Read West Ambae LUK 10 Bible Online

LUK 10 - West Ambae bible

LUK 10

¹Takuni tiua hi, a Hugwe* mo matai na tangaloi ngavu kaibitu dongwaki kairua vake. [17] U lengaia kwara ne horara rana vano kairua kehe nga, rana vano tomuakinia rana tirotiroki lo gwatuivanua lalakua savira mana gwatuivanua kwaririgi vake hinea aia sibona mo lengaia kwara vae ne vano vaki eia.

²Vae tomuaki mo kwaha maira mo viti kwara, “A makuriana u lakua haburu vae a tangaloiki te kairua vohoki kwara rana vileki na hinaka tilolo ingwaki. Tulu tiutangaroa lakwa na hugwe na makuriana hi kwara vae ne hokaki te tangaloi boloki vake rana makuriki na hinaka, rana vileki tilolo ingwaki.

³Tulu vano. Nu horakamu hi hoki na natu na sivsivi rau tu rokeroke mana kwiriu ovi.

⁴Tulu hatu hago a baos na mane*, diko a tanga nona tangaloi longilongi, diko a kaikwokwori na garumiu. Tulu mo hagwe a tangaloi lo hala tulu hatu tu tulu mo kwaha maira, kamo mahuki na taro.

⁵Vae tulu mo soro tilolo ingwa, tomuaki tulu mo viti kwara, ‘A magemuana ne eno lolo ingwa hika.’

⁶Diko te tangaloi hinea u lagwa mana magemuana lolo ingwa hi, tulu tiraki na nomiu leo na magemuana hi ne eno luna, vae diko hetea tulu tuku nomiu leo na magemuana taliku.

⁷Tulu hugu lolo ingwa aia hini, tulu kani tulu inu a havakinau hi ramo bete lakwakamu, huri a tangaloi boloki u taritarisa kwara ne lai kaivolina. Tulu hatu vano vataha na ingwa.

⁸Lolona tulu mo soro tilolo gwatuivanua ramo lai tabetabekikamu, tulu kani a havakinau hini ramo bete lakwakamu.

⁹Tulu vakahiki na lengeana lo gwatuivanua hi, tulu mo viti lakwa na tangaloi lo gwatuivanua takwa-hi kwara, ‘Hikani a taroki hinea i God u tuku boloki vae ne hugwe korokamu.’

¹⁰Vae lolona tulu mo soro tilolo gwatuivanua, diko rahe lai tabetabekikamu te takwa-hi, tulu mo vano vaki lo hala lalakua, tulu mo viti kwara,

¹¹‘Hikani a gwia na gwatui-vanuamiu hike ramo bulu lo garumai, vae kemo tivahira letiu tagai na nakomiu, kwara tulu ne kikilai huri tulu vakasile. Vae tulu domibibi kwara hikani a taroki hi i God u tuku boloki, vae ne hugwe koro na bulana tangaloi.’

¹²Na viti lakwakamu lo Rani na Arekiana [18] i God ne areki na tangaloi lo gwatuivanua hi ne sileti na tangaloi lo gwatuivanua Sotom.”

¹³Vunu i Jisas mo viti vake kwara, “A rongoana hati lakua lakwakamu lo gwatuivanua Korasin. A rongoana hati lakua lakwakamu vake lo gwatuivanua Betsaeta. A vaisea hika nomo vai lakwakamu, kwara vae diko u vaiana hokinia lo gwatuivanua lalakua Taea maia Saeton tuai, kwara vae a tangaloi takwahini ranahe hugu tea lo noga hatiana. Kwara vae rana lugwaki a lugwa hinea rau hati rana hugu lo gwia na kabu, kwara rana vosangi kwara rau bohi tina noga hatiana.

¹⁴Lo Rani na Arekiana i God ne arekikamu ne sileti na tangaloi lo gwatuivanua lalakua Taea maia Saeton.

¹⁵?Vae i kamu a ngwera Kavaneam, tulu lengaia kwara tulu ne tabe hakekikamu sibomiu vaki lolo taetae? I God ne vohokikamu tegetano tilolo kwalu bua.”

¹⁶I Jisas mo viti lakwa na nona ngwalagelo kwara, “Ihe hi u rongohurikamu u rongohuriau, vae ihe hi u bena kikamu, u bena kiau, vunu ihe hi u bena kiau u bena kinia hinea mo horeau.”

¹⁷A tangaloi ngavu kaibitu dongwaki kairua vano hi ramo mulemai u havutira haburu. [19] Ramo viti kwara, “Hugwe*, a tanungwe hati maira vake lolona kemo kwaha maira lo hinamu vae rau rongohurikami.”

¹⁸I Jisas mo daraki lakwara mo viti “Nu tagai Setano* u sovi tina taetae hoki na vila.

¹⁹Tulu rongo. I nau nu bete na huirana lakwakamu, kwara vae tulu ne lakao lo ngwata hati mana kwari* bulai gelevu hati aira hi rau kati na tangaloi vae ramo mate kinira, vake tulu ne lakao hivoulu lo huirana nona nomiu tavaluivuro, i Setano, vae a kinau nehe vai hokotikamu te vohoki.

²⁰Vae tulu hatu lagwa kwara a tanungwe hati ramo rongohurikamu, vae tulu lagwa kwara i God u ulibibi a hinamiu lolo taetae.”

²¹Lo taroki aia hini a Tanungwe Kokona mo vai i Jisas u havutia haburu mo viti kwara, “Mama, Hugwe na taetae mana varamana, nu lagwa haburu maiko, huri komo tavuniki na kinau aira vano hi tina tangaloi kikikila maira hinea rau domidomi sea, vae komo vosangira lakwa na tangaloi hinea rahe kikikila tea, aira hoki na raranatu. Kareaki Mama, a domimu, vae u mule luna hokinia hi komo lengaia.”

