulu ne bete na havakinau lakweau?” Hikani ramo valuki na mane* vatu a silva ngavu kaitolu hinea u taritarisa mana vatu tari vakahangavulu-dongwana-kailima, ramo betera lakwae.

¹⁶Vunu mo tinakaki lo taro hi, i Sutas mo soro haro na halaki kwara ne tiraki i Jisas tilo kabaga.

¹⁷Lo rani tomuaki na Kanikani* na Bereti* hini a Is Tikei Lolona, a ngwalagelo ramo vanamai vaki mai Jisas ramo uduhuri kinia ramo viti kwara, “?Ku lengaia kwara kena vai rarai na Kanikani* na Tivekiana huriko ave?”

¹⁸Mo viti lakwara kwara, “Tulu vano vaki mana tangaloi katukwale lo gwatuivanua lakua, tulu mo viti lakwae kwara, ‘A Tisa u viti kwara, “A tarogu u maravuti. I kami mana nogu ngwalagelo kena kani na Kanikani na Tivekiana lolo ingwamu.” ’ ”

¹⁹A ngwalagelo ramo vai hokinia hi i Jisas mo viti lakwara, ramo vai rarai savi na kinau huri na Kanikani na Tivekiana.

²⁰Lolo raviraviki, i Jisas mana nona ngwalagelo hangavulu dongwana kairua ramo hugu hivo kwara rana kanikani.

²¹Lolona ramo toko kanikani, i Jisas mo kwaha maira mo viti kwara, “Kareaki na viti lakwakamu, vae katukwale tikamu ne tirakiau tilo kaba na nogu tavaluivuro.”

²²A ngwalagelo ramo rongo hati, aira katukwale kehe ramo uduhuri ki Jisas ramo viti kwara, “?Hugwe*, ihe? ?I nau?”

²³Hikani i Jisas mo daraki lakwara mo viti kwara, “Aia te katukwale tikamu tulu mo hehe na kamiu bereti* lolo laha maiau, vae ne tirakiau tilo kaba na nogu tavaluivuro.

²⁴I nau a Natu* na Tangaloi, vae na mate hoki na Uliuli* Kokona mo viti. vae nu hahakavi haburu huri na tangaloi hinea ne tirakiau tilo kaba na tavaluivuro. U karea lakwa na tangaloi hi kwara ne va hatu vora.”

²⁵Hikani i Sutas aia hi mo tiraki Jisas mo uduhuri kinia mo viti kwara, “?Tisa, ihe? ?I nau?” I Jisas mo daraki lakwae mo viti kwara, “Aia hokinia hi komo viti.”

²⁶Lolona ramo toko kanikani, i Jisas mo lavi na bereti*, mo lagwaki God huri. Vunu mo volo utuutuhia mo bete lakwa na nona ngwalagelo mo viti kwara, “Tulu lai, tulu kani. Hikani a tarabehigu.”

²⁷Vunu mo lavi na laha, mo lagwaki God huri, vunu mo bete lakwara mo viti kwara, “Tulu inu luna i kamu vunu,

²⁸huri hikani a daigu hinea ne vai na leo harikiana noi God maikamu ne tu. A daigu hi ne huki tivarea huri na tangaloi rusa kwara i God ne domidomi koro na noga hatiana.

²⁹Na viti lakwakamu, i nau nahe inumi na waen te hi taliku rovonaki hini na inumi na waen karagwa maikamu lo Vanua Karagwa hinea i Tamagu u hugwe koroa.”

³⁰Hikani ramo kahoki na bolo na kaluhakiana, vunu ramo ngwalua tivarea ramo vano vaki lo Vuti na Vikai* a Violev.

³¹Vunu i Jisas mo kwaha maira mo viti kwara, “Bongi hika tulu ne tagai na havakinau hinea a tangaloi rana vai vovohiau, vae vunuhikamu a domimiu rana sovi, tulu ne kwalao tiau, huri a Uliuli* Kokona u viti kwara, ‘I God ne kwohi matei na kaitagahuri na sivsivi, a bulana sivsivi rana kwalao katukwale kehe.’

³²Vae takuni tina nogu marakaana tina mateana na vano tomuakikamu vaki Galili*.”

³³Vunu i Pita mo kwaha mai Jisas mo viti “Diko aira vunu a domiga rana sovi rana kwalao tiuko, vae i nau nahe kwalao te tiuko vohoki.”

³⁴Vae i Jisas mo kwaha mai Pita mo viti kwara, “Kareaki na viti lakwako, bongi hika a toa nehe tarere te radu nga kona herevunikiau vakaitolu kwara kohe kikilaiau tea.”

³⁵I Pita mo daraki mo viti kwara, “Diko i nau na mate haragoki maiko, vae i nau nanahe herevunikinigo tea.” A ngwalagelo savira ramo viti hokinia nga.

