Read West Ambae LUK 20 Bible Online

LUK 20 - West Ambae bible

LUK 20

¹Lo rani katukwale, i Jisas aia lolo Vanua* Kokona noi God u tuku huhui na tangaloi mo heretuvaki na Roro Karea lakwara. Hikani a tangaloi* lingilingi lalakua, mana tangaloi* kikikila na Uliuli* Kokona, mana ngwarasea* rusa, ramo vanamai vaki maia,

²ramo viti lakwae kwara, “Ko viti lakwakami. ?Ku hagwe na nomu bakotoana ave kwara kona toko vai na kinau vano hi? ?Ihe u rivukiko kinia?”

³I Jisas mo daraki lakwara mo viti kwara, “Hika i nau vake na uduhuri na leo katukwale kikamu. Tulu viti lakweau nga.

⁴?I God u rivuki Sione kwara ne bavtaes na tangaloi, diko a tangaloi rau rivukia?”

⁵Hikani ramo toko vikwahaki luna ramo viti kwara, “?Tana viti kworoho? Diko tana daraki kwara, ‘I God u rivukia,’ vae ne viti kwara, ‘?Kworoho tulu he va hauhuri tea lui Sione?’

⁶Vae diko tana viti ‘A tangaloi rau rivukia,’ a vao hikani rana kosokosomikita, huri aira rau domi kareaki kwara i Sione aia a tangaloi* duruduruki.”

⁷Hikani ramo daraki ramo viti kwara, “I kami kehe kikilai tea kwara ihe u rivukia.”

⁸Vunu i Jisas mo kwaha maira mo viti kwara, “I nau vake nahe viti tea lakwakamu kwara nu hagwe na nogu bakotoana ave, nomo toko vai na kinau vano hi.”

⁹Vunu i Jisas mo viti na tavaluileo hika lakwa na tangaloi mo viti kwara, “A tangaloi mo rivuki na karo aira hi ramo toko vaivai waen lo kwaiga, a talu katukwale, mo tirakinia lakwa na tangaloi kwara rana boloki luna rana tava lakwae. Vunu aia mo lakao tina tatana u tuai.

¹⁰Lo taro na makuriana, mo hora na nona tangaloi boloki katukwale vaki mana tangaloi na tava tano vano hi kwara ne lai te kaitava tiura. Vae hikani a tangaloi na tava tano vano hi ramo takwili na tangaloi boloki hi vunu ramo horae mule taliku vuroki.

¹¹Vunu mote hora na nona tangaloi boloki dolua vake, vae a tangaloi na tava tano vano hi ramo takwilia vake, rau vai bulakikinia haburu, vunu ramo horae mule taliku vuroki.

¹²Vunu mote hora na tangaloi boloki kaitoluki. A tangaloi na tava tano vano hi ramo kwohia, ramo tabatabae tivarea.

¹³Hikani a hugwe na talu hi mo viti kwara, ‘?Na va vai kworoho te hika? I nau na hora i natugu vohoki hika, a natu tabe, vae rana domi mavakinia.’

¹⁴Vae lolona a tangaloi na tava tano vano hi ramo tagaia, ramo kwahakwaha kinira, ramo viti kwara, ‘!Tagaia! !A natu na hugwe hi aia hi! Vae te taroki a vanua noi tamana ne kwareki a nona. !Ta kwohi mateia! Vunu a nona vanua ne kwareki a noda.’

¹⁵Hikani ramo kwalibibia ramo vohokinia tina talu hini ramo kwohi mateia.” Vunu i Jisas mo uduhuri kinira mo viti kwara, “?Vae a hugwe na talu hi ne vai kworoho lakwa na tangaloi na tava tano vano hi?

¹⁶Ne vanamai ne kwohi matemateira vunu ne tau na talu hi tilo kaba na tangaloi na tava tano te dolua.” Lolona a tangaloi ramo rongo na leo hika, ramo viti kwara, “!E! !Hete vohoki!”

¹⁷Vunu i Jisas mo taga vovohira mo viti kwara, “Tulu domidomi lo domiana na Uliuli* Kokona hinea mo vitia kwara, ‘A beru hinea a kaitabe na ingwa ramo bega kinia rau domi kwara u hati, vae mo mulemai mo kwareki a beruberu aulu.’

¹⁸Diko te tangaloi katukwale ne sovi tilo beru hini, vae a tarabehina ne mavurivuri, vake diko a beru hi ne sovi tilo tangaloi te katukwale, ne biha vurivuria ne mule ki gwia.”

¹⁹A tangaloi* kikikila na Uliuli* Kokona mana tangaloi* lingilingi lalakua rau vai kwara rana kwalibibi Jisas hi lai nga, huri rau kikilai kwara u viti na tavaluileo hi, u kwahakwaha kaga, vae rau mataku kina tangaloi maira.

²⁰Hikani ramo toko tagataga-bibi Jisas kwara vae te lo taroki ne vakasile lo leona. Rau lengaia kwara rana taua tilo kaba na kavman lakua huri a kavman lakua hi a nona huirana eia. Hikani ramo voli a tangaloi kwara rana tiusina i Jisas rana vosangi kwara aira a tangaloi bakoto. Vunu ramo horara vaki mai Jisas kwara rana tiusinae kina leo uhiuhi.

