Read West Ambae LUK 5 Bible Online

LUK 5 - West Ambae bible

LUK 5

¹Vakatukwale i Jisas u tu auta lo Kwai Tokatoka Lakua Genesaret, [7] a tangaloi ramo toko visusuni haro halaga vaki maia kwara rana rongo na leo i God.

²I Jisas mo tagai na aga kairua, rau reve duledulekirarua lo one. A tangaloi na ika rau vano tina aga kairua hi rau tuku kwasukwasu bulaga kabe.

³I Jisas mo galo tilolo aga kairuaki hi, a aga i Saemon, mo kwaha mai Saemon kwara ne susunia kelekele tivarea tina vanua auta. Vae i Jisas mo hugu lo aga mo huhui na vao.

⁴Mo kwaha mo rovo, vunu mo kwaha mai Saemon mo viti kwara, “Tulu susuni na aga vakevake vaki lo buabuaki. Vunu i nigo mai rabuluimu tulu mo vohoki bulamiu kabe tegetano tulu mo kwali ika.”

⁵Vunu i Saemon mo daraki mo viti kwara, “Hugwe*. Keu boboloki tarani vae kehe kwali hokoti na kinau te vohoki. Vae diko i nigo ku viti kwehi, na vohoki na kabe tegetano.”

⁶Vunu ramo vohoki na kabe tegetano, vae rau kwali kareaki na ika, a kabe vano hi kelekele mo eno kwara rana magae.

⁷Vae ramo alovi na rabuluiga vanamai lo aga kairuaki kwara rana hago maira. Ramo vanamai ramo hokoni na ika vano hi lolo aga kairua hi raru kukwere haburu, kelekele mo eno kwara raru ne dono.

⁸Lolona i Saemon Pita mo tagai na kinau hi mo vai, mo sovi hivo mo titiugwao koro na nako i Jisas, mo viti kwara, “!Hugwe! !Ko vano tiau! !I nau a tangaloi vaivai hati!”

⁹I Saemon, maira ratuaki vake ramo huria, aira vunu rau idila haburu kina ika rusa vano hi ramo kwalira.

¹⁰I rabului Saemon, i Semis mai Sione i ranatu i Seveti, i rarua vake raru idila haburu. I Jisas mo kwaha mai Saemon mo viti kwara, “Ko hatu mataku. Hika kona kwareki a kaireve na tangaloi.”

¹¹Vunu ramo reve hakeki na aga kairua hi vaki lo one, ramo tiraki savi na kinau, ramo huri i Jisas.

¹²Vakatukwale i Jisas u hugu lo vanua katukwale a tangaloi katukwale takwa-hi a lengeana hati na vinu [8] u vaia. Lolona mo tagai Jisas mo sovi hivo, mo kwaha maia mo viti kwara, “Hugwe*, nu kikilai kwara kona vai lai kona vaiau na ngwasara taliku, vae nahe kikilai tea kwara ku masinge diko hetea.”

¹³Vunu i Jisas mo hokaki na kabana mo kihia mo viti “!Nu masinge! !Ko ngwasara!” Heheriki a lengeana hi mo tikei tiua, mo ngwasara.

¹⁴Vae i Jisas mo suria mo viti kwara, “Ko hatu viti lakwa na tangaloi, vae ko hena bakotoki vaki mana tangaloi* lingilingi ne taga vivilokinigo. Vunu komo bete nomu hilehile lakwai God hokinia hi i Mosis mo viti, ne vosangi na tangaloi savia kwara i nigo hika ku ngwasara.”

¹⁵Vae a roro i Jisas mo vano mo lakua vakevake, vae a vao rusa ramo vanamai kwara rana rongoa, vake kwara ne vakahikinira tina kaga lengeana.

¹⁶Vae i Jisas a bohianana u tuku vano kahea vaki lolo bubu vuroki, mo tiutangaroa.

¹⁷Vakatukwale i Jisas u tuku huhui, a Varisi* tuaki mana tangaloi* kikikila na Uliuli* Kokona rau hugu takwa-hi. Rau vanamai vatavataha na gwatuivanua lo vanua Galili* maia Sutia, vake tina gwatuivanua lakua Serusalem. A huirana nona Hugwe i God aia lui Jisas huri kwara vae ne vakahiki na lengeana.

¹⁸A tangaloi tuaki ramo vanamai rau kwali na tangaloi sarosaro lo here, a tarabehina rau mate. Vae ramo vai kwara rana lavia tilolo ingwa rana lulukinia koro na nako i Jisas.

¹⁹Vae rahe hagwe te hala kwara rana lavia vaki lolo ingwa huri na vao u rusa. Vae hokinia ramo kwalia hake vaki lo ingwa* hivoulu, ramo ragahi na mahigwa na ingwa hivoulu ramo tiraki na tangaloi sarosaro hi hivo lo herena vaki lo livuka na tangaloi vano hi koro na nako i Jisas.

