Read West Ambae MATIU 28 Bible Online

MATIU 28 - West Ambae bible

MATIU 28

¹A Rani* na Mabuana mo rovo, vunu lo Sade sirovobongi bise i Meri a vavine Maktala mai Meri kairuaki vake raru vano kwara raru ne tagai na tabu hi.

²Heheriki mo ruru u huira vohoki. A kaihora nona Hugwe tina taetae mo hivo mo taleleki na vatu tina gwaru-malanga* hi, mo hugu luna.

³A nakona hoki na vila, a lugwana u lotu u diovuka vohoki.

⁴A kaitagahuri ramo mataku haburu, a huiga ramo rururu ramo vai hoki na tangaloi rau mate.

⁵A kaihora tina taetae mo kwaha mana vavine kairua hini mo viti kwara, “Kuru hatu mataku. Nu kikilai kwara kuru taga haro i Jisas hinea ramo durua tilo kaibetu.

⁶U tikei hike. U maraka hokinia mo viti. Kuru vanamai hike kuru tagai na tanotanona hi mo ngwalulu eia.

⁷Vunu kuru vano heheri kuru viti lakwa na nona ngwalagelo kwara u maraka tina mateana, vae hika u vano tomuakikamu vaki Galili*. Tulu ne tagaia takwa-hi. Kuru domidomi-bibi na havakinau hini nomo viti lakwakamurua.”

⁸Hikani raru mo tiraki na tabu heheriki, raru mataku haburu vae vake u havutirarua haburu. Raru mo kwalao kwara raru ne viti lakwa na nona ngwalagelo.

⁹Heheriki nga i Jisas mo hagwerarua mo viti kwara, “A magemuana ne eno maikamurua.” Raru mo vano vaki maia, raru mo kwiribibi na garuna, raru mo vai mavakinia.

¹⁰I Jisas mo kwaha mairarua mo viti kwara, “Kuru hatu mataku. Kuru vano kuru viti lakwai ratuagu kwara rana vano vaki Galili rana tagaiau takwahini.”

¹¹Lolona a vavine kairua raru mo mule, a tangaloi na vuro ratuaki hinea rau tagataga mana tabu ramo mule taliku vaki lo gwatuivanua lakua ramo viti huri na kinau savia lakwa na tangaloi* lingilingi lalakua.

¹²A tangaloi lingilingi lalakua mana ngwarasea* vano hi ramo tovotovo, vunu ramo bete na mane* u lakua lakwa na tangaloi na vuro.

¹³Ramo kwaha maira ramo viti “Tulu viti hokinia hika kwara, ‘Bongi, lolona keu maturu, a nona ngwalagelo ramo vanamai, ramo baluki na tarabehina.’

¹⁴Diko a kavman ne rongo kwehi, i kami kena kwaha tabetabeki maia, i kamu a kinau tikei kwara tulu ne rongo hati luna.”

¹⁵Hikani a kaitagahuri ramo lavi na mane ramo vai luna hokinia hinea a tangaloi lingilingi lalakua ramo viti lakwara kwara rana vai. Vae a leo hi u kwalao laliki radu nga mana gwaloana noi Isrel* vaki na hika kwahale.

¹⁶Hikani a ngwalagelo noi Jisas hangavulu dongwana katukwale ramo vano vaki lo vuti lo vanua Galili*, hinea i Jisas mo viti lakwara kwara rana vano vaki eia.

¹⁷Lolona ramo tagaia, ramo sovi hivo vovohia kina domi mavakiana, vae tuaki rau domi kairua kinia.

¹⁸I Jisas mo vanamai vaki garagarani maira, mo kwaha maira mo viti kwara, “I God u bete na huirana savia lakweau lolo taetae vake lo varamana.

¹⁹Vae huri hi, tulu vano vaki mana tangaloi savia vataha na mahagweki lo varamana, tulu huhuira kwara rana mulemai ki nogu ngwalagelo, tulu bavtaesira lo hina i Tamagu, lo hinagu i nau i Natuna, lo hina na Tanungwe Kokona.

²⁰Tulu huhuira kwara rana vai na kinau vunuhia hinea nomo vitira lakwakamu. Vae tulu domidomi-bibi, i nau maikamu tigwaravu vae tarisaki a varamana ne rovo.”