³⁶Vunu i Jisas mana nona ngwalagelo ramo vano vaki lo talutalu u kwareki Getsemane. Mo kwaha maira mo viti kwara, “Tulu hugu hikeni na va vano vaki takwahinea na tiutangaroa.”

³⁷Mo lavi i Pita mai raranatu i Seveti kairua ramo huria. A domina mo tinakaki mo mava mo rongo hati.

³⁸Vunu mo kwaha maira mo viti kwara, “A rongoana hati lolo domigu u lakua haburu, u vaiau nu rongo hati kwara na mate. Tulu hugu hike, tulu tagataga maiau.”

³⁹Aia mo lakao kusaki kelekele tiura, mo sovi hivo mo ngwalulu tagwao lo tano mo tiutangaroa mo viti “Tamagu. Diko ku vai lai, ko lavi na laha na rongoana hati hika tiau. Vae ko hatu vai luna i nau nomo lengaia, aia ko vai luna hokinia i nigo ku lengaia.”

⁴⁰Vunu mo mule taliku haro na nona ngwalagelo hi kaitolu mo hagwera rau maturu, mo kwaha mai Pita mo viti “?Kworoho i kamu kaitolu tulu he vai lai tea kwara tulu ne tagataga maiau te aoa katukwale?

⁴¹Tulu tagataga ne karea, tulu tiutangaroa kwara tulu nehe sovi te tilo sinasina hati. A domimiu u huira, vae a tarabehimiu u keokeo.”

⁴²Vunu i Jisas mo vano tiura vakairuaki mo tiutangaroa mo viti kwara, “Tamagu, diko konahe lavi na laha na rongoana hati hika tea tiau rovonaki na inumia, a nomu lengalengaiana ne mule luna.”

⁴³Vunu mo mule harora taliku mo hagwera rau maturu, huri a mataga rau mava.

⁴⁴I Jisas mo tirakinira taliku mo vano tiura mo tiutangaroa vakaitoluki kina leo hokinia hi tomua.

⁴⁵Vunu mo mule taliku vaki mana nona ngwalagelo mo kwaha maira mo viti kwara, “?Tulu maturu, tulu mabu radu nga? !Tulu tagaia! A taroki u maravuti kwara a tangaloi ne tirakiau a Natu* na Tangaloi, tilo kaba na tangaloi vaivai hati maira.

⁴⁶Tulu maraka, ta vano. Tulu tagaia, a tangaloi mo tovo kagu aia hi u maravuti.”

⁴⁷I Jisas mo toko kwahakwaha radu nga, i Sutas, aia hi katukwale tiura hangavulu dongwana kairua, mo maravuti. A vao lakua ramo huria ramo kwali a bue mana ngwasa. A tangaloi* lingilingi lalakua mana ngwarasea* maira nona gwaloana noi Isrel* rau horara.

⁴⁸A tangaloi hini u tovo kai Jisas, u viti terekaki na kaivosangi lakwara ba, mo viti kwara, “A tangaloi na bobonia, aia hi. Tulu kwiribibia.”

⁴⁹Lolona i Sutas mo maravuti, mo hena bakatoki vovohi Jisas, mo kwaha mo viti kwara, “Tisa, a magemuana ne eno maiko.” Hi mo bobonia.

⁵⁰I Jisas mo daraki mo viti kwara, “Tua, ku vanamai huri na havakinau ko vaia.” [34] Vunu ramo vanamai vaki mai Jisas ramo kwiribibia ramo lavia.

⁵¹Hikani katukwale tiura hinea rau hugu mai Jisas mo rauni na nona bue mo tai suati na gwero na tangaloi boloki nona hugwe na tangaloi* lingilingi.

⁵²Vunu i Jisas mo viti lakwae kwara, “Ko tau nomu bue taliku lo tanotanoki, huri savira hinea rau lai a bue rana mate kina bue.

⁵³?Ko he kikilai tea kwara na vai lai na kware haro i Tamagu vae heheriki ne hora na kaihora tina taetae, u sileti na bulubulu lalakua a gwatu hangavulu dongwana kairua rana hago maiau?

⁵⁴?Vae kwara vae na vai kwehi a Uliuli* Kokona ne kworo kworohokinia hinea mo viti kwara ne mule luna hokinia hi?”

⁵⁵Vunu i Jisas mo kwaha mana vao mo viti kwara, “?Kworoho tulu mo vanamai huriau tulu mo hago bue mana ngwasa kwara tulu ne laviau hokinia kwara, i nau te tangaloi uabalu tangaloi? Vataha na rani nu hugu maikamu nomo toko huhui lolo Vanua* Kokona noi God vae tulu he kwiribibiau tea.

