Read West Ambae MAK 14 Bible Online

MAK 14 - West Ambae bible

MAK 14

¹Hikani a rani kairua tomuaki na kanikani* lakua hinea rau kwarekinia a Kanikani* na Tivekiana mana Kanikani* na Bereti* hinea a Is Tikei Lolona. A tangaloi* lingilingi lalakua mana tangaloi* kikikila na Uliuli* Kokona rau soro haro na hala kwara vae rana kwiribibi Jisas tavuniki, rana kwohi mateia.

²Ramo viti kwara, “Ta hatu vaia lolo taro na kanikani lakua, vae a vao ramai vikwali maikita.”

³I Jisas u hugu lo gwatuivanua Betani lolo ingwa i Saemon hinea tuai a lengeana hati na vinu [14] mo vaia. Mo toko kanikani, a vavine katukwale mo vanamai mana botele u kihiana lo vatu, a hinaki a alabasta*, u kukwere kina vurae boniboni lolona, a hinaki a nat* hinea a maneki u lakua haburu. Mo vai volohi na mango na botele hi mo lilingi na vurae hi tilo gwatu i Jisas.

⁴A tangaloi ratuaki eia rau lologute, ramo toko kwahakwaha mulekinira ramo viti kwara, “?Kworoho mo vai behiki na vurae boniboni hi?

⁵Hi kwara ne hokakinia, a maneki ne sileti na vatu u tari vakavidolua vakaitolu, ne bete na maneki lakwa na tangaloi kakaravi.” Ramo maraka ramo toko lelehi na vavine hi.

⁶Vunu i Jisas mo viti kwara, “Tulu tirakinia. ?Huri aha tulu mo vaia mo rongo hati? Aia u vai na kinau karea lakweau.

⁷I kamu a kakaravi rau hugu maikamu tigwaravu, vae lo taroki tulu mo lengaia tulu neri hago maira. Vae i nau nahe hugu te maikamu tigwaravu.

⁸Aia u vai lai mo vaia. Aia u vurae rarai na tarabehigu tomuaki vunu ranari tauau tilo gwaru-malanga*.

⁹Kareaki na viti lakwakamu, takwanahavaki a tangaloi rana kwalahaki na Roro Karea doluaki na varamana, rana viti na havakinau hini a vavine hika mo vai, rana domihagwea luna.”

¹⁰Vunu i Sutas Iskariot, aia katukwale tina ngwalagelo hangavulu dongwana kairua, mo vano vaki mana tangaloi* lingilingi lalakua kwara ne tovo kai Jisas lakwara.

¹¹Vae ramo rongo kwara i Sutas u viti kwehi lakwara rau lagwa haburu. Ramo viti lakwae kwara vae rana bete mane* lakwae. Vunu i Sutas mo soro haro na halaki kwara ne tiraki i Jisas tilo kabaga.

¹²Lo rani tomuaki na Kanikani* na Bereti* hini a Is Tikei Lolona, a tangaloi rau tuku sio utu dodono na sivsivi* kwaririgi huri na Kanikani* na Tivekiana. Vae lolona hi, a ngwalagelo noi Jisas ramo uduhuri kinia ramo viti kwara, “?I nigo ku lengaikami kwara kena vano vaki ave, kwara kena vai rarai na Kanikani na Tivekiana huriko eia?”

¹³Hikani i Jisas mo hora na nona ngwalagelo kairua tiura, mo kwaha mairarua mo viti kwara, “Kuru vano vaki lo gwatuivanua lakua, vae kuru ne hagwe na ngwera katukwale, u huni kwai, vae kuru mo huria nga.

¹⁴Vae mo soro tilolo ingwa, kuru mo huria, kuru mo uduhuri kina tangaloi na ingwa hi, kuru mo viti lakwae kwara, ‘A Tisa u viti kwara, “?A nogu tanotano ave kwara i nau mana nogu ngwalagelo kena kani na Kanikani na Tivekiana eia?” ’

¹⁵Vae aia neri vosangikamurua kina tanotano lakua kairuaki aulu. A kinau savia rau raraiana lolona ba. Takwahini kuru mo vai rarai hinaka hurikita.”

