Read West Ambae LUK 2 Bible Online

LUK 2 - West Ambae bible

LUK 2

¹Lo taroki aia hini i Sisa* a hugwe nona ngwera Rom a hinana i Ogastas, aia u tuliki na leo kwara vae rana lai savi na hina na tangaloi takwa-hi mo hugwe korora.

²Hikani ramo lai a hina tomua halaradu lolona hi i Kwaerinias aia a kavman lakua lo vanua Siria.

³Lo taro aia hi a tangaloi savia rau mulemule vaki lo gwatugwatui-vanuaga kwara a tangaloi rana lai a hinaga.

⁴Vae i Sosev mo tiraki Nasaret lo vanua Galili* mo vano vaki Betlehem lo vanua Sutia, hinea a hugwe lakua i Devit mo vora eia. I Sosev u vano takwahini huri aia a gwaloana noi Devit.

⁵I rarua mai Meri raru vano kwara a tangaloi rana lai hinagaru. I Meri, aia hi i Sosev mo taubibia kwara ne laki maia, vae u tatagwangira.

⁶Lolona i rarua lo gwatuivanua Betlehem, a vulana mo rovo kwara ne hagovi i natuna.

⁷Vae a tanotano tikei lolo ingwa na maturua, hokinia raru mo vano vaki lo tanotano hinea rau tuku vanga boboroa eia. Vunu i Meri mo hagovi i natuna tomua halaradu, a natu ngwera. Mo vivihia lo lugwa, mo lulukinia lolo bokisi na duvu gorugoru kana boboroa.

⁸Takwa-hi a kaitagahuri na sivsivi rau hugu lo talutalu na boboroa bongi, rau tagahuri bulaga sivsivi.

⁹A kaihora tina taetae nona Hugwe mo maravuti kinira, a hahaviada nona Hugwe mo kwaka tiluga, vae aira rau mataku haburu.

¹⁰Vae a kaihora hi mo viti lakwara kwara, “Tulu hatu mataku, huri i nau nu vanamai kwara na viti na roro karea lakwakamu, aia hi ne lai a hahavutiana lakua lakwa na tangaloi savia.

¹¹Lolo bongi hikani a nomiu Kaivakahi u vora lo gwatuivanua i Devit. Aia a Hugwe*, i Vurae* hinea i God u tuliki terekakinia tuai kwara ne vanamai.

¹²Hikani a kaivosangi lakwakamu. I kamu tulu ne hagwe na natu kelekele rau kakavua kina lugwa, u ngwalulu lolo bokisi na duvu gorugoru kana boboroa.”

¹³Heheriki a kaihora tina taetae rusa ramo maravuti kinira ramo kaho kaluhaki God, ramo viti

¹⁴“!Kaluhaki God hinea lolo taetae aulu sea! A magemuana lo varamana lakwara hinea i God u lagwa maira.”

¹⁵Lolona a kaihora tina taetae ramo vano tiura ramo mule vaki lolo taetae taliku, a kaitagahuri na sivsivi vano hi ramo kwahakwaha kinira siboga ramo viti kwara, “De, ta vano vaki Betlehem ta tagai na kinau hi a Hugwe mo vitia lakwakita.”

¹⁶Vunu ramo vaivai heheri ramo vano, ramo hagwe i Meri mai Sosev, ramo tagai na natu kelekele hi u ngwalulu lolo bokisi na duvu gorugoru kana boboroa.

¹⁷A kaitagahuri na sivsivi ramo tagaia, ramo viti na leo hi a kaihora tina taetae mo vitia huri na natu kelekele hi.

¹⁸A tangaloi savia ramo rongo na leo hi a kaitagahuri na sivsivi ramo vitia lakwara, rau idila haburu.

¹⁹Vae i Meri u domidomi-bibi na kinau vunuhia aira vano hi, u kwiribibira lolo domina.

²⁰Hikani a kaitagahuri na sivsivi ramo mule taliku rau kaho kaluhaki God huri na kinau savia hinea ramo rongo ramo taga, hokinia hini a kaihora tina taetae mo viti lakwara.

²¹A rani kaikwaluki mo maravuti aia a taro na natu kwara rana vai na kaimatai* lo siosio luna. Ramo tau na hinana i Jisas*. A hina hi a kaihora tina taetae aia u taua tomuaki, vunu i Meri mori tatagwangira kinia.

²²A taroki mo taritarisa huri i Sosev mai Meri kwara raru ne vai a havakinau hini a Tangwata* noi Mosis mo viti, raru ne vai lo halaki hinea kwara vae i Meri ne ngwasara lo nako i God. Vae hokinia raru mo lavi na natu hi vaki Serusalem kwara raru ne betea lakwa na Hugwe i God,

²³hokinia u uliana lo Tangwata nona Hugwe i God kwara, “Vunuhi na natu ngwera hinea a natu tomua, rana betera lakwa na Hugwe i God.”

²⁴Vake raru vano kwara raru ne hile nogaru hura boniboni, a ngwaki kairua, diko a kwiba ngwalageloki kairua, hokinia a Tangwata hi mo viti.

²⁵A ngwera katukwale u hugu Serusalem, a hinana i Simion. Aia a tangaloi bakoto u mavaki God. U tuku hugu tara na taro aia hi kwara vae i God ne vakahiki na gwaloana noi Isrel*. A Tanungwe Kokona aia maia.

