Read West Ambae LUK 21 Bible Online

LUK 21 - West Ambae bible

LUK 21

¹I Jisas mo tagataga laliki mo tagai na tangaloi hugwe ramo toko tuli noga hilehile vaki lo tanotano na tuli mane* lolo Ara Kokona na Ingwa Kokona noi God.

²Vae mo tagai na gwati vavine katukwale u kakaravika haburu, mo vanamai mo tuli na nona mane vatu kairua kwaririgi.

³Vunu i Jisas mo kwaha mo viti “Kareaki na viti lakwakamu, a gwati kakaravi hikani u bete nona hilehile u lakua karakara sileti na hilehile hinea a tangaloi savira ramo bete.

⁴A tangaloi hugwe aira vano hi rau bete noga hilehile duviki tina noga konata lakua. Vae a natu vavine hika u kakaravika haburu aia u hile savi na nona mane hinea kwara ne hago maia lo nona tokaana.”

⁵Ratuaki tiura ramo toko vitiviti huri na Vanua* Kokona noi God kwara a vatu luna rau lalakua, rau karekarea, vake mana hilehile nona tangaloi u rusa ramo bete kwara ki noi God. Hikani i Jisas mo viti

⁶“A kinau vano hikani tulu mo toko tagaira, vae a taroki ne maravuti a vatu vano hi vae hete kwara te katukwale ne eno lo tanotanona. A tangaloi rana vai savi na vatu vano hi rana visoviki.”

⁷Hikani ramo uhia ramo viti “?Tisa, a kinau vano hi vae rana vanamai kihokua? ?Vunu a hava kaivosangi kwara ne vosangi bakotoki na taroki hi kwara vae rana mule luna?”

⁸Vunu i Jisas mo viti “Tulu tagahuri ne karea, vae te tangaloi ne mai sinakamu, huri a tangaloi rusa rana vanamai lo hinagu rana viti ‘I nau hika, i nau i Vurae*.’ Vunu rana viti kwara, ‘A taro i Vurae ne mulemai u garagarani.’ Vae tulu hatu hurira luna.

⁹Vae diko tulu mo rongo na roro na vuro, a tangaloi ramo maramaraka hurira, tulu hatu mataku. A kinau aira vano hi vae rana vanamai tomua, vae a rani rovonaki nehe vanamai te kwahaia hi.”

¹⁰Vunu i Jisas mo vano nga mo viti kwara, “A tangaloi na vanua katukwale rana vai vuro vovohi na tangaloi na vanua dolua, a hugwe na mamalukoro katukwale ne vai vuro vovohi na hugwe na mamalukoro dolua.

¹¹Vae ne ruru ne hati vohoki vataha na mahagweki, ne gwakere lolo vanua laliki, vunu a lengeana hati rana vai na tangaloi vataha na mahagweki. A kinau rana vanamai rana vai a tangaloi rana mataku vohoki, rana tagai na kaimatai rusa lo mahaleki vake.

¹²“Tomuaki vunu a kinau aira vano hi savira ranari mule luna, a tangaloi rana kwiribibikamu, rana vai bulakikikamu. Rana taukamu tilo kaba na ngwarasea* na vale* na tiutangaroa kwara rana arekikamu, vake rana taukamu lolo ingwa na gwarugwaru. Rana lavikamu tomuaki na nako na tomutomuai-tangaloi mana hugwe lalakua huriau.

¹³Vae hika a taromiu kwara tulu ne matangwasaraki na Roro Karea lakwara.

¹⁴Tulu vai domimiu ne madi terekaki kwara vae tulu hatu domi haroki na leo kwara tulu ne malo na leo hi ramo viti vovohikamu.

¹⁵Vae i nau kehekeheki nari bete leo lakwakamu mana loloraniki, vunu a nomiu tavaluivuro ranahe kwaha lai tea vovohikamu, ranahe kwaha hivoulu tea lo leomiu.

¹⁶Vunu i ratamamiu mai raretahimiu, mai ratuamiu, mai rabelamiu, mana nomiu buluana rana taukamu tilo kaba na nomiu tavaluivuro. Vae i kamu ratuaki a nomiu tavaluivuro rana kwohi mateikamu.

¹⁷Vunu savi na tangaloi rana bega kikamu huriau.

¹⁸Vae a vulu hi lo gwatumiu hete kwara te katukwale ne sala.

¹⁹Tulu tu ne madi vae tulu ne ahi lai.”

