Read West Ambae LUK 1 Bible Online

LUK 1 - West Ambae bible

LUK 1

¹Tua Teovilas, i nigo a tangaloi lakua kareaki. A tangaloi rusa ramo huirataki na kinau hika kwara rana uli na leo huri na kinau rusa hinea ramo vai hikeni maikami.

²Rau ulibibi na kinau aira vano hinea keu rongora ba tina tangaloi hinea ramo taga tina tinatinakakiki, ramo viti na leoki tivarea.

³Vae hokinia, i nau nu huri tabetabeki na kinau aira vano hi ba tina tinatinakakiki. Vae huri hi nu domi u karea kwara na uli na leoki, na taura ne taritarisa lo halaki huriko.

⁴Nu lengaia haburu kwara kona kikilai tabetabeki savi na kinau aira vano hinea a tangaloi ramo toko huhuiko kinira kwara rau kareaki.

⁵Lolona a hugwe i Herot [1] mo hugwe koro na vanua Isrel*, a tangaloi* lingilingi katukwale a hinana i Sekaraea. Aia lo vakabela na tangaloi lingilingi rau kwareki a vakabela lui Avia hinea aia katukwale tiura u vanamai lo tubutubu i Eron. I vavinehi Sekaraea a hinana i Elisabet, vae aia vake a gwaloana na tangaloi lingilingi i tubuga i Eron.

⁶I rarua vunu lo nogaru mauriana raru toka u bakoto lo nako i God, raru rongohuri savi na tulikileo mana korokoro nona Hugwe i God.

⁷Vae i natugaru tikei huri i Elisabet he hago lai te natu, vae i rarua vunu mai tuana ngwarasea i Sekaraea, raru ngwarasea haburu.

⁸Lo rani katukwale i Sekaraea mana nona vakabela rau tuku lingilingi noga boloki lo nako i God, huri a noga taro kwara rana boloki lo Ingwa Kokona noi God.

⁹Lo doridori na tangaloi lingilingi rau vai* a matarongo mo sovi ti lui Sekaraea kwara ne hura a kinau* boniboni lo voda[2] na kinau boniboni lo Tanotano Kokona. Lolona mo soro tilolo Ingwa Kokona nona Hugwe,

¹⁰a vao rau tu varea rau tiutangaroa lo taro na hura kinau boniboni.

¹¹A kaihora tina taetae nona Hugwe mo maravuti kinia mo tu lo matua na voda hinea ramo hura a kinau boniboni luna.

¹²Lolona i Sekaraea mo tagaia u rongo hati mo mataku.

¹³Vae a kaihora tina taetae mo kwaha maia mo viti “Sekaraea. Ko hatu mataku. I God u rongo na nomu tiutangaroa, vae i vavinehimu i Elisabet ne hagovi na natu ngwera kinigo. Kona tau na hinana i Sione.

¹⁴I nigo kona lagwa, ne havutiko. Ne vora vae a tangaloi rusa vake ne havutira.

¹⁵Vae aia ne kwareki a tangaloi lakua lo nako na Hugwe i God. Aia nehe inu te waen diko a inuinu huira. Tina tinatinakakiki hi ne vora aia ne kukwere kina Tanungwe Kokona.

¹⁶Aia neri lavi na gwaloana rusa noi Isrel ramo mulemai taliku vaki mana noga Hugwe i God.

¹⁷A natu hi ne vano tomuaki na Hugwe hi, ne kwareki a kaikwali na nona leo. A nona domidomi mana nona huirana ne hoki na domidomi mana huirana nona tangaloi* duruduruki i Elaesa. Neri lai tabulutaki a ratama mana raranatu rana lagwalagwa maira taliku, a tangaloi rahe rongorongo-huri tea, ne lavira vaki lo hala na domidomi na bakotoana. Aia neri kware tabulutaki na tangaloi nona Hugwe i God rana rarai huria.”

¹⁸I Sekaraea mo viti lakwa na kaihora hi, mo viti “?Vae nana kikilai kworoho kwara vae ne hokinia, huri i nau nu ngwarasea haburu, i vavinehigu u ngwarasea haburu vake?”

¹⁹A kaihora hi mo darakinia mo viti kwara, “I nau i Gabriel, nu tu koro na nako i God hinea mo horeau kwara na kwaha maiko, na viti na roro karea hika lakwako.

²⁰!Hika ko tagaia! Konahe kwaha lai tea kona butu tarisaki lo raniki hi a kinau vano hikani rana kworo, huri kohe hauhuri tea lo leo nomo viti, hinea kwara vae ne kukwere lo tarona.”

²¹Lo taro hi a tangaloi rau hugu tara i Sekaraea ramo toko domi lengalengakinia kwara “?Te kworohokinia te hikani, mo hugu mo tuai haburu lolo Ingwa Kokona noi God?”

