Read West Ambae MATIU 27 Bible Online

MATIU 27 - West Ambae bible

MATIU 27

¹Sirovobongi bise a tangaloi* lingilingi lalakua mana ngwarasea* maira nona gwaloana noi Isrel* rau vai a tovotovo hati vovohi Jisas kwara rana kwohi mateia.

²Rau gwarua kina seni ramo lavia ramo tirakinia lakwa na kavman lakua i Paelet*, a ngwera Rom.

³Lolona i Sutas hinea mo tovo kai Jisas mo taga kwara rau tau i Jisas tilo mateana, mo bohi na domina mo lavi na mane* vatu a silva ngavu kaitolu vano hi mo tukuhira lakwa na tangaloi* lingilingi lalakua mana ngwarasea* maira.

⁴Mo viti kwara, “Nu vai na doridori hati u lakua haburu huri nomo tiraki na tangaloi bakoto kwara ne mate.” Vae ramo daraki lakwae ramo viti kwara, “I kami kehe kikilai tea. !A nomu!”

⁵I Sutas mo vohoki terekaki na mane hini lolo Ingwa Kokona noi God mo lakao tiura. Vunu mo vano mo liko mateia sibona.

⁶A tangaloi lingilingi lalakua ramo lavi na mane ramo viti kwara, “He taritarisa tea lo noda tangwata kwara tana tau na mane hi lolo tanotano na mane na Ingwa Kokona noi God huri a mane na abeana.”

⁷Ramo kwahakwaha tabulutaki ramo voli na tano hi a tangaloi ramo toko kihi a laha maira eia. Ramo volia kwara ne kwareki a ara maturu huri na tangaloi a hala vanovano rana mate rana taura eia.

⁸Huri hi a tangaloi rau kwareki na tano hi kwara, “A Tano na Abeana” vaki na hika.

⁹Vunu a leo hinea a tangaloi* duruduruki i Seremaea mo vitia u kworo, aia hi mo viti kwara, “Rau lavi na mane vatu a silva ngavu kaitolu [35] hinea ramo hokaki na tangaloi hi kinia, aia hi a gwaloana noi Isrel* ramo masinge tabulutaki luna kwara a manena aia hi.

¹⁰Vunu ramo voli na tano kinia hinea a tangaloi ramo toko kihi na laha maira eia, hokinia hi a Hugwe i God mo viti lakweau kwara na vai.”

¹¹I Jisas mo tu koro na nako na kavman i Paelet* a ngwera Rom vae a kavman hi mo uduhuri kinia mo viti kwara, “?I nigo a Hugwe Lakua nona gwaloana noi Isrel*?” I Jisas mo daraki mo viti “Aia hokinia hi komo viti.”

¹²Hikani a tangaloi* lingilingi lalakua mana ngwarasea* ramo toko lidua kina leo rusa vae he malangaki na leo te vohoki.

¹³Vunu i Paelet mo viti lakwae kwara, “?Kworohokinia? ?Kohe rongo na noga leo te vano hi ramo toko liduko kinia?”

¹⁴Vae i Jisas he daraki na leo te kwara te katukwale. Hikani a kavman hi mo idila haburu kinia.

¹⁵Lo vataha na taro na Kanikani* na Tivekiana a doridori na kavman kwara ne tiraki na tangaloi gwarugwaru katukwale tivarea lo leo na vao.

¹⁶Lo taroki hini a tangaloi katukwale lolo ingwa na gwarugwaru hinea a tangaloi savia rau rongo na rorona, a hinana i Jisas Baravas.

¹⁷Hikani lolona a vao ramo vileki tabulutaki, i Paelet* mo uduhuri kinira mo viti kwara, “?Aia makive hi tulu lengaia kwara na tirakinia lakwakamu? ?I Jisas Baravas diko i Jisas u kwareki i Vurae*?”

¹⁸I Paelet u kikilai kareaki kwara rau koroki i Jisas huri na nona bolokiana, vae huri hi ramo tirakinia lakwae.

¹⁹Lolona i Paelet mo hugu lolo tanotano na arekiana, i vavinehina mo hora na leo lakwae, mo viti kwara, “Konahe vai na kinau tea vohoki lakwa na tangaloi bakoto hini, huri lo nogu boborea bongi nu rongo hati haburu huria.”

²⁰A tangaloi* lingilingi lalakua mana ngwarasea* ramo lai lavi na vao kwara rana uduhuri ki Paelet ne tiraki i Baravas, vae ne tau i Jisas tilo kaba na tangaloi kwara rana kwohi mateia.

²¹Hikani a kavman mo uduhuri kina vao mo viti kwara, “?Makive hi tirarua tulu lengaia kwara na tirakinia lakwakamu?” Ramo daraki ramo viti kwara, “!I Baravas!”

²²I Paelet mo uduhuri kinira mo viti “?Vae i nau na vai kworohoki Jisas hinea u kwareki i Vurae?” Aira vunu ramo daraki ramo viti kwara, “!Durua tilo kaibetu!”