²⁰Vunu i Jisas mo viti vake kwara, “Lolona tulu ne tagai na gwatuivanua lakua Serusalem a tangaloi na vuro rana tu dalidalia, tulu ne kikilai kwara u garagarani hika vae a tangaloi rana magaraki na vanua hi kareaki.

²¹Lo taroki aia hi vae a tangaloi hinea rau hugu lo vanua Sutia u karea kwara rana kwakwalaoki vaki lolo vuti. Vunu aira hinea rau hugu lo gwatuivanua lakua rana kwalao tiua, aira hinea rau hugu tavalavarea ranahe mulemai tea vaki lolo gwatuivanua lakua hi,

²²huri kwahaia hi a ‘Taro na Kakadiki,’ kwara vae a leo hinea a Uliuli* Kokona tuai mo vitia ne kworo.

²³Oo, a rongoana hati lakua haburu lakwa na ravavine hinea rau tatagwangira mana raretahi rau bava natu karagwa lo rani aira vano hi, huri vae a rongoana hati lakua ne vanamai tilo vanua hika, i God a nona lologute ne tu vovohi na tangaloi aira hi.

²⁴Vae a tavaluivuro rana tai mateira ratuaki kina bue, vunu rana gwarubibira ratuaki rana lavira rana taura vatavataha na vanua laliki lo varamana. Vunu a tangaloi tavalavarea tina gwaloana noi Isrel* rana soro vaki lo gwatuivanua lakua Serusalem rana hugwe koroa, ne vanovano vae tarisaki a taroga ne rovo.”

²⁵Vunu i Jisas mo vano nga mo viti kwara, “A tangaloi rana tagai na kaimatai rusa lo mataniaho, lo vula, lo vitu. Vunu hike lo varamana, a tangaloi lo vanua ratuaki rana rongo hati haburu kina roro na navo lalakua hinea ramo marobe.

²⁶A tangaloi rana mataku haburu vae rana matemate kina matakuta huri rau domidomi haburu lo kinau savia hinea rana vanamai tilo varamana, huri vae savi na kinau hinea rau huira lo mahaleki, i God ne vaira rana kusa tina tanotanoga.

²⁷Vunu a tangaloi ranari tagaiau i nau a Natu* na Tangaloi na mulemai lolo taenalangi mana huirana mana hahaviada lakua.

²⁸A kinau aira vano hini rana tinakaki rana mule luna, vunu i kamu tulu ne tu bakotoki tulu ne lalangao, huri a taroki u garagarani vae na kasatukuhikamu tina rongohati savia.”

²⁹Vunu i Jisas mo viti na tavaluileo hika lakwara mo viti “Tulu domihagwe na vikai* hinea u kwareki a vivik [29] mana vikai ratuaki vake.

³⁰Lolona a vikai vano hi ramo tinakaki ramo tavutavu, tulu kikilai kwara hika a taro na bulamiu saru.

³¹Vae lo hala hokinia hi, tulu ne tagai na kinau vano hini rana mule luna vae tulu neri kikilai kwara a Vanua Karagwa hinea i God u hugwe koroa nehe tuai tea ne maravuti.

³²“Kareaki na viti lakwakamu, a tangaloi hinea rau toka hika kwahale ranahe mate vunu tea, tarisaki savi na kinau vano hi rana mule luna.

³³A taetae mana varamana vae raru ne tikei vae a leogu nehe tikei lai te vohoki.”

³⁴Vunu i Jisas mo viti kwara, “Tulu tagahurikamu ne karea. Tulu hatu mahuki na taro tulu mo vai kanikani tigwaravu, tulu mo inuinu kwara tulu ne reraka kinia. A domimiu ne hatu kwalao laliki huri na maurianamiu lo varamana hika. Diko tulu vai na kinau hokinia hi, vae a Ranigu [30] ne vanamai ne vakamarutikamu, hoki na vuna mo tavidiri mo kwiribibi na manu,

³⁵huri a Rani hi vae ne vanamai lakwa na tangaloi savira lo varamana doluaki.

³⁶Vae tulu likoliko ne karea, vake tulu tiutangaroa tigwaravu vae tulu ne huira karakara kwara vae tulu ne gui lavi na kinau vano hi savira, vunu tulu ne tu lai lo nakogu i nau a Natu* na Tangaloi.”

³⁷U rani i Jisas u huhui tigwaravu lolo Vanua* Kokona noi God, vunu raviravi, tigwaravu u vano mo hugu lolo Vuti na Vikai* a Violev.

³⁸A tangaloi vunuhira ramote vano vaki lolo Vanua Kokona noi God sirovobongi bise ramo gwerongo huria mo toko kwahakwaha maira.