⁵⁶Vae a kinau savia vano hi ramo mule luna kwara a havakinau hinea a tangaloi* duruduruki ramo uli lo Uliuli Kokona ne kworo.” Vunu a nona ngwalagelo vunuhira ramo tirakinia ramo kwalao tiua.

⁵⁷Aira hinea rau kwiribibi i Jisas, ramo lavia vaki lo ingwa i Kaeavas, a hugwe na tangaloi* lingilingi. A tangaloi* kikikila na Uliuli* Kokona mana ngwarasea* rau vileki tabulutaki takwa-hi.

⁵⁸I Pita mo toko huri tiutiuki i Jisas mo maravuti lolo loloiara na ingwa na hugwe na tangaloi lingilingi. Mo soro tilolo loloiara, mo hugu hivo mana kaitagahuri maira kwara ne tagai na gweregwere na kinau hi.

⁵⁹A tangaloi* lingilingi lalakua mana Tangaloi* Tovotovo Lalakua doluaki ramo soro haro na tangaloi kurakura kwara rana va viti te kwara i Jisas u vai na hatiki, vae ne mate huri.

⁶⁰Vae venaha u rusa rau maraka ramo kurakuraki leo huria vae rahe hagwe na leo te vohoki huria. rovonaki a tangaloi kairua raru mo tu vaki tomua

⁶¹raru mo viti kwara, “A tangaloi hika u viti kwara, ‘I nau nu vai lai kwara na talahi na Ingwa Kokona noi God, vunu lo rani kaitolu na tabea taliku.’ ”

⁶²A hugwe na tangaloi lingilingi mo maraka hake, mo kwaha mai Jisas mo viti kwara, “?Kworohokinia, kohe va daraki na leoga tea hinea ramo toko vitira vovohiko?”

⁶³Vae i Jisas u hugu butu. Vunu a hugwe na tangaloi lingilingi mo kwaha maia taliku mo viti kwara, “Nu hahariki tilui God Tatoka, ko viti lakwakami. ?I nigo i Vurae* i Natu i God diko hetea?”

⁶⁴I Jisas mo daraki lakwae mo viti kwara, “Aia hokinia hi komo viti. Vae na viti lakwakamu, takuni tina taro hikani tulu ne tagaiau i nau a Natu* na Tangaloi, na hugu lo matuai God na Huirana, na vanamai lo taenalangi na taetae.”

⁶⁵Vunu a hugwe na tangaloi lingilingi hi mo dare na lugwana mo kwaha mo viti kwara, “!U kwahakwaha hati vovohi God! ?Kworohokinia tamote soro haro na hagoleo vake? Hika vohoki tulu rongo na nona leo hati vovohi God.

⁶⁶?Tulu domi kworohokinia?” Ramo daraki ramo viti kwara, “U taritarisa kwara ne mate.”

⁶⁷Vunu ramo lido tilo nakona, ramo tukwaia. Aira hini rau tukwaia,

⁶⁸ramo viti kwara, “Vurae, i nigo a tangaloi* duruduruki. !Ko viti lakwakami! ?Ihe hi mo tukwaiko?”

⁶⁹Hikani i Pita u hugu varea lolo loloiara na ingwa. Lolona hini a vavine boloki katukwale nona hugwe na tangaloi* lingilingi mo vanamai vaki maia, mo viti kwara, “I nigo vake, ku tuku hurihuri i Jisas, a ngwera Galili*.”

⁷⁰Vae mo harovia lo nakoga savira mo viti kwara, “Nohe kikilai na havakinau tea hi komo toko viti huria.”

⁷¹I Pita mo vano, mo ngwalua lo matakihala na loloiara hi. A vavine boloki dolua mo tagaia vake, mo viti lakwa na tangaloi ratuaki rau tu takwahini kwara, “A tangaloi hika u tuku huri i Jisas a ngwera Nasaret.”

⁷²I Pita mo harovia taliku mo viti kwara, “Nu hahariki, i nau nohe kikilai na tangaloi te hini.”

⁷³He tuai tea a tangaloi rau tu takwahini ramo vanamai vaki mai Pita, ramo viti kwara, “Kareaki i nigo vake katukwale tiura. Keu rongo lo dilaomu.”

⁷⁴Vunu i Pita mo maraka mo hahariki mo viti kwara, “!Ei! Diko nu kura, i God ne vai kadiau huri. Nohe kikilai na tangaloi te hini.” Heheriki hini a toa mo tarere.

⁷⁵I Pita mo domihagwe na havakinau hinea i Jisas mo viti lakwae kwara, “A toa nehe tarere te radu nga kona herevunikiau vakaitolu kwara kohe kikilaiau tea.” I Pita mo soro tivarea mo karuki na mena tinangi.