Read West Ambae LUK 19 Bible Online

LUK 19 - West Ambae bible

LUK 19

¹I Jisas u hena nga vaki Seriko, hika mo toko lakao lalahi na vanua hi.

²A tangaloi katukwale eia, a hugwe na tangaloi* na vilevile mane* a takis nona kavman, a hinana i Sakius, aia a tangaloi hugwe.

³U lengaia kwara ne tagai Jisas kwara aia makive. Vae aia a tangaloi kelekele, u gwanugwanu, vae he taga lavi Jisas tea, huri na vao mo rusa.

⁴Vae mo kwalao tomuaki na vao mo galo lo vikai* katukwale, a hinaki a visikamo*, kwara ne tagai Jisas, huri vae ne lakao lo hala hi.

⁵Hikani i Jisas mo maravuti lo tanotano hi mo lalangao hake mo kwaha mai Sakius mo viti kwara, “Sakius, ko hivo heheri, huri i nau vae na maturu tatamu hika bongi.”

⁶I Sakius mo hivo heheri mo lai tabetabeki i Jisas, u havutia haburu.

⁷A tangaloi vunuhia ramo tagaia ramo maraka ramo toko kwaha ruturutu ki Jisas rau viti kwara, “A tangaloi hika u vano kwara ne maturu lo tata na tangaloi vaivai hati.”

⁸Vae i Sakius mo maraka hake mo kwaha mana Hugwe* mo viti kwara, “Hugwe, ko rongo, vae na bete na duvi na nogu vivilagoki lakwa na tangaloi kakaravi. Vake diko nu sinasinae te katukwale nomo lai nona kinau tiua kina babalua, vae na bete lakwae taliku vakaivati siletia nomo lai tiua.”

⁹I Jisas mo kwaha mo viti kwara, “Hika karagwa i nau nu vakahiki na tangaloi hika mai raranatuna, huri a tangaloi hika vake aia a gwaloana lui Evraham.

¹⁰I nau a Natu* na Tangaloi nu vanamai kwara na soro harora hinea rau sala na vakahikinira.”

¹¹Lolona a tangaloi ramo toko gwerongo huri Jisas mo viti na kinau vano hi, mo viti na tavaluileo katukwale lakwara. Aia u garagarani mana gwatuivanua lakua Serusalem, aira rau tuku domi kwara rana tagai God ne hugwe koro na bulana tangaloi lai nga lo Vanuana Karagwa.

¹²Huri na kinau aia hika mo viti kwara, “A tangaloi lakua katukwale u vano vaki lo vanua dolua vakahao kwara a hugwe lakua eia ne rivukia ne kwareki a hugwe lakua, vunu neri mulemai taliku neri hugwe koro na tangaloi lo vanuana.

¹³Vae he vano te radu nga, mo kware tabulutaki na nona tangaloi boloki hangavulu vaki maia, mo bete na mane* vatu a kol katukwale kehe lakwara vatavatahakinira, hinea katukwale u taritarisa mana vatu tari vakavidolua. Vunu mo kwaha maira mo viti kwara, ‘Tulu boloki luga vae tulu ne seme te mane vakevake tarisaki na mulemai taliku.’

¹⁴Karea, mo vano. Hika a ngwera tatana rau bega kinia, ramo hora a kailai na leo ramo huria, ramo viti kwara, ‘I kami kehe lengai na tangaloi te hika kwara vae ne hugwe korokami.’

¹⁵“A tangaloi lakua hi mo vano, a hugwe lakua mo rivukia u kwareki a hugwe lakua, vunu mo mulemai taliku. Heheriki mo kware na nona tangaloi boloki vano hi, aira hi mo bete na mane lakwara, kwara rana vano vaki maia. U lengaia kwara ne kikilai kwara rau seme noga mane kaivihe tiluna.

¹⁶A nona tangaloi boloki tomuaki mo vano vaki maia mo viti kwara, ‘Hugwe, a mane hi komo betea lakweau, nu seme hokinia nga hangavulu vake tiluna.’

¹⁷A hugwe hi mo viti lakwae kwara, ‘!Aa, ku vai u karea haburu! I nigo a nogu kaihora karea. Huri ku karohuri lo boloki kelekele hokinia hika, vae i nau na tauko kona tagahuri na gwatuivanua lalakua hangavulu.’

¹⁸Vunu a nona tangaloi boloki kairuaki mo vanamai mo viti kwara, ‘Hugwe, a mane hi komo betea lakweau vae nu seme hokinia nga kailima vake tiluna.’

¹⁹A hugwe hi mo viti lakwae kwara, ‘U karea, na tauko kona tagahuri na gwatuivanua lalakua kailima.’

²⁰Vunu a tangaloi boloki vake mo vanamai mo viti lakwae kwara, ‘Hugwe, a nomu mane aia hikani. Nu diubibia kina lugwa nomo tau tabetabekinia.

²¹Nu matakutakinigo, huri i nigo a tangaloi madi. Ku tuku lai a kinau hi hete nomu, vake ku kwali a hinaka lolo agoago* hinea kohe rivu tea.’

²²A hugwe hi mo viti lakwae kwara, ‘A, i nigo a tangaloi boloki hati. A leomu hi komo vitia na vaia ne vaiko kona rongo hati. Ku kikilai vunu ba kwara i nau a tangaloi madi, nu tuku lai a kinau hi hete nogu, vake nu kwali a hinaka lolo agoago hinea i nau nahe rivu tea.

²³?Vae kworoho kohe va tau na nogu mane tea lolo bagi? Kwara vae diko ku vai kwehi vunu lo taroki hi na mulemai na hagwe kelekele vake hivoulu tiluna hi a bagi ne voli lakweau.’

