Read West Ambae MATIU 6 Bible Online

MATIU 6 - West Ambae bible

MATIU 6

¹I Jisas mo kwaha taliku mo viti kwara, “A bohianamiu hinea tulu mo toko vai, kwara vae tulu ne domi mavaki i God luna, tulu tagahuri kwara tulu hatu vai lo nako na tangaloi kwara rana tagaikamu. Diko tulu ne vai kwehini tulu nehe lai te kaitakwe ti Tamamiu lolo taetae.

²“Hokinia komo bete nomu hokohoko lakwa na tangaloi kakaravi, ko hatu horo tavui huri, hoki na tangaloi hinea rau kwetukwetutu rau domidomira, ramo vai lolo vale* na tiutangaroa, vake lo sara, kwara vae a tangaloi rana kalukinira. Kareaki na viti lakwakamu, rau lai a kaitakwega vunu ba.

³Vae i nigo komo hokaki lakwa na tangaloi kakaravi, ko hatu tiraki na ngwairi kabamu mo kikilai a havakinau a matuai kabamu mo vai.

⁴Ko tavuniki na nomu boloboloki karea kwara a tangaloi rana hatu kikilai. Vunu i Tamamu hinea u tagai na kinau hinea komo vai tavuniki neri bete kaitakwemu.”

⁵I Jisas mo viti vake kwara, “Lolona komo tiutangaroa ko hatu vai hoki na tangaloi hinea rau kwetukwetutu, rau viti kinau ki ringoga vohoki. rau lagwa kwara rana tiutangaroa lolo vale* na tiutangaroa, vake lo sara kwara a tangaloi savia rana tagaira. Kareaki na viti lakwakamu, aira rau lai a kaitakwega ba.

⁶Vae lolona komo tiutangaroa, ko soro vaki lolo ingwamu, ko hogoi nomu katama, ko tiutangaroa lakwai Tamamu hinea aia eia maiko, vae a tangaloi rahe taga lavia tea. Vae i Tamamu hinea u tagai na havakinau hi komo vai tavuniki neri bete kaitakwemu.

⁷“Lo nomiu tiutangaroa tulu hatu viti na leo mo rusa hoki na tangaloi hinea rahe kikilai i God tea. Rau domi kwara i God ne rongora huri na noga leo rusa.

⁸Tulu hatu vai hokinira. I Tamamiu u kikilai a havakinau hinea tulu lengaia, vunu tulu mori uduhuri kinia.

⁹Tulu tiutangaroa hokinia hika. ‘Tamamai lolo taetae, a hinamu u kokona. Keu tiutangaroa kwara a tangaloi rana domi mavakinigo,

¹⁰rana hugu tavutimu, i nigo a Hugwe Lakua, rana vai na domimu lo varamana ne taritarisa hokinia hinea aira lolo taetae ramo toko vai.

¹¹Ko bete kamai hinaka hika karagwa huri na rani hika.

¹²Ko domidomi koro lakwakami nomai vakasileana hokinia i kami keu domidomi koro lakwara hinea rau vakasile vovohikami.

¹³Ko hatu tirakikami tilo hala na sinasina huira, vae ko kwiribibikami ti Setano*.’ [7]

¹⁴“Diko i kamu tulu domidomi koro lakwa na tangaloi hinea rau vakasile vovohikamu, vae i Tamamiu lolo taetae ne domidomi koro lakwakamu vake.

¹⁵Vae diko tulu he domidomi koro tea lakwa na tangaloi, vae i Tamamiu lolo taetae nehe domidomi koro te nomiu vakasileana.”

¹⁶Vunu i Jisas mo viti kwara, “Lolona tulu mo rete, tulu hatu vai na nakomiu ramo hati hoki na tangaloi hinea rau kwetukwetutu rau domidomira, ramo toko vai. Aira rau vai na nakoga ramo hati, kwara vae a tangaloi rana tagaira rana kikilai kwara rau rete. Kareaki na viti lakwakamu, rau lai a kaitakwega vunu ba.

¹⁷Vae i nigo komo rete, ko rovi nakomu, ko gari vulumu,

¹⁸vae a tangaloi ranahe kikilai tea kwara ku rete, vae kehekeheki i Tamamu u kikilai hinea aia eia maiko, vae a tangaloi rahe taga lavia tea. Vae i Tamamu hinea u tagai na havakinau hi komo vai tavuniki neri bete kaitakwemu.”

