Read West Ambae LUK 11 Bible Online

LUK 11 - West Ambae bible

LUK 11

¹Vakatukwale i Jisas u tuku tiutangaroa lo tanotano katukwale. Vae mo rovo, katukwale tina nona ngwalagelo mo kwaha maia mo viti kwara, “Hugwe*, ko huhuikami kina tiutangaroa, hokinia hi i Sione mo huhui na nona ngwalagelo.”

²I Jisas mo viti lakwara kwara, “Tulu tiutangaroa hikwe. ‘Mama, a hinamu u kokona. Keu tiutangaroa kwara a tangaloi rana domi mavakinigo, rana hugu tavutimu, i nigo a Hugwe Lakua.

³Ko bete kamai hinaka vataha na rani, ne taritarisa hokinia hi keu lengaia.

⁴Ko domidomi koro nomai hatiana rusa, huri keu domidomi koro lakwara hinea rau vai kinau rau hati vovohikami. Ko hatu tirakikami tilo hala na sinasina huira.’ ” [NOTE TO TYPESETTER: Please put a thinspace between the single and double quotes there.]

⁵Hikani i Jisas mo viti lakwa na nona ngwalagelo kwara, “Diko te katukwale tikamu ne vano vaki tata na nona buluana bongi lakua, ne viti lakwae kwara, ‘Tua, ko beteau kina bereti* kaitolu.

⁶A nogu buluana katukwale u tuku lakalakao laliki mori maravuti maiau hi nga tatagu, vae a kinau tikei kwara na bete lakwae ne kani.’

⁷Vae diko a nona buluana ne dara lolo ingwa ne viti kwara, ‘Hatu kurekurere maiau. Nu hogoi katama ba, keu maturu ba mai raranatugu. Nahe maraka lai tea taliku kwara na bete bereti lakwako.’

⁸?Vae kworohokinia? Na viti lakwakamu, diko a tangaloi hi nehe maraka tea kwara ne bete a bereti lakwa na nona buluana, vae a nona buluana ne diridiri ne seseaka, a tangaloi hi ne maraka ne bete savi na kinau lakwae hinea mo lengaia. Ne bete lakwae, hete huri kwara mo kwareki nona buluana, vae huri mo diridiri mo seseaka he maemae tea kwara ne uduhuri vakarusa.

⁹Hikani na viti lakwakamu, tulu uduhuri, vae tulu ne lai. Tulu soro haro, vae tulu ne hagwe. Tulu diridiri, vae a matakihala ne matakahi lakwakamu.

¹⁰Ihe hi ne uduhuri vae ne lai. Ihe hini ne soro haro vae ne hagwe. A matakihala ne matakahi lakwae hinea ne diridiri.

¹¹I kamu hi a ratama. Diko te katukwale tikamu i natuna ne uduhuri a ika kinia vae nehe bete te ngwata lakwae.

¹²Diko ne uduhuri a tolu kinia vae nehe bete te kwari* bulai gelevu lakwae.

¹³Venaha diko i kamu a tangaloi hati vae tulu bete a kinau karekarea lakwai raranatumiu. Vae i Tamamiu lolo taetae ne vai u siletikamu, ne bete na Tanungwe Kokona lakwara hinea rana uduhuri kinia.”

¹⁴I Jisas u livuti na vono tina tangaloi katukwale hinea mo vaia he kwahakwaha lai tea. A vono hi mo vano tiua, a tangaloi hi mo tinakaki mo kwahakwaha. A vao rau idila haburu,

¹⁵vae ratuaki ramo viti “I Bielsebal, a hugwe na tanungwe hati, aia u bete na huirana lakwae, mo livutira letiu.”

¹⁶Ratuaki rau lengaia kwara rana kahi haro na domina, vae ramo uhia huri na kaivosangi tina taetae kwara ne vosangi kwara i God aia maia.

¹⁷Vae i Jisas u kikilai na domiga, mo kwaha maira viti “Te vanua haro nga ne kwahekinia sibona a gwatuki ne rusa hinea rana vae vuro mulekinira, vae a vanua hi nehe tu lai tea kwara ne tuai. A vakabela ne kwahekinia sibona, vae ne matagiri.

¹⁸?Hikani kwara vae diko i Setano* a nona tangaloi rana makwahe a gwatuki ne rusa, rana vai vuro mulekinira, vae ne hugwe kworohokinia korora kwara ne tuai? I kamu tulu viti kwara a hugwe nona tanungwe hati u bete a huirana lakweau nomo livuti na tanungwe hati kinia.

¹⁹?Diko u vai kwehini aia i kamu a nomiu tangaloi rau livu kworohokinira letiu? A nomiu tangaloi rau vosangi kwara tulu vakasile haburu.

