Read West Ambae MAK 3 Bible Online

MAK 3 - West Ambae bible

MAK 3

¹Vunu i Jisas mo mule taliku vaki lolo vale* na tiutangaroa, a tangaloi a kabana u gogo mo hugu eia.

²Vae a tangaloi takwa-hi rau tuku tagataga-bibi i Jisas, kwara diko ne vakahikinia lo Rani* na Mabuana rana vaia huri.

³Hikani i Jisas mo kwaha mana tangaloi hi a kabana u gogo mo viti kwara, “Ko vanamai vaki hike tomua.”

⁴Vunu i Jisas mo uduhuri kinira mo viti kwara, “?A noda Tangwata* u tirakikita kwara tana vai kworoho lo Rani na Mabuana? ?Tana vai tabetabeki na tangaloi diko tana vai bulakikinia? ?Tana vakahiki na tangaloi diko tana kwohi mateia?” Vae aira rahe viti na kinau tea.

⁵Hikani i Jisas u lologute mo taga vatahakinira, vae u hakavira vake huri a domiga u madi haburu. Vunu mo kwaha mana tangaloi hi mo viti kwara, “Vukeri na kabamu.” Mo vukeria mo karea taliku.

⁶Vunu a Varisi* ramo tiraki na vale* na tiutangaroa heheriki ramo vileki tabulutaki mana tangaloi noi Herot, [3] ramo vai na tovotovo huri Jisas kwara rana kwohi mateia.

⁷I Jisas mana nona ngwalagelo rau vano vaki lo Kwai* Tokatoka Lakua Galili*. vae a vao lakua ramo huria. Rau vanamai tina vanua Galili, tina vanua Sutia,

⁸tina gwatuivanua lakua Serusalem, tina vanua Itumia, tina vanua tavaluki lo kwai Sotan, vunu vake dalidali na gwatuivanua lalakua Taea maia Saeton. A vao lakua hini ramo vanamai vaki mai Jisas huri rau rongo savi na kinau rusa hi i Jisas mo toko vaira.

⁹A vao u lakua haburu, hokinia i Jisas mo kwaha mana nona ngwalagelo kwara rana vai rarai a aga huria, huri a tangaloi u rusa haburu, vae ramai vai hokotia.

¹⁰Vunuhi na tangaloi hinea rau lenga, rau visusuni huria kwara rana kihia, huri u vakahiki na tangaloi rusa ba.

¹¹Takwanahavaki a tangaloi hinea a tanungwe hati luga ramo tagaia, rau sovi hivo koro na nakona, ramo ngara karakara ramo viti kwara, “I nigo i Natu i God.”

¹²Vae i Jisas mo kwaha madi, mo surira mo viti kwara rana hatu viti huria lakwa na tangaloi ramo kikilaia.

¹³Hikani i Jisas mana nona ngwalagelo ramo vano ramo galo hake lo vuti katukwale, vae mo kwareluahi na tangaloi aira hi mo lengaira. Ramo vanamai vaki maia,

¹⁴mo mataira hangavulu dongwana kairua, aira hi mo kwarekinira a kaihora* kokona. Mo kwaha maira mo viti kwara, “I nau nu mataikamu kwara tulu ne hugu maiau, na hokakikamu tivarea tulu ne heretuva,

¹⁵vake tulu ne hago huirana tulu ne bakoto kinia kwara tulu ne livu a tanungwe hati letiu.”

¹⁶A tangaloi vano hi a hinaga aira hika. I Saemon, i Jisas mo tau na hinana i Pita.

¹⁷I Semis i natu i Seveti, i Sione i tua i Semis. I Jisas mo tau na hinagaru i Boaneses, a domianaki kwara a Gwatuhari, huri i rarua raru lologute vuroki.

¹⁸Vunu i Aduru, i Viliv, i Batolomiu, i Matiu, i Tomas, i Semis i natu i Alveas, i Tateas, i Saemon hinea aia katukwale tina tangaloi* aira hi ramo karohuri na vanua noi God, a vanua Isrel*,

¹⁹mai Sutas Iskariot, aia hini mo tovo kai Jisas lakwa na nona tavaluivuro.

²⁰Vunu i Jisas mo mule. A vao lakua ramo vileki tabulutaki taliku, vae a taro tikei kwara i Jisas mana nona ngwalagelo rana kanikani.

²¹Lolona i rabelana ramo rongo hokinia hi, ramo vano kwara rana va lavia, huri a tangaloi rau viti kwara, “U reraka.”

²²Vae a tangaloi* kikikila na Uliuli* Kokona ratuaki hinea rau vanamai tina gwatuivanua lakua Serusalem, rau vitiviti huri i Jisas kwara, “A hugwe na tanungwe hati maira hinea i Bielsebal aia luna. A hugwe hi u bete a huirana lakwae kwara ne livuti na tanungwe hati maira tina tangaloi.”

²³Vae i Jisas mo kware na tangaloi vaki maia, mo tavatavaluileo lakwara mo viti kwara, “Kareaki i Setano* he livu lavia tea sibona.

²⁴Diko a vanua ne kwahekinia sibona a gwatuki ne rusa, hinea rana vai vuro mulekinira, vae a vanua hi ne makwahekwahe.

²⁵Diko a vakabela ne kwahekinia sibona ne mulemai kina vakabela rusa, hinea rana vai vuro mulekinira, vae a vakabela hi ne makwahekwahe.

²⁶?Hikani kwara vae diko i Setano a nona tangaloi rana kwahekinira siboga a gwatuki ne rusa, vae ne hugwe kworohokinia korora kwara ne tuai? A nona tangaloi rana makwahekwahe, a nona huirana ne tikei.

²⁷“Hete tangaloi kwara ne vai lai ne magaraki na ingwa na tangaloi huira, vunu ne lavi na nona vivilagoki. Vae kehekeheki ne gwarua tomua, vunu neri vai lai mo magaraki na ingwana.

²⁸“Kareaki na viti lakwakamu kwara i God ne vai lai ne domidomi koro vunuhi na vaivai hati nona tangaloi mana noga kwahakwaha hati savia hinea ramo viti vovohia.

²⁹Vae diko a tangaloi ne kwahakwaha hati vovohi na Tanungwe Kokona, vae i God nehe domidomi koro lavia te vohoki, huri a tangaloi hinea u vai kwehini a nona vaivai hati hi u eno luna vaki tuai.”

³⁰I Jisas u viti kwehini huri a tangaloi ratuaki rau viti kwara, “Aia a tanungwe hati luna.”

³¹Vunu i ratua i Jisas mai retahina ramo maravuti, ramo tu varea ramo uduhuria kina tangaloi.

³²A vao rau hugu dalidali i Jisas, ramo kwaha maia ramo viti kwara, “Ko taga. I retahimu mai ratuamu aira hike varea rau uduhuriko kwara kona vano kona tagaira.”

³³Vae i Jisas mo darakinira mo viti kwara, “?I retahigu ihe? ?I ratuagu ihe maira?”

³⁴Hikani mo taga vatahaki na tangaloi vano hi ramo hugu dalidalia, mo kwaha mo viti kwara, “I retahigu, i raratuagu, aira hika.

³⁵A tangaloi hinea u vai a havakinau hinea i God u lengaia kwara ne vai, aia u kwareki i tuagu, i hagwegu, i retahigu.”