²⁰Vunu i Jisas mo tagaira kwara a noga hauhuriana u haburu, mo kwaha mana tangaloi hi mo viti kwara, “Tua. I nau nu domidomi koro na nomu hatiana, u rovo ba.”

²¹A tangaloi kikikila na Uliuli Kokona mana Varisi ramo tinakaki ramo toko kwahakwaha mulekinira ramo viti kwara, “?Ihe tangaloi hika mo kwaha vovohi God lo hala hokinia hika? Hete tangaloi kwara ne domidomi koro a hatiana hokinia hika. Vae i God kehekeheki u vai lai.”

²²I Jisas u kikilai na domiga ba, mo kwaha maira mo viti kwara, “?Kworoho tulu mo toko dikoki lolo domimiu lo kinau aira vano hi?

²³?Aia makive u magemu? ?Na viti ‘I nau nu domidomi koro na nomu hatiana, u rovo ba,’ diko na viti ‘Maraka ko lakao’?

²⁴Nanari vosangi lakwakamu kwara i nau a Natu* na Tangaloi a nogu huirana eia lo varamana kwara na domidomi koro a hatiana nona tangaloi.” Vunu mo kwaha mana tangaloi sarosaro hi mo viti kwara, “Na viti lakwako, ko maraka, ko kwali heremu ko mule vaki tatamu.”

²⁵A tangaloi hi mo maraka hake vakatukwale koro na nako na tangaloi savia, mo kwali na herena hi mo ngwalulu luna, mo mule vaki tatana, u kaluhaki God.

²⁶Aira vunu rau idila haburu vohoki. Rau mataku haburu ramo kaluhaki God ramo viti kwara, “!A hava na kinau karea rusa hika tamo tagaira hika karagwa!”

²⁷Takuni tiua hi i Jisas mo soro tivarea mo tagai na tangaloi* na vilevile mane*, a takis nona kavman, a hinana i Livae. U hugu lolo ingwa na nona boloki. I Jisas mo kwaha maia mo viti kwara, “Ko huriau.”

²⁸I Livae mo maraka mo tiraki savi na kinau, vunu mo huria.

²⁹Vunu i Livae mo vai na hinaka lakua tatana huri i Jisas. Vae a tangaloi na vilevile mane, a takis nona kavman, u rusa vohoki, mana tangaloi ratuaki vake rau kanikani mairarua.

³⁰A Varisi* ratuaki mana tangaloi* kikikila na Uliuli* Kokona aira hi lo bulubulu hi, ramo kwaha lo ngwalagelo noi Jisas. Rau viti kwara, “?Kworoho tulu mo kanikani tulu mo inuinu mana tangaloi na vilevile mane, a takis nona kavman, mana tangaloi* vaivai hati tavalavarea?”

³¹I Jisas mo daraki lakwara mo viti kwara, “A tangaloi aira hinea rau rongo karea rahe lengai na tokita tea, vae kehekeheki aira hinea rau lenga rau lengai na tokita.

³²I nau nahe vanamai tea kwara na kware na tangaloi hinea rau bakoto kwara rana bohi, vae nu vanamai kwara na kwarera hinea a tangaloi vaivai hati tavalavarea kwara vae rana bohi tina noga vaivai hati.”

³³A tangaloi tuaki ramo kwaha mai Jisas ramo viti kwara, “A ngwalagelo noi Sione rau rete tigwaravu vake rau tiutangaroa. A ngwalagelo nona Varisi* maira rau vai kwehi vake. Vae i nigo, a nomu ngwalagelo rau kanikani rau inuinu.”

³⁴I Jisas mo daraki mo viti kwara, “?I kamu tulu domi kwara tulu ne vai na tangaloi hinea ramo vanamai huri na kanikani na lakiana rana rete lolona hi a ngwera na lakiana aia maira? Hetea.

³⁵Vae lo taroki a tangaloi rana lavi na ngwera na lakiana hi tiura, vunu ranari rete lo taro aira vano hi.”

³⁶I Jisas u viti na tavaluileo hika lakwara vake, mo viti kwara, “Hete katukwale kwara ne gae na mautu na lugwa tina lugwana hinea u karagwa ne bolokia tilo lugwana hinea u ngwanika. Kwara vae diko ne vai kwehi, hi a tangaloi hi u magaraki na lugwana hi karagwa. Vake a mautu na lugwa karagwa hi nehe taritarisa te mana lugwa ngwanika.

³⁷Vunu vake a tangaloi nehe lilingi na waen karagwa tea tilolo tanga na waen tuai hinea a vinu na boboroa. Vae diko ne lilingi na waen karagwa tilolo tanga tuai, a waen karagwa hi a nona huirana ne maraka ne vai dare na tanga tuai ne magarakinia, a waen ne madidihi.

³⁸Vae a tangaloi ne lilingi a waen karagwa tilolo tanga karagwa.

³⁹Vunu a tangaloi hinea u tuku inu lo waen tuai he lengai na waen karagwa tea. Aia u viti kwara, ‘A waen tuai u karea.’ ”