Read West Ambae MAK 11 Bible Online

MAK 11 - West Ambae bible

MAK 11

¹Hikani ramo vanamai ramo maravuti u garagarani mana gwatuivanua Betvas maia Betani lo Vuti na Vikai* a Violev, hi u garagarani mana gwatuivanua lakua Serusalem. Lo taro hi i Jisas mo hora na nona ngwalagelo kairua tiura,

²mo viti lakwararua kwara, “Kuru vano vaki lo gwatuivanua kelekele hinea u tu koro na nakomiru. Kuru ne soro tilolona kuru ne hodilai na natu na dogi rau saniki-bibia hinea a tangaloi rahe kwalao te luna radu nga. Kuru mo teri na karo tiua, kuru mo lavia vanamai.

³Vae diko te tangaloi mo uduhuri kikamurua kwara ‘?Kworoho kuru mo vai hokinia hi?’ kuru mo viti kwara, ‘A Hugwe* u lengaia kwara ne kwalao luna, vunu ne taua taliku mulemai lai nga.’ ”

⁴Hika raru mo vano, raru mo tagahagwe na natu na dogi hi u tu lo hala lakua u sanikiana lo matakihala na ingwa. Lolona raru mo toko teri na karo tiua,

⁵a tangaloi ratuaki hinea rau tu takwa-hi ramo uduhuri kirarua kwara, “?Kuru vai aha kuru mote toko teri na karo tina natu na dogi hi?”

⁶Hika raru mo daraki lakwara hokinia hini i Jisas mo viti lakwararua. Vae a tangaloi vano hi ramo tirakirarua raru mo vano.

⁷Hikani raru mo lavi na natu na dogi hi vaki mai Jisas. Vunu raru mo teri na kakavugaru raru mo verakira hivoulu luna, i Jisas mo hugu luna.

⁸A tangaloi u rusa ramo vola kakavuga lo hala, ratuaki rau tai a rangai-vikai lo talutalu ramo tau lo hala.

⁹A tangaloi rusa rau tomua, ratuaki aira takuni ramo vidouki ramo viti “!Keu kaluhakinigo! Hugwe i God. Ko vai tabetabeki na tangaloi hinea u vanamai lo hinamu.

¹⁰Ko vai tabetabeki na tangaloi hi hinea ne mulemai kina Hugwe Lakua hika, hoki i tubumai tuai i Devit aia a hugwe lakua. A tangaloi aira vunu hinea lolo taetae rau kaluhakinigo.”

¹¹Hikani i Jisas mo soro vaki Serusalem, mo vano vaki lolo Vanua* Kokona noi God, mo tagataga laliki lo kinau savira, vae huri u raviravi ba, mo tiraki na gwatuivanua lakua hi taliku mo mule vaki Betani mana nona ngwalagelo hangavulu dongwana kairua.

¹²Mote mavukona ramo ngwalua tina gwatuivanua Betani, i Jisas mo marakatia.

¹³Mo tagai na vikai* vakahao, a vivik, u tavutavu ba, vae mo vano mo tagaia u domi kwara ne hagwe te kwaiki luna. Vae mo vano vaki maia, mo tagai na rauki kehekeheki, huri hete taroki radu nga kwara ne kwai.

¹⁴Hikani i Jisas mo kwaha mana vikai hi mo viti “Vae a tangaloi nehe kani na kwaimu tea vaki tuai.” Vae a nona ngwalagelo rau rongo na leo hi mo vitia.

¹⁵Lolona ramo maravuti Serusalem i Jisas mo soro tilolo Vanua* Kokona noi God, mo tinakaki mo livulivuti na tangaloi hinea ramo toko hokahokaki maira hi ramo toko volivoli lolona, mo hale bohiki na tevo na riririri mane* mana hagehagele na kaihokaki na kwiba.

¹⁶He tiraki na tangaloi tea kwara ne kwali a kinau ne lakao lalahi na loloiara* na Ingwa Kokona noi God maia.

