Read West Ambae MATIU 4 Bible Online

MATIU 4 - West Ambae bible

MATIU 4

¹Vunu a Tanungwe Kokona mo tomuaki i Jisas vaki lo vanua vuroki, kwara i Setano* ne sinasina rongohia.

²I Jisas u rete a rani ngavu kaivati mana bongi ngavu kaivati vunu takuni tiua mo marakatia.

³Vunu i Setano mo vanamai vaki maia, mo viti “Diko i nigo i Natu i God, ko kwaha mana vatu vano hika rana bohi kina hinaka.”

⁴Vae i Jisas mo daraki mo viti “A Uliuli* Kokona u viti kwara, ‘A tangaloi ranahe toka lai tea kina hinaka kehekeheki, vae vatavataha na leo rau vanamai ti God, aia hi ne vai na tangaloi rana ahi.’ ”

⁵Vunu i Setano mo lavi Jisas vaki lo Gwatuivanua Kokona Serusalem, mo taua lo vuhunge na Ingwa Kokona.

⁶Mo viti lakwae kwara, “Diko i nigo i Natu i God, ko rovo hivo, huri a Uliuli Kokona u viti kwara, ‘I God ne kwaha mana nona kaihora tina taetae huriko.’ U viti vake kwara, ‘Rana kwiri halehalekinigo ki kabaga kwara vae a garumu, a vatu nehe vai hokotira te vohoki.’ ”

⁷Vae i Jisas mo daraki mo viti “A Uliuli Kokona u viti vake kwara, ‘Ko hatu kahi haro na domi na Hugwe a nomu God.’ ”

⁸Vunu i Setano mote lavi Jisas vaki lo vuti u tu aulu karakara. Mo vosangia kina mamalukoro na varamana savia mana noga karekarea vunuhia.

⁹I Setano mo kwaha maia mo viti kwara, “Diko kona sovi hivo vovohiau, kona kaluhakiau, a kinau aira vano hi na bete vunuhira lakwako.”

¹⁰Vunu i Jisas mo daraki mo viti kwara, “!Setano! !Vano tiau! A Uliuli Kokona u viti kwara, ‘Kona sovi hivo vovohi na Hugwe a nomu God, kona kaluhakinia. Kona boloki lakwae kehekeheki.’ ”

¹¹Hikani i Setano mo vano tiua, a kaihora tina taetae ramo vanamai ramo hago mai Jisas.

¹²Lolona i Jisas mo rongo kwara rau tau i Sione lolo ingwa na gwarugwaru, mo vano vaki Galili*.

¹³Aia he hugu tea lo gwatuivanua Nasaret, vae u vano u hugu lo gwatuivanua Kavaneam, hinea u garagarani mana Kwai* Tokatoka Lakua Galili lo vanua nona gwaloana noi Sevulun mana gwaloana noi Navtali tomua, hinea i rarua i raranatu i Isrel*.

¹⁴A kinau hi mo mule luna hoki na leo hinea a tangaloi* duruduruki i Aesaea mo vitia tuai kwara,

¹⁵“A vanua nona gwaloana noi Sevulun mana vanua nona gwaloana noi Navtali i rarua tavaluki tina Kwai Sotan, lo hala vaki na Kwai Tokatoka Lakua Galili. A vanua hi a vanua Galili hinea a tangaloi tavalavarea tina gwaloana noi Isrel ramo toka eia.

¹⁶A tangaloi aira vano hi rau hugu lolo dodoki, vae rau tagai na leleha lakua. Aira hinea rau hugu lo vanua hinea a dodo na mateana luna, vae u leleo tiluga.”

¹⁷U tinakaki lo taro hini, i Jisas mo toko heretuva mo viti “Tulu bohi tina nomiu hatiana, huri a taro hinea i God ne hugwe koro na bulana tangaloi u garagarani.”

¹⁸I Jisas mo lakao mana Kwai* Tokatoka Lakua Galili*, mo tagai na tangaloi kairua raru vituatua, i Saemon hinea a hinana kairuaki i Pita, mai tuana i Aduru. I rarua a tangaloi na reve ika. Raru vohoki na bulagaru kabe tilolo kwai tokatoka lakua.

¹⁹I Jisas mo kwaha mairarua mo viti kwara, “Kuru huriau, na huhuikamurua kwara kuru ne kwareki a kaireve na tangaloi.”

²⁰Heheriki raru mo tiraki na bulagaru kabe, raru mo huria.

²¹Mo hena nga mo tagai na tangaloi kairua vake raru vituatua, i Semis mai Sione i raranatu i Seveti. Raru hugu lo agaga mai tamagaru i Seveti, rau tuku vai huri bulaga kabe. I Jisas mo kwarerarua.

²²Heheriki raru mo tiraki na aga hi mai tamagaru, raru mo huri i Jisas.

²³I Jisas u vano vunuhi na vanua Galili*, mo huhui lolo vale* rusa na tiutangaroa, mo kwalahaki na Roro Karea kwara i God u tuku boloki vae ne hugwe koro na tangaloi doluaki na varamana. Mo vakahiki na tangaloi tina kaga lengeana a gwatuki u rusa.

²⁴A rorona mo kwalao laliki doluaki na vanua Siria. Vunu a tangaloi ramo lavira aira vunu hinea rau lenga kina lengeana a gwatuki u rusa, ramo vanamai vaki mai Jisas. A tangaloi aira vano hi, tuaki rau lenga, tuaki a tarabehiga rahe taritarisa tea, tuaki a tanungwe hati rau vaira, tuaki rau tuku matemate, tuaki a tarabehiga rau mate, vae i Jisas u vakahikinira aira vunu.

²⁵A vao u lakua ramo tiraki na vanua Galili mana Gwatuivanua Hangavulu, mana gwatuivanua lakua Serusalem mana vanua Sutia, mana vanua tavaluki tina Kwai Sotan, ramo huri i Jisas.