Read West Ambae MAK 15 Bible Online

MAK 15 - West Ambae bible

MAK 15

¹Lolo rovobongi bise a tangaloi* lingilingi lalakua ramo vileki tabulutaki mana ngwarasea*, a tangaloi* kikikila na Uliuli* Kokona, mana Tangaloi* Tovotovo Lalakua ratuaki. Ramo vai na tovotovo hati, vunu ramo gwaru i Jisas, ramo lavia, ramo taua lo kaba i Paelet*.

²I Paelet mo uduhuri kinia mo viti “?I nigo a Hugwe Lakua nona gwaloana noi Isrel*?” I Jisas mo daraki lakwae mo viti kwara, “Aia hokinia hi komo viti.”

³A tangaloi lingilingi lalakua ramo lidu i Jisas kina leo hati rusa.

⁴Hikani i Paelet mo uduhuri kinia taliku, mo viti “?I nigo konahe daraki na leoga tea? Ko taga, hika rau liduko kina leo rusa.”

⁵Vae i Jisas he kwaha tea. Hikani i Paelet u idila haburu kinia.

⁶Tigwaravu lo taro na Kanikani* na Tivekiana, i Paelet u tuku tiraki na tangaloi gwarugwaru katukwale tivarea lo leo na tangaloi rusa.

⁷Lo taro aia hi a tangaloi ratuaki rau hugu lolo ingwa na gwarugwaru huri ramo maraka ramo vai vuro vovohi na kavman, vae ramo ua mate tangaloi. Katukwale tiura hi a hinana i Baravas.

⁸Hikani a vao ramo vanamai ramo uduhuri ki Paelet* kwara vae ne vai a kinau lakwara hokinia mo toko vai tigwaravu.

⁹Vunu i Paelet mo uduhuri kinira mo viti kwara, “?Tulu lengaia kwara na tiraki na Hugwe Lakua nona gwaloana noi Isrel* lakwakamu?”

¹⁰I Paelet u kikilai kwara a tangaloi* lingilingi lalakua rau karoki Jisas huri na nona bolokiana, vae huri hi ramo tirakinia lakwae.

¹¹Vae a tangaloi lingilingi lalakua ramo susuni na vao kwara rana uduhuri ki Paelet kwara ne tiraki i Baravas lakwara, vae i Jisas hetea.

¹²I Paelet mo kwaha taliku mo viti kwara, “?Vae na vai kworohoki na tangaloi hi tulu mo kwarekinia kwara a Hugwe Lakua nona gwaloana noi Isrel?”

¹³Ramo maraka ramo koleki lakwae taliku ramo viti “!Durua tilo kaibetu!”

¹⁴I Paelet mo uduhuri kinira mo viti “?Huri aha? ?U vai na havakinau mo hati?” Vae ramo koleki karakara vake siletia tomua, rau viti “!Durua tilo kaibetu!”

¹⁵I Paelet u lengaia kwara ne vai na vao rana lagwa, vae mo tiraki i Baravas lakwara. Mo viti lakwa na nona tangaloi na vuro kwara rana takwili i Jisas, vunu mo tirakinia lakwara kwara rana durua tilo kaibetu.

¹⁶Hikani a tangaloi na vuro ramo lavi Jisas tilo loloiara na ingwa na arekiana nona kavman, u kwareki a Praetoriam. Ramo kware tabulutaki na tangaloi na vuro rovorovonaki.

¹⁷Ramo tau na lugwa u kara dodoka lui Jisas, vunu ramo viri na karo hohokoti, ramo lilia, ramo kwokworia tilo gwatuna.

¹⁸Vunu ramo maraka ramo vai mavaki kurakurakinia, ramo viti kwara, “!I nigo a Hugwe Lakua nona gwaloana noi Isrel*!”

¹⁹Hikani ramo toko viliti na gwatuna kina ngwasa, ramo lido tiluna, ramo titiugwao ramo olo vovohia.

²⁰Ramo veveki rera kinia mo rovo, vunu ramo teri na lugwa u kara dodoka tiua, ramo lugwae kina lugwana taliku, vunu ramo lavia tivarea kwara rana durua tilo kaibetu.

²¹Ramo lakao lo hala ramo hagwe na tangaloi katukwale a hinana i Saemon, a ngwera Saerini, u vanamai tina vanua auta kwara ne va vano vaki lo gwatuivanua lakua. Aia i tama i Aleksada mai Ruvas. Vae ramo susuni ngwavingwavikinia kwara ne kwali na kaibetu i Jisas.

²²Ramo lavi Jisas vaki lo tanotano katukwale u kwareki Golgota, a domianaki kwara “A Tanotano na Hui na Gwatu na Tangaloi.”

²³Ramo lavi na waen u rokeana mana meresin hi a mir*, ramo bete lakwae, vae u bena inu.

²⁴Vunu lo mataniaho galo ramo durua tilo kaibetu. Ramo kwaheki na lugwana lo livukaga, vunu ramo tatiki na taes kwara rana taga kwara ihe ne lavi na hava lugwa.