²⁰Vae diko nu livutira letiu kina huirana noi God, hikani u vosangi kwara i God u hugwe koro na vanuamiu ba.

²¹“A tangaloi huira, a nona lagolago na vuro savia rau raraiana ba, u tagataga mana ingwana sibona, a nona vivilagoki savia rau eno u karea.

²²Vae lolona a tangaloi u huira siletia mo vanamai, mo vai vuro vovohia, mo kwohia, mo lai savi na nona lagolago na vuro tiua, aira hi mo toko domidomi tiluga kwara ne vai vuro kinira. Vae a tangaloi hi u gui na tangaloi na ingwa hi, mo balu savi na nona vivilagoki, mo hilekinira.

²³“A tangaloi rahe huriau tea, kareaki aira a nogu tavaluivuro. A tangaloi rahe hago te maiau kwara rana vileki nogu tangaloi maiau, kareaki aira rau livu girigirikinira.”

²⁴Vunu i Jisas mo viti kwara, “Lolona a tanungwe hati mo vano tina tangaloi, mo lakao laliki lo vanua vuroki, u tuku soro haro a tanotano kwara ne mabu eia. Vae diko nehe hagwe te kwara te katukwale, vae ne toko kwahakwaha kahea ne viti ‘!A! Na mule taliku vaki lolo ingwagu hinea nomo salatiua tomua.’

²⁵Hikani mo mule taliku mo hagwe na ingwa hini u ngwasara, rau tau tabetabeki na kinau lolona u rovo ba.

²⁶Vunu mo soro tivarea, mo lavi na tanungwe hati dolua kaibitu vake rau hati siletia, ramo vanamai ramo toka takwahini. Hikani a tangaloi hini mote hati vakevake nga siletia tomua.”

²⁷Lolona i Jisas mo kwaha, a vavine katukwale tina vao mo kwaha karakara mo viti “Ei, a vavine hika mo bavako, komo kanikani tiua, ne havutia.”

²⁸Vae i Jisas mo kwaha maia mo viti “Io, vae aira hinea rau rongo na leo noi God ramo rongohuria, vae u havutira siletia.”

²⁹Hikani a tangaloi rusa ramo vileki dali i Jisas, mo kwaha maira mo viti kwara, “I kamu a tangaloi lo taro hika tulu hati haburu. Tulu longi na kaivosangi tiau, vae nahe bete tea kwara te katukwale lakwakamu, vae kehekeheki tulu ne tagai na kaivosangi lui Sona hinea tuai.

³⁰A tangaloi* duruduruki hi i Sona u kwareki a kaivosangi lakwa na ngwera Nineve. Vae lo hala hokinia hi i nau a Natu* na Tangaloi nu kwareki a kaivosangi lakwa na tangaloi na taro hika.

³¹Lo Rani na Arekiana [20] a vavine hugwe lakua tina ngwahukui-vanua talumabeo ne tu hake ne viti kwara a tangaloi na rani hika rau hati, huri u lakao dali na duvi na varamana hikani kwara ne rongo na lolorani noi Solomon. !Vae tulu tagaia! I nau nu lakua sileti Solomon.

³²Lo Rani na Arekiana a tangaloi na gwatuivanua Nineve rana tu hake, rana viti kwara tulu hati, huri i Sona mo heretuva, ramo halebohi tina noga hatiana rusa. !Vae tulu tagaia! I nau nu lakua sileti Sona.”

³³Vunu i Jisas mo viti kwara, “Hete tangaloi kwara ne bulukaoki na laeti, vunu ne tavunikinia diko ne gworovi koroa kina bakete, vae ne lavia ne taua lo tutu na laeti, kwara vae a tangaloi rana soro tilolo ingwa rana tagaia mo vavarama.

³⁴A matamu aia hoki na laeti huri na tarabehi. A matamu rau karea a tarabehimu savia aia lolo leleha. Vae diko a matamu rau hati, a tarabehimu savia aia lolo dodoki.

³⁵Vae ko tagahuri kwara a leleha lumu ne hatu mulemai kina dodoki.

³⁶Diko u leleha lo tarabehimu savia, a dodoki tikei, u leleha savia hoki na laeti mo kwaka vavarama vakahakinigo.”

³⁷Lolona i Jisas mo kwaha mo rovo, a Varisi* katukwale mo kwarea kwara ne va kanikani maia tatana. Hikani mo soro vaki lolo ingwana mo hugu kwara ne kanikani.

³⁸A Varisi hika mo taga kwara i Jisas he sasavula tea tomua vunu mori kanikani, vae u idila haburu.

