Read West Ambae LUK 12 Bible Online

LUK 12 - West Ambae bible

LUK 12

¹A tangaloi taritarika ramo visusuni tabulutaki, rau tutu luga vohoki. I Jisas mo kwaha tomuaki lakwa na nona ngwalagelo mo viti “Tulu tagahurikamu tina doridori hati nona Varisi* hinea rau kwetukwetutu rau domidomira, rau viti kinau ki ringoga vohoki. A doridori hi aia hoki na is.

²A havakinau hini a tangaloi rau gui koroa, vae i God ne ragahia, vatavataha na kinau tavuniki, vae i God ne taua vaki na ngwasara.

³Vae a kinau hi ku viti lolo dodoki vae a tangaloi rana rongoa lolo rani vake, a kinau ku kwaha lolo gwero na tangaloi lolo bolo kabakaba, vae a tangaloi rana kolekinia tivarea lakwa na tangaloi rusa.”

⁴Vunu i Jisas mo viti vake kwara, “Rabuluigu, na viti lakwakamu, tulu hatu mataku kinira hinea rana kwohi matei na tarabehimiu, vae vaki takuni ranahe vai lavi na kinau te vake hinea u hati vovohikamu.

⁵Nana viti na tangaloi lakwakamu hinea u taritarisa kwara tulu ne mataku kinia. Tulu mataku ki God, aia hi ne vai lai ne kwohi matei na tangaloi, vunu takuni tiua a nona huirana eia u taritarisa kwara ne vohokinia tilolo kabu na kakadiki. Io, na viti lakwakamu, tulu mataku kinia.

⁶“Tulu domidomi lo kinau hika. A manu kwaririgi hinea a tangaloi rau tuku harakira a selen hangavulu dongwana kairua vohoki a manu kailima, vae hete kwara te katukwale tiura hi i God a lolona ne bongi kinia.

⁷Kareaki i kamu a vulu na gwatumiu vake, i God u valu savira u rovo ba. Vae tulu hatu mataku. I kamu tulu karekarea sileti na manu rusa.”

⁸Vunu i Jisas mo viti kwara, “Na viti lakwakamu, ihe tea ne viti matangwasarakiau lolo nako na tangaloi kwara aia a nogu, i nau a Natu* na Tangaloi na vai kwehini vake lakwae lolo nako na kaihora noi God lolo taetae.

⁹Vae ihe tea ne viti tivarea lolo nako na tangaloi kwara aia hete nogu, i nau a Natu na Tangaloi na viti tivarea vake kwara aia hete nogu, lolo nako na kaihora noi God lolo taetae.

¹⁰“Ihe tea ne viti a leo vovohiau, i nau a Natu na Tangaloi, vae i God ne domidomi koroa. Vae ihe tea ne viti a kinau hati vovohi na Tanungwe Kokona, i God nehe domidomi koroa tea vaki tuai.

¹¹“Lolona ramo lavikamu kwara rana kahi haro a doridorimiu lolo vale* na tiutangaroa, diko tomuaki na hugwe lalakua mana kaitagahuri lalakua, tulu hatu domi huri kwara vae tulu ne tu koro kworohokikamu tiura, diko kwara vae tulu ne viti a havakinau.

¹²A Tanungwe Kokona aia neri huhuikamu kwahaia hi kwara vae tulu ne viti a havakinau.”

¹³A tangaloi katukwale lolo vao mo kwaha maia mo viti “Tisa. I tamagu u mate ba. Ko viti lakwai tuagu ne kwaheki na nomaru vivilagoki hi i tamamaru mo tuliki terekaki lakwakamirua.”

¹⁴I Jisas mo daraki lakwae mo viti kwara, “?Ihe u rivukiau kwara na kwaheki na nomiru vivilagoki hokinia hi lakwakamurua?”

