Read West Ambae MAK 7 Bible Online

MAK 7 - West Ambae bible

MAK 7

¹A Varisi* maira mana tangaloi* kikikila na Uliuli* Kokona ratuaki rau vanamai tina gwatuivanua lakua Serusalem ramo vileki dali Jisas.

²Ramo taga kwara a nona ngwalagelo ratuaki rau tuku kani kaga hinaka a kabaga rahe ngwasara tea, hokinia kwara rahe sasavula tea lo halaki hinea a Varisi ramo viti kwara a tangaloi rana vai luna.

³A Varisi maira mana gwaloana noi Isrel* doluaki, rau huri na hahara noi ratubuga. Ranahe kanikani tea hi rahe sasavula tea, vae rana sasavula lo halaki bakotoki vunu ranari kanikani.

⁴Vake lolona ramo mule tina tanotano na hokahokaki hinaka, ranahe kanikani tea, vae kehekeheki rana sasavula tomua. [6] Vae aira rau huri na doridori rusa makive hinea aira ramo hagobibi vanamai evina kinia, hoki na halaki bakotoki kwara rana kwasu a laha na inuinu, a laha na hahalakwai, vake a laha na kanikani hinea a tangaloi rau kihia lo bras.

⁵Hokinia a Varisi maira mana tangaloi kikikila na Uliuli Kokona ramo uhi Jisas, ramo viti “?Kworoho a nomu ngwalagelo rahe va huri na haharaana te hi mo hagobibiana vanamai tuai kinia ti ratubuda? Rau kanikani, a kabaga rahe ngwasara tea.”

⁶I Jisas mo daraki lakwara mo viti “Lolona a tangaloi* duruduruki i Aesaea tuai mo duruki na leo ti God tivarea, u viti bakotokikamu kareaki kwara i kamu a tangaloi kurakura, tulu viti kinau kina ringomiu vohoki. Mo viti kwara, ‘I God u viti “A tangaloi vano hikani rau domi mavakiau kina leoga vohoki, vae a domiga u vakahao haburu tiau.

⁷Venaha ramo toko domi mavakiau, huri aira rau huhui na tangaloi kina huhuiana nona tangaloi, vunu ra va viti kwara a nogu leo.” ’ ”

⁸I Jisas mo kwaha mo viti “I kamu tulu tau gegeaki na tulikileo noi God tulu mo rongohuri na huhuiana nona tangaloi na varamana.”

⁹Vunu i Jisas mo kwaha taliku mo viti “Tulu kikikila haburu tulu mo tau letiuki na tulikileo noi God, tulu mo kwiribibi na nomiu sibomiu.

¹⁰I Mosis u viti kwara, ‘Ko domi mavaki i tamamu mai retahimu.’ Vunu vake mo viti ‘Ihe tea ne kwahakwaha hati vovohi tamana diko i retahina, vae rana kwohi mateia.’

¹¹Vae i kamu a nomiu huhuiana tulu viti kwara diko te tangaloi te u hago te kinau kwara ne hago mai tamana mai retahina, vae ne viti ‘Hetea, a kinau hika u Koban’ a domianaki kwara u hileana ba lakwai God, vae ne viti kwehini hi a leo noi Mosis u rovo.

¹²Tulu viti kwara a leo na tangaloi hi ne tu koroa, vae nehe hago lai te mai tamana mai retahina vohoki.

¹³Lo halaki hokinia hi tulu domi hahae na leo noi God kina nomiu haharaana hinea i kamu tulu mo domiki, tulu mo hahara na tangaloi dolua vake kinia. Vunu a kinau rusa vake tulu mo toko vaira hokinira hi.”

¹⁴Vunu i Jisas mo kware na vao vaki maia taliku, mo kwaha maira mo viti

¹⁵“I kamu vunu tulu rongohuriau vae tulu lai tabetabeki na leogu. Hete kinau kwara ne vanamai tavalavarea ne soro tilo kwakwa na tangaloi ne vaia ne hogora. Aia vae a havakinau hinea u vanamai tina domi na tangaloi aia hi ne vaia ne hogora.” [7]

¹⁷Lolona mo tiraki na vao mo soro vaki lolo ingwa, a nona ngwalagelo ramo uhia huri na tavaluileo hi.

¹⁸I Jisas mo kwaha maira mo viti “?Kworohokinia? ?A gwatumiu rau madi radu hokinira? A kinau hinea a tangaloi u kani nehe vaia tea kwara ne hogora koro na nako i God huri aira a kinau tavalavarea vohoki.