¹⁶Vunu a ngwalagelo kairua hi raru mo vano vaki lo gwatuivanua lakua hini, raru mo taga savi na kinau hokinia hi i Jisas mo viti lakwararua. Raru mo vai rarai savi na kinau huri na Kanikani na Tivekiana.

¹⁷Lolo raviraviki, i Jisas mo vanamai mana nona ngwalagelo hangavulu dongwana kairua.

¹⁸Lolona ramo hugu hivo ramo toko kanikani, i Jisas mo kwaha maira mo viti kwara, “Kareaki na viti lakwakamu, vae katukwale tikamu ne tirakiau tilo kaba na nogu tavaluivuro. Aia katukwale tikamu hika tulu mo toko kanikani maiau.”

¹⁹A nona ngwalagelo ramo rongo hati, ramo uduhuri ki Jisas katukwale kehe nga, ramo viti kwara, “?Ihe? ?I nau?”

²⁰I Jisas mo daraki mo viti kwara, “Katukwale tikamu hangavulu dongwana kairua, tulu mo toko hehe na kamiu bereti maiau lolo laha hika katukwale.

²¹I nau, a Natu* na Tangaloi, vae na mate hoki na Uliuli* Kokona mo viti. Vae nu hahakavi haburu huri na tangaloi hinea ne tirakiau tilo kaba na tavaluivuro. U karea lakwa na tangaloi hi kwara ne hatu va vora.”

²²Lolona ramo toko kanikani, i Jisas mo lavi na bereti*, mo lagwaki God huri. Vunu mo volo utuutuhia mo bete lakwa na nona ngwalagelo mo viti kwara, “Tulu lai. Hikani a tarabehigu.”

²³Vunu mo lavi na laha waen, mo lagwaki God huri. Vunu mo bete lakwara, aira vunu ramo inu luna.

²⁴I Jisas mo viti kwara, “Hikani a daigu hinea ne vai na leo harikiana noi God maikamu ne tu. A daigu hi ne huki tivarea huri na tangaloi rusa.

²⁵Kareaki na viti lakwakamu, i nau nahe inumi na waen te hi taliku rovonaki hini na inumi na waen karagwa lo Vanua Karagwa hinea i God u hugwe koroa.”

²⁶Ramo kahoki na bolo na kaluhakiana, vunu ramo ngwalua tivarea ramo vano vaki lo Vuti na Vikai* a Violev.

²⁷Vunu i Jisas mo kwaha maira, mo viti kwara, “Vunuvunuhikamu a domimiu rana sovi tulu ne kwalao tiau, huri a Uliuli* Kokona u viti kwara, ‘I God ne kwohi matei na kaitagahuri na sivsivi, a sivsivi rana kwalao katukwale kehe.’

²⁸Vae takuni tina nogu marakaana tina mateana na vano tomuakikamu vaki Galili*.”

²⁹I Pita mo daraki mo viti kwara, “Diko aira vunu a domiga rana sovi rana kwalao tiuko, vae i nau hetea.”

³⁰Vunu i Jisas mo kwaha mai Pita mo viti kwara, “Kareaki na viti lakwako, bongi hika a toa nehe tarere te vakairua radu nga, kona herevunikiau vakaitolu kwara kohe kikilaiau tea.”

³¹I Pita u kwaha madi mo viti kwara, “Diko i nau na mate haragoki maiko, vae i nau nahe herevunikinigo tea.” A ngwalagelo savira ramo viti hokinia nga.

³²Hikani ramo vano vaki lo talutalu katukwale u kwareki Getsemane, i Jisas mo kwaha mana nona ngwalagelo mo viti “Tulu hugu hike, na va tiutangaroa.”

³³Mo lavi i Pita, i Semis, i Sione ramo huria. Lolo domina mo tinakaki mo rongo hati, a matakuta mo vanamai tiluna.

³⁴Mo viti lakwara kwara, “A rongoana hati lolo domigu u lakua haburu, u vaiau nu rongo hati kwara na mate. Tulu hugu hike, tulu tagataga.”