²³Vae i Paelet mo uduhuri mo viti “?Huri aha? ?U vai na havakinau mo hati?” Vunu ramo koleki karakara vake siletia tomua, ramo viti “!Durua tilo kaibetu!”

²⁴Lolona i Paelet mo taga kwara nehe vano te vakevake lo leo, vake a vuro ne mai takwaka, mo lavi na kwai mo sasavula lolo nako na vao, mo viti kwara, “I nau a nogu tikei eia maikamu kwara a tangaloi hika ne mate. !Hikani a nomiu sibomiu! Nanahe kwali na dai te maikamu.”

²⁵A vao doluaki ramo daraki taliku ramo viti kwara, “A daina ne eno lo kabamai mai raranatumai.”

²⁶Hikani i Paelet mo tiraki i Baravas lakwara, vunu mo viti lakwa na nona tangaloi na vuro kwara rana takwili i Jisas, vunu mo tirakinia lakwara kwara rana durua tilo kaibetu.

²⁷Vunu a tangaloi na vuro noi Paelet* ramo lavi Jisas vaki lolo loloiara na ingwa na arekiana nona kavman, a tangaloi na vuro doluaki ramo vileki tabulutaki dalidalia.

²⁸Ramo teri na lugwana tiua, ramo lugwae kina lugwa u kara dodoka hoki na lugwa nona hugwe lakua.

²⁹Vunu ramo viri na karo hohokoti, ramo lilia, ramo kwokworia tilo gwatuna, ramo tau na ngwasa lo matuai kabana. Vunu ramo toko vaivai tagaia ramo titiugwao koro na nakona ramo viti kwara, “!I nigo a Hugwe Lakua nona gwaloana noi Isrel*!”

³⁰Ramo lido tiluna, ramo lavi na ngwasa hi ramo viliti na gwatuna kinia.

³¹Ramo veveki rera kinia mo rovo, vunu ramo teri na lugwa hi tiua, ramo lugwae kina lugwana taliku, vunu ramo lavia tivarea kwara rana durua tilo kaibetu.

³²Lolona ramo vano nga ramo hagwe na ngwera Saerini katukwale a hinana i Saemon, vae a tangaloi na vuro ramo susuni ngwavingwavikinia kwara ne kwali na kaibetu i Jisas.

³³Ramo vano vaki lo tanotano katukwale u kwareki Golgota, a domianaki kwara, “A Tanotano na Hui na Gwatu na tangaloi.”

³⁴Takwahini ramo lavi na waen u rokeana mana meresin, a toto na vikai hinea lolona a tangaloi a tarabehiga ramo kadikadira, ramo inu, vae ramo betea lakwai Jisas. Vae mo damedame rongohia he inumia tea.

³⁵Ramo durua tilo kaibetu, vunu ramo kwaheki na lugwana lo livukaga, vunu ramo tatiki na taes kwara rana taga kwara ihe ne lavi na hava lugwa.

³⁶Vunu ramo hugu takwahini ramo tagataga maia.

³⁷A leo hinea ramo hagwe luna hinea mo viti kwara, “Hikani i Jisas a Hugwe Lakua nona gwaloana noi Isrel*” ramo ulia ramo taua tilo kaibetu hivoulu tina gwatuna.

³⁸Vunu ramo lavi na tangaloi uabalu tangaloi kairua rau dururarua tilo kaibetu hoki i Jisas vake, kairuaki lo matuana, kairuaki lo ngwairina.

³⁹Hikani a tangaloi ramo lakao utu, ramo kwahakwaha tagaia, ramo dekidekiki gwatuga vovohia,

⁴⁰ramo viti kwara, “I nigo hinea ku vai kwara kona talahi na Ingwa Kokona noi God, vunu kona tabea taliku a rani kaitolu, ko vakahikinigo sibomu. Diko i nigo i Natu i God, ko hivo tina kaibetu.”

⁴¹Lo halaki hokinia hi a tangaloi* lingilingi lalakua, a tangaloi* kikikila na Uliuli* Kokona mana ngwarasea* maira ramo toko mana tiehia, ramo toko kwahakwaha kinira

⁴²ramo viti kwara, “Aia u tuku vakahiki na tangaloi ratuaki, vae aia nehe vai lai tea kwara ne vakahikinia sibona. ?Aia a Hugwe Lakua nona gwaloana noi Isrel a? U karea kwara ne hivo tina kaibetu hika lai nga, vunu tana hauhuri luna.

⁴³A tangaloi hi u hauhuri lui God. Diko i God u lagwa maia, u karea kwara ne vakahikinia hika lai nga, huri a tangaloi hi u tuku viti kwara, ‘I nau i Natu i God.’ ”

⁴⁴Vae a tangaloi na uabalu tangaloi hinea ramo dururarua tilo kaibetu hoki i Jisas, i rarua vake raru tuku kwahakwaha hati vovohia lo halaki hokinia hini nga.