¹⁹Rahe hivo tea vaki lolo domi, aia rau hivo tilolo tagwangi, vunu rau vano tina tarabehi.” Lo leo hikani i Jisas u viti kwara a hinaka savia u taritarisa kwara tana kani.

²⁰Vunu mo vano nga mo viti “A havakinau hinea u vanamai tina domi na tangaloi, hi u vaia mo hogora,

²¹huri a domi hati u rusa rau vanamai tina domi na tangaloi. Rau turukinia u vai a doridori he taritarisa tea mana vavine ngwalagelo, u babalu, u uaua.

²²A ngwera u tiutokakivanua mana vavinehi na tangaloi dolua, vunu a vavine hinea u laki ba u tiutokakivanua mana ngwera dolua. A tangaloi u lengai na kinau nona tangaloi dolua, u vai vataha na kinau hinea rau hati rusa, u sinasina tangaloi, u vai a doridori hati takwanahavaki mo lengaia. A kinau u kadikadia, u uveuve, u domidomia, u vai kinau hati na tangaloi u reraka.

²³Vunuhi na kinau vano hi rau hati rau vanamai tina domi na tangaloi, rau vai na tangaloi hi mo hogora koro na nako i God.”

²⁴Vunu i Jisas mo tiraki takwa-hi mo vano vaki lo vanua garagarani mana gwatuivanua lakua Taea, mo soro tilolo ingwa kwara ne hugu eia. He lengaia tea kwara a tangaloi rana kikilaia kwara aia takwa-hi, vae he hili lai tea.

²⁵A vavine katukwale, i natuna a natu vavine a tanungwe hati luna, mo rongo i Jisas, mo vanamai vaki maia heheriki, mo sovi hivo vaki mana garuna.

²⁶A vavine hi a tangaloi tavalavarea tina gwaloana noi Isrel, u vora Vonisia lo vanua Siria. Mo kware i Jisas kwara ne livuti na tanungwe hati tina gwatu i natuna.

²⁷Vae i Jisas mo daraki lakwae mo viti “A sakwarigi rana kanikani tomua. He taritarisa tea kwara na lavi na hinaka kana sakwarigi na vohokinia lakwa na kwiriu.”

²⁸A vavine hi mo daraki mo viti kwara, “Kareaki Hugwe*, vae a kwiriu vake rau kani a mavuvu na hinaka kana sakwarigi hinea ramo sovi vaki tavuti na tevo.”

²⁹Vunu i Jisas mo kwaha maia mo viti “Huri komo daraki hokinia hi, hika ko mule, a tanungwe hati hi u vano ti natumu ba.”

³⁰A vavine hi mo mule taliku vaki tatana mo hagwe i natuna u ngwalulu lo here a tanungwe hati hi u vano tiua ba.

³¹Hikani i Jisas mo tiraki na vanua garagarani mana gwatuivanua lakua Taea mo vano lalahi na gwatuivanua lakua Saeton mo mule lalahi na vanua dali na Gwatuivanua Hangavulu vaki lo Kwai* Tokatoka Lakua Galili*.

³²Hika ramo lavi na tangaloi katukwale vaki maia a gwerona u vono, vake a meana u bulu, ramo kwaha mai Jisas kwara ne tau kabana luna ne vakahikinia.

³³I Jisas mo lavi na tangaloi hini tina vao raru mo vano gegeaki, mo tau na bihuna tilolo gwero na tangaloi hini, vunu i Jisas mo lido mo kihi na mea na tangaloi hi.

³⁴Vunu i Jisas mo lalangao tagaulu vovohi na taetae mo mabuharaki mo kwaha maia mo viti “!Evata!” A domianaki kwara “Ko matakahi.”

³⁵Hikani a gwero na tangaloi hi mo matakahi vakatukwale, a meana mo karea mo kwaha mo matangwasara.

³⁶Vunu i Jisas mo surira mo viti lakwara kwara rana hatu viti lakwa na tangaloi dolua. Vae hetea, mo surira, aira ramori talahakinia vakevake.

³⁷Vunuhira hinea ramo rongo rau idila haburu luna, rau maraka ramo viti kwara, “!A hava tangaloi hikani! !Vunuhi na kinau u vaira rau karea kehe nga! U vai na tangaloi hinea a gweroga rau vono, ramo rongorongo lai, vake a tangaloi hinea rahe kwahakwaha lai tea, u vaira ramo kwahakwaha lai.”