³⁵Aia mo lakao kusaki kelekele tiura, mo sovi hivo tilo tano, mo tiutangaroa, mo uduhuri kwara diko mo karea a taro na rongoana hati hi ne vano tiua.

³⁶Mo tiutangaroa mo viti kwara, “Aba,” a domianaki kwara “Mama.” “Vunuhi na kinau rau magemu lakwako. Ko lavi na laha na rongoana hati hika tiau kwara vae na hatu inu luna. Aia ko hatu vai luna i nau nomo lengaia, vae ko vai luna hokinia i nigo ku lengaia.”

³⁷Vunu mo mule taliku haro na nona ngwalagelo hi kaitolu mo hagwera rau maturu, mo kwaha mai Pita mo viti kwara, “?Saemon, ku maturu? ?Konahe vai lai tea kwara kona tagataga te aoa katukwale?

³⁸Tulu tagataga ne karea, tulu tiutangaroa, kwara tulu nehe sovi tea tilo sinasina hati. A domimiu u huira, vae a tarabehimiu u keokeo.”

³⁹Vunu mo vano taliku, mo tiutangaroa, mo viti na leo hokinia hi taliku.

⁴⁰Vunu mo mule harora taliku mo hagwera rau maturu, huri a mataga rau mava. Vae rahe kikilai tea kwara rana viti kworoho lakwae.

⁴¹Lolona mo mule taliku vakaitoluki, mo kwaha maira mo viti “?Tulu maturu, tulu mabu radu nga? !U karea te ba! A taroki u maravuti. !Tulu tagaia! I nau, a Natu* na Tangaloi, a tangaloi u tirakiau tilo kaba na tangaloi doridori hati maira.

⁴²Tulu maraka, ta vano. Tulu tagaia, a tangaloi mo tovo kagu aia hi u maravuti.”

⁴³Mo toko kwahakwaha radu nga, i Sutas aia hi katukwale tiura hangavulu dongwana kairua, mo maravuti. A vao ramo huria rau kwali a bue mana ngwasa. A tangaloi* lingilingi lalakua mana tangaloi* kikikila na Uliuli* Kokona mana ngwarasea* maira rau horara.

⁴⁴A tangaloi hini u tovo kai Jisas, u viti terekaki na kaivosangi lakwara ba, mo viti kwara, “A tangaloi hi na bobonia, aia hi. Tulu kwiribibia, tulu mo lavia, tulu tagahuria ne karea.”

⁴⁵Lolona hi i Sutas mo maravuti, mo hena vaki mai Jisas, mo viti kwara, “Tisa.” Hi mo bobonia.

⁴⁶Hikani ramo kwiribibi i Jisas, ramo lavia.

⁴⁷Vae katukwale tiura hini rau tu garagarani, mo rauni na nona bue, mo tai suati na gwero na tangaloi boloki nona hugwe na tangaloi lingilingi.

⁴⁸I Jisas mo viti lakwara kwara, “?Kworoho tulu mo vanamai huriau tulu mo hago bue mana ngwasa kwara tulu ne laviau, hokinia kwara i nau te tangaloi uauabalu tangaloi?

⁴⁹Vataha na rani nu hugu maikamu, nomo toko huhui lolo Vanua* Kokona noi God, vae tulu he kwiribibiau tea. Vae a Uliuli Kokona ne kworo kareaki.”

⁵⁰Vunu a nona ngwalagelo vunuhira ramo tirakinia ramo kwalao tiua.

⁵¹A ngwalagelo katukwale u baribariki na lugwa lotu, mo huri i Jisas. Hikani ramo vai kwara rana kwiribibia, ramo kwiri lo barina vohoki,

⁵²mo kwalao vuroki tina barina.

⁵³Vunu ramo lavi Jisas vaki lo ingwa na hugwe na tangaloi* lingilingi, hinea a tangaloi* lingilingi lalakua savia, mana ngwarasea*, mana tangaloi* kikikila na Uliuli* Kokona rau tuku vanamai kwara rana vileki tabulutaki eia.

⁵⁴I Pita u tuku huri tiutiuki Jisas mo soro tilolo loloiara na ingwa na hugwe na tangaloi lingilingi. Mo hugu hivo mana kaitagahuri maira mo toko manihu.

