Read West Ambae LUK 22 Bible Online

LUK 22 - West Ambae bible

LUK 22

¹A taroki mo garagarani huri na kanikani lakua rau kwarekinia a Kanikani* na Bereti* hi a Is Tikei Lolona, vunu vake rau kwarekinia a Kanikani* na Tivekiana.

²Hikani a tangaloi* lingilingi lalakua mana tangaloi* kikikila na Uliuli* Kokona ramo soro haro na hala tavuniki kwara vae rana kwohi matei Jisas, huri rau mataku haburu kina tangaloi.

³Vunu i Setano* mo soro vaki lolo domi i Sutas u kwareki i Iskariot, aia katukwale tina ngwalagelo hangavulu dongwana kairua.

⁴Hikani i Sutas mo vano mo kwaha mana tangaloi* lingilingi lalakua vano hini mana kaitomuaki na kaitagahuri na Vanua* Kokona noi God, ramo vitiviti huri kwara vae ne tiraki kworohoki i Jisas tilo kabaga rana lavia.

⁵Hikani rau rongo rau lagwa haburu, rau masinge kwara rana volia ki mane*.

⁶I Sutas u masinge luna vake, mo soro haro na halaki kwara vae ne hagwe i Jisas aia kahea, a vao rahe hugu te maia, ne lavia ne tirakinia tilo kabaga.

⁷Hikani a rani tomuaki na Kanikani* na Bereti* hi a Is Tikei Lolona mo maravuti, lo rani aia hi kwara vae a tangaloi rana sio utu dodono na sivsivi* kwaririgi huri na Kanikani* na Tivekiana.

⁸I Jisas mo kwaha mai Pita mai Sione mo viti kwara, “Kuru vano kuru vai rarai na Kanikani na Tivekiana vae tana kani.”

⁹Raru mo uhia kwara, “?Ku lengaia kwara kenaru vano vaki ave keru ne vai rarai na Kanikani hi eia?”

¹⁰I Jisas mo viti kwara, “Kuru rongo na viti. Lolona kuru mo vano vaki lo gwatuivanua lakua kuru ne hagwe na ngwera katukwale u huni kwai. Vae mo soro tilolo ingwa, kuru mo huria takwa-hi mo soro eia,

¹¹kuru mo uduhuri kina tangaloi na ingwa hini kwara, ‘A Tisa u hora na leo katukwale u viti kwara, “?A nogu tanotano ave kwara i nau mana nogu ngwalagelo kena kani a Kanikani na Tivekiana eia?” ’

¹²Vae aia neri vosangikamurua kina tanotano lakua kairuaki aulu, a kinau savira rau raraiana lolona ba. Takwahini kuru neri vai rarai savi na kinau hurikita.”

¹³Hikani raru mo vano raru taga savi na kinau hokinia hi i Jisas mo viti lakwararua. Raru mo vai rarai savi na kinau huri na Kanikani na Tivekiana.

¹⁴Lolona a taroki mo taritarisa i Jisas mo vano mo hugu hivo mana nona kaihora* kokona mana tevo na kanikani kwara rana kanikani.

¹⁵Hikani mo viti lakwara kwara, “Nu lengaia haburu kwara tana kanikani tabulutaki lo Kanikani* na Tivekiana hika, vunu nari rongo hati.

¹⁶Vae na viti lakwakamu, nanahe kani te lo kanikani hika taliku vae tarisaki hi a domiana na kanikani hika ne kworo, lo taroki hi i God ne hugwe koro na bulana tangaloi lo Vanuana Karagwa.”

¹⁷Vunu i Jisas mo lavi na laha waen, mo lagwaki God huria mo rovo, vunu mo viti “Tulu lavi na laha hikani, i kamu vunu tulu inumi na waen luna,

¹⁸huri na viti lakwakamu, u tinakaki lo taro hika vae nahe inumi na waen te hika taliku maikamu vae tarisaki hi i God ne hugwe koro na bulana tangaloi lo Vanuana Karagwa.”

