Read West Ambae MAK 2 Bible Online

MAK 2 - West Ambae bible

MAK 2

¹A raniki he rusa tea koroa, i Jisas mo mulemai taliku vaki Kavaneam, vae a roro mo vitiana kwara aia na vanua.

²A tangaloi u rusa ramo vanamai tabulutaki, vae a tanotano u tikei vohoki lakwara, kwara diko te vaki lo matakihala, tikei, u kukwere kina tangaloi. Hikani i Jisas mo toko heretuvaki na leo lakwara.

³Lo taro hi a tangaloi ramo vanamai vaki maia, rau kwali na tangaloi sarosaro katukwale a tarabehina rau mate. Aira kaivati ramo kwalia.

⁴Vae rahe soro lai te maia vaki mai Jisas huri na vao. Vae ramo kakwohi na mahigwa na ingwa* hivoulu, vovohi na mahao hi i Jisas mo tu eia. Ramo kakwohia mo rovo, vunu ramo tiraki na tangaloi hi tegetano mana herena hi mo ngwalulu luna.

⁵Vae Jisas mo tagai na noga hauhuriana, mo kwaha mana tangaloi sarosaro hi mo viti lakwae kwara, “Natugu. I nau nu domidomi koro na nomu hatiana, u rovo ba.”

⁶Hikani a tangaloi* kikikila na Uliuli* Kokona ratuaki rau hugu takwahini ramo toko domi lolo domiga kwara,

⁷“?Kworohokinia a tangaloi hika mo kwahakwaha hati vovohi God hokinia hi? A tangaloi nehe domidomi koro lai te hatiana. I God kehekeheki u vai lai.”

⁸Vae i Jisas u kikilai na domiga vakatukwale, mo kwaha maira mo viti kwara, “?Kworoho tulu mo toko dikoki lolo domimiu hokinia hi, huri na kinau aira vano hi?

⁹?Aia makive u magemu? ?Na viti lakwa na tangaloi hi a tarabehina rau mate kwara, ‘I nau nu domidomi koro na nomu hatiana, u rovo ba,’ diko na viti ‘Maraka, ko lai heremu, ko lakao’?

¹⁰Vae na vosangi lakwakamu tulu ne kikilai kwara i nau, a Natu* na Tangaloi, a nogu huirana eia lo varamana kwara na domidomi koro na hatiana nona tangaloi.” Vunu mo kwaha mana tangaloi sarosaro hi

¹¹mo viti kwara, “Na viti lakwako, ko maraka ko kwali heremu, ko mule vaki tatamu.”

¹²A tangaloi hi mo maraka mo kwali na herena, mo lakao lo nakoga. Vae rau idila vohoki, ramo kaluhaki God, ramo viti kwara, “Kehe toko taga te kinau hokinia hi tuai.”

¹³I Jisas mo mule taliku vaki lo Kwai* Tokatoka Lakua Galili*. Doluaki na vao ramo vanamai vaki maia, mo tinakaki mo huhuira.

¹⁴Vunu mo maraka mo lakao, mo tagai Livae i natu i Alveas, u hugu lo nona tanotano na tau mane*, a takis nona kavman. I Jisas mo kwaha maia mo viti kwara, “Ko huriau.” I Livae mo maraka, mo huria.

¹⁵Vunu takuni tiua hi i Jisas u kanikani lolo ingwa i Livae. A tangaloi* na vilevile mane, a takis nona kavman, mana tangaloi* vaivai hati tavalavarea u rusa ramo huri i Jisas, vae ratuaki rau hugu mai Jisas mana nona ngwalagelo ramo kanikani maira.

¹⁶A tangaloi* kikikila na Uliuli* Kokona ratuaki mana Varisi* maira, ramo tagai Jisas kwara u kanikani mana tangaloi vaivai hati tavalavarea mana tangaloi na vilevile takis nona kavman, ramo uduhuri kina nona ngwalagelo ramo viti kwara, “?Kworohokinia mo kanikani mana tangaloi hokinira hi?”

¹⁷I Jisas mo rongora, mo darakinira mo viti kwara, “A tangaloi hinea rau rongo karea rahe lengai na tokita tea, vae aira kehekeheki hinea rau lenga rau lengai na tokita. I nau nohe vanamai tea kwara na kware na tangaloi hinea rau bakoto, vae aira hinea a tangaloi vaivai hati tavalavarea.”

¹⁸Vakatukwale, a ngwalagelo noi Sione, a tangaloi na bavtaes tangaloi, mana ngwalagelo nona Varisi* maira rau tuku rete. Vae a tangaloi ratuaki ramo vanamai vaki mai Jisas ramo uhia ramo viti kwara, “?Kworoho a ngwalagelo noi Sione mana ngwalagelo nona Varisi maira ramo rete, vae a nomu ngwalagelo rahe rete tea?”

¹⁹I Jisas mo daraki lakwara mo viti kwara, “?I kamu tulu domi kwara a tangaloi aira hinea ramo vanamai huri a kanikani na lakiana rana rete? Hetea. Lolona hi a ngwera na lakiana aia maira ranahe rete tea.

²⁰Vae lo taroki a tangaloi rana lavi na ngwera na lakiana hi tiura, vunu ranari rete lo taro hi.

²¹“A tangaloi nehe somavu na mahigwai-lugwa karagwa tea tilo lugwa ngwanika. Diko ne vai kwehini a lugwa karagwa hi ne kuku ne reve dare na lugwa ngwanika, ne madare siletia hi tomua.

²²Vunu vake a tangaloi nehe lilingi na waen karagwa tea tilolo tanga na waen tuai hinea a vinu na boboroa. Vae diko ne lilingi na waen karagwa tilolo tanga tuai, a waen karagwa hi a nona huirana ne maraka ne vai dare na tanga tuai, a waen mana tangaki raru ne hati i rarua vunu. Vae a tangaloi ne lilingi na waen karagwa tilolo tanga karagwa.”

²³Lo Rani* na Mabuana katukwale, i Jisas mana nona ngwalagelo ramo lakao utuhi na agoago* na uit*. Vae a nona ngwalagelo ramo maraka hika ramo rarahi na biuki na uit lo hala.

²⁴Vunu a Varisi* ramo tagaira, ramo kwaha lui Jisas ramo viti kwara, “!Tagaia! ?Kworoho a nomu ngwalagelo ramo vai na kinau hokinia hi, a noda Tangwata* he tirakikita tea kwara tana vai lo Rani na Mabuana?”

²⁵I Jisas mo daraki lakwara mo viti kwara, “?I kamu tulu he valuki na kinau tea lo Uliuli* Kokona huri i Devit hinea mo vai tuai? Lolona hinea i Aviata aia a hugwe na tangaloi* lingilingi, i Devit mana nona ngwalagelo a kaga hinaka tikei, u marakatira. Vae i Devit mo soro tilolo ingwa noi God, mo lavi na bereti* hinea a tangaloi rau hilea ba lakwai God, mo kania. Vunu vake u bete lakwa na nona ngwalagelo ramo kani. Aia a noda Tangwata he tiraki tea kwara a tangaloi haro nga rana kani na bereti hi, kehekeheki na tangaloi lingilingi maira.”

²⁷Vunu i Jisas mo kwaha maira mo viti kwara, “A Rani na Mabuana u tauana huri na tangaloi, a tangaloi he tauana tea huri na Rani na Mabuana.

²⁸Hokinia hini i nau, a Natu* na Tangaloi, nu hugwe koro na tangaloi, vae a Rani na Mabuana vake nu hugwe koroa hokinia.”