Read West Ambae LUK 18 Bible Online

LUK 18 - West Ambae bible

LUK 18

¹Hikani i Jisas mo viti na tavaluileo hika lakwara kwara ne huhuira rana tiutangaroa tigwaravu, vae rana hatu keokeo, a domiga ne hatu sovi.

²Mo viti “A hugwe katukwale u toka lo gwatuivanua katukwale he mataku tea ki God, vake he domi mavaki na tangaloi te vohoki.

³Vunu a gwati vavine katukwale takwa-hi lo gwatuivanua aia hi nga, u tuku vanamai vaki mana tangaloi hi tigwaravu, mo seseaka huria kwara vae ne hago maia, mo viti ‘Ko hago maiau lo kinau aira hi a nogu tavaluivuro mo toko vaira vovohiau.’

⁴Mo vanovano vae u tuai haburu a tangaloi hi mo bena kwara ne vai na leo na tubui hi. Vae vaki takuni mo toko domidomi lolo domina kwara, ‘Kareaki, i nau hika nahe mataku te ki God, vake nahe domi mavaki na tangaloi tea.

⁵Vae a gwati vavine hika mo vai utuutu maiau, vae huri hi na hago maia. Diko hetea ne toko vanamai nga vae ne ngwahiau kinia.’ ”

⁶Vunu a Hugwe* i Jisas mo viti kwara, “Tulu domidomi lo leo hi a hugwe hati hi mo vitia.

⁷?Hikani kworohokinia mai God? A bulana tangaloi hinea u mataira rau ngarahakinia u rani u bongi kwara ne hago maira. ?Vae tulu domi nehe vai bakotoki na noga kinau tea? ?Diko tulu domi kwara vae nehe vaivai heheri tea kwara ne hago maira?

⁸Vae na viti lakwakamu, i God ne vai bakotoki na noga kinau bulu maia nga. ?Vae i nau a Natu* na Tangaloi, na mulemai taliku vaki lo varamana nana hagwe lavi na tangaloi tea hinea rau hauhuri diko hetea?”

⁹I Jisas u viti na tavaluileo hika lakwa na tangaloi hinea rau tuku domi kwara aira kehekeheki rau bakoto vae rau domi bulakiki na tangaloi doluaki.

¹⁰Mo viti “A tangaloi kairua raru vano vaki lo Vanua* Kokona noi God kwara raru ne tiutangaroa. Kairuaki aia a Varisi*, kairuaki aia a tangaloi* na vilevile mane* a takis nona kavman.

¹¹A Varisi hi u tu kahea, mo tiutangaroa. [28] Mo viti ‘God. Nu lagwakinigo huri i nau hete hoki na tangaloi doluaki hinea rau kodoka, rau vai kinau hinea rahe bakoto tea, rau balu vavine, vake i nau hete hoki na tangaloi na vilevile takis hika.

¹²Nu rete vakairua lo kwiki katukwale, vunu tigwaravu lolona nomo lai a kinau hangavulu vae nu lai katukwale tiura nomo bete lakwako.’

¹³Vae a tangaloi na vilevile takis hini u tu vakahao he vai tea kwara ne lalangao vaki lo taetae, vae u vosai na gwagwana kehekeheki u vosangi kwara u rongo hati huri u kikilai kwara u vai kinau rau hati, mo viti ‘O, God ko hakaviau ko domidomi koro nogu hatiana, huri i nau a tangaloi vaivai hati.’ ”

¹⁴Vunu i Jisas mo viti kwara, “Na viti lakwakamu, a tangaloi aia hi u mule vaki tatana u kwareki a tangaloi bakoto koro na nako i God. Aia hi kairuaki tomuahiki, vae nehe hokinia tea, huri a tangaloi hinea rau lailai hakekinira siboga vae i God ne lailai hivokinira. Vunu aira hinea rau lailai hivokinira vae i God ne tabe hakekinira rana lalakua.”

¹⁵A tangaloi tuaki rau kwali raranatuga kwaririgi bise vaki mai Jisas kwara ne tau kabana luga. Vae a nona ngwalagelo ramo tagaira ramo tu korora kwara rana hatu vai kwehi.

¹⁶Vae i Jisas mo kware na sakwarigi vano hi vaki maia mo viti “Tulu tiraki na sakwarigi rana vanamai vaki maiau. Tulu hatu tu korora, huri a natu kwaririgi vake i God u kwarera kwara ne hugwe korora.

¹⁷Na viti bakotoki lakwakamu, a tangaloi hinea he hivokinia tea kwara ne mulemai hoki na natu kelekele kwara ne hugu tavuti na Hugwe Lakua i God, vae i God nehe kwareki te nona Hugwe lo taroki.”

¹⁸A kaitomuaki nona gwaloana noi Isrel* katukwale mo uduhuri ki Jisas mo viti “Tisa, i nigo a tangaloi karea. ?Na vai kworoho kwara vae na hagwe na ahiana vaki tuai?”

¹⁹Hikani i Jisas mo uduhuri kinia mo viti kwara, “?Kworoho komo vitiau kwara nu karea? Hete kwara te katukwale u karea, vae i God kehekeheki.

