Read West Ambae MATIU 8 Bible Online

MATIU 8 - West Ambae bible

MATIU 8

¹I Jisas mo duvule tegetano tina vuti, a vao lakua ramo huria.

²Vunu a tangaloi hinea a lengeana hati na vinu [10] u vaia mo vanamai vaki maia, mo sovi hivo koro na nakona mo viti kwara, “Hugwe*, nu kikilai kwara kona vai lai kona vaiau na ngwasara taliku, vae nahe kikilai tea kwara ku masinge diko hetea.”

³Vunu i Jisas mo hokaki na kabana mo kihia, mo viti kwara, “Nu masinge, ko ngwasara.” Heheriki hini mo ngwasara tina kana lengeana.

⁴Vunu i Jisas mo kwaha maia mo viti kwara, “Konahe viti te lakwa na tangaloi vohoki, vae ko hena bakotoki vaki mana tangaloi* lingilingi ne taga vivilokinigo. Vunu ko bete a hilehile lakwai God hokinia hinea i Mosis mo viti, ne vosangi na tangaloi savia kwara i nigo hika ku ngwasara.”

⁵Lolona i Jisas mo soro vaki lo gwatuivanua Kavaneam a kaitomuaki na tangaloi na vuro na ngwera Rom mo hagwea, mo seseaka huria mo viti

⁶“Hugwe*, a nogu tangaloi boloki na vanua lo here u lenga, a tarabehina rau mate u rongo hati haburu.”

⁷I Jisas mo kwaha maia mo viti kwara, “Na vano na vakahikinia.”

⁸A kaitomuaki hi mo daraki mo viti kwara, “Hetea, Hugwe, nohe taritarisa tea kwara na laviko vaki lolo ingwagu. Ko viti na leo vohoki vae a nogu tangaloi boloki ne rongo karea.

⁹I nau nu hugu tavuti na kaba na kaitovo na vuro hinea rau lalakua koroau. Vake i nau a nogu tangaloi na vuro eia rau hugu tavutigu. Nana kwaha maia katukwale na viti ‘!Ko vano!’ vae ne vano. Nana kwaha maia katukwale na viti ‘!Ko vanamai!’ vae ne vanamai. Vake nana kwaha mana nogu tangaloi boloki na viti ‘!Ko vai na kinau hika!’ vae ne vaia.”

¹⁰I Jisas mo rongo na leo hi u idila, mo viti lakwara hinea ramo huria kwara, “Kareaki na viti lakwakamu, nohe hagwe na gwaloana noi Isrel* te kwara te katukwale hinea a nona hauhuriana u huira hoki na hauhuriana nona tangaloi hika.

¹¹Na viti lakwakamu, u rusa rana vanamai tina hala na mataniaho giri, tina hala na mataniaho soro, rana hugu rana kanikani mai Evraham, i Aesik, mai Sekov, lo vanua Karagwa hinea i God u hugwe koroa.

¹²Vae aira hinea i God mo kwarera tomua kwara rana soro vaki lolo Vanua Karagwa hinea aia u hugwe koroa, ne taura tivarea tilolo dodoki. Takwahini rana ngara, rana kati raharahaki na livoga.”

¹³Vunu i Jisas mo kwaha mana kaitomuaki hi mo viti kwara, “Ko mule. Ne mule luna lakwako hokinia hi komo hauhuri.” Vae a tangaloi boloki nona kaitomuaki hi mo ahi lo taroki hini vohoki.

¹⁴I Jisas mo vano vaki tata i Pita, mo tagai gwelika i Pita, a vavine takwahini, u ngwalulu u mahaki.

¹⁵Vae i Jisas mo kihi na kabana, a mahakita hi mo tirakinia, mo maraka mo hago mai Jisas mo bete hinaka lakwae.

¹⁶Mo toko raviravi, a vao ramo lavi na tangaloi a tanungwe hati luga vaki mai Jisas. I Jisas mo livuti na tanungwe hati tiura kina leo, mo vakahikinira hinea rau lenga.

