Read West Ambae LUK 13 Bible Online

LUK 13 - West Ambae bible

LUK 13

¹Lo taro hini a tangaloi tuaki rau vanamai ramo vitiviti huri lakwai Jisas kwara a ngwera Galili* rau tuku vai noga hura boniboni lakwai God, vae kwahaia hi nga a tangaloi na vuro noi Paelet* ramo vanamai, ramo kwohi matemateira, rau mate.

²I Jisas mo daraki lakwara mo viti “?Tulu domi kworohokinia? ?Hika tulu domi kwara a ngwera Galili vano hi rau mate hokinia hi, hika u vosangi kwara aira rau hati haburu sileti na ngwera Galili ratuaki?

³Na viti lakwakamu, hete kwehi. Vae diko tulu nehe bohi te tina nomiu hatiana, i kamu vunu vake tulu ne mate hokinira nga.

⁴Tulu domihagwe na ngwera Serusalem hinea aira hangavulu dongwana kaikwalu, a ingwa lakua mo sovibibira ramo vimateki lo vanua Saeloam. ?Hika tulu domi kwara hi u vosangi kwara aira rau hati haburu sileti na ngwera Serusalem ratuaki?

⁵Na viti lakwakamu, hete kwehi. Vae diko tulu nehe bohi te tina nomiu hatiana, i kamu vunu vake tulu ne mate hokinira nga.”

⁶Vunu i Jisas mo viti na tavaluileo hika lakwara kwara, “A tangaloi katukwale a bulana vikai katukwale u kwareki a vivik u mauri lolo lungwana. Vae a tangaloi hi mo vano kwara ne tova te kwaiki vae he hagwe te vohoki.

⁷Hikani mo viti lakwa na kaitagahuri na lungwa hini mo viti ‘Tagaia. Hika a hukao kaitolu rau vano ba, nomo toko vanamai vaki mana vikai hika kwara na tova te kwaiki vae nohe hagwe te vohoki. U karea kwara kona tai suria. ?Kworoho mo toko tutu koro mahao hokinia hi?’

⁸Vae a kaitagahuri na lungwa hi mo viti lakwae kwara, ‘Masi. Ko tirakinia a hukao katukwale vake, nari keli dalidalia, nomo rasu te tae na buluki tiluna ne vaia ne mauri ne karea.

⁹Diko te lo hukao taliku mo kwai, hokinia hi u karea, diko hetea kori viti lakweau nomo tai suria.’ ”

¹⁰Lo Rani* na Mabuana katukwale i Jisas u tuku huhui lolo vale* na tiutangaroa.

¹¹A vavine takwa-hi katukwale a tanungwe hati luna, mo vaia mo lenga a hukao hangavulu dongwana kaikwalu, a kadiuna u bakilu vae u olo kehe nga, he tu bakotoki te vohoki.

¹²Lolona i Jisas mo tagaia, mo kwarea mo viti “Tubui. Hika a kamu lengeana u rovo tiuko.”

¹³Hikani i Jisas mo tau na kabana lo vavine hi, mo tu bakotoki bulu maia nga, mo kaluhaki God.

¹⁴Vae a kaitagahuri na vale na tiutangaroa hi mo lologuteki Jisas, huri mote vakahiki na vavine hi lo Rani na Mabuana. Mo kwaha maira hi rau hugu takwa-hi mo viti kwara, “A noda rani kaiono kwara tana boloki luga. Tulu vanamai lolo rani aira vano hini kwara ne vakahiki na tarabehimiu rana karea taliku, vae lo Rani na Mabuana tulu hatu vanamai.”

¹⁵Hikani a noda Hugwe* mo daraki mo viti kwara, “I kamu a tangaloi kwetukwetutu tulu domidomikamu. Tulu kwaha ki ringomiu vohoki. Savisavikamu tulu teri na bulamiu buluki mana dogi tulu mo lai kusaki tina tanotano na kaga hinaka, tulu mo lavira tivarea tulu mo bete kwai lakwara lo Rani na Mabuana.

¹⁶Hikani a vavine hi a gwaloana lui Evraham, aia hi i Setano* mo gwarubibia kina lengeana a hukao hangavulu dongwana kaikwalu. ?Vae kworohokinia kwara nahe va teri na kaigwaru noi Setano tea tiua, na vakahikinia lo Rani na Mabuana?”

¹⁷A nona leo darakiana u vai na nona tavaluivuro rau maemae haburu maira. Hikani a tangaloi vunuhira u havutira haburu huri na boloki lalakua hi rau karekarea haburu mo toko vaira.

¹⁸I Jisas mo viti taliku kwara, “?I God a nona bolokiana ne mauri ne toko lakua kworohokinia kwara ne hugwe koro na bulana tangaloi? ?Na va dumua lo ha?