²²Vunu i Jisas mo viti lakwa na tangaloi kwara, “Rabela. I Tamagu u bete na kinau savia lakweau ba. I nau i Natuna, vae hete kwara te katukwale u kikilai kwara i nau ihe. I Tamagu kehekeheki u kikilai. Hete kwara te katukwale u kikilai kwara i Tamagu ihe. I nau mana tangaloi hinea nu mataira kwara na vosangia lakwara, i kami kehekeheki keu kikilai.”

²³Vunu i Jisas mo halebohi vaki mana nona ngwalagelo mo kwaha maira raraveki mo viti kwara, “U kareahakikamu huri tulu mo tagai na kinau vano hika.

²⁴Vae na viti lakwakamu, a tangaloi* duruduruki rusa hinea tuai mana hugwe rusa, rau lengaia kwara rana tagai na kinau vano hi tulu mo taga, vae rahe tagaira tea, vake rau lengaia kwara rana rongo na kinau vano hika tulu mo rongo, vae rahe rongora tea.”

²⁵A tangaloi* kikikila na Uliuli* Kokona katukwale u vanamai u vai kwara ne tiusina i Jisas. Mo uduhuri kinia mo viti kwara, “?Tisa, na vai kworoho vae na lavi na ahiana vaki tuai?”

²⁶I Jisas mo daraki lakwae mo viti “?A Uliuli Kokona u viti kworoho? ?Ku valu kworohokinia?”

²⁷A tangaloi hi mo daraki mo viti kwara, “ ‘Ko lagwa mana Hugwe a nomu God kina domimu vunuhia, mana mamaurianamu vunuhia, mana huihuimu vunuhia, mana domidomimu vunuhia’, vake ‘Kona lagwa mana tangaloi hinea rau hugu laliki maiko, kona vai tabetabekinira hokinia komo vai tabetabekinigo sibomu.’ ”

²⁸Vunu i Jisas mo daraki mo viti kwara, “Ku daraki u bakoto, vae ko vai kwehini kona ahi.”

²⁹Vae a tangaloi kikikila na Uliuli Kokona hi u lengaia kwara ne vosangia sibona lo nako na tangaloi kwara aia u bakoto. Hikani mo uduhuri ki Jisas mo viti kwara, “?Ihe maira rau hugu laliki maiau?”

³⁰I Jisas mo daraki mo viti kwara, “A tangaloi katukwale u duvule vanamai tina gwatuivanua lakua Serusalem kwara ne vano vaki Seriko. Vae a tangaloi uabalu tangaloi ramo kwalibibia, ramo teri na lugwana, ramo kwohia, vunu ramo kwalao tiua, garagarani kwara ne mate.

³¹Vae lo taroki hini a tangaloi* lingilingi katukwale u duvule vanamai u huri na hala hi, mo tagai na tangaloi hi, vae va lakao henahena tavaluki tiua va vano.

³²Vunu hokinia nga a kaihago katukwale nona tangaloi lingilingi aia a gwaloana* noi Livae mote vanamai vaki takwa-hi, mo tagai na tangaloi hini, vae va lakao henahena tavaluki tiua vake va vano.

³³Vae a ngwera katukwale, a ngwera Sameria* hinea tulu domi bulakikinira, mote lakao lo hala aia hi nga, mo vanamai vaki takwahini, mo tagai na tangaloi hini, u hakavia haburu.

³⁴Mo lakao vaki maia, mo lilingi na waen mana oel tilo mataikana mo vivihi korora. Vunu mo tau na tangaloi hi lo bulana boboroa, mo lavia vaki lo hotel katukwale takwahini mo tagahuria eia.

³⁵Mavukona mo lavi na vatu tari vakairua, mo betera lakwa na kaitagahuri na lolo na ingwa hi, mo viti lakwae kwara, ‘Ko tagahuria, vae hokinia nana mulemai hikeni, te havakinau hinea komo mahuki huria, nari kwono lakwako taliku.’ ”

³⁶I Jisas mo gweregwerei na nona leo mo viti kwara, “?Vae ku domi kwara aia makive tiura hinea kaitolu u vaivai karea mana tangaloi hinea a tangaloi uabalu tangaloi ramo kwohia?”

³⁷A tangaloi kikikila na Uliuli Kokona mo daraki mo viti “Aia hi mo hakavia.” I Jisas mo daraki lakwae mo viti “Karea, i nigo vake ko vano ko vai hokinia hi.”

³⁸Hikani i Jisas mana nona ngwalagelo ramo lakao, vae i Jisas mo maravuti lo gwatuivanua katukwale takwahini, a vavine a hinana i Mata mo lai tabetabekinia vaki tatana.

³⁹I tuana, a hinana i Meri, mo hugu hivo mana garu na Hugwe* i Jisas, mo toko rongohuri na nona huhuiana.

⁴⁰I Mata u rongo hati lolo domina huri na boloki kwara ne vaira. Vae hikani mo vanamai mo viti “Hugwe, kohe domihuriau te vohoki kwara i tuagu mo tirakiau nomo vai savi na boloki kaheau. Kona viti lakwae ne vanamai ne hago te maiau vaha.”

⁴¹Vae a Hugwe mo daraki lakwae, mo viti kwara, “!Mata, Mata! A domimu u kwalao laliki komo rongo hati huri na kinau vuroki maira,

⁴²vae a kinau katukwale vohoki u taritarisa kwara kona bolokinia. I Meri u matai na kinau bakoto vae nehe laiana te tiua.”