¹⁷I Jisas mo vai kwehini, u mule luna lo leoki hinea a tangaloi* duruduruki i Aesaea mo viti, vae u kworo hinea mo viti kwara, “Aia sibona u lavi na noda rongoana hati, u kwali letiuki na kada lengeana.”

¹⁸I Jisas mo tagai na vao dalidalia, mo viti lakwa na nona ngwalagelo kwara rana vano vaki tavalakwai tokatoka lakua tavaluki.

¹⁹A tangaloi* kikikila na Uliuli* Kokona mo vanamai vaki maia mo viti “Tisa, kona vano takwanahavaki i nau na huriko eia.”

²⁰I Jisas mo viti lakwae kwara, “A karivi a gwarangaga eia, a manu a unuga eia.[11] Vae i nau a Natu* na Tangaloi a tanotanogu tikei kwara na ngwalulu eia na mabu.”

²¹A tangaloi dolua hinea a nona ngwalagelo katukwale mo viti “Hugwe, ko tirakiau na mule na tanomi i tamagu ba.”

²²Vae i Jisas mo kwaha maia mo viti kwara, “Ko huriau, ko tiraki na tangaloi a domiga rau mate hoki na tangaloi u mate rana tano kaga tamate kahera.”

²³Vunu i Jisas mo galo tilolo aga, a nona ngwalagelo ramo huria.

²⁴Heheriki hi a langi lakua mo here tilolo kwai tokatoka lakua, hikani a navo ramo tinakaki ramo gui na aga. Vae i Jisas u maturu.

²⁵A nona ngwalagelo ramo vano vaki maia, ramo vakaradae ramo viti “!Hugwe*! !I kita hika tana sala! !Ko vakahikikita!”

²⁶Vae i Jisas mo daraki mo viti kwara, “?Kworoho tulu mo mataku haburu? A nomiu hauhuriana u kelekele haburu.” Vunu mo maraka mo kwaha suri na langi mana navo, a kwai hi mo tangwata medemedekinia.

²⁷Aira vunu rau idila ramo viti kwara, “?A hava tangaloi aia hika? A langi mana navo vake raru mo rongohuria.”

²⁸Vunu i Jisas mo galo hake lo vanua Gadara tavalakwai tokatoka lakua tavaluki, mo hagwe na tangaloi kairua raru ngwalua vanamai lolo gwaru-malanga* maira. A tangaloi kairua hi a tanungwe hati rau vairarua, raru vonovonoka haburu, vae huri hi lo hala takwa-hi a tangaloi rahe toko huria te vohoki.

²⁹Hikani raru mo taga dila i Jisas heheriki nga raru mo kakaili raru mo viti kwara, “!I nigo i Natu i God! ?Ku vanamai kwara kona vai aha maikamirua? ?Ku vanamai kwara kona vai kadikamirua a taroki hete radu nga?”

³⁰Vae a dura u rusa ramo toko kanikani takwa-hi he vakahao tea.

³¹A tanungwe hati vano hi ramo kwaha mai Jisas ramo viti “Diko ku vai kwara kona livutikami letiu, ko horakami tilolo dura vano hi.”

³²I Jisas mo viti lakwara mo viti “!Tulu vano!” Hikani ramo tirakirarua ramo vano tilolo dura vano hi. A dura vano hi doluaki ramo kwalao tegetano ramo rovo lo baha tilolo kwai tokatoka lakua ramo dono.

³³Vunu a tangaloi hinea ramo tagahuri na dura vano hi ramo kwalao, ramo vano vaki lo gwatuivanua, ramo viti huri savi na kinau vano hi lakwa na tangaloi, vake ramo viti huri na tangaloi kairua hi a tanungwe hati ramo vairarua, vae hika raru karea taliku.

³⁴Hikani vunuhi na tangaloi lo gwatuivanua hi ramo tiraki na gwatui-vanuaga kwara rana tagai Jisas. Lolona ramo tagaia, ramo seseaka luna kwara ne vano tina vanuaga.