¹⁹Vunu mote lavi na bereti* mo lagwaki God huria, mo volo utuutuhia mo betea lakwara mo viti kwara, “Hikani a tarabehigu [31] nana betea hurikamu. [32] Tulu ne vai hokinia hikani, tulu ne domidomi-bibiau luna.”

²⁰Lolona ramo kanikani mo rovo, mo bete na laha waen lakwara lo halaki hokinia nga mo viti “A laha waen hikani aia a leo harikiana karagwa noi God maikamu. A daigu ne huki hurikamu kwara ne vai na leo harikiana hi ne tu.

²¹“Vae tulu taga. A tangaloi hi mo tovo na kagu, aia hike maiau lo tevo na kanikani hika.

²²I nau a Natu* na Tangaloi vae na mate hokinia hini i God mo domiki, vae a tangaloi hinea ne tirakiau tilo kaba na nogu tavaluivuro, nu hakavia haburu.”

²³Hikani ramo tinakaki ramo uhiuhira muleki, ramo viti kwara, “?Ihe hi tikita hi ne vai lavi na kinau hokinia hi?”

²⁴Vunu a ngwalagelo ramo viroro mulekinira kwara ihe hi u lakua karakara tiura.

²⁵Hikani i Jisas mo kwaha maira mo viti kwara, “A hugwe lalakua hinea rau hugwe koro na tangaloi na varamana rau hago huirana koro na noga tangaloi, vake a tangaloi tomutomuaki rau lengaia kwara a tangaloi rana viti hurira kwara aira a noga kaihago karea.

²⁶I kamu tulu hatu vai hokinira. Vae a tangaloi hinea u lakua karakara tikamu, ne hoki na tangaloi ngwalagelo halaradu tikamu, vake a nomiu kaituruki ne hoki na tangaloi boloki.

²⁷?Ihe u lakua karakara? ?Aia hi mo hugu lo tevo na kanikani, diko aia hi mo toko kwali kana hinaka? U matangwasara kwara aia hi mo hugu kwara ne kanikani aia u lakua karakara. Vae i nau hikani nu hugu maikamu, i nau hoki na kaikwali na kamiu hinaka.

²⁸“I kamu tulu tuku tu maiau lo nogu rongoana hati hinea ramo toko vai rongohiau.

²⁹I Tamagu u rivukiau kwara nana hugwe koro na tangaloi doluaki lo Vanuana Karagwa, vae hokinia i nau nana rivukikamu,

³⁰kwara vae tulu ne kanikani lai maiau vake tulu ne inuinu lai maiau lo tevo na kanikani lo taro hinea na mulemai kina Hugwe Lakua. Vunu tulu ne hugu lai lo hagehagele na hugwe lalakua, kwara vae tulu ne hugwe koro na tangaloi lo gwatuidamu hangavulu dongwana kairua nona gwaloana noi Isrel*.”

³¹Vunu i Jisas mo viti kwara, “!Saemon, Saemon! Ko rongo na viti. I Setano* u uduhuri ki God ba kwara vae ne vai rongohikamu. Vae i God u tiraki lakwae kwara ne vile vohoki na tangaloi hati tikamu leletiu tiura hinea rau karea, hoki na tangaloi ramo toko vile vohoki na hogo na uit* tina biuki mo vohoki leletiukinira.

³²Vae nu tiutangaroa huriko, Saemon, kwara vae a nomu hauhuriana ne hatu sovi. Kona halebohi vaki maiau taliku, vunu kona rakati na domi i ratuamu rana huira taliku.”

³³I Pita mo daraki mo viti kwara, “Hugwe*, i nau hika nu rarai kwara na huriko vaki lolo ingwa na gwarugwaru, vake na mate haragoki maiko.”

³⁴I Jisas mo daraki mo viti kwara, “Pita, na viti lakwako, bongi hika a toa nehe tarere te radu nga, kona herevunikiau kona viti kwara kohe kikilaiau tea halana vakaitolu.”