¹⁵Vunu vake mo kwaha maira aira vunu mo viti kwara, “Tulu likoki, tulu tagahuri ne karea kwara tulu ne hatu tau na nomiu domidomi lo vivilagoki rusa hinea tulu mo lengaia kwara ki nomiu kehe nga. A mauriana nona tangaloi he eno te lo nona vivilagoki hinea u rusa lengalenga.”

¹⁶Vunu i Jisas mo viti na tavaluileo hika lakwara kwara, “A tangaloi hugwe katukwale a nona tano eia a rivurivuki rau kwai a kwaiki rau karekarea haburu.

¹⁷Vunu mo tinakaki mo toko domi lolo domina kwara, ‘I nau hika a tanotano na kwai na bulagu rivurivu u tikei. ?Vae na vai kworoho?’

¹⁸Mo domidomi sibona kwara, ‘I nau hika na vai hikwe. Na talahi na nogu ingwa vano hika, vunu nari tabera te hini rau lakulakua vake, nari tau na hinaka lologa vake mana nogu vivilagoki ratuaki.

¹⁹Vunu na domi lugu sibogu kwara, “!A tangaroa karea lakweau! Hikani a kinau rusa hinea rau karea nomo toko lengaia, vae hika aira eia ba huri na hukao rusa. Hika na mabu tabetabeki na hugu, na kani na inu, ne havutiau.” ’

²⁰Vae i God mo viti lakwae kwara, ‘!Ku reraka! Bongi hika kona mate, vae ihe ne lavi na kinau vano hi u rusa lengalenga komo taura huriko sibomu.’ ”

²¹I Jisas mo gweregwerei na leo mo viti kwara, “Vae ne hokinia lakwara hi rau vileki tabulutaki na noga vivilagoki hurira siboga, vae lo nako i God rahe hugwe tea.”

²²Hikani i Jisas mo viti lakwa na nona ngwalagelo mo viti “Huri na kinau hi na viti lakwakamu kwara a domimiu ne hatu kwalao laliki huri na hinaka hinea tulu mo lengaia kwara tulu ne ahi kinia, diko huri na lugwa hinea tulu mo lengaia huri na tarabehimiu.

²³A maurianamiu u sileti na hinaka vake a tarabehimiu u sileti na lugwa.

²⁴Tulu tagai na manu, rahe rivu te biu, diko rahe makuriki te hinaka. A noga ingwa kwara rana tau hinaka eia diko kwara rana vile tilolona tikei. !Vae i God u vanganira! Vae i kamu tulu sileti na manu.

²⁵?Diko a tangaloi a domina u kwalao laliki huri na maurianana hinea kwara ne toka nehe tuai tea, vae tulu domi kwara lo hala hi ne vaia ne toka ne tuai vakevake? Hetea.

²⁶?Diko tulu he vai lavi na kinau tea hinea u kelekele, kworohokinia a domimiu mo kwalao laliki huri na kinau ratuaki vake?

²⁷Tulu tagai na vira na bubu ramo mauri. Rahe boloki tea diko rahe vai te vulavulaga siboga. Vae na viti lakwakamu, i Solomon aia a tangaloi hugwe lakua lengalenga, vae a vulavulana he karea tea haburu hoki na vira aira vano hini.

²⁸I God u vakavula na duvu na bubu. A duvu aia hike hika karagwa vunu mavuko ne va tikei, a tangaloi ne huraira letiu. ?Kworohokinia? ?I God nehe vakavulakamu tea? A nomiu hauhuriana u kelekele haburu.

²⁹Hikani a domimiu ne hatu kwalao laliki, tulu hatu domidomi haburu tigwaravu kwara tulu ne kani aha diko tulu ne inu aha.

³⁰A tangaloi na varamana hika hinea rahe kikilai i God tea, tigwaravu rau domidomi haburu lo kinau aira vano hi. Vae i Tamamiu lolo taetae u kikilai kwara tulu lengai na kinau aira vano hi.

