Read West Ambae LUK 6 Bible Online

LUK 6 - West Ambae bible

LUK 6

¹Lolona i Jisas mo lakao utuhi na agoago* na uit* lo Rani* na Mabuana, a nona ngwalagelo ramo rarahi na biuki na uit, ramo rahaki na vinuki tina biuki, ramo kani.

²A Varisi* ratuaki ramo viti kwara, “?Kworoho tulu mo vai na kinau a noda Tangwata* he tirakikita tea kwara tana vai lo Rani na Mabuana?”

³I Jisas mo daraki lakwara mo viti kwara, “?I kamu tulu he valu tea lo Uliuli* Kokona a havakinau i Devit mo vai? Aia mana nona ngwalagelo mo marakatira,

⁴vae mo soro tilolo ingwa noi God, mo lavi na bereti* hinea a tangaloi* lingilingi rau hilea ba lakwai God. Mo kania, vunu vake mo bete lakwa na nona ngwalagelo ramo kani. Aia a noda Tangwata he tiraki tea kwara a tangaloi haro nga rana kani na bereti hini, kehekeheki a tangaloi lingilingi maira.”

⁵Vunu i Jisas mo kwaha rovonaki mo viti kwara, “I nau a Natu* na Tangaloi nu hugwe koro na Rani na Mabuana.”

⁶Lo Rani* na Mabuana dolua vake, i Jisas u vano vaki lo vale* na tiutangaroa mo huhui. A ngwera katukwale takwa-hi a matuai kabana u gogo.

⁷A tangaloi* kikikila na Uliuli* Kokona mana Varisi* ratuaki rau lengaia kwara rana tu te lo kinau, rana vai na leo huri i Jisas kwara aia u vai kinau rau hati. Vae ramo tagataga-bibia kwara, diko ne vakahiki na tangaloi lo Rani na Mabuana, rana vaia huri.

⁸Vae i Jisas u kikilai na domiga, mo kwaha mana tangaloi hi a kabana u gogo mo viti kwara, “Maraka, ku tu, ko vanamai vaki hike tomua.” A tangaloi hi mo maraka mo vano mo tu takwa-hi.

⁹Vunu i Jisas mo kwaha maira mo viti kwara, “?Na uduhuri kikamu, a noda Tangwata* u tirakikita kwara tana vai kworoho lo Rani na Mabuana? ?Tana vai tabetabeki na tangaloi diko tana vai bulakikinia? ?Tana vakahiki na tangaloi diko tana kwohi mateia?”

¹⁰Vae mo tagataga laliki mo tagaira aira vunu, vunu mo kwaha mana ngwera hi mo viti kwara, “Vukeri na kabamu.” Mo vai luna, a kabana mo karea taliku.

¹¹Vae aira rau lologute haburu ramo kwahakwaha mulekinira kwara rana vai kworohoki i Jisas.

¹²Lo taro hi i Jisas mo vano hake vaki lo vuti kwara ne tiutangaroa. Mo hugu takwa-hi lolo bongi mo tiutangaroa lakwai God, mo vanovano vaki sirovobongi.

¹³Mo rani mo kware na nona ngwalagelo vaki maia mo kwareluahira hangavulu dongwana kairua tiura. Aira hi mo kwarekinira a kaihora* kokona.

¹⁴A hinaga aira hika. I Saemon, i Jisas mo tau na hinana i Pita, mai tuana i Aduru, i Semis, i Sione, i Viliv, i Batolomiu,

¹⁵i Matiu, i Tomas, i Semis i natu i Alveas, i Saemon hinea aia katukwale tina tangaloi* aira hi ramo karohuri na vanua noi God, a vanua Isrel*,

¹⁶i Sutas i natu i Semis, mai Sutas Iskariot, aia hi vae vaki takuni mo mulemai kina tangaloi hinea mo tovo kai Jisas lakwa na nona tavaluivuro.

¹⁷I Jisas mo duvule hivo lo vuti mana nona kaihora* kokona. Mo tu lo tavotavolaki mana nona ngwalagelo rusa. Takwa-hi a vao rusa rau vanamai vataha na mahagweki, tina vanua Sutia, tina gwatuivanua lakua Serusalem, tina babaitahi na gwatuivanua lalakua Taea maia Saeton.

