Read West Ambae LUK 16 Bible Online

LUK 16 - West Ambae bible

LUK 16

¹Hikani i Jisas mo kwaha mana nona ngwalagelo mo viti kwara, “A tangaloi hugwe katukwale a nona tangaloi katukwale eia u tuku tagahuri savi na nona vivilagoki. Hikani a tangaloi katukwale mo duruki lakwa na masi hi kwara a kaitagahuri hi u mahuki haburuki na mane* na nona masi.

²Vunu a masi hi mo kware na nona kaitagahuri mo uduhuri kinia kwara, ‘?A hava leo hika huriko nomo toko rongora? Ko vosangi tivarea kwara ku mahuki kworohoki na nogu vivilagoki savira, huri vae konahe kwiribibi na boloki te hika taliku vohoki kwara kona tagahuri savi na nogu vivilagoki.’

³Hikani mo domidomi lolo domina kwara, ‘A nogu masi hika vae ne vohokiau tina nogu boloki. ?Vae na vai kworoho? Nahe huira tea kwara na keli tano, vunu nu maemae kwara na longilongi mane tina tangaloi.

⁴Io, nu kikilai na halaki. Nana vai hokinia hika, vae na rovo tina nogu boloki, nana hagwe lai belagu, rana lai tabetabekiau vaki lolo ingwaga.’

⁵“Hikani mo kware tabulutaki na tangaloi savia hinea a bukuga eia mana nona masi. Mo viti lakwae hinea tomua halaradu kwara, ‘?A bukumu kaivihe mana nogu masi?’

⁶A tangaloi hi mo daraki mo viti kwara, ‘A bukugu a taramu na oel na kanikani vidolua.’ A kaitagahuri hi mo viti lakwae kwara, ‘A veva na bukumu aia hikani. Ko hugu tabetabeki ko ulibibi na valuvaluki kwara ngavu kailima vohoki.’

⁷Mote kwaha maia kairuaki vake, mo viti kwara, ‘?I nigo a bukumu kaivihe?’ Mo daraki lakwae mo viti kwara, ‘A baki na uit* u tari.’ A kaitagahuri hi mo viti lakwae kwara, ‘A veva na bukumu aia hikani. Ko ulibibi kwara vidolua vakaikwalu.’

⁸Hikani a masi nona kaitagahuri hati hi mo kaluhakinia huri na nona domidomi sea. A kinau hi u vosangi kwara a tangaloi na varamana rau vai boloki lo varamana rau domidomi sea u sileti na tangaloi na leleha.”

⁹Vunu i Jisas mo viti nga kwara, “Huri na kinau hi, na viti lakwakamu, tulu boloki lo nomiu vivilagoki na varamana hinea rau vanamai lakwakamu, kwara tulu ne hagwe nomiu buluana. Tulu ne vai hokinia hi, vae lo taroki a kinau vano hi rana rovo, vae i God ne lavikamu tilolo vanua lolo taetae tulu ne toka eia vaki tuai vaki tuai.

¹⁰Aira hinea rau tagahuri u karea lo kinau kwaririgi, vae rana tagahuri lai ne karea lo kinau rau lalakua vake, vae aira hinea rau kurakura lo kinau kwaririgi, vae rana kurakura lai lo kinau rau lalakua vake.

¹¹Diko tulu tagahuri mane na varamana, vae tulu vai he bakoto tea, i God nehe tiraki lai tea lakwakamu kwara vae tulu ne tagahuri na nona kinau rau karekarea hinea rana vaikamu tulu ne kwareki a tangaloi hugwe kareaki.

¹²Vake diko tulu tagahuri na kinau tea nona tangaloi dolua, vae tulu vai he bakoto tea, i God ne tu korokamu kwara tulu nehe tagahuri lai tea a nomiu kinau sibomiu.”

¹³Vunu i Jisas mo viti kwara, “Hete tangaloi kwara ne boloki lakwa na masi kairua vakatukwale. Diko a tangaloi ne vai kwehi ne bena kinia kairuaki ne lagwa maia kairuaki. Vunu vake ne domi mavakinia kairuaki ne domi bulakikinia kairuaki. Tulu nehe vai lai tea kwara tulu ne kwareki i God ki nomiu hugwe tulu ne boloki nona, vunu tulu nete vai na mane* ne kwareki nomiu hugwe vake tulu ne boloki nona.”

¹⁴A Varisi* ramo rongo na leo hi, ramo toko mana tiehi Jisas, huri aira rau lagwa haburu mana mane*.

