Read West Ambae LUK 17 Bible Online

LUK 17 - West Ambae bible

LUK 17

¹I Jisas mo kwaha mana nona ngwalagelo mo viti kwara, “A kinau u rusa vae rana vanamai, rana vai lavi na tangaloi rana sovi tilolo vaivai hati. Vae a rongoana hati lakua lakwa na tangaloi hinea ne lavira vanamai.

²Diko ne sinasina na tangaloi te katukwale tiura hi rahe huira tea lo noga hauhuriana, vae ne sovi tilolo vaivai hati, ne kwali na kakadiki huria, u huira haburu. Ne siletia hinea kwara vae diko te tangaloi ne likoti na vatu lakua lo kusuna, ne vohokinia tilolo tahi ne dono.

³!Tulu tagahuri ne karea!” Vunu i Jisas mo viti vake kwara, “Diko i tuamu tea u vaivai hati, ko kwaha karakara maia, vae diko mo bohi na domina ko domidomi koro lakwae.

⁴Vake diko u vaivai hati vovohiko vakaibitu lo rani katukwale, vunu vatavatahaki na taroki hi vakaibitu mo vanamai vaki maiko mo viti kwara, ‘Hikani nu bohi na domigu ba lo kinau hini,’ vae kona domidomi koro lakwae.”

⁵A kaihora* kokona rau kwaha mana Hugwe* ramo viti kwara, “Ko vai na nomai hauhuriana ne lakulakua vake.”

⁶A Hugwe mo daraki mo viti kwara, “Diko a nomiu hauhuriana u kelekele vohoki, hoki na biu na vibaga hinea kelekele bise, vae tulu ne viti lai lakwa na vikatabola kwara, ‘Ko mavuraki tina mahao hika ko va tu lolo livukai tahi.’ Vae a vikai hi ne rongohurikamu.”

⁷Vunu i Jisas mo viti nga kwara, “I kamu tulu kikilai u rovo ba a doridori na masi lakwa na nona tangaloi boloki, hinea u boloki lolo agoago*, diko u tagahuri sivsivi. Vae ne mulemai tina nona boloki raviravi, nona masi nehe viti lai te lakwae kwara, ‘Mai, heheri, ko hugu ko kanikani.’ Hetea.

⁸A doridori na masi ne viti hokinia hika kwara, ‘Go, ko vai rarai kagu hinaka. Vunu komo lugwaki na lugwa ne taritarisa, komo kwali kagu hinaka vanamai, na kanikani, na inuinu. Vae i nigo kori kanikani komo inuinu vaki takuni.’

⁹?Vae a tangaloi boloki hokinia hi mo vai a havakinau a nona masi mo viti, tulu domi kwara a nona masi mo viti te kwara, ‘Nu lagwa maiko’? Hetea.

¹⁰Vae aia hokinia maikamu. I kamu a tangaloi boloki noi God. Diko ne viti a havakinau lakwakamu kwara tulu ne vai, vae tulu vai savi na kinau hinea mo viti, u taritarisa kwara tulu ne viti hokinia hika kwara, ‘I kita a tangaloi boloki vohoki. U taritarisa kwara tana vai hokinia hi.’ ”

¹¹Lolona i Jisas mo tau hala vaki lo gwatuivanua lakua Serusalem u lakao lo livuka na vanua kairua, Sameria*, maia Galili*.

¹²Mo toko lakao vaki lo gwatuivanua kelekele katukwale, mo hagwe na tangaloi hangavulu a lengeana hati na vinu [25] u vaira. Rau tu vakavakahaoka tiua ramo koleki,

¹³ramo viti kwara, “!Jisas, Hugwe*! !Ko hakavikami!”

¹⁴I Jisas mo tagaira mo viti lakwara kwara, “Tulu vano tulu vosangikamu lakwa na tangaloi* lingilingi rana vivilokikamu.” Lolona hi aira lo hala radu nga a tarabehiga ramo ngwasara taliku.

¹⁵Vae katukwale tiura mo tagaia kwara a tarabehina u ngwasara, mo mulemai taliku vaki mai Jisas mo kaluhaki God kina dilao huira.

¹⁶Mo sovi hivo vaki lo tano mana garu i Jisas, mo lagwakinia. A ngwera hi aia a ngwera Sameria.

