Read West Ambae LUK 23 Bible Online

LUK 23 - West Ambae bible

LUK 23

¹A tangaloi aira vunu ramo maraka ramo lavi Jisas mo tu koro na nako i Paelet*.

²Hikani ramo tau na noga leo lakwai Paelet, ramo viti kwara, “Keu tagai na tangaloi hikani u tuku turuki hatihatiki na nomai tangaloi, u tuku viti lakwara kwara rana hatu voli a takis lakwa na hugwe lakua i Sisa*. Mo viti huria sibona kwara aia i Vurae*, a Hugwe Lakua.”

³I Paelet mo uduhuri kinia mo viti kwara, “?I nigo a Hugwe Lakua nona gwaloana noi Isrel*?” Hikani i Jisas mo daraki lakwae mo viti kwara, “Aia hokinia hi komo viti.”

⁴Vunu i Paelet mo viti lakwa na tangaloi* lingilingi lalakua mana vao kwara, “Nahe hagwe na vakasileana te vohoki lo tangaloi hika.”

⁵Vae aira ramo madimadi lo leoki ramo viti kwara, “Lolona mo toko huhui, u sinasina na ngwera Sutia doluaki kwara rana toko vai vuro. U tinakaki tomua lolo vanua Galili*, vae hika mo maravuti takwahike.”

⁶Lolona i Paelet mo rongo na leo hokinia hi mo uduhuri kwara, “?Kworohokinia? ?A tangaloi hikani aia a ngwera Galili?”

⁷Lolona i Paelet mo rongo na roroki kwara i Jisas u vanamai tina vanua hinea i Herot [34] aia u hugwe koroa, mote maraka mo hora i Jisas vaki maia, huri i Herot u hugu Serusalem lo taro hi.

⁸Lolona i Herot* mo tagai Jisas u lagwa haburu huri u rongo na rorona vae u lengaia kwara ne tagaia te tuai, vae hetea. U tuku domi kwara ne tagai Jisas te lo vaisea hinea mo toko vai.

⁹Hokinia i Herot mo uhi Jisas kina leo uhiuhi u rusa, vae i Jisas he viti na leo te vohoki.

¹⁰A tangaloi* lingilingi lalakua mana tangaloi* kikikila na Uliuli* Kokona rau hugu takwa-hi, ramo kwaha karakara ramo viti na kinau rahe karea te vovohi Jisas.

¹¹I Herot mana nona tangaloi na vuro ramo vaivai tagai Jisas, ramo tagataga veveki rera kinia. Vunu ramo duletaki na lugwa karea luna, ramo horae mule taliku vaki mai Paelet*.

¹²Lo rani kwahaia hi i Herot mai Paelet raru mo bulubulu taliku, huri tomua raru tavatavaluivuro kirarua.

¹³Hikani i Paelet* mo kware tabulutaki na tangaloi* lingilingi lalakua, mana kaitomuaki na tangaloi, vake mana tangaloi maira.

¹⁴Mo kwaha maira mo viti kwara, “I kamu tulu lavi na tangaloi hikani vaki maiau, tulu viti kwara u tuku turuki hatihatiki na tangaloi. Hikani nomo kahi haro na doridorina lo nakomiu, vae nahe hagwe na hatiki te luna vohoki hinea tulu mo toko vitira huria.

¹⁵I Herot* vake he hagwe na kinau te luna kwara mo vai saloia, vae huri hi mo horae mulemai taliku vaki maikita. Vae u matangwasara kwara a tangaloi hika he vai na kinau te hinea kwara u hati vohoki vae ne mate huri.

¹⁶I nau nari viti lakwara rana takwilia, vunu na tirakinia ne va lakao.” [35]

¹⁷

¹⁸Vae a vao doluaki ramo vidouki ramo vikwahaki ramo viti kwara, “!Ko kwohi mateia! Ko tiraki i Baravas lakwakami.”

¹⁹A tangaloi hi i Baravas rau taua tilolo ingwa na gwarugwaru huri u vai na tangaloi ramo viroro vovohi na tangaloi nona kavman lo gwatuivanua lakua hi, vake aia u ua mate a tangaloi.

²⁰I Paelet u lengaia kwara ne tiraki Jisas, hikani mo kwaha mana vao vano hi taliku.