¹⁵Vae i Jisas mo kwaha maira mo viti kwara, “I kamu a tangaloi hinea tulu vai na kinau kwara vae a tangaloi rana domi kwara tulu bakoto. Vae i God u kikilai savi na domimiu. A doridori hinea a tangaloi ramo toko taga kwara a kinau haburu, vae lolo nako i God a kinau vuroki vohoki.

¹⁶“A Tangwata* noi Mosis mana uliuli nona tangaloi* duruduruki rusa rau tu, vae rovonaki lo taro i Sione a tangaloi na bavtaes tangaloi mo maravuti, vae takuni tiua, a Roro Karea u vitiana tivarea kwara hika i God u tuku boloki kwara ne hugwe koro na bulana tangaloi. Hikani a tangaloi savia ramo huira vakevake kwara vae i God ne hugwe korora.

¹⁷U madi kwara a taetae mana varamana raru ne sala. Vae u madi siletia kwara vae a mahigwai leo te kelekele bise na Tangwata ne tikei.

¹⁸“Diko te tangaloi u tiraki vavinehina, vunu mote laki mana vavine dolua, u veveki rera ki vavinehina. Vunu diko a ngwera te katukwale ne laki mana vavine hini i tuana ngwarasea u tirakinia ba, aia u baluki na vavine hi.”

¹⁹Vunu i Jisas mo viti kwara, “A tangaloi hugwe katukwale u lugwaki na lugwa karekarea, rau kara hoki na lugwa na hugwe lakua, rau lotu hi rau karea haburu nga. U kanikani karea tigwaravu, u havutia vataha na rani.

²⁰Vae a tangaloi kakaravi takwa-hi katukwale a hinana i Lasaros, u kovikovia haburu, rau tuku kwalia vaki lo matakihala nona tangaloi hugwe hi.

²¹Mo hugu takwa-hi u lengaia kwara ne toko kani a mavuvui hinaka kana hugwe hi hinea ramo sovi tina nona tevo. Vunu a kwiriu ramo vanamai ramo toko meloi na kovina.

²²Vae a tangaloi kakaravi hi mo mate, a kaihora tina taetae ramo kwalia vaki lo ngwarara i Evraham tavaluki, lo tanotano na kanikani lolo taetae. A tangaloi hugwe hi mote mate vake, ramo tanomia.

²³“Aia lolo rongoana hati lakua takwa-hi lolo kabu na kakadiki, vae mo lalangao mo tagai Evraham u vakahao lengalenga, i Lasaros tavaluki tiua.

²⁴Hikani mo kwarekware mo viti kwara, ‘!Mama Evraham! Ko hakaviau, ko hora i Lasaros ne tuli na bihuna tilolo kwai kangwkangwa ne taua tilo meagu ne kangwkangwakinia, huri nu rongo hati haburu lolo kabu hika.’

²⁵Hikani i Evraham mo viti ‘Natugu. Ko domi hagwe hinea lolo nomu tokaana lo varamana ku hagwe a kinau vunuhira rau karea maiko, vae i Lasaros u hagwe a kinau rahe karea tea savia. Vae hika u havutia takwahike, i nigo ku rongo hati haburu takwa-hi.

²⁶Vae hivoulu tina kinau hika, a kwalu bua mo saro kwahekita, vae aira hi hikeni rau lengaia kwara rana kao utu vaki maikamu, ranahe vai lai tea. Vake hete kwara te katukwale ne kao utu tikamu vanamai hike.’

²⁷“A tangaloi hugwe hi mo viti kwara, ‘Go, Mama, nu uduhuri tabetabeki kinigo kwara kona hora i Lasaros vaki tata i tamagu,

²⁸huri ratuagu kailima eia. Ko tirakinia ne vano vaki maira ne viti duruhaki lakwara kwara vae aira vake rana hatu vanamai vaki lolo tanotano na rongoana hati hika.’

²⁹Vae i Evraham mo viti kwara, ‘I ratuamu, a uliuli noi Mosis mana tangaloi* duruduruki rau viti duruhaki lakwara. U karea kwara i ratuamu rana rongohuri na kinau hinea a tangaloi aira vano hi ramo ulira.’

³⁰A tangaloi hugwe hi mo daraki mo viti kwara, ‘He taritarisa tea, Mama Evraham. Vae diko te katukwale ne maraka tina tata na tamate ne mulemai taliku vaki maira ranari va bohi na domiga.’

³¹Hikani i Evraham mo viti lakwae kwara, ‘Diko ranahe rongohuri i Mosis te mana tangaloi duruduruki, vae diko te katukwale ne ahi mulemai taliku tina mateana, vae ranahe rongohuria te vake.’ ”