³⁹Vae a Hugwe* i Jisas mo kwaha maia mo viti kwara, “Tagaia, i kamu a Varisi tulu kwasuki na laha mana beleti tavalavarea kehekeheki, vae lolo domimiu u kukwere kina babalua mana kinau vake rau hati u rusa.

⁴⁰Tulu reraka. I God aia u kihi na kinau tavalavarea, lolona vake.

⁴¹Vae tulu bete te kinau lolo nomiu laha mana beleti lakwa na tangaloi kakaravi, vunu a kinau savira rana ngwasara lakwakamu.

⁴²“I kamu hi a Varisi, a rongoana hati lakua lakwakamu. Tigwaravu tulu kwiribibi na tangwata hika. Tulu valuki na rau kwaririgi hinea tulu tuku tau lo hinaka kwara ne boniboni, hoki na rau na min* mana rau na ru* mana rau ratuaki vake hokinira, kwara vae tulu ne bete a rau katukwale lakwai God, tulu ne kwiribibi na rau kaihikwa. Vae tulu he domi huri tea kwara tulu ne vai na kinau rau bakoto lakwa na tangaloi, vake kwara tulu ne lagwa mai God. A kinau kairua hi u taritarisa kwara tulu ne vai, vae tulu hatu domi bulakiki na kinau ratuaki aira vano hi vake.

⁴³“I kamu hi a Varisi, a rongoana hati lakua lakwakamu. Tulu lagwa haburu kwara tulu ne hugu lo hagele na tangaloi lalakua lolo vale* na tiutangaroa, vake tulu lengaia kwara a tangaloi rana vai mavakikamu lo nako na tangaloi maira na sara.

⁴⁴A rongoana hati lakua lakwakamu. I kamu hoki na tabu hinea a tangaloi rahe mataira tea, vae lolona a tangaloi mo lakao luga he kikilai tea, vae aia u mulemai hokinia u hogora koro na nako i God.”

⁴⁵Katukwale tina tangaloi* kikikila na Uliuli* Kokona mo viti “Tisa, ku kwaha hokinia hini, ku viti hatihatikikami vake.”

⁴⁶I Jisas mo daraki mo viti “I kamu a tangaloi kikikila na Uliuli Kokona, a rongoana hati lakua lakwakamu. Tulu mo tau na hagohago mava haburu lo tangaloi kwara rana kwalia, vae i kamu sibomiu tulu he vai tea kwara tulu ne hago maira tulu ne kwali na hagohago mava vano hi.

⁴⁷A rongoana hati lakua lakwakamu. Tulu mo vai tabetabeki na tabu na tangaloi* duruduruki rusa, hinea i ratubumiu ramo kwohi matemateira.

⁴⁸I kamu tulu vai hokinia hi tulu vosangi kwara tulu lagwa mana kinau hinea i ratubumiu ramo toko vai tuai. Aira rau kwohi matematei na tangaloi duruduruki maira, vae i kamu tulu mo toko vai tabetabeki na tabuga.

⁴⁹Vae huri hi a Lolorani noi God u viti kwara, ‘Na hora na tangaloi duruduruki mana kaihora* kokona, vae a tangaloi rana kwohi matemateira ratuaki, ratuaki rana vai bulakikinira.’

⁵⁰Vae i kamu a tangaloi kwahale hikani, tulu ne kwali na kakadiki huri na mateana nona tangaloi duruduruki savira hinea a tangaloi ramo kwohi matemateira vanamai evina lo tinatinakakiki na varamana.

⁵¹U tinakaki lui Evol i tuana mo kwohi mateia, vaki lui Sekaraea, hinea ramo kwohi mateia lo livuka na voda[21] mana Ingwa Kokona noi God. Io, na viti lakwakamu, i kamu a tangaloi kwahale hikani, tulu ne kwali na kakadiki huri na tangaloi duruduruki savira hinea i ratubumiu ramo kwohi matemateira tuai.

⁵²“I kamu hi a tangaloi kikikila na Uliuli Kokona, a rongoana hati lakua lakwakamu. Tulu kwiribibi na ki na katama na ingwa na kikikila. Vae i kamu sibomiu tulu bemiu soro vaki lolona, vunu tulu tu korora hinea rau vai kwara rana soro vaki lolona.”

⁵³Lolona i Jisas mo tiraki na vanua hini, a tangaloi kikikila na Uliuli Kokona mana Varisi maira ramo tinakaki ramo tuku gulele na leona, vunu ramo kwaha madi vovohia, ramo uhia huri na kinau rusa.

⁵⁴Rau vai kwara rana tiusinae lo leo kwara rana kwalibibia te lo leo hinea ne viti vakasilekinia.