Read West Ambae LUK 4 Bible Online

LUK 4 - West Ambae bible

LUK 4

¹I Jisas mo galo hake tina Kwai Sotan kwara ne mule taliku, u kukwere kina Tanungwe Kokona. Vae a Tanungwe Kokona hi mo tomuakinia vaki lo vanua vuroki.

²Takwa-hi i Setano* mo toko sinasina rongohia a rani ngavu kaivati. Vae lo rani maira hi he kanikani te vohoki, vae a taro hi mo rovo mori marakatia.

³Vunu i Setano mo kwaha maia mo viti kwara, “Diko i nigo i Natu i God ko kwaha mana vatu hika ne bohi kina hinaka.”

⁴Vae i Jisas mo daraki lakwae mo viti “A Uliuli* Kokona u viti kwara, ‘A tangaloi nehe toka lai tea kina hinaka kehekeheki.’ ”

⁵Vunu i Setano mo lavia hake vaki lo vutivuti aulu mo vosangia lo taro gwanugwanu vohoki kina mamalukoro na varamana savia.

⁶Mo viti lakwae kwara, “Nana bete savi na huirana hika lakwako, vake mana vivilagokiki savia. A kinau vano hi vunuhia a nogu ba, vae i nau na vai lai na bete lakwa na tangaloi te nomo lengaia.

⁷Diko kona sovi hivo vovohiau kona kaluhakiau, a kinau savia hika rana kwareki a nomu.”

⁸Vae i Jisas mo daraki mo viti “A Uliuli Kokona u viti kwara, ‘Kona sovi hivo vovohi na Hugwe* a nomu God kona kaluhakinia. Kona boloki lakwae kehekeheki.’ ”

⁹Vunu i Setano mo lavia vaki Serusalem mo taua lo vuhunge na Ingwa Kokona. Mo kwaha maia mo viti kwara, “Diko i nigo i Natu i God ko rovo hivo hike,

¹⁰huri a Uliuli Kokona u viti kwara, ‘I God ne viti lakwa na nona kaihora tina taetae kwara rana tagahuriko.’

¹¹U viti vake kwara, ‘Rana kwiri halehalekinigo ki kabaga kwara vae a garumu, a vatu nehe vai hokotia te vohoki.’ ”

¹²Vae i Jisas mo daraki lakwae mo viti “A Uliuli Kokona u viti kwara, ‘Ko hatu kahi haro na domi na Hugwe a nomu God.’ ”

¹³I Setano mo sina rongohi Jisas lo hala rusa mo rovo, vunu mo tirakinia kwara vae te lo taroki ne mulemai taliku huria.

¹⁴Vunu i Jisas mo mule taliku vaki Galili*, vae a huirana na Tanungwe Kokona aia maia. A roro huria mo kwalao tivarea vunuhi na vanua takwa-hi.

¹⁵U huhui lo noga vale* na tiutangaroa, vae a tangaloi vunuhia rau kalukinia.

¹⁶Vunu i Jisas mo vano vaki Nasaret hinea mo ngwarasea hake eia. Vae lo Rani* na Mabuana mo vano vaki lo vale* na tiutangaroa, hokinia mo toko vano tigwaravu. Mo maraka mo tu kwara ne valuki na Uliuli* Kokona.

¹⁷Hikani ramo bete na buku* nona tangaloi* duruduruki i Aesaea lakwae. Mo vukeri na buku hi mo hagwe na leo u uliana u viti kwara,

¹⁸“A Tanungwe nona Hugwe i God aia lugu, huri aia u vuraeau ba kwara vae na heretuvaki na Roro Karea lakwa na kakaravi. Aia u hokakiau kwara na koleki lakwa na tangaloi rau hugu lolo ingwa na gwarugwaru kwara vae rana soro tivarea, vake na koleki lakwara hinea a matadodo kwara vae rana tagataga. Aia u hokakiau kwara na tirakinira hinea rau rongo hati, rau hugu tavuti na huirana na noga tavaluivuro, rana lakao tiura rana rongo karea.

¹⁹Vunu vake na tuliki na hukao hi kwara vae a Hugwe i God ne vakahiki na bulana tangaloi luna.”

²⁰I Jisas mo gworovi na buku hi mo betea taliku lakwa na tangaloi hi mo toko tagahuri a buku, vunu mo hugu hivo kwara ne heretuva. A tangaloi vunuhia lolo vale na tiutangaroa ramo tagataga huri Jisas.

²¹Mo tinakaki mo kwaha maira mo viti kwara, “A Uliuli Kokona hika tulu mo rongoa nomo valukia, u kworo hika karagwa.”

²²Aira vunu rau kalukinia haburu, vake rau idila haburu kina leo karekarea aira vano hi mo vitira. Ramo kwaha ramo viti kwara, “?Kworohokinia? !Aia i natu i Sosev!”