³¹Vae tulu ne tagahuri ne karea kwara tulu ne rongohuri i God hinea aia a nomiu Hugwe Lakua, vunu aia neri bete na kinau vano hi lakwakamu.”

³²Vunu i Jisas mo viti, “Tulu hatu mataku, i kamu hika a tangaloi maguguki kelekele, huri i Tamamiu u lagwa haburu kwara ne lavikamu tulu ne mulemai ki bulana tangaloi hinea aia a nomiu Hugwe Lakua.

³³Tulu hokaki vunuhi na nomiu vivilagoki, vunu tulu bete a maneki lakwa na tangaloi kakaravi. Tulu vai rarai hurikamu sibomiu a tanga na mane* hini vae nehe hati tea. Tulu tau tabetabeki nomiu vivilagoki lolo taetae, rana eno takwahini ne rusa tigwaravu nehe ngwadeleki tea, huri a tangaloi na babalua nehe balu lavira tea, vunu vake a kanikani ranahe magarakinira tea.

³⁴Takwanahavaki hinea a nomiu vivilagoki rau eno eia, vae a domimiu u eno takwa-hi tigwaravu vake.”

³⁵Vunu i Jisas mo viti vake kwara, “Tulu rarai vatavataha na taroki kwara tulu ne boloki, hoki na tangaloi boloki hinea u lugwa u kwahikwahi mo madi, u tutu nona laeti u rovo ba, u rarai.

³⁶I kamu tulu ne hoki na tangaloi boloki hinea rau hugu tara na noga masi kwara ne mulemai tina kanikani na nona lakiana. Ne mulemai ne diridiri, rana takahi heheriki na katama lakwae.

³⁷Diko a noga masi ne mulemai hagwera rau rada rau rarai, ne havutira. Kareaki na viti lakwakamu, vae a masi hi ne lugwaki na lugwana ne kwahikwahi ne madi, vunu ne viti lakwa na nona tangaloi boloki rana hugu hivo kwara rana kanikani, ne bete hinaka lakwara.

³⁸Diko ne mulemai te hinea bongi lakua, diko te behi na rani, vae diko ne hagwera rau rarai, ne havutira haburu.

³⁹A lolomiu ne hatu bongi kina kinau hika. Kwara vae diko a tangaloi na ingwa u kikilai kwara a tangaloi na babalua vae ne vanamai vaki tatana lo hava taro, nehe tirakinia tea kwara ne gae na ingwana ne soro tilolona.

⁴⁰Vae i kamu vake tulu ne rarai vatavataha na taroki huri i nau a Natu* na Tangaloi vae na mulemai taliku lo taro hi tulu he domi huri tea.”

⁴¹I Pita mo uduhuri viti “?Hugwe*, ku viti na tavaluileo hika hurikami, diko huri na tangaloi savia?”

⁴²A Hugwe mo daraki mo viti kwara, “?A hava tangaloi boloki u karohuri u kikikila? Aia hi a nona masi ne taua ne tagahuri na nona boloki savia, vae a tangaloi boloki hi ne bete a hinaka ne taritarisa lakwa na tangaloi boloki ratuaki lo taroki bakotoki.

⁴³Vae diko a masi hi ne mulemai ne hagwe na nona tangaloi boloki u vai hokinia hi, vae a tangaloi boloki hi ne havutia haburu.

⁴⁴Kareaki na viti lakwakamu, a masi hi ne tau na tangaloi boloki hi ne tagahuri na nona vivilagoki savia.

⁴⁵Vae diko a tangaloi boloki hi u domi sibona kwara, ‘A nogu masi u vaivai ta tuai kwara ne mulemai,’ vunu ne maraka ne kwohikwohi na tangaloi boloki ratuaki, a ngwera a vavine aira vunu, vunu ne kanikani ne inuinu ne torongi.