²⁴Vunu a hugwe mo viti lakwara hi rau tu takwa-hi kwara, ‘Tulu lavi na mane hika tiua tulu mo betea lakwa na tangaloi boloki hi a nona mane hangavulu.’

²⁵Hikani aira ramo kwaha maia ramo viti kwara, ‘Hugwe, aia a nona mane hangavulu ba.’

²⁶Vae aia mo daraki mo viti kwara, ‘Na viti lakwakamu, aira hinea a noga eia ba, rana lai vakevake, vae aira hinea a noga tikei, diko te noga eia kelekele, vae ne laiana tiura.

²⁷Vae a nogu tavaluivuro, aira vano hi rahe lengaia te kwara na hugwe korora, tulu lavira vanamai tulu kwohi matemateira hika lai nga lo nakogu.’ ”

²⁸I Jisas mo viti na leo hi mo rovo vunu mo vano tomuakinira vovohi na gwatuivanua lakua Serusalem. Aira rau huria takuni.

²⁹Hikani i Jisas mo vanamai vaki garagarani mana gwatuivanua kairua Betvas maia Betani, behi na Vuti na Vikai* a Violev, vae mo hora na nona ngwalagelo kairua,

³⁰mo viti kwara, “Kuru vano vaki lo gwatuivanua kelekele hi u tu koro na nakomiru. Kuru mo maravuti kuru ne hodilai na natu na dogi rau sanibibia hinea a tangaloi rahe kwalao te luna radu nga. Kuru mo teri na karo tiua, kuru mo lavia vanamai vaki hike.

³¹Vae diko te tangaloi mo uhikamurua kwara, ‘?Kworoho kuru mote teri na karo tina dogi hi?’ kuru mo viti tabetabeki lakwae kwara, ‘A noda Hugwe* u lengaia kwara ne kwalao luna.’ ”

³²Raru mo vano lo halagaru, raru hagwe savi na kinau hi i Jisas mo vitira lakwararua.

³³Hikani raru mo vano, raru mo teri na karo tina natu na dogi hi. I ratabulana ramo kwaha mairarua ramo viti kwara, “?Kworoho kuru mote teri na karo tiua?”

³⁴Raru mo darakinira kwara, “A noda Hugwe u lengaia kwara ne kwalao luna.”

³⁵Hikani raru mo lavi na dogi hi vaki mai Jisas. Vunu raru mo teri na kakavugaru raru mo verakira hivoulu lo natu na dogi hi, vunu raru mo hago mai Jisas kwara ne galo ne hugu luna.

³⁶Lolona mo toko kwalao luna mo vano, a tangaloi ramo vola kakavuga lo hala, mo kwalao hivoulu luga.

³⁷Hikani mo vanamai vaki garagarani mana gwatuivanua Serusalem, lo hala hi mo duvule lo Vuti na Vikai a Violev, a nona vao lakua hi ramo toko huria u havutira haburu, ramo lagwaki God huri na kinau savira hinea rau hahaburuka ramo taga. Ramo kaluhakinia karakara

³⁸ramo viti kwara, “Hugwe i God. Ko vai tabetabeki na Hugwe Lakua hinea u vanamai lo hinamu. A magemuana eia lolo taetae. Aira vunu hinea lolo taetae rau tabe hakekinigo.”

³⁹Vunu a Varisi* ratuaki lolo vao ramo kwaha mai Jisas ramo viti “Tisa, ko suri na nomu vao ramo toko huriko rana hugu butu.”

⁴⁰I Jisas mo darakinira mo viti “Na viti lakwakamu, vae diko aira rana hugu butu, kareaki a vatu vano hika siboga rana vidouki rana kaluhaki God.”

⁴¹Lolona i Jisas mo vanamai vaki garagarani mana gwatuivanua lakua hi mo tagaia mo tangi huri u hakavi na tangaloi na gwatuivanua hi, mo viti kwara,

⁴²“E, kwara vae tulu kikilai hika karagwa kwara ne tangwatahaki-kamu kworohokinia, ne karea haburu. Vae hikani, tulu he taga kikilakinia te vohoki.

⁴³Vae a raniki ne vanamai hinea a nomiu tavaluivuro rana tu korokorokamu. A noga tangaloi na vuro rana keli na kwalu dalidali na gwatui-vanuamiu kwara rana hili lolona, rana tagataga korokamu vatavataha na ngwahukui-vanua, vae tulu nehe ahi lai te tiura.

⁴⁴Vunu rana voho surisuri na ingwa savira lo vanuamiu rana kwohi matemateikamu mai raranatumiu hi lolo nomiu ara. Vae a vatu na ingwa savira hete kwara te katukwale ne tu lo tanotanoki, huri i God u vanamai kwara ne vakahikikamu, vae tulu he taga kikilaki na taroki te vohoki.”

⁴⁵Vunu i Jisas mo soro vaki lolo Vanua* Kokona noi God mo tinakaki mo livulivuti na tangaloi hini ramo toko hokahokaki vivilagoki takwahini.

⁴⁶Mo kwaha maira mo viti “?Kworohokinia? U uliana lo Uliuli* Kokona kwara i God u viti ‘A ingwagu ne kwareki a ingwa na tiutangaroa.’ Vae i kamu tulu mo bohikinia mo mulemai kina hilihili na tangaloi babalua.”

⁴⁷Hikani i Jisas mo huhui lolo Vanua Kokona noi God vatavataha na rani. Vunu a tangaloi* lingilingi lalakua mana tangaloi* kikikila na Uliuli Kokona mana kaitomuaki nona gwaloana noi Isrel* ramo lengaia kwara rana kwohi mateia,

⁴⁸vae rahe hagwe lavi na halaki tea, huri a tangaloi savira rau lengaia haburu kwara rana rongohuri tabetabeki na leona.