³⁵Hikani i Jisas mo kwaha maira mo viti kwara, “?Lolona hinea nomo horakamu tivarea huri heretuva, lo taroki hini tulu he lai te baos na mane*, a tanga, diko te kaikwokwori na garumiu, vae tulu gwanugwanu te lo ha?” Ramo daraki lakwae ramo viti kwara, “Kehe gwanugwanu te lo kinau.”

³⁶Vunu i Jisas mo viti “Hikani diko te tangaloi a nona baos na mane eia mana tanga, ne kwali. Diko a tangaloi a nona bue tikei, ne hokaki na lugwana kwara ne voli nona bue kinia.

³⁷A Uliuli* Kokona u viti kwara, ‘Rau valu haragokinia mana tangaloi na magaraki tangwata.’ Nu viti lakwakamu a leo hika vae ne kworo lugu, huri savi na kinau hi a Uliuli Kokona mo vitira huriau vae rana mule luna.”

³⁸A ngwalagelo noi Jisas vano hi ramo viti kwara, “!Tagaia, Hugwe*! A bue kairua eia maikami.” Aia mo daraki mo viti kwara, “Tulu hatu lenga na kwahakwaha. U rusa ba.”

³⁹I Jisas mo tiraki na gwatuivanua hini mo vano vaki lo Vuti na Vikai* a Violev, hokinia hi mo toko vai tigwaravu. A nona ngwalagelo rau huria vake.

⁴⁰Lolona mo vanamai vaki lo tanotano hi mo kwaha maira mo viti kwara, “Tulu tiutangaroa kwara tulu nehe sovi te tilo sinasina hati.”

⁴¹Hikani mo vano gegeaki tiura kelekele he vakahao tea, kwara a tangaloi ne voho ne maravuti eia. Mo titiugwao hivo mo tiutangaroa.

⁴²Mo viti kwara, “Mama, diko ku masinge ko lavi na laha na rongoana hati hika tiau, kwara vae na hatu inu luna. Aia ko hatu vai lo domigu vae ko vai lo domimu, hokinia hi ku lengaia vae ne mule luna.”

⁴³A kaihora tina taetae mo maravuti maia mo ravani na huina.

⁴⁴U rongo hati haburu u rongo u volohi na huina vae mo tiutangaroa vakevake kina domi mava. Hikani a raratona ramo turuturu ramo sovi vaki lo tano hoki na dai. [33]

⁴⁵Hikani mo tiutangaroa vae mo rovo, mo maraka mo mule taliku vaki mana nona ngwalagelo, mo hagwera rau maturu aira vunu, huri rau rongo hati haburu.

⁴⁶Mo viti lakwara kwara, “?Kworoho tulu mo toko maturu hokinia hi? Tulu rada tulu tiutangaroa kwara tulu nehe sovi te tilo sinasina hati.”

⁴⁷Vae lolona i Jisas mo toko kwaha radu nga mana nona ngwalagelo, a vao ramo mamaravutiki. I Sutas aia hi katukwale tina nona ngwalagelo hangavulu dongwana kairua, aia u tomuakinira. Hikani mo lakao henahena vaki mai Jisas kwara ne bobonia.

⁴⁸I Jisas mo viti kwara, “Sutas. ?I nau a Natu* na Tangaloi vae kona boboniau kwara kona sineau huri kwara kona tirakiau tilo kaba na nogu tavaluivuro?”

⁴⁹Vae lolona a ngwalagelo noi Jisas ramo tagai na kinau hi mo mule luna hokinia hi, ramo viti kwara, “?Hugwe*, kworohokinia? ?Kena taitaira kina nomai bue?”

⁵⁰Hikani katukwale tiura mo maraka mo tai suati na matuai gwero na tangaloi boloki nona hugwe na tangaloi* lingilingi.

⁵¹Vunu i Jisas mo daraki mo viti kwara, “!U rusa ba!” Mo tau na kabana tilo gwero na tangaloi hi, mo karea taliku.

⁵²Hikani i Jisas mo kwaha mana tangaloi* lingilingi lalakua mana kaitomuaki na kaitagahuri na Vanua* Kokona noi God, vake mana ngwarasea* aira hi ramo vanamai kwara rana lavia. Mo viti lakwara kwara, “?Kworoho tulu mo vanamai huriau tulu mo hago bue mana ngwasa, hokinia kwara i nau te tangaloi uauabalu tangaloi?

