Read West Ambae MAK 9 Bible Online

MAK 9 - West Ambae bible

MAK 9

¹Vunu mo kwaha maira taliku mo viti “Kareaki na viti lakwakamu, ratuaki rau tu hike maiau ranahe mate tea tarisaki hi rana tagai na huirana noi God ne maravuti, vae i God ne hugwe koro na bulana tangaloi.”

²Vunu a rani kaiono koro, i Jisas mo lavi i Pita, i Semis, i Sione, mo tomuakinira hake vaki lo vuti aulu, aira kahera. Ramo taga tiluna, a tarabehina mo bohi.

³A lugwana mo lotu mo vilavila u sileti na lugwa savia. Hete tangaloi lo varamana kwara ne vai na lugwa ne lotu hokinia.

⁴Vunu ramo tagai Elaesa mai Mosis, raru mo toko kwaha mai Jisas.

⁵I Pita mo kwaha mai Jisas mo viti “Hugwe*, mo karea i kami hike, vae kena vai na ingwa haleki kaitolu, katukwale huriko, katukwale huri i Mosis, katukwale huri i Elaesa.”

⁶Mo viti kwehi huri he kikilai tea kwara ne viti aha, huri rau mataku haburu.

⁷Vunu a taenalangi mo malumalu korora, a dilao mo tangi lolo taenalangi mo viti “Hikani i Natugu, a Natu tabe. Tulu rongohuria.”

⁸Bulu maia ramo tagataga laliki rahe taga te tangaloi vake, i Jisas aia kahea maira.

⁹Lolona ramo duvule tina vuti, i Jisas mo surira mo viti “Tulu ne hatu viti lakwa na tangaloi laliki a havakinau hi tulu mo taga tarisaki i nau, a Natu* na Tangaloi, vae nana maraka taliku tina mateana.”

¹⁰Vae aira rau kwiribibi na leo hi, aira kahera ramo uhiuhira kwara a marakaana tina mateana a domianaki kworohokinia.

¹¹Vunu ramo uhi Jisas ramo viti “?Kworoho a tangaloi* kikikila na Uliuli* Kokona ramo viti kwara i Elaesa ne vanamai tomua?”

¹²Aia mo daraki lakwara mo viti “Kareaki i Elaesa u vanamai tomua u vai rarai na kinau savia. ?Vae a Uliuli Kokona u viti kworoho huriau, kwara i nau a Natu na tangaloi na rongo hati lo kinau savia, a tangaloi rana taga bulakikiau?

¹³Vae na viti lakwakamu, i Elaesa u vanamai ba, vae a tangaloi rau vai a kinau vovohia hokinia rau lengaia, hoki na uliuliki huria mo viti.”

¹⁴Lolona ramo maravuti mana nona ngwalagelo ratuaki, ramo tagai na vao lakua dalidalira, a tangaloi* kikikila na Uliuli* Kokona ratuaki ramo toko vikwahaki maira.

¹⁵Lolona a vao ramo taga dilai Jisas, ramo mamarutiki, ramo kwalao huria ramo lai tabetabekinia.

¹⁶I Jisas mo uhira kwara, “?Tulu tuku vikwahaki huri aha?”

¹⁷Vae katukwale tina vao mo daraki mo viti “Tisa, nu lavi natugu a ngwera vanamai vaki maiko, a tanungwe hati luna mo vaia he kwaha lai tea.

¹⁸Vae lolona mo rovokinia hi u tuku visakinia tilo tano, a gavina ramo vilaiki, mo kati raharahaki na livona, a tarabehina ramo toratoraka. Nomo kwaha mana nomu ngwalagelo kwara rana livutia letiu vae rahe vai lai tea.”

¹⁹I Jisas mo daraki lakwara mo viti “!I kamu a hava tangaloi hika, nomiu hauhuriana mo tikei! ?Na va loli maikamu tarisaki ave? ?Nari va rongo karea kikamu kihokua? Tulu lavi na natu hi vanamai vaki maiau.”

²⁰Vunu ramo lavia vaki mai Jisas. A tanungwe hati mo taga dilai Jisas, vae heheriki a tanungwe hati hi mo tokiki suri na natu hi tilo tano, a gavina ramo vilaiki, mo toko talele doridori.

²¹I Jisas mo uduhuri ki tamana kwara, “?A kinau hika u tinakaki luna kihokua?” I tamana mo daraki mo viti “Lolona hi u kelekele radu nga.

²²Vakarusa u vohokinia tilolo kabu vunu tilolo kwai kwara ne vai mateia. Vae diko kona vai lai ko hakavikami, ko hago maikami.”

²³I Jisas mo viti lakwae viti “!Diko i nigo ko vai lai! Savisavi na kinau rau magemu lakwa na tangaloi hinea u hauhuri.”

²⁴Bulu maia a tama na natu hi mo ngara karakara mo viti “!Hugwe*, nu hauhuri! Ko hago maiau nana hauhuri vakevake.”

²⁵I Jisas mo tagai na vao ramo kwalao vakatukwalekinira huria, mo hora na tanungwe hati hi kwara “I nigo a tanungwe hati ku vai na tangaloi he kwaha lai tea a gwerona mo vono, nu horako ko vano tina natu kelekele hika, konahe soro te vohoki tiluna taliku.”