²²Lolona mo soro tivarea he kwaha lai te maira, vae rau kikilai kwara u taga te vakatabobo lolo Ingwa Kokona noi God. He malangaki na leo tea, mo vai a kaivosangi lakwara kina kabana.

²³Hikani i Sekaraea a nona bolokiana hi lolo Ingwa Kokona noi God mo rovo, mo mule vaki tatana.

²⁴Hika he tuai tea i vavinehina i Elisabet mo tatagwangira, hokinia mo hugu lolo ingwa a vula kailima.

²⁵I Elisabet mo viti “Mo karea a Hugwe i God mo hago maiau lo hala hikani. Mo lavi na nogu maemaeana tiau lo nako na tangaloi huri nohe hago lai te natu.”

²⁶I Elisabet a vulana mo kaiono, i God mo hora nona kaihora tina taetae i Gabriel, vaki lo gwatuivanua a hinaki Nasaret lo vanua Galili*.

²⁷Mo lavi na leo huri na vavine u toka kokona hinea a tangaloi katukwale a hinana i Sosev mo taubibia kwara ne laki maia. I Sosev aia a gwaloana nona hugwe lakua i Devit. A natu vavine hi a hinana i Meri.

²⁸A kaihora hi mo vano vaki maia, mo viti “!Karea haburu! !A Hugwe i God u tabe kareakinigo! Aia maiko.”

²⁹I Meri u rongo hati haburu lo leo nona kaihora hi, mo toko domidomi kwara, “?Kworoho a kaihora hi mo kwaha maiau hokinia hi?”

³⁰A kaihora hi mo viti lakwae kwara, “Meri, ko hatu mataku, huri i God u tabeko.

³¹Vae i nigo kona tatagwangira, konari hagovi na natu ngwera, komo kwareki na hinana i Jisas*.

³²Aia ne lakua ne kwareki i Natu i God Aulu Karakara. A Hugwe i God ne vaia ne mulemai kina Hugwe Lakua hoki i tubuna i Devit.

³³Neri kwareki a Hugwe Lakua nona gwaloana noi Sekov vaki tuai, ne hugwe korora vaki tuai, a gwereki tikei.”

³⁴I Meri mo viti lakwa na kaihora hi kwara, “?I nau a tokakokona vae ne mule kworohokinia kwehi?”

³⁵A kaihora hi mo daraki mo viti “A Tanungwe Kokona ne vanamai tilumu, a huirana noi God ne toka lumu. Hokinia a natu kokona hika ne kwareki i Natu i God.

³⁶Ko domihagwe i belamu i Elisabet. Rau viti kwara he hago lai te natu. U ngwarasea haburu vae hikani a vulana kaiono ba.

³⁷Hika hoki na Uliuli* Kokona hinea mo viti ‘A kinau he madi tea mai God.’ ”

³⁸I Meri mo viti kwara, “I nau a tangaloi boloki nona Hugwe i God. Ne mule kwehi lakweau hokinia komo viti.” Vunu a kaihora tina taetae mo vano tiua.

³⁹He tuai tea i Meri mo vaivai heheri mo lago hala kwara ne vano vaki lo gwatuivanua lo mahao na vutivuti na vanua Sutia.

⁴⁰Mo maravuti, mo soro vaki tata i Sekaraea mo hihiolo ki Elisabet, mo kwaha maia.

⁴¹Lolona i Elisabet mo rongo na leo i Meri, i natuna mo kilu lolona. Vunu i Elisabet mo kukwere kina Tanungwe Kokona,

⁴²mo kwaha karakara mo viti “I God u tabeko sileti na ranatu vavine savia. Vake u vai tabetabeki na natu hi vae kona bavae.

⁴³?Kworohokinia te hika a kinau lakua hika mo vai hikwe maiau, i retahi na nogu Hugwe* mo vanamai mo tirokiau?

⁴⁴Lolona nomo rongo na leomu, i natugu mo kilu lolo lologu kina hahavutiana.

⁴⁵Ne va havutiko huri ku hauhuri kwara a leo nona Hugwe lakwako ne mule luna kareaki.”

⁴⁶I Meri mo viti “Nu kaluhaki na Hugwe i God kina domigu,

⁴⁷a tanungwegu u havutia huri i God aia a nogu Kaivakahi.

⁴⁸Aia u domihagweau, i nau a nona tangaloi boloki, i nau a tangaloi vuroki. Vae u tinakaki hika, a tangaloi vunuhira rana viti kwara i God u vai tabetabekiau,

⁴⁹huri na kinau lalakua vano hika mo vaira lakweau. Aia a God na Huirana, a hinana u kokona.

⁵⁰Aia u vosangi na nona hahakaviana lakwara hinea rau domi mavamavakinia vanamai evina kinia tina vakabela vakarusa.

