Read West Ambae MATIU 7 Bible Online

MATIU 7 - West Ambae bible

MATIU 7

¹Vunu i Jisas mo kwaha taliku mo viti kwara, “Tulu hatu taga kwaheki na doridori na tangaloi tulu mo viti kwara rau hati, vae i God ne mai taga kwaheki na doridorimiu ne mai viti kwara tulu hati vake.

²A hala hinea tulu mo huria kwara tulu ne taga kwaheki na doridori na tangaloi, vae i God ne taga kwaheki na doridorimiu lo hala hokinia. A korokoro hinea tulu mo tau lakwa na tangaloi vae i God ne tau lakwakamu vake.

³?Kworoho komo tagai na hogo kelekele lolo mata i tuamu, vae kohe va tagai na leko te lolo matamu?

⁴?Ku domi kworohokinia kwara kona viti lakwai tuamu kwara, ‘Koe, na lavi na hogo kelekele tina matamu,’ aia i nigo kohe va tagai na leko te lolo matamu?

⁵I nigo a tangaloi kurakura, ku viti kinau ki ringomu vohoki. Ko lavi na leko tina matamu tomua, vunu konari taga ne matangwasara, konari lavi na hogo kelekele tina mata i tuamu.

⁶“Tulu hatu bete a kinau hinea u kokona, a noi God, lakwa na kwiriu, vae ramai halebohi ramo katikamu. Tulu hatu vohoki nomiu kinau karekarea lakwa na dura, vae ramai bilebibira ki garuga.”

⁷Vunu i Jisas mo viti kwara, “Tulu uduhuri, vae tulu ne lai. Tulu soro haro, vae tulu ne hagwe. Tulu diridiri, vae a matakihala ne matakahi lakwakamu.

⁸Ihe hi ne uduhuri vae ne lai. Ihe hini ne soro haro vae ne hagwe. A matakihala ne matakahi lakwae hinea ne diridiri.

⁹Diko te katukwale tikamu i natuna ne uduhuri a bereti* kinia, vae nehe bete te vatu lakwae.

¹⁰Diko ne uduhuri a ika kinia, vae nehe bete te ngwata lakwae.

¹¹Venaha diko i kamu a tangaloi hati vae tulu bete a kinau karekarea lakwai raranatumiu. Vae i Tamamiu lolo taetae ne vai u siletikamu ne bete a kinau karekarea lakwara hinea rana uduhuri kinia.

¹²“U taritarisa kwara tulu ne vai lakwa na tangaloi ratuaki hokinia hinea tulu lengaia kwara rana vai lakwakamu. Aia hi a domiana na huhuiana na Tangwata* noi Mosis mana huhuiana nona tangaloi* duruduruki maira.”

¹³I Jisas mo viti vake kwara, “U taritarisa kwara tulu ne soro lo mataiara kelekele, huri a mataiara u lakua, a halaki u magemu kwara a tangaloi rana huria hinea u vano vaki lo kabu na kakadiki. U rusa rana huri na hala hi.

¹⁴Vae a mataiara u kelekele, a halaki u madi hinea u vano vaki lo ahiana. A tangaloi he rusa tea rana hagwea.”

¹⁵Vunu i Jisas mo viti vake kwara, “Tulu likoki na tangaloi* duruduruki kurakura. Rana vanamai vaki maikamu rau ngwaungwau hoki na sivsivi, vae lo doridoriga aira hoki na boboroa ovi kareaki.

¹⁶Tulu ne kikilaira lo doridoriga. A tangaloi nehe tova te kwai na karo karea tina karo na bubu hinea a kasiki luna. A karo na bubu nehe kwai lai tea kina kwai karea.

¹⁷Vataha na vikai karea rana kwai kina kwaiki hinea rau karea, vae a vikai hati ne kwai kina kwaina hinea u hati.

¹⁸A vikai karea nehe kwai tea kwara u hati, a vikai hati nehe kwai tea kwara u karea.

¹⁹A vikai hinea a kwaina u hati a tangaloi ne taia letiu, vae ne vohokinia tilolo kabu.

²⁰Lo hala hokinia hini tulu neri kikilai na tangaloi duruduruki kurakura lo doridoriga.”

²¹Vunu i Jisas mo viti kwara, “Hete vunuhi na tangaloi hinea rau kwareau kwara, ‘Hugwe*, Hugwe,’ vae rana soro tilolo Vanua Karagwa hinea i God u hugwe koroa. vae aira hinea rau vai a bolokiana u taritarisa mana domi i Tamagu lolo taetae, aira hi kehekeheki rana soro.

²²U rusa rana kwaha maiau lo Rani hi [9] kwara, ‘Hugwe, keu duruki na leo ti God lo hinamu. Keu livu tanungwe hati lo hinamu. Keu vai na vaisea rusa lo hinamu. ?Vae kworohokinia maikami?’

²³Vae nari matangwasaraki lakwara kwara, ‘Nohe kikilaikamu tea. I kamu a tangaloi vaivai hati. tulu vano tiau.’ ”

²⁴Vae i Jisas mo gweregwereki na nona leo mo viti, “Ihe hi u rongo na leogu aira vano hi, u vai luna, aia hoki na tangaloi kikikila hinea mo tabe na ingwana lo vatu toka.

²⁵Mo uha lakua, a kwai mo huki, a langi mo here mo kiluki na ingwana, vae he sovi tea, huri u tabeana lo vatu toka.

²⁶Vae ihe hi u rongo na leogu, he vai te luna, aia hoki na tangaloi rera hinea u tabe na ingwana lo one.

²⁷Mo uha lakua, a kwai mo huki, a langi mo here mo kiluki na ingwana, vae mo sovi, u matalatala vohoki.”

²⁸Hikani i Jisas mo kwahakwaha mo rovo, a vao rau idila vohoki kina nona huhuiana,

²⁹huri a nona huhuiana u bakoto, a huirana luga, hete hoki na huhuiana nona tangaloi* kikikila na Uliuli* Kokona.