²¹Vae hetea ramo kwaha karakara ramo viti kwara, “!Durua tilo kaibetu! !Durua tilo kaibetu!”

²²I Paelet mo viti lakwara vakaitoluki kwara, “?Huri aha? ?U vai na havakinau mo hati? I nau nahe hagwe na kinau te hinea kwara u vaia, vae u taritarisa kwara ne mate huri. Karea, hika vae na viti lakwara rana takwilia vunu na tirakinia ne va lakao.”

²³Vae ramo kwaha karakara vakevake ramo seseaka ramo toko viti kwara i Paelet ne viti lakwa na nona tangaloi rana durua tilo kaibetu. Ramo kwaha karakara hokinia hi vae rovonaki ramo gui i Paelet.

²⁴Hikani i Paelet mo tau i Jisas tilo kabaga kwara rana kwohi mateia hokinia hi rau lengaia.

²⁵Mo tiraki na tangaloi hi rau lengaia mo ngwalua, a tangaloi aia hi ramo taua tilolo ingwa na gwarugwaru huri u vai na tangaloi ramo maraka, ramo viroro mana tangaloi nona kavman, vake aia u ua mate a tangaloi. Vae i Paelet u tau i Jisas tilo kaba na nona tangaloi na vuro kwara rana vai a kinau maia hokinia hi a tomutomuai-tangaloi nona gwaloana noi Isrel* rau lengaia.

²⁶Hikani ramo lavi Jisas ramo vano. Lolona ramo lakao lo hala ramo hagwe na tangaloi katukwale a hinana i Saemon, a ngwera Saerini, u vanamai tina vanua auta kwara ne va vano vaki lo gwatuivanua lakua. Hikani ramo susuni ngwavingwavikinia kwara ne kwali na kaibetu i Jisas ne huria takuni.

²⁷A vao lakua lengalenga ramo huri Jisas lo hala hi. A ravavine vake ramo hurira ramo vitangiki ramo ula huria.

²⁸Vae i Jisas mo halebohi vaki maira mo viti lakwara kwara, “I kamu a ravavine Serusalem. Tulu hatu tangi huriau, vae tulu tangi hurikamu, huri raranatumiu vake.

²⁹A taroki eia u tuku vanamai vae savi na tangaloi rana viti kwara, ‘A tangaroa karea lakwa na ravavine hinea rahe hagohago natu tea, aira hinea rahe toko bava te natu, aira hinea a natu rahe kanikani te tiura.’

³⁰Vae lolo taro aia hini a tangaloi rana viti kwara, ‘!A vuti lalakua hika kwara rana sovibibikami vaha! !A vutivuti kwaririgi hika kwara rana tavunikikami vaha!’

³¹Hika lai nga a vikai u gwaro radu nga vae rau tuku vai hokinia hi, vae diko a vikai ne goru rana vai ne huihuira vake.”

³²Hikani rau lavi na tangaloi kairua vake raru galogalo tangwata, kwara vae raru ne mate haragoki mai Jisas.

³³Lolona ramo maravuti lo tanotano hi u kwareki “A Tanotano na Hui na Gwatu na Tangaloi,” ramo duru i Jisas tilo kaibetu takwa-hi. A tangaloi kairua hi ramo dururarua vake tilo kaibetu kairua, kairuaki lo matuai Jisas kairuaki lo ngwairina.

³⁴Hikani i Jisas mo viti kwara, “Mama, ko domidomi koro lakwara, huri rahe kikilai na kinau te hi ramo toko vai.” [36] Hikani ramo kwaheki na lugwa i Jisas lo livukaga kina tatatiki taes.

³⁵A tangaloi ramo tu dalidalia ramo tagataga huria, vake a kaitomuaki nona gwaloana noi Isrel* ramo toko mana tiehia, ramo viti kwara, “!Ai! Aia u tuku vakahiki a tangaloi ratuaki vae hika diko aia i Vurae* hinea i God u mataia ne vakahikinia sibona vaha.”

³⁶Hikani a tangaloi na vuro vake ramo tuku mana tiehia. Ramo vanamai kwara rana bete a waen kakarati lakwae kwara ne inu.

³⁷Ramo viti kwara, “Diko i nigo a Hugwe Lakua nona gwaloana noi Isrel ko vakahikinigo.”