²⁰Ku kikilai na leo na Tangwata* hi mo viti ‘Ko hatu balu vavine, ko hatu ua mate tangaloi, ko hatu babalu, ko hatu kurakura, ko domi mavaki tamamu mai retahimu.’ ”

²¹Hikani a tangaloi hi mo daraki mo viti kwara, “Nu rongohuri savi na leo na Tangwata vano hi ba, lolona nomo ngwarasea hake vae vaki na hika.”

²²Lolona i Jisas mo rongo hokinia hi mo kwaha maia mo viti kwara, “Kona vai na kinau katukwale vake. Ko hokaki savi na nomu vivilagoki, ko hileki a maneki lakwa na tangaloi kakaravi, vunu lo taroki konari hagwe nomu vivilagoki karekarea rusa lolo taetae, vae ko vanamai ko huriau.”

²³Vae lolona a tangaloi hi mo rongo na leo hokinia hi u rongo hati, huri aia a tangaloi hugwe.

²⁴I Jisas mo tagaia kwara u rongo hati haburu, mo viti “Raka, u madi haburu lakwa na tangaloi hugwe kwara rana soro tilo Vanua Karagwa hinea i God u hugwe koroa.

²⁵U madi lakwa na boboroa lakua hi u kwareki a kamel, kwara ne soro lalahi na mata na nitili. Vae u madi siletia lakwa na tangaloi hugwe kwara ne hivokinia ne hugu tavuti na Hugwe Lakua i God.”

²⁶A tangaloi ramo rongo na leo hi ramo viti kwara, “?Vae ihe ne va ahi te hika?”

²⁷I Jisas mo daraki mo viti “Savi na kinau hinea a tangaloi rahe vai lai tea, i God u vai lai.”

²⁸Hikani i Pita mo viti “?Kworohokinia maikami? Keu tiraki tatamai kwara kena huriko.”

²⁹Vunu i Jisas mo viti kwara, “Io, kareaki na viti lakwakamu, diko te katukwale hinea i God u hugwe koroa vae huri hi u tiraki tatana, diko i vavinehina, diko i ratuana, diko i tamana mai retahina, diko i raranatuna,

³⁰vae lo varamana hika ne hagwe na kinau rusa silesiletia tomua, vunu lo taroki hi vae ne vanamai, neri hagwe na ahiana gwaravu vaki tuai.”

³¹Hikani i Jisas u lavi na nona ngwalagelo hangavulu dongwana kairua gegeaki mo kwaha maira mo viti kwara, “Tulu rongo. Hika tau tuku vano vaki Serusalem, vae vatavatahaki na kinau hinea a tangaloi* duruduruki ramo ulibibia tuai huriau i nau a Natu* na Tangaloi, vae ne mule luna.

³²Rana tauau tilo kaba na tangaloi tavalavarea tina gwaloana noi Isrel*, rana vaivai tagaiau, rana barahiau, rana lido tilugu,

³³rana takwiliau, vunu rana kwohi mateiau. Vae vaki takuni lo rani kaitoluki nari maraka taliku.”

³⁴Vae a nona ngwalagelo rahe rongo kikilaki na leo te vano hika, a leoki he matangwasara te lakwara, huri rahe kikilai na domianaki te vohoki kwara i Jisas u tuku viti na havakinau.

³⁵Hikani i Jisas mo vanamai vaki garagarani mana gwatuivanua Seriko, a tangaloi katukwale u hugu takwa-hi lo ngwararai-hala, a matana u dodo. U tuku longilongi kinau tina tangaloi.

³⁶Vae lolona mo rongo na vao ramo lakao utu, mo uduhuri kwara, “?A havakinau hike?”

³⁷Ramo viti lakwae kwara, “I Jisas a ngwera Nasaret u lakao utu hike.”

³⁸Aia mo tau mo ngara karakara mo viti “!Jisas! !Gwaloana noi Devit! Ko hakaviau, ko vai tabetabekiau.”

³⁹A tangaloi ramo lakao tomuakinira ramo taraia ramo viti “!Ko hatu kurekurere!” Vae hetea, mo ngara karakara vakevake nga, mo viti “!Gwaloana noi Devit! Ko hakaviau, ko vai tabetabekiau.”

⁴⁰Hikani i Jisas mo tu takwa-hi, mo viti lakwara kwara rana lavi na tangaloi hi, a matana u dodo, vaki maia. Vae lolona mo vanamai vaki garagarani, i Jisas mo uhia,

⁴¹mo viti kwara, “?Ku lengaiau kwara na vai aha maiko?” A tangaloi hi mo viti kwara, “Hugwe*. Nu lengaia kwara na tagataga taliku.”

⁴²Vunu i Jisas mo viti lakwae kwara, “U karea, a matamu rau karea taliku. Hika a nomu hauhuriana u vakahikinigo.”

⁴³Vae heheriki mo tagataga lai, vunu mo huri i Jisas u kaluhaki God. Lolona a vao ramo tagaia ramo kaluhaki God aira vunu.