Read West Ambae MAK 5 Bible Online

MAK 5 - West Ambae bible

MAK 5

¹Hikani i Jisas mana nona ngwalagelo ramo maravuti lo Kwai* Tokatoka Lakua Galili* tavaluki ramo galo hake lo vanua Gerasa.

²Lolona i Jisas mo galo hake tina aga, mo hagwe na tangaloi katukwale u ngwalua lolo gwaru-malanga* maira. A tangaloi hi a tanungwe hati luna,

³u toka lo livuka na gwaru-malanga. A tangaloi tikei kwara rana gwarubibia taliku.

⁴Tigwaravu u havuti utuutuhi na seni lo kabana, vake u vai vurivuri na aean lo garuna. Aia u huira haburu kwara a tangaloi rana suria.

⁵U rani, u bongi, u lakao laliki lo livuka na gwaru-malanga, vake lalahi na vuti, mo kakaili, mo sioa sibona kina vatu.

⁶Hikani mo tagai Jisas vakahao, mo kwalao mo sovi hivo koro na nakona.

⁷Mo kakaili karakara kina dilao huira mo viti “!Jisas, i nigo i Natu i God hinea Aulu Karakara! ?Ku vai kwara kona vai aha maiau?” I Jisas mo kwaha maia mo viti “Tanungwe hati, ko vano tina tangaloi hikani.” Vunu a tangaloi hi mo kwaha mo viti “Nu suriko lo hina i God, ko hatu vai bulakikiau.”

⁹Hikani i Jisas mo uduhuri kinia mo viti kwara, “?A hinamu ihe?” A tangaloi hi mo darakinia mo viti kwara, “A hinagu i Vao huri i kami keu rusa.”

¹⁰Vae aia mo seseaka mo viti lakwai Jisas kwara ne hatu hora na tanungwe hati vano hi tina vanua takwa-hi.

¹¹A dura rusa takwa-hi garagarani lo ngwarasa na vuti rau tuku kanikani.

¹²A tanungwe hati vano hi ramo kwaha mai Jisas ramo viti kwara, “Ko horakami vaki mana dura vano hinea, ko tirakikami kena soro tilologa.”

¹³Hikani mo masinge. A tanungwe hati ramo vano tina tangaloi hi ramo soro vaki lolo dura. A dura vano hi savira, a valuvaluga u tari vakairua, ramo kwalao tegetano ramo rovo lo baha tilolo kwai tokatoka lakua ramo dono.

¹⁴A tangaloi hinea ramo tagahuri na dura vano hi, rau kwalao ramo viti talahaki na roroki lo gwatuivanua vaki lo utaki vake. A tangaloi rusa rau vano kwara rana tagai na kinau hi.

¹⁵Ramo vanamai vaki mai Jisas ramo tagai na tangaloi hi a tanungwe hati mo vaia, aia u hugu takwa-hi, u lugwa, a gwatuna u karea ba, vae aira vunu rau mataku.

¹⁶Aira hinea rau tagaia ramo viti lakwa na tangaloi maira a havakinau hi mo vaiana lakwa na tangaloi hi a tanungwe hati luna, vake huri na dura vano hi.

¹⁷Vunu ramo maraka ramo kwaha mai Jisas kwara vae ne vano tina tataga.

¹⁸Lolona i Jisas mo galo tilo aga, a tangaloi hi a tanungwe hati mo vaia, mo kwaha maia mo viti kwara, “Na huriko.”

¹⁹Vae i Jisas he masinge tea, vae mo kwaha maia mo viti “Ko mule taliku vaki tatamu mana nomu vakabela, komo viti lakwara a havakinau hinea a Hugwe* mo vai lakwako, u hakaviko mo vai tabetabekinigo.”

²⁰Vunu a tangaloi hi mo mule mo lakao lalahi na Gwatuivanua Hangavulu mo matangwasaraki lakwa na tangaloi a havakinau i Jisas mo vai lakwae, vae a tangaloi savia hinea ramo rongoa rau idila haburu.

²¹I Jisas mo vano utuhi na kwai tokatoka lakua taliku vaki tavaluki, vae a vao lakua ramo vileki dalia takwa-hi auta.