²¹A tangaloi tiusina vano hi ramo vanamai vaki mai Jisas, ramo kwaha maia, rau viti “Tisa. I kami keu kikilai kwara savi na kinau hi komo toko vitira, vake savi na kinau hi komo toko huhui na tangaloi kinira rau kareaki. I nigo kohe domi huri tea kwara a tangaloi u lakua diko he lakua tea, vae ku tuku huhui na tangaloi savia kina hala noi God lo hala bakoto.

²²Ko viti lakwakami. ?Diko tana voli a takis lakwai Sisa*, a hugwe lakua Rom, tana galo lo noda Tangwata* diko hetea?”

²³Vae i Jisas u taga lalahira kwara rau tiusinae, mo kwaha maira, mo viti kwara,

²⁴“Tulu vosangiau te kina mane* vatu, na tagaia. ?A nakohe luna? ?A hinahe luna?” Ramo daraki ramo viti “A nako i Sisa mana hinana.”

²⁵Aia mo tau mo viti kwara, “U karea, a kinau hinea a noi Sisa, tulu bete lakwai Sisa. A kinau hinea a noi God, tulu bete lakwai God.”

²⁶Hikani rahe vai suri lavia tea kwara ne sovi lo leona kwara te katukwale lolo nako na tangaloi maira. Rau idila haburu kina nona kaidaraki, vae ramo hugu butu.

²⁷A Satiusi* ratuaki ramo vanamai vaki mai Jisas. Aira hi rau tuku viti kwara a tangaloi rau mate vae ranahe maraka te taliku tina mateana. Ramo uduhuri kinia,

²⁸ramo viti “Tisa. I Mosis u uli na tangwata hika hurikita hinea mo viti ‘Diko a tangaloi u mate ti vavinehina, vae raru he bava te natu, vunu i tuana ne lavi na gwatina, raru ne bava natu, ne lai tanotano i tamana hi mo mate.’

²⁹Vakatukwale a ratua aira kaibitu, a natu tomua mo laki, vae va mate he bava te natu.

³⁰Vunu i tuana kairuaki mote laki kina vavine hi mo mate tiua,

³¹vunu kaitoluki hokinia nga. Vae a ratua hi kaibitu aira vunu rau vai hokinia hi, rau mate rahe bava te natu vohoki.

³²Mo vano vae ki rovonaki a vavine hi mo mate.

³³?Vae lo rani kwahaia hi a mateana rana ahi taliku lo Rani na Marakaana, vae a vavine hi ne kwareki i vavinehihe? A ratua hi kaibitu aira vunu rau laki maia.”

³⁴Hikani i Jisas mo daraki lakwara mo viti “A ngwera mana ravavine lo taro hikani rau laki.

³⁵Vae lo taroki ne vanamai, a ngwera maira mana ravavine hinea i God u tagaira kwara rau taritarisa kwara rana maraka taliku tina mateana rana toka lo taro hi, ranahe laki tea.

³⁶Aira hoki na kaihora tina taetae vae aira ranahe mate tea. Aira i raranatu i God, huri rau maraka ba tina mateana.

³⁷Vunu i Mosis vake u matangwasaraki kwara a mateana rana ahi lai taliku. Lo vevehuri huri na vikai kelekele hi mo kao, mo viti matangwasaraki na hina i God Tatoka kwara aia ‘a God noi Evraham, a God noi Aesik, a God noi Sekov.’

³⁸A leo hi a domianaki kwara i God aia a God na tangaloi rau ahi, aia hete God na tangaloi rau mate, huri i God u tagai na tangaloi savia, hokinia rahe mate tea, rau ahi.”

³⁹A tangaloi* kikikila na Uliuli* Kokona ratuaki ramo kwaha rau viti “Tisa. A nomu leo ku darakinira rau karea haburu.”

⁴⁰Ramo viti kwehini huri rau maemae kwara rana uhia te ki leo uhiuhi taliku.

⁴¹Vunu i Jisas mo uduhuri kinira mo viti “?Kworohokinia ramo toko viti kwara i Vurae* aia a gwaloana noi Devit kehekeheki?

⁴²I Devit sibona u viti lo buku na Sam kwara, ‘A Hugwe i God u viti lakwa na nogu Hugwe* kwara, “Ko hugu hikeni lo matuagu, ko mabu.

⁴³tarisaki hi na vai na nomu tavaluivuro rana hugu tavutimu, rana kwareki a nomu tangaloi* boloki vuroki.” ’

⁴⁴I Devit u kwarekinia kwara a nona ‘Hugwe’. ?Vunu kworohokinia i Vurae mo kwareki a gwaloana noi Devit?”

⁴⁵Lolona a vao doluaki ramo toko gwerongo huri i Jisas, mo viti lakwa na nona ngwalagelo kwara,

⁴⁶“Tulu likoki na tangaloi* kikikila na Uliuli* Kokona, hinea rau lagwa kwara rana lakao laliki rana lugwaki lugwaga hinea rau gwagwaravu, vunu rau lagwa vake kwara a tangaloi rana vai mavakinira lo nako na tangaloi maira na sara. Rau lengaia kwara rana hugu lolo vale* na tiutangaroa lo hagehagele hinea rau karea karakara, vake rau lai a hagele karekarea nona tangaloi lalakua lolo kanikani.

⁴⁷Rau tuku sinasina na gwati ravavine rau balu savi na noga kinau. Vunu vake rau tiutangaroa gwagwaravu kwara rana sina na tangaloi kwara a tangaloi rana domi mavakinira. Vae rana kwali na kakadiki ne huira haburu.”