⁵⁵A tangaloi lingilingi lalakua mana Tangaloi* Tovotovo Lalakua doluaki, ramo soro haro na tangaloi hinea kwara rana viti i Jisas u vai na hatiki, kwara vae ne mate huri, vae rahe hagwe te vohoki.

⁵⁶A hagoleo rusa rau viti na kurakura rusa vovohi Jisas, vae a noga leo rahe hariki tea katukwale.

⁵⁷Vunu a tangaloi tuaki ramo maraka hake, ramo viti na kurakura hika vovohi Jisas,

⁵⁸ramo viti kwara, “Keu rongo u viti kwara, ‘Na vai letiuki na Ingwa Kokona noi God hikani a tangaloi aira rau kihi, vae takuni tina rani kaitolu na tabea katukwale vake hinea he kihiana te kina kaba na tangaloi.’ ”

⁵⁹Vae aira vake a noga leo rahe hariki tea katukwale.

⁶⁰A hugwe na tangaloi lingilingi mo maraka lo livukaga, mo uhi Jisas mo viti “?Kworohokinia kohe va daraki na leoga te hinea ramo toko vitira vovohiko?”

⁶¹Vae i Jisas u hugu butu he malangaki na leo tea. Hikani a hugwe na tangaloi lingilingi mo uduhuri kinia taliku mo viti “?I nigo i Vurae*, i Natu i God hinea tau domi mavakinia?”

⁶²I Jisas mo darakinia mo viti kwara, “Io. I nau aia hi. Vae tulu ne tagaiau, i nau a Natu* na Tangaloi, nu hugu lo matuai God na Huirana, na vanamai lolo taenalangi na taetae.”

⁶³A hugwe na tangaloi lingilingi mo dare na lugwana, mo kwaha mo viti kwara, “?Kworohokinia tamote soro haro na hagoleo vake?

⁶⁴Tulu rongo na nona leo hati ba vovohi God. ?Tulu domi kworoho huria?” Aira doluaki ramo daraki kwara vae ne mate.

⁶⁵Tuaki ramo maraka ramo lido tiluna, ramo kweti koro na matana, ramo tukwaia, ramo kwaha luna ramo viti “I nigo a tangaloi* duruduruki. Ko viti. ?Ihe hi mo toko tukwaiko?” A kaitagahuri ramo lavia ramo toko raba lalikinia.

⁶⁶Hikani i Pita aia evina lo loloiara na ingwa radu nga. A tangaloi boloki vavine nona hugwe na tangaloi* lingilingi mo lakao utu.

⁶⁷Mo tagai Pita u tuku manihu mo tagataga huria, mo kwaha maia mo viti kwara, “I nigo vake ku tuku hurihuri i Jisas a ngwera Nasaret.”

⁶⁸Hika mo haro mo viti kwara, “I nau nohe kikilai tea. Nohe kikilai tea kwara ku tuku viti naha.” Mo ngwalua mo lakao vaki lo matakihala na ingwa, hikani a toa mo tarere.

⁶⁹A tangaloi boloki vavine hi mo tagaia, mo viti taliku lakwa na tangaloi ratuaki rau tu takwa-hi kwara, “A tangaloi hika aia katukwale tiura vake.”

⁷⁰Vae i Pita mo harovia taliku. He tuai tea a tangaloi rau tu takwa-hi ramo viti lakwai Pita kwara, “Kareaki i nigo katukwale tiura, huri i nigo vake a ngwera Galili*.”

⁷¹I Pita mo maraka mo hahariki mo viti kwara, “!Ei! Diko nu kura i God ne vai kadiau huri. I nau nohe kikilai na tangaloi te hika tulu mo toko vitia.”

⁷²Heheriki hini a toa mo tarere vakairuaki, i Pita mo domihagwe kwara i Jisas mo kwaha maia tomua mo viti kwara, “A toa nehe tarere te vakairua radu nga, kona herevunikiau vakaitolu kwara kohe kikilaiau tea.” Vae u rongo hati haburu, mo tangi.