²²Hika a tangaloi lakua katukwale tiura hinea rau tuku tagahuri na vale* na tiutangaroa nona gwaloana noi Isrel* mo vanamai. A hinana i Saeras. Mo tagai Jisas mo vano vaki maia mo sovi hivo vovohi na garu i Jisas,

²³mo seseaka huria mo viti kwara, “I natugu, a natu vavine u garagarani kwara ne mate. Ko vanamai, ko tau kabamu luna kwara vae ne rongo karea ne ahi.”

²⁴Hikani i Jisas mo huri na tangaloi hi. A vao lakua ramo huria, ramo visusuni dalia.

²⁵A vavine katukwale takwa-hi a daidai gwaravu u vaia a hukao hangavulu dongwana kairua.

²⁶Aia u rongo hati haburu mo vano vaki mana tokita rusa. U mahuki savi na nona mane* vae he rongo karea tea, a kana lengeana mo toko hati vakevake nga.

²⁷Mo rongo na roro i Jisas, vae lolona mo bulu mana vao mo lakao huri Jisas takuni.

²⁸Mo domidomi luna sibona kwara, “Diko na kihi na lugwana vohoki na ahi.”

²⁹Hikani mo kihi na lugwana a dai hi mo tirakinia vakatukwale, mo rongo lolo tarabehina kwara a kana lengeana u tirakinia.

³⁰Heheriki i Jisas mo rongo kwara a huirana u vano tiua, mo halebohi vovohi na vao mo kwaha maira mo viti kwara, “?Ihe mo kihi na lugwagu?”

³¹A nona ngwalagelo ramo darakinia ramo viti kwara, “?Kohe tagai na tangaloi tea vano hika ramo toko visusuni dalidaliko? ?Vunu kworoho komo uduhuri kwara ihe u kihiko?”

³²Vae i Jisas mo tagataga laliki kwara ihe hi mo kihia.

³³A vavine hi u kikilai kwara i Jisas u vai kworoho maia, mo vanamai a huina u rururu kina matakuta, mo sovi hivo vovohi na garu i Jisas mo viti bakotoki savi na kinau lakwae.

³⁴I Jisas mo kwaha maia mo viti kwara, “Natugu. A nomu hauhuriana u vaiko komo rongo karea. Ko mule lo magemuana, ku rongo karea tina kamu lengeana.”

³⁵Lolona hi mo toko kwaha radu nga, a tangaloi na leo ramo vanamai tina tata i Saeras, ramo kwaha mai Saeras ramo viti “Ko hatu vai na rongohati lakwa na Tisa. I natumu a mabuna u rovo ba.”

³⁶I Jisas mo rongo na leo hi, mo kwaha mai Saeras mo viti kwara, “Hatu mataku, ko hauhuri kehekeheki.”

³⁷Vunu i Jisas mo suri na tangaloi kwara rana hatu huria, vae mo lavi i Pita, i Semis mai tuana i Sione, aira kehekeheki ramo huria.

³⁸Lolona ramo vano vaki mana ingwa na tangaloi lakua hi, i Jisas mo tagai na tangaloi maira ramo toko kurekurere, rau tangi. Tuaki rau ula karakara.

³⁹Hika mo soro tilolo ingwa, mo kwaha maira mo viti kwara, “?Kworoho tulu mo kurekurere haburu tulu mo tangi? A natu he mate tea, aia u maturu.”

⁴⁰A tangaloi ramo mana tiehia, vae mo hora savira tivarea, mo lavi na tama mana retahi na natu vavine hi, mana nona ngwalagelo kaitolu ramo huria, ramo soro vaki hinea a natu vavine mo ngwalulu eia.

⁴¹Hika i Jisas mo hago lo kaba na natu vavine hi, mo kwaha maia mo viti “Talita kumi.” A domiana na leo hi kwara, “Natu vavine, na viti lakwako, ko maraka.”

⁴²Heheriki a natu vavine hi mo maraka, mo lakao. A natu hi a hukaona hangavulu dongwana kairua. Aira vunu rau idila haburu kinia.

⁴³Vae i Jisas mo surira kwara rana hatu viti lakwa na tangaloi ratuaki. Vunu mo kwaha maira kwara rana bete te kinau lakwa na natu hi ne kani.