⁴⁵Lo mataniaho kaheata a dodo mo vanamai hoki na bongi mo gui koro na vanua doluaki rovonaki lo mataniaho dori lakua.

⁴⁶Garagarani mana mataniaho dori lakua i Jisas mo kware karakara mo viti kwara, “?Eli, Eli, lama sabaktani?” a domiana na leo hi kwara, “Nogu God, nogu God. ?Kworoho komo tirakiau?”

⁴⁷Ratuaki rau tu garagarani ramo rongoa rau viti kwara, “A tangaloi hi u kware haro i Elaesa.”

⁴⁸Katukwale tiura mo kwalao heheriki, mo lavi na koten, mo hehea lo waen kokona, mo taua lo gweregwere na mavuro mo hokakinia lakwae kwara ne inumia.

⁴⁹Vae ratuaki ramo viti kwara, “!Tulu hatu vai ba! Ta taga kwara diko i Elaesa mo vanamai mo vakahikinia diko hetea.”

⁵⁰Hikani i Jisas mo ngara karakara taliku, mo tiraki na tanungwena lakwai God, mo mate.

⁵¹Vunu a lugwa* na bolo kabakaba hinea mo toko dule koro na Tanotano Kokona Karakara hinea lolo Ingwa Kokona noi God mo madadare kairua, mo tinakaki aulu vaki evina. Mo ruru, a vatu ramo takwakwaka.

⁵²Vunu a tabu rau matakahi, a tangaloi rusa noi God hinea rau mate tuai rau ahi ramo maraka.

⁵³Vae lolona i Jisas mo maraka tina mateana, ramo tiraki na tabuga ramo vano vaki lo Gwatuivanua Kokona Serusalem, vae a tangaloi rusa takwahini ramo tagaira.

⁵⁴Lolona a kaitomuaki na tangaloi na vuro mana nona tangaloi na vuro hinea rau tagataga mai Jisas ramo tagai na ruru mana kinau ratuaki vake, rau mataku haburu ramo viti kwara, “!Kareaki aia i Natu i God!”

⁵⁵A ravavine u rusa takwa-hi vake hinea ramo toko hago mai Jisas, ramo huria vanamai tina vanua Galili*, vae rau tu vakavakahaoka ramo toko tagaia.

⁵⁶Tuaki tiura i Meri a vavine Maktala, mai Meri i retahi i Semis mai Sosev, vunu i retahi i raranatu i Seveti.

⁵⁷Mo toko raviravi, a tangaloi hugwe tina gwatuivanua Arimatia mo maravuti, a hinana i Sosev. Aia vake a ngwalagelo noi Jisas.

⁵⁸Mo vano vaki mai Paelet* mo longi na tarabehi i Jisas tiua. I Paelet mo hora kwara rana bete na tarabehi i Jisas lakwai Sosev.

⁵⁹Hikani i Sosev mo lavia, mo lugwatia kina lugwa lotu u karagwa,

⁶⁰mo taua lolo gwaru-malanga*. A gwaru-malanga hi a gwaru i Sosev sibona, u kelia karagwa tina vatu. Hokinia mo tau na tarabehi i Jisas tilolona, mo taleleki na vatu lakua katukwale mo saro koro na matakihalaki, vunu mo lakao tiua.

⁶¹I Meri a vavine Maktala mai Meri kairuaki raru hugu takwahini raru mo toko tagataga huri na gwaru-malanga hi.

⁶²Hikani a Rani na Vai Raraiana huri na Rani* na Mabuana, vae mavukona a tangaloi* lingilingi lalakua mana Varisi* maira ramo vanamai vaki mai Paelet*.

⁶³Ramo viti kwara, “Keu domihagwe kwara lolona a tangaloi kurakura hini u ahi radu u viti hikwe kwara, ‘Takuni tina rani kaitolu na maraka taliku.’

⁶⁴Huri hi ko hora a kaitagahuri vaki lo tabu rana tagataga maia ne karea tarisaki lo rani kaitoluki. Vae diko hetea, a nona ngwalagelo ramai balu na tarabehina, vunu ramai viti lakwa na tangaloi maira kwara, ‘U maraka tina mateana.’ Hini a kurakura rovonaki ne hati ne siletia tomua.”

⁶⁵I Paelet mo kwaha maira mo viti “Tulu lai a kaitagahuri tulu mo vano tulu boloki ne karea kwara tulu ne vai na matakihala na tabu hi ne madi ne karea.”

⁶⁶Hikani ramo vano ramo vai tabetabeki na tabu hi. Ramo tau na bulu lo vatu hi, vunu ramo tau na kaimatai lo bulu hi, kwara vae diko a tangaloi ne kiluki na vatu hi, vae rana kikilai luna. Vunu ramo tau na kaitagahuri ramo tagataga maia.