¹⁸Rau vanamai kwara rana rongoa, vake ne vakahikinira tina kaga lengeana. Aira hi rau rongo hati kina tanungwe hati rau vanamai vake, vae rau ahi.

¹⁹A tangaloi vunuhia rau vai kwara rana kihia, huri a huirana u vanamai tiua mo vakahikinira savira.

²⁰Vunu i Jisas mo tagatagahuri na nona ngwalagelo mo kwaha mo viti kwara, “I kamu hi tulu kakaravika, ne havutikamu, huri i God u hugwe korokamu.

²¹I kamu hi u marakatikamu hika, ne havutikamu, huri lo taroki vae tulu ne kugwa. I kamu hi tulu rongo hati hika, ne havutikamu, huri lo taroki vae tulu ne lagwa.

²²“I nau a Natu* na Tangaloi, vae diko lo taroki a tangaloi rana vai taratarakikamu, rana bega kikamu, rana kwaha bulakikikamu rana viti kwara i kamu a tangaloi hati, huri i kamu a nogu tangaloi, vae lo taro hi ne havutikamu.

²³Diko rana vai kwehi, tulu ne lagwa tulu ne vai hakwana kina hahavutiana, huri i God u kwiribibi a kaitakwe lakua hurikamu lolo taetae. I ratubuga vake rau vai na doridori hokinia hi vohoki vovohi na tangaloi* duruduruki maira.

²⁴“Vae i kamu hi a tangaloi hugwe, a rongoana hati lakua lakwakamu, huri tulu lai savi na nomiu kinau karekarea u rovo ba, vae tulu nehe lai tea taliku.

²⁵I kamu hi tulu kugwa hika, a rongoana hati lakua lakwakamu, huri lo taroki vae ne marakatikamu. I kamu hi tulu lagwa hika, a rongoana hati lakua lakwakamu, huri lo taroki vae tulu ne rongo hati, tulu ne tangi.

²⁶“I kamu hi lo taroki a tangaloi savia rana kalukikamu, a rongoana hati lakua lakwakamu, huri i ratubuga vake rau vai hokinia hi vohoki lakwa na tangaloi duruduruki kurakura maira.”

²⁷Vunu i Jisas mo kwaha mo viti kwara, “Vae nana viti lakwakamu hinea tulu mo toko rongohuriau kwara, tulu lagwa mana nomiu tavaluivuro, tulu ne vaivai karea maira hinea rau vai taratarakikamu.

²⁸Tulu tiutangaroa karea kinira hinea rau tiutangaroa hati kikamu, vake tulu tiutangaroa hurira hinea rau vai bulakikikamu.

²⁹Diko te katukwale u rabako lo baririmu tavaluki, ko halebohi kinia tavaluki ne raba rovonakinia vake. Diko te katukwale u revei na kakavumu tiuko ko tirakinia ne lavi na lugwamu lolona vake.

³⁰Aira hi rau longi te kinau tiuko, ko bete lakwara aira vunu. Vae diko te katukwale u lai te nomu havakinau, ko hatu uduharoa taliku.

³¹Tulu vaivai karea mana tangaloi vunuhia hokinia hi tulu mo domiki kwara rana vaivai karea maikamu.

³²“?Diko tulu lagwa kehekeheki mana tangaloi hinea rau lagwa maikamu vae kworohokinia tulu ne lai kaitakwe huri? A tangaloi vaivai hati vake rau lagwa mana tangaloi hinea rau lagwa maira.

³³?Vake diko tulu vaivai karea kehekeheki maira hinea rau vaivai karea maikamu vae kworohokinia tulu ne lai kaitakwe huri? A tangaloi vaivai hati vake rau vai kwehini.

³⁴?Vake diko tulu tiraki te nomiu kinau kehekeheki lakwara hinea tulu tuku domi kwara vae tulu ne lai tiura taliku, vae kworohokinia tulu ne lai kaitakwe huri? A tangaloi vaivai hati vake rau tiraki noga kinau lakwa na tangaloi vaivai hati kwara vae rana lai tiura taliku hokinia hi ramo bete lakwara.