²³Mo kwaha maira mo viti kwara, “I nau nu kikilai kwara i kamu tulu ne viti a tavaluileo hika lakweau, hinea u vitiana vanamai evina kinia kwara ‘Tokita. Ko vakahikinigo sibomu.’ Vake tulu ne viti lakweau kwara ‘Ko vai hike lo gwatui-vanuamu hokinia hinea kemo rongo komo vai lo gwatuivanua Kavaneam.’ ”

²⁴Vae i Jisas mo kwaha vake mo viti kwara, “Kareaki na viti lakwakamu, a tangaloi duruduruki, vae a tangaloi lo gwatui-vanuana vohoki rahe toko lai tabetabekinia tea.

²⁵Tulu rongo na viti. Kareaki lo taro i Elaesa, lolona hi he uha tea a hukao kaitolu kaivatiki duviki, a gwati vavine u rusa lo vanua Isrel*, vae takwa-hi a gwakere lakua doluaki na vanua hi.

²⁶Vae i God he hokaki i Elaesa te vohoki vaki mana gwati vavine maira hi kwara te katukwale lo vanua Isrel, vae u hokakinia kehekeheki vaki mana gwati vavine katukwale lo gwatuivanua Sarevat lo mahigwa na vanua Saeton.

²⁷Vake lo taro na tangaloi duruduruki i Elisa, a tangaloi u rusa a lengeana hati na vinu [6] u vaira lo vanua Isrel. Vae i God he lalahi i Elisa tea kwara ne vakahikinia kwara te katukwale ne ngwasara tina lengeana hi, vae u lalahia kwara ne vakahiki i Neman kehekeheki hinea a ngwera Siria.”

²⁸Hikani vunuhi na tangaloi lo vale na tiutangaroa ramo rongo mo kwaha hokinia hi rau lologute haburu.

²⁹Ramo maraka ramo revei Jisas tivarea tina gwatuivanua, ramo lavia vaki lo vuti aulu hinea ramo tokaki vanua eia, rau vai kwara rana vohokinia hivo lo baha.

³⁰Vae va lakao lalahi na livuka na vao hi va vano.

³¹Vunu i Jisas mo vano vaki Kavaneam lo vanua Galili*, mo huhui na tangaloi takwa-hi lo Rani* na Mabuana.

³²Aira vunu rau idila kinia lo hala mo huhui, huri a leona rau bakoto a huirana luna.

³³A tangaloi katukwale lo vale* na tiutangaroa a tanungwe hati luna. Vae mo kwaha karakara mo viti kwara,

³⁴“!Aa! Jisas ngwera Nasaret. ?Kwara kona vai aha maikami? ?Ku vai kwara kona magarakikami? I nau nu kikilaiko. I nigo a Tangaloi Kokona noi God.”

³⁵Vae i Jisas mo suri na tanungwe hati hi mo viti kwara, “!Hugu butu! !Ko vano tina tangaloi hika!” A tanungwe hati hi mo vai suri na tangaloi hi tilo tano lo nakoga, mo vano tiua, vae he vai hokotia tea.

³⁶Aira vunu rau idila haburu ramo kwahakwaha mulekinira ramo viti “!Hava na leo aira vano hika! A tangaloi hi u kwaha kina bakotoana mana huirana mo hora na tanungwe hati, vae ramo ngwalua.”

³⁷Vae a roro hi huri i Jisas mo vano vataha na mahagweki lo vanua hi.

³⁸I Jisas mo tiraki na vale* na tiutangaroa hi, vunu mo vano vaki tata i Saemon. I Saemon, i gwelikana vavine u lenga u mahaki haburu, vae ramo vitia lakwai Jisas.

³⁹Mo vano mo tu maia tavaluki mana herena mo hora na mahakita tiua. Vunu a mahakita mo tirakinia, mo maraka vakatukwale mo hago maira, mo bete hinaka lakwara.

⁴⁰A mataniaho mo soro, vunu aira vunu hi a rabuluiga eia rau lenga kina lengeana a gwatuki u rusa, ramo lavira vaki mai Jisas. Mo tau kabana luga savira mo vakahikinira aira vunu.

⁴¹A tanungwe hati vake ramo ngwalua tina tangaloi rusa, ramo kakaili, ramo viti kwara, “!I nigo i Natu i God!” I Jisas mo surira kwara vae rana hatu kwaha, huri rau kikilai kwara aia i Vurae*.

⁴²A rani mo kini i Jisas mo tiraki na vanua mo vano vaki lolo bubu vuroki hinea a tangaloi tikei eia. A tangaloi ramo tinakaki ramo soro haroa, vae ramo hagwea ramo vai kwara rana kwiribibia ne hatu vano.

⁴³Vae aia mo viti lakwara kwara, “I nau nana heretuvaki na Roro Karea lo gwatugwatui-vanua dolua vake, na matangwasaraki kwara hika i God u tuku boloki vae ne hugwe koro na bulana tangaloi, huri i God u hokakiau kwara na vai kwehi.”

⁴⁴Vae mo heretuva lo vale* na tiutangaroa maira doluaki na vanua hi.