Read West Ambae MAK 13 Bible Online

MAK 13 - West Ambae bible

MAK 13

¹Lolona i Jisas mo tiraki na Vanua* Kokona noi God, a nona ngwalagelo katukwale mo kwaha maia mo viti kwara, “!Tagaia Tisa! Hava na vatu karekarea vano hi mana ingwa vano hikani.”

²Vae i Jisas mo daraki mo viti kwara, “Tulu tagai na ingwa lalakua vano hikani. A vatu vano hi vae hete kwara te katukwale ne eno lo tanotanona. A tangaloi rana vai savi na vatu vano hi rana visoviki.”

³Hikani i Jisas mo hugu lo Vuti na Vikai* a Violev, a nakona vovohi na Vanua* Kokona noi God. Vae i Pita, i Semis, i Sione, mai Aduru ramo vanamai vaki maia, ramo uhia raraveki

⁴ramo viti kwara, “Ko viti lakwakami. ?A kinau vano hikani ranari mule luna kihokua? ?A hava kaivosangi hinea ne vosangi kwara hikani a taro huri na kinau vano hi vunuhia rana mule luna?”

⁵Vunu i Jisas mo tinakaki mo huhuira mo viti kwara, “Tulu tagahuri ne karea. Tulu hatu tiraki na tangaloi ramo sinasinakamu.

⁶A tangaloi rusa rana vanamai lo hinagu, rana viti kwara, ‘I nau hika i nau i Vurae*,’ vae rana sina na tangaloi rusa.

⁷Lolona tulu ne rongo na roro na vuro garagarani mana roro na vuro vakahao, vae i kamu tulu hatu mataku. A kinau aira vano hi rana mule luna, vae a gweregwereki hete radu.

⁸A tangaloi na vanua katukwale rana vai vuro vovohi na tangaloi na vanua dolua, a hugwe na mamalukoro katukwale ne vai vuro vovohi na hugwe na mamalukoro dolua. Ne ruru vataha na mahagweki, ne gwakere. Vae a kinau aira vano hi aira hoki na natu vavine hinea a lolona mo tinakaki mo kadia ki natuna.

⁹“I kamu sibomiu tulu tagahuri ne karea. Vae a tangaloi rana kwiribibikamu rana lavikamu vaki lo nako na tangaloi tovotovo kwara rana arekikamu. Rana takwilikamu lolo vale* na tiutangaroa. I kamu tulu ne tu vovohi na tomuai-tangaloi na vanua rusa mana hugwe lalakua huriau, huri kwara vae tulu ne matangwasaraki na Roro Karea lakwara.

¹⁰Tulu ne vai hokinia hi huri a Roro Karea ne kwalahakiana tomuaki lakwa na tangaloi na ureure rusa doluaki na varamana, vunu vari a rani ki rovonaki.

¹¹Vae lolona rana kwiribibikamu rana lavikamu vaki lo tanotano na arekiana, tulu hatu domidomi haburu tomuaki kwara vae tulu ne viti a havakinau. A taroki ne vanamai, tulu neri viti a havakinau hi a Tanungwe Kokona ne bete lakwakamu, huri a leo vano hi tulu ne viti, hete nomiu, rana vanamai tina Tanungwe Kokona.

¹²Vunu a tangaloi rana tovo matematei ratuaga vohoki kwara rana va mate, a tama rana vai kwehini lakwai raranatuga. A raranatu vake rana halebohi vovohi raratamaga mai raretahiga rana tovo matemateira.

¹³Savi na tangaloi rana bega kikamu huriau. Vae ihe hi ne tu madimadi vaki lo gwereki ne ahi.”

¹⁴Vunu i Jisas mo viti kwara, “Tulu ne tagai na kinau u hati haburu hinea u magaraki na vanua ne tu lo tanotano hinea he taritarisa te kwara ne tu eia vae ne vakangwedaia.” (A tangaloi hinea ne valuki na leo hikani, u karea kwara ne kikilaia.) “Lo taro aia hi vae a tangaloi hinea rau hugu lo vanua Sutia u karea kwara rana kwakwalaoki vaki lolo vuti.

¹⁵A tangaloi hinea u hugu varea tina ingwana, u karea kwara ne hatu vaivai ta tuai kwara ne soro vaki lolo ingwana, kwara ne kahi te kinau ne lai maia.

¹⁶A tangaloi hinea lolo talutalu u karea kwara ne hatu mule taliku vaki tatana huri na lugwana.