²⁶A tanungwe hati hi mo ngara karakara mo vai na natu mo rurururu haburu, mo vano tiua, a natu mo saro hokinia u mate. Mo vai hokinia, a tangaloi ramo viti kwara u mate.

²⁷Vae i Jisas mo hago lo kabana mo tabea mo maraka.

²⁸Vunu i Jisas mo soro tilolo ingwa, a nona ngwalagelo ramo uhi raravekinia kwara, “?Kworoho kehe va livu lavi na tanungwe hati hi te tiua?”

²⁹Mo viti lakwara kwara, “A kinau hokinia hika nehe livuana lai tea kina kinau dolua vae kina tiutangaroa kehekeheki.”

³⁰Hikani i Jisas mana nona ngwalagelo ramo tiraki na vanua hi ramo lakao lo vanua Galili*. I Jisas he lengaia tea kwara te tangaloi haro ne kikilai kwara aia ave,

³¹huri u tuku huhui na nona ngwalagelo mo viti lakwara kwara, “I nau a Natu* na Tangaloi, vae a tangaloi rana tirakiau tilo kaba na tangaloi hinea vae rana kwohi mateiau. Vunu takuni tina rani kaitolu na maraka taliku.”

³²Rahe kikilai na domiana na leo te hi vae rau mataku kwara rana uhia huri.

³³Hikani ramo vanamai vaki lo gwatuivanua Kavaneam, ramo soro tilolo ingwa. I Jisas mo uduhuri kina nona ngwalagelo mo viti “?A havakinau hini tulu mo toko vikwahaki luna lo hala?”

³⁴Vae ramo hugu butu, huri lo hala rau tuku vikwahaki huri kwara ihe u lakua karakara.

³⁵I Jisas mo hugu hivo mo kware na nona ngwalagelo hangavulu dongwana kairua vaki maia, mo kwaha maira mo viti “Diko te tangaloi u lengaia kwara ne tomua, vae aia ne lavi na tanotano takuni halaradu, vunu ne kwareki a tangaloi boloki lakwara vunuhira.”

³⁶Mo lavi na natu kelekele, mo taua mo tu lo livukaga, vunu mo haka tataloa mo kwaha maira

³⁷mo viti “Te tangaloi ne lai tabetabeki na natu kelekele katukwale tiura hikani lo hinagu, u lai tabetabekiau. Aia hi u lai tabetabekiau, he lai tabetabekiau te kehekeheki, aia vae u lai tabetabekinia hinea vake mo horeau.”

³⁸I Sione mo viti lakwae kwara, “Tisa, keu tagai na tangaloi u tuku livu a tanungwe hati maira lo hinamu, vae kemo suria huri aia hete lo noda bulubulu.”

³⁹Vae i Jisas mo viti “Tulu hatu suria, huri hete tangaloi kwara ne vai a vaisea lo hinagu vunu nete kwahakwaha hati vovohiau.

⁴⁰Ihe hi hete noda tavaluivuro aia buluida.

⁴¹Kareaki na viti lakwakamu, te katukwale ne hile na kwai lakwakamu tulu ne inumia huri i kamu a nogu tangaloi hinea i nau i Vurae*, kareaki aia ne hagwe na kaitakwena huri.”

⁴²Vunu i Jisas mo viti “Diko te tangaloi katukwale ne sinasina na natu kelekele tiura hikani hinea rau hauhuri lugu ba, vaki lo hatiki, a tangaloi hi ne kwali na kakadiki u huira haburu. Vae diko te tangaloi ne likoti na vatu dongwolingwoli lakua lo kusuna, ne vohokinia tilolo tahi ne dono, hi u hati haburu. Vae a kakadiki hinea kwara vae ne kwalia lo taroki, ne huira haburu siletia hi.

⁴³Vae diko a kabamu u vaiko komo halebohi tilo hatiki, ko tai utuhia leletiu. U karea lakwako kwara kona hagwe na ahiana vaki tuai mana kabamu katukwale siletia hi a kabamu kairua, vae raru ne vaiko kona vano tilolo kabu na kakadiki hinea he toko mate lai tea. [8]

⁴⁴

⁴⁵Diko a garumu u vaiko komo halebohi tilo hatiki, ko tai utuhia leletiu. U karea lakwako kwara kona hagwe na ahiana vaki tuai mana garumu katukwale siletia hinea a garumu kairua, vae raru ne vaiko kona vohokiana tilolo kabu na kakadiki. [9]

⁴⁶

⁴⁷Vake diko a matamu u vaiko komo halebohi tilo hatiki, ko dangea leletiu. U karea lakwako kwara kona soro tilolo Vanua Karagwa hinea i God u hugwe koroa mana matamu katukwale siletia hi a matamu kairua vae raru ne vaiko kona vohokiana tilolo kabu na kakadiki.

⁴⁸Takwahini a nuvega ranahe mate lai tea, a kabu nehe mate lai tea.

⁴⁹“I God ne vai na tangaloi savia rana ngwasara kina kabu hokinia a tangaloi rau tau a solo lo noga kairoroi* hinea rau hile lakwai God.

⁵⁰A solo [10] u kokona aia a kinau karea. ?Vae diko a kokonaki ne tikei vae tulu ne vai kworohokinia kwara vae ne kokona taliku? A kokonaki ne eno lumiu, tulu ne toka ne tangwata maikamu savikamu.”