⁴⁶Vunu a masi hi ne mulemai taliku te lo raniki hinea a tangaloi boloki hi he kikilaia tea he raraia tea, vae a masi hi ne vai kadia ne taua vaki mana tangaloi hinea rahe hauhuri te lo leona, vae aia ne kwali na kakadiki vake hokinira.

⁴⁷“Diko a tangaloi boloki hinea u kikilai na kinau hi a nona masi mo lengaia kwara ne vai, vae aia sibona he rarai te kwara ne vai na kinau hini a nona masi mo lengaia, rana takwilia karakara.

⁴⁸Vae diko a tangaloi boloki hini he kikilai na kinau te hini a nona masi mo lengaia kwara ne vai, vae diko u vaia u vakasile luna u taritarisa kwara rana takwilia huri, vae rana takwilia nehe karakara tea. A tangaloi hinea u lai a kinau rusa ti God, vae u taritarisa kwara ne vai na kinau ne rusa. Vake a tangaloi hinea u lai kinau rusa karakara, vae u taritarisa kwara ne vai na kinau ne rusa karakara.”

⁴⁹Vunu i Jisas mo viti kwara, “I nau nu vanamai kwara na tau na kabu lo varamana. Kwara vae diko hika a kabu hi u kao ba, kwara vae na lagwa haburu.

⁵⁰Vae a rongoana hati lakua ne duduniau hokinia hi a tangaloi mo lai bavtaes. Vae na rongo hati haburu radu nga, tarisaki hi a rongoana hati hi ne rovo.

⁵¹?Tulu domi nu vanamai kwara na bete na magemuana lakwa na tangaloi na varamana? !Hete vohoki! Nahe vanamai te huri, aia nu vanamai kwara na vai na tangaloi rana makwahe.

⁵²U tinakaki hika, diko a tinami katukwale aira kailima, vae rana makwahe. Vae aira hi kaitolu ranahe karea te mairarua hi kairua, diko i rarua hi raru nehe karea te maira hi kaitolu.

⁵³A ratama ranahe karea te mai raranatuga a ngwera, a raranatu ngwera ranahe karea te mai ratamaga, vunu a raretahi ranahe karea te mai raranatuga a ravavine, a raranatu vavine ranahe karea te mai raretahiga. A ratubui ngwarasea ranahe karea te mai ragwelikaga vavine, i ragwelikaga vavine ranahe karea te mai ratubuga a ratubui ngwarasea.”

⁵⁴I Jisas mo viti vake lakwa na tangaloi kwara, “Diko tulu ne tagai na dodo ne galo ahivo, tulu ne viti kwara ‘Hika ne uha,’ vae ne uha.

⁵⁵Vunu lolona tulu mo rongo na langi mo here vanamai a kwaibilake, [22] tulu viti kwara, ‘Ne ngwangwavi haburu,’ vae ne ngwangwavi haburu.

⁵⁶I kamu a tangaloi kwetukwetutu, tulu domidomikamu tulu kwaha ki ringomiu vohoki. ?Tulu mo tagai na varamana hikani mana mahaleki, tulu viti lavia kwara a domianaki hoki na havakinau, vae kworoho tulu he va kikilai na domiana na taro te hika?”

⁵⁷Vunu i Jisas mo viti kwara, “?Kworoho i kamu sibomiu tulu he va matai na kinau tea hinea u bakoto kwara tulu ne vai?

⁵⁸Diko a tangaloi mo laviko vaki lo ingwa na arekiana kwara rana arekinigo huri u viti kwara ku vai kinau he taritarisa tea vovohia, u karea kwara tomua, lolona i kamurua lo hala radu nga, kuru mo vai tabetabeki na nomiru rongohati. Diko hetea, ne mai reveko vaki lo nako na tangaloi na arekiana, a tangaloi na arekiana ne tirakinigo tilo kaba na bulusman, a bulusman hi ne tauko lolo ingwa na gwarugwaru.

⁵⁹Na viti lakwako konahe ngwalua te vohoki tarisaki kona vai savi na bukumu.”