Read West Ambae MAK 16 Bible Online

MAK 16 - West Ambae bible

MAK 16

¹A Rani* na Mabuana mo rovo, vunu i Meri a vavine Maktala, i Salome, mai Meri i retahi i Semis, ramo vano ramo voli noga kinau* boniboni kwara rana vurae na tarabehi i Jisas kinia.

²Hikani lo Sade sirovobongi bise a mataniaho mo takwaka, ramo vano vaki lo tabu.

³Ramo lakao lo hala, ramo toko uhiuhira muleki kwara, “?Ihe ne rihi na vatu lakwakita te hika, tina matakihala na gwaru-malanga* hi?”

⁴Hikani ramo lalangao, ramo tagai na vatu hi huri u lakua haburu, vae u rihiana ba.

⁵Ramo soro tilolo gwaru-malanga hi, ramo tagai na ngwalagelo katukwale mo hugu lo matua na gwaru-malanga hi, u lugwaki na lugwa lotu gwaravu, ramo maruti kinia.

⁶Hika mo kwaha maira mo viti kwara, “Tulu hatu mataku. Nu kikilai kwara tulu tuku taga haro i Jisas, a ngwera Nasaret, aia hi hinea ramo durua tilo kaibetu. Vae u tikei hike. U maraka taliku. Tulu tagai na tanotanona ramo lulukinia eia.

⁷Tulu vano tulu viti lakwa na nona ngwalagelo, i Pita, maira ratuaki vake, kwara aia ne vano tomuakikamu vaki Galili*. Tulu ne tagaia takwa-hi, hokinia hi mo viti terekaki lakwakamu.”

⁸Hikani ramo ngwalua tivarea ramo kwalao tina gwaru-malanga hi huri rau rongo a huiga u titikeiki ramo rurururu kina matakuta. Vae rahe viti na kinau te vohoki lakwa na tangaloi kwara te katukwale, huri rau mataku haburu. [16]

⁹I Jisas u maraka tina mateana, lo Sade sirovobongi bise mo vosangia sibona tomuaki lakwai Meri a vavine Maktala, aia hinea i Jisas mo livuti na tanungwe hati kaibitu tiua.

¹⁰A vavine hi mo mule vaki mai rabului Jisas hinea rau rongo hati rau tuku tangi, mo vitia lakwara.

¹¹Vae lolona ramo rongo mo viti kwara i Jisas u ahi, aia u tagaia, rahe hauhuri te luna.

¹²Vunu takuni tiua hi i Jisas mo vosangia sibona lakwa na nona ngwalagelo kairua lo halagaru vaki lo vanua auta, vae lo taro hi a tarabehina u dolua.

¹³Raru mo mule taliku raru mo viti lakwara ratuaki, vae rahe hauhuri te luna.

¹⁴I Jisas mo vosangia sibona rovonaki lakwa na nona ngwalagelo hangavulu dongwana katukwale lolona ramo toko kanikani. Mo kwaha luga, huri a noga hauhuriana tikei, vunu vake huri a domiga u madi haburu kwara rana hauhuri lo tangaloi hinea ramo viti kwara rau tagaia u ahi taliku.

¹⁵Mo kwaha maira mo viti kwara, “Tulu vano doluaki na varamana, tulu kwalahaki na Roro Karea lakwa na tangaloi doluaki.

¹⁶Ihe hi ne hauhuri lo Roro Karea hi ne lai bavtaes ne ahi. Vae ihe hi he hauhuri tea, i God ne arekinia tilo mateana.

¹⁷I God ne bete na kaivosangi na nona huirana aira hika lakwara hinea rau hauhuri. Lo hinagu rana livu tanungwe hati tina tangaloi, rana kwaha lo leo mataroi.

¹⁸Diko rana kwali a ngwata, diko rana inumi na kinau hati, vae ranahe rongo hati tea. Rana tau kabaga lo tangaloi hinea rau lenga vae rana ahi.”

¹⁹A Hugwe* i Jisas mo kwahakwaha mana nona ngwalagelo mo rovo vunu i God mo lavia tagaulu vaki lolo taetae, mo hugu lo matuai God.

²⁰A ngwalagelo ramo vano, ramo heretuva vataha na mahagweki, vae a Hugwe u hago maira, u vosangi kina kaivosangi rusa kwara a noga heretuva u kareaki. [17]