²⁵

²⁶Vunu a leo hinea ramo hagwea luna hinea mo viti kwara, “Aia a Hugwe Lakua nona gwaloana noi Isrel*” ramo ulia ramo taua tilo kaibetuna.

²⁷Vunu ramo lavi na tangaloi uabalu tangaloi kairua, ramo dururarua tilo kaibetu hoki i Jisas vake, kairuaki lo matuana, kairuaki lo ngwairina. [15]

²⁸

²⁹A tangaloi ramo lakao utu, ramo kwahakwaha tagaia, ramo dekidekiki gwatuga vovohia, ramo viti kwara, “!A heo! I nigo hinea ko vai kwara kona talahi na Ingwa Kokona noi God, vunu kwara kona tabea taliku a rani kaitolu.

³⁰

³¹Lo halaki hokinia hi vake, a tangaloi* lingilingi lalakua mana tangaloi* kikikila na Uliuli* Kokona ramo toko mana tiehia, ramo toko kwahakwaha kinira, ramo viti kwara, “Aia u tuku vakahiki na tangaloi ratuaki, vae aia nehe vai lai tea kwara ne vakahikinia sibona.

³²I Vurae*, a Hugwe Lakua nona gwaloana noi Isrel, kwara ne hivo tina kaibetuna hika lai nga vae tana tagaia, tanari hauhuri luna.” I rarua hi ramo dururarua tilo kaibetu hoki i Jisas, i rarua vake raru tuku kwahakwaha hati vovohia.

³³Lo mataniaho kaheata a dodo mo vanamai hoki na bongi, mo gui koro na vanua doluaki rovonaki lo mataniaho dori lakua.

³⁴Lo mataniaho dori lakua i Jisas mo kware karakara mo viti “Eloi, Eloi. ?Lama sabaktani?” A domianaki kwara, “Nogu God, nogu God. ?Kworoho komo tirakiau?”

³⁵Ratuaki rau tu garagarani ramo rongoa, ramo viti kwara, “Tulu tagaia, u tuku kware haro i Elaesa.”

³⁶A tangaloi katukwale mo kwalao mo lavi na koten, mo hehea lo waen kokona, mo taua lo gweregwere na mavuro mo hokakinia lakwae kwara ne inumia, mo viti “Tulu hatu vai ba. Ta taga kwara i Elaesa mo vanamai mo suria tegetano tina kaibetu diko hetea.”

³⁷Hikani i Jisas mo kware karakara, vunu hi a mabuna mo rovo.

³⁸A lugwa* na bolo kabakaba hinea mo toko dule koro na Tanotano Kokona Karakara hinea lolo Ingwa Kokona noi God, mo madadare kairua, mo tinakaki aulu vaki evina.

³⁹A kaitomuaki na tangaloi na vuro u tu koro na nako i Jisas mo tagaia kwara u mate kworohokinia, mo viti “Kareaki a tangaloi hikani aia i Natu i God.”

⁴⁰A ravavine ratuaki takwa-hi vake, rau tu vakavakahaoka ramo toko tagaia. Tuaki tiura i Meri a vavine Maktala, mai Salome, mai Meri i retahi i Semis kelekele mai Sosev.

⁴¹Rau tuku huri Jisas lolona hinea aia lo vanua Galili*, ramo toko hago maia. A ravavine rusa vake eia hinea ramo vanamai harago mai Jisas vaki Serusalem.

⁴²Mo toko raviravi i Sosev a ngwera Arimatia mo maravuti. Aia katukwale tina Tangaloi* Tovotovo Lalakua hinea a tangaloi rau domi mavakinia, vae u hugu tara kwara i God ne hugwe koro na bulana tangaloi. A rani hi a Rani na Vai Raraiana huri na Rani* na Mabuana, vae huri hi mo vano vaki mai Paelet*, he mataku tea, mo uduhuri kinia kwara ne tirakinia ne lavi na tarabehi i Jisas.

⁴³

⁴⁴Hikani i Paelet mo rongo kwara i Jisas u mate ba, u idila haburu. Mo kware na nona kaitomuaki na tangaloi na vuro mo uduhuri kinia kwara i Jisas u mate ba diko hetea.

⁴⁵Lolona i Paelet mo rongo kwara a kaitomuaki hini mo viti kwara u mate ba, mo masingeki na tarabehi i Jisas lakwai Sosev.

⁴⁶Vunu i Sosev mo voli na lugwa lotu u karea, mo suri na tarabehi i Jisas tina kaibetu, mo lugwatia kina lugwa hi, mo lavia mo taua lolo gwaru-malanga* hinea a tangaloi ramo kelia tina vatu. Mo taleleki na vatu lakua katukwale, mo saro koro na matakihala na gwaru-malanga hi.

⁴⁷I Meri a vavine Maktala mai Meri i retahi i Sosev raru tagai na tanotano hini ramo luluki i Jisas eia.