³⁵!Hetea! Tulu ne lagwa mana nomiu tavaluivuro, tulu vaivai karea maira. Tulu ne tiraki nomiu kinau lakwara, tulu hatu domi kwara vae tulu ne lai tiura taliku, vae i kamu tulu neri kwali a kaitakwe lakua huri. Vae tulu ne kwareki i raranatu i God hinea Aulu Karakara, huri aia u karea mana tangaloi hinea rahe lagwalagwa tea, vake mana tangaloi hinea a doridoriga rau hati.

³⁶Nomiu hahakavi ne eia huri a tangaloi, hoki i Tamamiu nona hahakavi eia huri a tangaloi.”

³⁷Vunu i Jisas mo viti lakwara kwara, “Tulu hatu taga kwaheki na doridori na tangaloi tulu mo viti kwara rau hati, vae i God ne mai taga kwaheki na doridorimiu ne mai viti kwara tulu hati vake. Tulu hatu tau a leo na rongo hati lakwa na tangaloi lo noga hatiana, vae i God nehe tau te leo na rongo hati lakwakamu lo nomiu hatiana. Tulu domidomi koro na hatiana nona tangaloi vae i God ne domidomi koro nomiu hatiana.

³⁸Tulu betebete lakwa na tangaloi, vae i God ne bete lakwakamu. Ne bete u taritarisa lo dumuki bakotoki. Ne susunia hivo ne rugwekinia kwara ne kukwere ne karea, ne bete vakevake ne kukwere avuavu ne ngwaraburabu tulu ne kwali lengalengakinia. Lo dumuki hi tulu ne bete, i God ne bete lakwakamu hokinia.”

³⁹Vunu i Jisas mo viti na tavaluileo hika lakwara mo viti kwara, “A matadodo nehe tagaoki na matadodo tea, vae diko ne tagaokinia i rarua vunu raru ne sovi tilolo kwalukwalu.

⁴⁰A tangaloi hinea u sekulu, he lakua tea sileti na nona tangaloi hinea mo huhuia. A tangaloi savia hinea rau sekulu ramo vai savi na noga huhuiana mo taritarisa mo rovo, vunu ramori hoki na noga tangaloi hinea mo huhuira.

⁴¹“?Kworoho komo tagai na hogo kelekele lolo mata i tuamu vae kohe va tagai na leko te lolo matamu?

⁴²?Ku domi kworohokinia kwara kona viti lakwai tuamu kwara, ‘Ai, tua, na lavi na hogo kelekele tina matamu,’ aia i nigo kohe va tagai na leko te lolo matamu? I nigo a tangaloi kurakura, ku viti kinau ki ringomu vohoki. Ko lavi na leko tina matamu tomua, vunu konari taga ne matangwasara, konari lavi na hogo kelekele hi tina mata i tuamu.”

⁴³Vunu i Jisas mo viti vake kwara, “A vikai karea u tuku kwai, a kwaiki rahe hati tea, diko a vikai hati u tuku kwai, a kwaiki rahe karea tea.

⁴⁴A vikai savia tau kikilaira lo kwaiga. Konahe tovahi na kwai na karo karea tea tina karo na bubu hinea a kasiki eia, diko konahe vuvuki na kwai karea tea tina karo hohokoti.

⁴⁵A tangaloi bakoto u viti kinau rau bakoto huri a domina lo kinau rau bakoto kehe. A tangaloi hati u viti kinau rau hati huri a domina lo kinau rau hati kehe. A tangaloi u kwaha, u viti huri na kinau hinea a domina u kukwere kinia.”

⁴⁶Vae i Jisas mo gweregwereki na nona leo mo viti “?Kworoho tulu mo kwareau kwara, ‘Hugwe*, Hugwe,’ aia nu viti kinau lakwakamu tulu he vai tea?

⁴⁷Aira vunu hinea rau vanamai vaki maiau rau rongohuri na nogu leo, rau tabe tabetabekinira, na viti lakwakamu kwara aira hoki na havakinau.

⁴⁸Aira hoki na tangaloi hinea u tabe ingwa. U keli na tano u bua, mo tau na tutuki lo vatu toka. Vunu a kwai mo huki vanamai tiluna, vae he kiluki lavia tea huri u tabea u karea u madi.

⁴⁹Vae aia hinea u rongo na nogu leo, vae he tabe tabetabekinira tea, aia hoki na tangaloi hinea u tabe na ingwana lo tano a tutuki tikei. Vunu a kwai mo huki vanamai tiluna, vae u sovi vakatukwale mo matalatala va hati.”