¹⁷!Oo! A rongoana hati lakua haburu lakwa na ravavine hinea rau tatagwangira, mana raretahi rau bava natu karagwa lo rani aira vano hi.

¹⁸Tulu tiutangaroa lakwai God kwara a kinau vano hikani rana hatu vanamai lo taro* na katama dovo.

¹⁹Lo rani aira vano hini a tangaloi rana rongo hati silesiletia hinea ramo toko rongo hati tuai, mo tinakaki i God mo tau na varamana tarisaki hikani. Vae nehe hokinia te taliku vaki tuai.

²⁰Vae a Hugwe* i God ne hivoki na valuvalu na rani vano hi. Kwara vae diko nehe vai te kwehini, kwara vae a tangaloi ranahe ahi tea. Vae ne hivoki na valuvalu na rani vano hi huri na nona tangaloi hi mo mataira.

²¹“Vunu diko te katukwale ne viti lakwakamu kwara, ‘!Tulu tagaia, i Vurae* aia hike!’ diko ‘!Tulu tagaia, aia takwahinea!’ tulu hatu hauhuri luna.

²²A Vurae kurakura mana tangaloi* duruduruki kurakura rana maraka, rana vai a kaivosangi mana idilakiana rusa kwara rana sina na tangaloi. Rana vai kwehini huri kwara vae diko rana hagwe na hala tea, rana sina na tangaloi hinea i God mo mataira vake.

²³Vae i kamu tulu ne tagahuri ne karea. Nu viti vunuhi na kinau vano hi lakwakamu tomuaki, vunu ranari mule luna.”

²⁴Vunu i Jisas mo viti vake kwara, “Lo rani hinea takuni tina rongoana hati hi, a mataniaho ne dodoka, a vula nehe varama tea,

²⁵a vitu rana sovi tina taetae, vake a kinau hinea rau huira lo mahaleki, i God ne vaira rana kusa tina tanotanoga.

²⁶Vunu a tangaloi rana tagaiau, i nau a Natu* na Tangaloi, na mulemai lolo taenalangi mana huirana lakua mana hahaviada.

²⁷Vunu i nau na hokaki na nogu kaihora tina taetae rana vileki na tangaloi hinea nomo mataira tina ngwahuku na varamana gwatu kaivati. Ne tinakaki lo gweregwere na varamana lo duviki vaki lo duviki.”

²⁸Vunu i Jisas mo viti kwara, “Tulu huhui tina vikai* hi a vivik. Lolona a rangaki ramo kesakesana a rauki ramo tavu, tulu kikilai kwara a taro na bulamiu saru. [13]

²⁹Vae lo hala hokinia hi tulu ne tagai na kinau vano hini rana mule luna, vae tulu neri kikilai kwara i nau, a Natu* na Tangaloi nu garagarani, hokinia kwara i nau lo matakihala.

³⁰Kareaki na viti lakwakamu, a tangaloi hinea rau toka hika kwahale ranahe mate vunu tea, tarisaki savi na kinau vano hi rana mule luna.

³¹A taetae mana varamana vae raru ne tikei, vae a leogu nehe tikei lai te vohoki.”

³²Vunu i Jisas mo gweregwere na nona leo mo viti kwara, “Hete kwara te katukwale u kikilai kwara a raniki diko a taroki hi ne vanamai kihokua, hete kaihora tina taetae, hete a Natuki, aia a Tamaki kehekeheki u kikilai.

³³Tulu tagataga tulu likoki, huri tulu he kikilai tea kwara a taroki ne maravuti kihokua.

³⁴Aia hoki na tangaloi katukwale hinea u vano tina tatana u lagalaga, mo tau terekaki na nona kinau tilo kaba na nona tangaloi boloki. Vatavatahakinira rau tu lo noga boloki kwara rana vai. Mo viti lakwa na kaitagahuri na matakihala kwara ne tagataga.

³⁵Tulu tagahuri ne karea, huri tulu he kikilai tea kwara a hugwe na ingwa hi ne mulemai kihokua. Ne mai mulemai te lolo raviravi, diko te lolo livukai-bongi, diko te luirani, diko lolo rovobongi.

³⁶Vae diko ne maravuti lai nga ne hatu hagwekamu kwara tulu maturu.

³⁷A havakinau hi nomo viti lakwakamu, nu viti lakwa na tangaloi doluaki. Tulu tagataga.”