¹⁹Aia hoki na biu na vibaga, hinea mo sovi tilo vikai katukwale mo mauri hake mo mulemai kina vikai viu lakua, vunu a manu ramo vanamai ramo vai unuga, ramo tiu valavalaga lo rangaki.”

²⁰I Jisas mo kwaha taliku mo viti kwara, “?Na va dumuki kwara i God a nona bolokiana ne mauri ne toko lakua kworohokinia kwara ne hugwe koro na bulana tangaloi?

²¹Aia hoki na is hinea a vavine mo lavia mo didihia tilolo vulaoa lolo disi mo kwihia, vae doluaki na vulaoa hi mo ngwarasea kinia.”

²²I Jisas mo lakao lalahi na gwatuivanua lalakua mana gwatuivanua kwaririgi, mo toko huhui lologa, lo halana hi mo toko vano huri na gwatuivanua lakua Serusalem.

²³A tangaloi katukwale mo uhia mo viti kwara, “?Hugwe*, aira hi rana ahi aira te kairua, diko kworohokinia?” I Jisas mo daraki lakwara,

²⁴mo viti kwara, “Tulu seseaka kwara vae tulu ne soro lo matakihala hi kelekele bise vohoki. Kareaki na viti lakwakamu, a tangaloi rusa rana vai rongo kwara rana soro eia, vae ranahe soro lai tea.

²⁵“Vae a masi na ingwa hi ne maraka ne hogoi na katama. Vae diko i kamu tulu tu te varea, tulu ne toko diridiri lo matakihala hi, tulu ne viti ‘Ko takahi na katama lakwakami,’ vae aia ne daraki lakwakamu kwara, ‘I nau nahe kikilaikamu tea kwara tulu vanamai ave.’

²⁶Vae tulu ne daraki lakwae taliku, tulu ne viti kwara, ‘I kami hi kemo toko kanikani maiko, kemo inuinu maiko, vunu i nigo ku tuku huhui lolo gwatui-vanuamai.’

²⁷Vunu aia ne viti lakwakamu taliku kwara, ‘Nahe kikilaikamu tea kwara tulu vanamai ave. I kamu vunu a tangaloi vaivai hati. !Tulu vano tiau!’

²⁸Hikani tulu ne tagai Evraham i Aesik mai Sekov mana tangaloi* duruduruki rusa, rau hugu lo Vanua Karagwa hinea i God u hugwe koroa, vae i kamu tulu ne tauana tivarea, tulu ne ngara tulu ne toko va kati raharahaki na livomiu.

²⁹A tangaloi rusa rana vanamai dalibulu talukahake talukahivo, rana vanamai talumahuku vake talumabeo, rana hugu lo tevo na kanikani lo Vanua Karagwa hinea i God mo hugwe koroa.

³⁰Vae kwahaia hi aira hinea lo taro hika rau takuni vae rana tomua, vunu aira hinea lo taro hika rau tomua vae rana takuni.”

³¹Lo taro aia hi nga a Varisi* ratuaki ramo vanamai vaki mai Jisas ramo viti lakwae kwara, “Ko vano tina vanua hike, ko va vano te vaki lo vanua dolua, huri a kavman hi i Herot, [23] u lengaia kwara ne kwohi mateiko.”

³²I Jisas mo daraki lakwara mo viti kwara, “I Herot aia a tangaloi na tiutiusina. Tulu vano tulu viti na leo hika lakwae kwara, ‘Lo taro gwanugwanu hinea u eno radu nga, vae na toko livu letiuki na tanungwe hati maira, vake na vakahiki a lengeana rusa. Vunu takuni tiua na vai rovonaki na nogu boloki doluaki.’

³³Vae lo taro hika karagwa vaki na mavuko ne vano nga, na va toko lakao lo halagu na vano, huri he taritarisa tea kwara vae rana kwohi mate a tangaloi* duruduruki lo vanua te dolua vake, kehekeheki rana kwohi mateia lo gwatuivanua lakua Serusalem.”

³⁴Vunu i Jisas mo viti “!Ee! !I kamu a ngwera Serusalem! I kamu tulu tuku kwohi matematei na tangaloi* duruduruki rusa, tulu voho matematei na kailai na leo noi God hinea mo horara vaki maikamu. Vakarusa nu lengaia kwara na haka korokamu savia, hoki na toa hinea mo kokovi koro i raranatuna, vae i kamu tulu he lengaia tea kwara na vai hokinia hi.

³⁵Vae u karea, hika tulu ne hugu kwehi. !Tulu taga! Hika i God u tiraki na nona Ingwa Kokona lo vanuamiu ba. Vae na viti lakwakamu hika kwara i kamu vae tulu nehe tagaiau te tarisaki a taroki ne maravuti kwahaia hi tulu ne viti kwara, ‘A Hugwe i God ne vai tabetabekinia hi u vanamai lo hinana.’ ”