⁵¹Mo hokaki na kabana kina huirana, mo livu girigiriki na tangaloi kwetukwetutu mana noga tovotovo rusa.

⁵²Mo reve surisuri na hugwe lalakua huira tina hagehagelega, mo tabera hinea a tangaloi vuroki.

⁵³Mo vanganira hinea u marakatira, kina kinau rau karea, mo hora na tangaloi hugwe leletiu a kinau tikei lo kabaga.

⁵⁴U hagobibi na tulikileo hinea mo viti lakwai ratubuda, mo vanamai kwara ne hago mana nona kaihora a gwaloana noi Isrel*.

⁵⁵Vunu u domidomi-bibi kwara ne vosangi a hahakaviana lakwai Evraham, vunu lakwa na nona gwaloana savia vaki tuai.”

⁵⁶I Meri mo toka mai Elisabet kwara a vula kaitolu vunu mo mule taliku.

⁵⁷A taroki mo maravuti kwara i Elisabet ne hagovi i natuna, vae mo hagovia a ngwera.

⁵⁸I rabuluina, mai rabelana ramo rongoa kwara a Hugwe i God u karea haburu maia, aira vunu u havutira maia vake.

⁵⁹Vae a natu hi a ranina mo kaikwalu, ramo vanamai kwara rana vai na kaimatai* lo siosio luna, vunu kwara vae rana suliti na hina i tamana i Sekaraea tiluna.

⁶⁰Vae i retahina mo viti kwara, “!Eheo hetea! A hinana i Sione.”

⁶¹Vunu ramo viti lakwai retahina kwara, “Lo nomu vakabela a hina tikei kwehini.”

⁶²Hikani ramo vai a kaivosangi lakwai tamana ramo uduhuri kwara, “?Tana kwareki na hina na natu hikani ihe?”

⁶³Vunu i Sekaraea mo longi na veva tiura mo uliuli luna kwara, “A hinana i Sione.” Ramo mamarutiki.

⁶⁴Bulu maia nga i Sekaraea mo kwahakwaha lai taliku, mo tinakaki mo kaluhaki i God.

⁶⁵Hikani i rabuluina ramo mataku haburu, vunu a roro na kinau vano hini mo vano lalahi na gwatugwatui-vanua lolo vuti Sutia.

⁶⁶Aira hinea rau rongo ramo domidomi luna, ramo uhi kwara “?A natu hika vae ne va boloki te kworohokinia tea?” U matangwasara kwara a huirana nona Hugwe i God aia maia.

⁶⁷I Sekaraea a tama na natu hi u kukwere kina Tanungwe Kokona, mo duruki na leo ti God mo viti

⁶⁸“Tana kaluhaki na Hugwe hinea a noda God i kita a gwaloana noi Isrel*, huri u vanamai kwara ne hago maikita a bulana tangaloi ne volitukuhikita.

⁶⁹U rivuki na tangaloi katukwale a nona huirana eia kwara ne vakahikikita, aia u gwalo vanamai lui Devit, a nona tangaloi boloki.

⁷⁰I God mo tuliki terekakinia tuai lengalenga lalahi na nona tangaloi* duruduruki kokona.

⁷¹Mo viti kwara ne vakahikikita tina noda tavaluivuro, tina noga huirana hinea rau vai taratarakikita.

⁷²U viti kwara ne vosangi na nona hahakaviana lakwai ratubuda, ne domidomi-bibi na nona leo harikiana kokona.

⁷³Mo vai na tulikileo huira lakwai tubuda i Evraham, kwara vae ne kasatukuhikita tina noda tavaluivuro, huri kwara vae tana boloki nona, tana hatu mataku,

⁷⁴

⁷⁵tana ngwasara, tana bakoto koro na nakona vatahaki na rani na noda mauriana.

⁷⁶“I nigo, i natugu, konari kwareki a tangaloi duruduruki noi God Aulu Karakara. I nigo kona vano tomuaki na Hugwe i God, kona vai rarai na hala huria.

⁷⁷Kona viti lakwa na bulana tangaloi kwara vae ne vakahikinira, ne domidomi koro na noga vaivai hati.

⁷⁸A noda God a hahakavina eia, u hahaloki tabetabekikita, vae neri tiraki na leleha na ahiana ne leleo tiluda.

⁷⁹Vunu ne leleo vanamai tina taetae tiluga hinea rau hugu tavuti na dodo na mateana, ne turukikita hi lo hala kwara vae tana hagwe na magemuana luna.”

⁸⁰A natu hi mo ngwarasea hake, mo huira lo tarabehina lo tanungwena vake, mo toka lolo vanua vuroki tarisaki lo rani hi kwara vae ne vosangia sibona tivarea lakwa na gwaloana noi Isrel.