Read West Ambae MATIU 3 Bible Online

MATIU 3 - West Ambae bible

MATIU 3

¹Lo taro aia hini, i Sione a tangaloi na bavtaes tangaloi u tinakaki mo heretuva lo vanua vuroki Sutia.

²Mo viti kwara, “Tulu bohi tina nomiu hatiana, huri a taro hinea i God ne hugwe koro na bulana tangaloi u garagarani.”

³I Sione aia hi hinea a tangaloi* duruduruki i Aesaea mo viti huria lolona hinea mo viti kwara, “A tangaloi mo toko kwarekware lo vanua vuroki, mo viti kwara, ‘Tulu vai rarai na hala huri na Hugwe*. Tulu vai bakotoki na hala hi ne huria.’ ”

⁴I Sione a lugwana he karea tea, rau kihia kina vulu na kamel, u kwahikwahiki na vinu na buluki, u tuku kani a dio mana meme* na sukabak* na bubu.

⁵A vao ramo vanamai vaki maia tina gwatuivanua lakua Serusalem, tina vanua doluaki Sutia, tina vanua vunuhia dalidali na Kwai Sotan.

⁶Ramo matangwasaraki na noga hatiana, vunu mo bavtaesira lolo Kwai Sotan.

⁷Lolona i Sione mo tagai na Varisi* mana Satiusi* rau rusa, ramo vanamai vaki maia kwara ne bavtaesira, mo kwaha maira mo viti kwara, “!I kamu hoki na ngwata! ?Ihe u viti lakwakamu kwara tulu ne kwalao tina lologute noi God? A lologute hi ne vanamai nehe vakasile tea.

⁸Diko tulu bohi kareaki tina nomiu hatiana vae a kwaiki ne eia kareaki lo mamaurianamiu.

⁹Tulu hatu domidomikamu hinea tulu mo viti kwara i Evraham i tubumiu. Na viti lakwakamu, i God ne vai lai ne lavi na vatu vano hika ne vaira rana mulemai ki gwaloana noi Evraham.

¹⁰A talai u raraiana ba kwara ne tai na vikai maira lolo kakwariga. Vataha na vikai hinea rau kwai he karea tea, i God ne tai surira ne vohokinira tilolo kabu.

¹¹I nau nu bavtaesikamu kina kwai u vosangi hini kwara tulu bohi tina nomiu hatiana. Vae katukwale ne vanamai takuni tiau ne bavtaesikamu kina Tanungwe Kokona mana kabu. Aia u lakua karakara siletiau. Nahe taritarisa te vohoki kwara na kwali na kaikwokwori na garuna.

¹²U kwiribibi na nona kaihibi na uit* lo kabana vae ne hibi na uit kinia ne vohoki hake, a langi ne hereia, a hogoki rana sovi kehekeheki, a hinakaki rana sovi kehekeheki. Vunu ne lai a hinakaki ne tau vaki lolo ingwaki, vae ne hura savi na hogoki lo kabu hinea toko he mate lai tea.”

¹³Lo taro hi i Jisas mo vanamai tina vanua Galili* vaki lo Kwai Sotan kwara i Sione ne bavtaesia.

¹⁴Vae i Sione mo vai kwara ne tu koroa, mo viti “U taritarisa kwara i nigo kona bavtaesiau. ?Vae kworohokinia i nigo kote vanamai vaki maiau?”

¹⁵Vae i Jisas mo daraki lakwae mo viti kwara, “U taritarisa kwara kona vai hika ba, huri lo hala hini taru ne vai vunuhi na kinau hinea i God u lengaia.” Vunu i Sione mo masinge.

¹⁶Mo bavtaesi Jisas mo rovo, vunu i Jisas mo galo hake tina kwai. Vae heheriki a taetae mo matakahi lakwae, mo tagai na Tanungwe Kokona noi God mo hivo tegetano hoki na ngwaki, mo hugu lui Jisas.

¹⁷Vunu a dilao mo tangi tina taetae mo viti kwara, “Hikani i Natugu, a Natu tabe. Nu lagwa maia haburu.”