¹⁷Vunu mo toko huhui na tangaloi mo viti lakwara kwara, “U uliana lo Uliuli* Kokona kwara i God u viti ‘A Ingwagu ne kwareki a ingwa na tiutangaroa huri na tangaloi na vanua rusa doluaki.’ Vae i kamu tulu mo bohikinia mo mulemai ki hilihili na tangaloi babalua.”

¹⁸Hikani aira a tangaloi* lingilingi lalakua mana tangaloi* kikikila na Uliuli Kokona ramo rongo na leo hi i Jisas mo vitira, ramo soro haro na halaki kwara rana kwohi mateia, huri rau mataku kinia, a vao rau idila haburu kina nona huhuiana.

¹⁹Lolo raviravi hi i Jisas mana nona ngwalagelo ramo tiraki na gwatuivanua lakua hi.

²⁰Mo sirovobongi ramo lakao lo halaga hi taliku, ramo tagai na vikai* hi a vivik u goru savia vaki lo kakwariki.

²¹Hikani i Pita mo domihagwe na leo hi, mo viti “Hugwe, ko tagai na vikai hi komo kwaha vovohia vae u goru savia.”

²²Vae i Jisas mo kwaha maira mo viti “Tulu hauhuri lui God.

²³Kareaki na viti lakwakamu, ihe te haro ne viti lakwa na vuti hika kwara, ‘Ko maraka ko rovo tilolo tahi sibomu,’ vae he dikoki te lolo domina, aia u hauhuri lo leona hi mo viti, vae neri mule luna lakwai hokinia hi.

²⁴Vae huri hi, na viti lakwakamu, tulu mo lengai naha tea tulu mo tiutangaroa, tulu hauhuri kwara tulu lavia ba vae tulu ne lai lavia.

²⁵Vae lolona tulu mo tu kwara tulu ne tiutangaroa, tulu domidomi koro lakwa na tangaloi te lo havakinau hinea mo vai vovohikamu kwara vae i Tamamiu lolo taetae ne domidomi koro nomiu vakasileana.” [11]

²⁷Vunu ramo vanamai taliku vaki Serusalem. Lolona i Jisas mo toko lakao laliki lolo Vanua* Kokona noi God a tangaloi* lingilingi lalakua mana tangaloi* kikikila na Uliuli* Kokona mana ngwarasea* maira ramo vanamai vaki maia.

²⁸Ramo viti lakwae kwara, “?Ku hagwe na nomu bakotoana ave kwara kona toko vai na kinau vano hi? ?Ihe u rivukiko komo toko vai kwehi?”

²⁹Hikani i Jisas mo daraki lakwara mo viti kwara, “I nau na uduhuri na kinau katukwale kikamu vae tulu ne darakinia lakweau, vunu i nau nari viti lakwakamu kwara nu gwatua ave nomo toko vai na kinau aira vano hika.

³⁰Tulu daraki na nogu leo hika. ?I God u rivuki Sione kwara ne bavtaes na tangaloi, diko a tangaloi rau rivukia?”

³¹Hikani ramo toko vikwahaki luna aira mulekinira, ramo viti kwara, “?Tana viti kworoho? Diko tana daraki kwara ‘I God u rivukia,’ vae ne viti kwara, ‘?Kworoho tulu heva hauhuri tea lui Sione?’

³²Vae tanahe viti lai tea kwara, ‘A tangaloi rau rivukia.’ ” Rau viti kwehi huri rau mataku kina tangaloi, huri a tangaloi savia rau hago lo leoki kwara i Sione aia a tangaloi* duruduruki kareaki.

³³Vunu ramo daraki lakwai Jisas ramo viti kwara, “Kehe kikilai tea.” Vunu i Jisas mo viti lakwara kwara, “I nau vake nahe viti tea lakwakamu kwara nu hagwe na nogu bakotoana ave nomo vai na kinau vano hi.”