³⁸A uliuli hika rau taua hivoulu tina gwatu i Jisas u matangwasaraki kwara, “Hika a Hugwe Lakua nona gwaloana noi Isrel.”

³⁹A tangaloi hi kairua raru mo galo lo tangwata raru mo dule lo kaibetu takwa-hi, kairuaki mo kwahakwaha hati ki Jisas mo viti kwara, “?Kworoho? ?Nu domi kwara i nigo hika i Vurae? !U karea kwara kona vakahikinigo, i kamirua vake!”

⁴⁰Vae aia hi kairuaki mo suria mo viti kwara, “?Kworohokinia? ?Kohe mataku te ki God? I kita vunu hika rau durukita tilo kaibetu lo hala katukwale.

⁴¹Vae i kitarua u taritarisa kwara rana durukitarua tilo kaibetu huri na kinau hati taru mo toko vaira, vae rau vai kwehi lakwakitarua u bakoto. Aia a tangaloi hika he vai na kinau te kwara u hati.”

⁴²Hikani mo viti lakwai Jisas kwara, “Jisas, kona mulemai ki Hugwe Lakua kona vanamai lo nomu huirana, vae ko domihagweau.”

⁴³I Jisas mo kwaha maia mo viti kwara, “Kareaki na viti lakwako, hika karagwa, vae i nigo maiau lo vanua Parataes.”

⁴⁴Lo mataniaho kaheata he aho tea, u dodoka koro na vanua doluaki hoki na bongi vae tarisaki lo mataniaho dori lakua.

⁴⁵Hikani a lugwa* na bolo kabakaba hinea mo toko dule koro na Tanotano Kokona Karakara hinea lolo Ingwa Kokona noi God mo madadare kairua.

⁴⁶I Jisas mo ngara karakara mo viti kwara, “Mama, nu tiraki na tanungwegu tilo kabamu.” Mo viti na leo hikani mo rovo vunu a mabuna mo sala.

⁴⁷Lolona a kaitomuaki na tangaloi na vuro nona ngwera Rom mo tagai na kinau vano hi, mo kaluhaki God mo viti kwara, “!Kareaki aia a tangaloi bakoto!”

⁴⁸A tangaloi doluaki aira hi rau vanamai kwara rana tagai na kinau vano hi, ramo mule taliku vaki tataga rau rongo hati haburu, ramo toko vosai na gwagwaga huri.

⁴⁹Aira hinea rau kikilai tabetabeki Jisas, maira hini a ravavine rau huria tina vanua Galili*, rau tu u vakavakahaoka ramo taga savi na kinau vano hi.

⁵⁰Hikani a ngwera katukwale a hinana i Sosev, u vanamai. Aia a ngwera Arimatia, a gwatuivanua katukwale nona gwaloana noi Isrel*. Aia katukwale tina Tangaloi* Tovotovo Lalakua nona gwaloana noi Isrel vae aia a tangaloi karea u bakoto.

⁵¹He masinge te mana noga tovotovo mana kinau vano hi ramo vai, vae u hugu tara kwara i God ne hugwe koro na bulana tangaloi.

⁵²Aia mo vano vaki mai Paelet* mo uduhuri kwara ne tirakinia ne lavi na tarabehi i Jisas.

⁵³Vunu mo vano mo lavi na tarabehi i Jisas tina kaibetu, mo lugwatia kina lugwa lotu u karea, vunu mo taua lolo gwaru-malanga* hinea a tangaloi rau kelia tina vatu. A gwaru-malanga hi rahe tau te tangaloi lolona radu nga.

⁵⁴A rani hi a Rani na Vai Raraiana huri na Rani* na Mabuana, vae a Rani na Mabuana hi u garagarani kwara ne tinakaki.

⁵⁵A ravavine hinea rau huri i Jisas tina vanua Galili*, ramo huri i Sosev ramo tagai na gwaru-malanga hi, vunu vake ramo taga tabetabekinia kwara a tangaloi rau tau kworohoki na tarabehi i Jisas tilolona.

⁵⁶Vunu ramo mule taliku vaki tataga, ramo lai a rau na vikai hinea rau boniboni mana pomat, ramo vai rarai kwara rana tau lo tarabehi i Jisas. Lo Rani na Mabuana rau mabu, hokinia hi a Tangwata* mo viti.