¹⁷Hikani i Jisas mo kwaha mo viti kwara, “?Kworohokinia? ?Nu domi kwara a tangaloi hangavulu rau ngwasara, vae kaihikwa aira ave?

¹⁸?A tangaloi hika aia a vanamaiana, vae kworoho aia kahea mote mulemai taliku mo kaluhaki i God?”

¹⁹Hikani i Jisas mo kwaha maia mo viti kwara, “Karea, ko maraka ko vano, a nomu hauhuriana u vaiko vae ku ahi.”

²⁰A Varisi* ratuaki rau uhi Jisas kwara i God ne hugwe koro na bulana tangaloi kihokua. I Jisas mo darakinira mo viti kwara, “A kaimatai tikei kwara tulu ne taga kina matamiu ne matangwasaraki lakwakamu kwara i God ne hugwe koro na bulana tangaloi.

²¹Hete kwara te katukwale ne viti lavia kwara, ‘!Tulu tagaia, aia hika!’ diko ne viti ‘!Tulu tagaia, aia hinea!’ huri hika i God mo toko boloki kwara ne hugwe koro na bulana tangaloi vae aia lo livukamiu ba.” [26]

²²Hikani i Jisas mo kwaha mana nona ngwalagelo mo viti kwara, “A taroki ne vanamai tulu ne lengaia haburu kwara tulu ne tagaiau, i nau a Natu* na Tangaloi, kinahavaki diko te rani katukwale vohoki, vae tulu nehe taga laviau tea.

²³Vae a tangaloiki ne eia rana viti lai lakwakamu kwara, ‘!Tulu tagaia, aia takwahinea!’ diko rana viti ‘!Tulu tagaia, aia hike!’ Vae tulu hatu huri na leo vano hi.

²⁴Lolona mo vila, mo varahi na taetae vaki lo duviki, vae lo ranigu hinea i nau a Natu na Tangaloi na mulemai taliku luna, ne hokinia hi.

²⁵Vae tomuaki na rongo hati haburu, vunu a tangaloi rusa lo taro aia hika rana bega kiau.

²⁶I nau a Natu na Tangaloi, a doridori na tangaloi rana vaira lo tarogu ne hoki na doridori na tangaloi ramo toko vai lo taro i Noa.

²⁷Vunuvunuhi na tangaloi rau kanikani rau inuinu, a ngwera mana vavine rau vilakilaki, vae rovonaki hi i Noa mo soro vaki lolo agana, a kwai mo huki, mo horo ramo mate lolona.

²⁸Vunu vake a doridoriki ne hoki na doridori na tangaloi lo taro i Lot. Vunuvunuhi na tangaloi rau kanikani rau inuinu rau volivoli, rau hokahokaki, rau rivurivu, rau kihikihi ingwa.

²⁹Vae lo raniki hini i Lot mo ngwalua tina vanua Sotom, a kabu mana vuikani* ramo hivo vanamai tina taetae ramo kao matemate savira.

³⁰Vae ne hokinia hi lo rani hi i nau a Natu na Tangaloi nari matangwasarakiau lolo nako na tangaloi rusa.

³¹“A raniki hi ne vanamai, vae a tangaloi hinea diko aia te varea tina ingwana, vae ne hatu soro vaki lolo ingwana kwara ne lai nona vivilagoki takwa-hi. Vake lo halaki hokinia hi diko te tangaloi aia lolo bulana agoago*, vae ne hatu mule vaki na vanua.

³²!Tulu domihagwe i vavinehi i Lot!

³³Diko te tangaloi u vai kwara ne uti na mamaurianana ne vai salakinia, vae ihe hinea ne vai salaki na mamaurianana ne ahi.

³⁴Na viti lakwakamu, vae lolo bongi hi, a tangaloi kairua raru ne ngwalulu lo here katukwale, vae kairuaki ne laiana letiu, kairuaki hetea.

³⁵A vavine kairua raru ne vai rarai hinaka tabulutaki, vae kairuaki ne laiana letiu, kairuaki hetea.” [27]

³⁷A nona ngwalagelo ramo uhia ramo viti kwara, “?Hugwe*, ave?” I Jisas mo tavatavalui leo mo viti kwara, “Ne hoki na manu hinea rau tuku kani a biki boni. Te ave te hinea a biki boni eia, a manu vano hi rana vileki tabulutaki eia kwara rana kania.”