²⁶I Simion u kikilai bakotoki lalahi na Tanungwe Kokona kwara aia nehe mate tea, vae tarisaki hi ne tagai i Vurae* hinea a Hugwe i God mo tuliki terekakinia.

²⁷A Tanungwe Kokona mo lavia vaki lolo Vanua* Kokona noi God. Vunu a tama mana retahi raru mo lavi na natu hi i Jisas vaki lolo Vanua Kokona noi God, kwara raru ne vai a havakinau lakwae hokinia hi a Tangwata mo viti.

²⁸Vae lo taro hi i Simion mo kwali hakeki na natu hi lo kabana, mo lagwakinia lakwai God mo viti

²⁹“Hugwe, hika i nigo ku kwiribibi na nomu tulikileo. I nau a nomu kaihora, ko tirakiau na mule lo magemuki,

³⁰huri nu taga kina matagu kareaki a tangaloi hinea kona lalahia kwara kona vakahiki na tangaloi rusa.

³¹A tangaloi hi, komo tau raraia lo livuka na tangaloi vunuhira.

³²Aia a leleha hinea ne vosangi na halamu lakwa na tangaloi tavalavarea tina gwaloana noi Isrel, ne tabe hakeki na hina na nomu tangaloi a gwaloana noi Isrel.”

³³A tama mana retahi na natu hi raru idila haburu kina kinau aira vano hi i Simion mo viti huri na natu hi.

³⁴Vunu i Simion mo kwahakwaha tabetabeki maira mo viti kwara, “I God ne vai tabetabekikamu.” Vunu mo kwaha mai Meri, a retahi na natu hi, mo viti kwara, “A natu hikani i God u taua huri kwara vae ne magaraki na gwaloana rusa noi Isrel, vunu rusa vake ne vakahikinira. Aia ne kwareki a kaivosangi ti God vae a tangaloi rusa rana kwaha bulakikinia,

³⁵vae hokinia ne matangwasaraki na noga domidomi tavuniki tivarea. Vae i nigo kona rongo hati. A nomu rongohati ne hoki na bue u hoko lo gweregwereki ne keliko ne volohi na domimu.”

³⁶A vavine duruduruki katukwale a hinana i Ana, i natu i Vanuel, u gwalo vanamai lui Asere. Lolona u ngwalagelo u laki vae u hugu a hukao kaibitu mai tuana ngwarasea. Vunu u gwati a hukao ngavu kaikwalu dongwaki kaivati. Hikani aia u ngwarasea haburu. [3] Aia he tiraki na Vanua Kokona noi God te vohoki. U rani, u bongi, u kaluhaki God, u rete, u tiutangaroa vake.

³⁷

³⁸Lo taro hi nga mo maravuti mo hile lagwaana lakwai God, vake mo viti huri na natu lakwara doluaki hinea rau tuku hugu tara i God kwara ne kasatukuhi na ngwera Serusalem tina noga tavaluivuro.

³⁹Hokinia raru mo vai vunuhi na kinau hinea a Tangwata* nona Hugwe i God mo viti, vunu ramo mule taliku vaki Galili* vaki lo noga tokakivanua Nasaret.

⁴⁰A natu hi mo ngwarasea mo huira. U kikikila vohoki, u domi sea, vae tigwaravu i God u vai tabetabekinia.

⁴¹Vataha na hukao i tama i Jisas mai retahina raru tuku vano vaki Serusalem huri na Kanikani* na Tivekiana.

⁴²Lolona i Jisas a hukaona mo hangavulu dongwana kairua, ramo vano vaki lolo kanikani hokinia ramo toko vano tigwaravu.

⁴³Hokinia a rani na kanikani mo rovo vunu raru mo tinakaki raru mo mule. Vae a natu hi i Jisas u hugu Serusalem. I tamana mai retahina raru he kikilai tea.

⁴⁴Raru tuku domi kwara aia te hike maira rau mule haragoki. Hokinia raru mo lakao rani katukwale. Vunu raru mo soro haroa mai rabelagaru vake mai rabuluigaru,

⁴⁵vae raru he hagwea tea. Hokinia mavukona raru mo mule taliku vaki Serusalem, raru mo soro haroa takwa-hi.

⁴⁶Lo rani kaitoluki raru mo hagwea lolo Vanua* Kokona noi God, u hugu mana tangaloi huhui aira a gwaloana noi Isrel*. Mo rongohurira mo toko uduhuri a leo uduuduhuri rusa kinira.

⁴⁷Vunuhira hinea ramo rongoa, rau idila haburu kina nona kikikila mana nona kaidaraki na leo, huri rau bakoto.

⁴⁸I tamana mai retahina raru mo tagaia raru idila haburu. Vae i retahina mo kwaha maia mo viti kwara, “Mama. ?Kworoho komo vaikamirua kwehi? I kamirua mai tamamu keru rongo hati haburu keru mo toko soro haroko.”

⁴⁹Mo daraki lakwararua mo viti kwara, “?Kworoho kuru mo toko soro haroau? ?Kuru he kikilai tea kwara i nau na va toko hugu lolo ingwa i Tamagu?”

⁵⁰Vae raru he kikilai tea kwara u viti a havakinau lakwararua.

⁵¹Vunu i Jisas mo hurirarua taliku vaki Nasaret, mo hugu tavutigaru takwa-hi. I retahina u kwiribibi savi na kinau aira vano hi lolo domina.

⁵²Vae i Jisas mo ngwarasea hake lo tarabehina mana nona kikikila. I God u lagwa maia, a tangaloi rau lagwa maia vake.