⁵³I nau nu hugu maikamu vatavataha na rani lolo Vanua Kokona noi God, vae tulu he vai tea kwara tulu ne kwiribibiau. Vae hikani a taromiu mai Setano* hinea u hugwe korokamu kina huirana na dodoki.”

⁵⁴Ramo kwiribibi Jisas ramo lavia vaki lolo ingwa na hugwe na tangaloi* lingilingi, i Pita mo toko huri tiutiukinia.

⁵⁵Rau kahaki na kabu lo livuka na ara na ingwa hini, i Pita mo hugu maira hi ramo hugu dali na kabu.

⁵⁶Vae a vavine boloki katukwale mo tagaia tilakwa na vavarama na kabu, mo taga madimadi luna vae mo taga bakotokinia, mo viti kwara, “!Ei! !A tangaloi hikani u tuku huria vake!”

⁵⁷Hikani i Pita mo harovia mo viti kwara, “Tubui, a tangaloi hini i nau nahe kikilaia tea kwara aia ihe.”

⁵⁸He tuai tea takuni tiua hi, a ngwera mote tagaia, mo viti kwara, “I nigo katukwale vake tina nona ngwalagelo.” I Pita mo daraki mo viti kwara, “!Ii, kwara ihe hi! !I nau hetea, hete katukwale tiura!”

⁵⁹Kwara te aoa katukwale koro, a tangaloi dolua vake mote tagaia mo viti kwara, “Kareaki a tangaloi hika u tuku huria huri aia a ngwera Galili*.”

⁶⁰Vae i Pita mo daraki mo viti kwara, “!Ii, kwara ave hi! I nau nahe kikilai na kinau te hi komo toko vitira.” Heheriki vake lolona i Pita u tuku kwaha radu nga, a toa mo tarere.

⁶¹A Hugwe* i Jisas mo matabari vae mo taga vovohi Pita, i Pita mo domihagwe na leo na Hugwe hinea mo vitira kwara, “Vae bongi hika a toa nehe tarere te radu nga kona herevunikiau vakaitolu kwara kohe kikilaiau tea.”

⁶²Vunu i Pita mo soro tivarea mo karuki na mena tinangi.

⁶³A tangaloi aira vano hini ramo tagahuri i Jisas ramo toko vaivai tagaia ramo vosaia.

⁶⁴Ramo kweti koro matana ramo tukwaia ramo viti kwara, “I nigo a tangaloi* duruduruki. !Ko viti lakwakami! ?Ihe hi mo tukwaiko?”

⁶⁵Ramo viti na kinau rusa vake hinea rau hati vovohia.

⁶⁶Vunu lolona mo toko rani, a ngwarasea* nona gwaloana noi Isrel*, mana tangaloi* lingilingi lalakua, vake a tangaloi* kikikila na Uliuli* Kokona ramo bulu tabulutaki, ramo lavi Jisas mo tu koro na nako na noga Tangaloi* Tovotovo Lalakua.

⁶⁷Ramo viti lakwae kwara, “?Ko viti lakwakami, i nigo i Vurae*?” Aia mo daraki mo viti kwara, “Diko na viti lakwakamu, vae tulu nehe hauhuri te lugu,

⁶⁸vake diko na uduhuri a leo uhiuhi kikamu, vae tulu nehe daraki te lakweau vake.

⁶⁹Vae hika u tinakaki hikani vae i nau a Natu* na Tangaloi, na vano na hugu lo matuai God, a God na Huirana.”

⁷⁰Hikani aira vunu ramo uhia ramo viti “?I nigo hika i Natu i God?” Aia mo daraki lakwara mo viti “Aia hokinia hi tulu mo viti.”

⁷¹Vunu ramo viti kwara, “I kita tahe lengai na hagoleo te vake. Hikani i kita tau rongo bakotoki tiua tina kwakwana.”