¹⁹I Jisas mo hoke na leona, mo viti kwara, “Tulu hatu tau nomiu vivilagoki mo rusa lo varamana. Takwa-hi vae a kanikani ramai kanira, ramai daira, vake a tangaloi babalua ramai soro ramo balu.

²⁰Vae tulu tau nomiu vivilagoki maira lolo taetae. Takwa-hi a kanikani ranahe kanira tea, ranahe daira tea, vake a tangaloi babalua ranahe soro lai tea kwara rana balu.

²¹Takwanahavaki a nomiu vivilagoki rau eno eia, vae a domimiu u eno takwa-hi vake tigwaravu.”

²²Vunu i Jisas mo viti kwara, “A mata aia hoki na laeti huri na tarabehi. Vae diko a matamu rau karea a tarabehimu savia aia lo leleha.

²³Vae diko a matamu rau hati a tarabehimu savia u eno lo dodoki. Diko a leleha hi lumu vae u dodoka, hi u dodoka vohoki kareaki.”

²⁴Vunu i Jisas mo viti vake kwara, “Hete tangaloi kwara ne boloki lakwa na hugwe kairua vakatukwale. Diko a tangaloi ne vai kwehi, ne bena kinia kairuaki ne lagwa maia kairuaki. Vunu vake ne domi mavakinia kairuaki ne domi bulakikinia kairuaki. Tulu nehe vai lai tea kwara tulu ne kwareki i God ki nomiu Hugwe tulu ne boloki nona, vunu tulu nete vai na mane* ne kwareki nomiu hugwe vake, tulu ne boloki nona.”

²⁵Vunu i Jisas mo viti kwara, “Huri na kinau hi, na viti lakwakamu kwara a domimiu rana hatu kwalao laliki huri na hinaka mana inuinu hinea tulu mo lengaia kwara tulu ne ahi kinia, diko huri na lugwa hinea tulu mo lengaia huri na tarabehimiu. A maurianamiu u sileti na hinaka, vake a tarabehimiu u sileti na lugwa.

²⁶Tulu tagai na manu na mahaleki. Rahe rivurivu tea, rahe makuriki te hinaka, vake rahe tau te hinaka lolo ingwa, vae i Tamamiu lolo taetae u vanganira. Vae i kamu tulu karea siletira.

²⁷?Diko a tangaloi a domina u kwalao laliki huri na maurianana hinea kwara ne toka nehe tuai tea, vae tulu domi kwara lo hala hi ne vaia ne toka ne tuai vakevake? [8] Hetea.

²⁸“?Vake kworoho a domimiu ramo kwalao laliki huri na vulavula? Tulu tagai na vira na bubu ramo mauri. Rahe boloki tea, diko rahe vai te vulavulaga siboga.

²⁹Vae na viti lakwakamu, i Solomon aia a tangaloi hugwe lakua lengalenga, vae a vulavulana rahe karea tea haburu hoki na vira aira vano hi.

³⁰I God u vakavula na duvu na bubu. A duvu vano hi rau eno a rani katukwale vohoki, vunu mavukona a tangaloi rau vohokinira tilolo kabu. ?Tulu domi kwara i God nehe vakavulakamu tea? !A nomiu hauhuriana u kelekele haburu!

³¹“Vae huri hi, he karea te kwara a domimiu rana kwalao laliki tulu ne domidomi kwara, ‘?Kena kani aha?’ diko ‘?Kena inu aha?’ diko ‘?Kena lugwaki aha?’

³²A kinau aira vano hi, a tangaloi tavalavarea tina gwaloana noi Isrel* rau domidomi luga tigwaravu. Vae i Tamamiu lolo taetae u kikilai kwara u taritarisa kwara tulu ne lai savi na kinau aira vano hi.

³³Vae tomuaki tulu ne tagahuri ne karea kwara tulu ne rongohuri i God hinea aia a nomiu Hugwe Lakua, tulu ne vai na kinau hinea rau bakoto hokinia aia u lengaia. Vunu aia neri bete savi na kinau aira vano hi vake lakwakamu.

³⁴“Vae huri hi, a domimiu rana hatu kwalao laliki huri na rani mavuko. A kinau huri na rani mavuko tulu neri domidomi luga lo rani mavuko. A rongoana hati huri na rani katukwale u taritarisa huri na rani hi vohoki.”