Read West Ambae LUK 9 Bible Online

LUK 9 - West Ambae bible

LUK 9

¹I Jisas mo kware tabulutaki na nona ngwalagelo hangavulu dongwana kairua mo bete na huirana lakwara mo rivukira kwara rana bakoto rana livu savi na tanungwe hati tina tangaloi, vake rana vakahiki na tangaloi tina kaga lengeana rusa.

²Mo kwaha maira mo viti kwara, “Tulu hatu hago te kinau huri a halamiu. Tulu hatu kwali te kaitiko, tulu hatu hago te tanga, diko te hinaka, diko te mane*, diko te lugwamiu vake. Te takwanahavaki a tangaloi rana lai tabetabekikamu, tulu ne hugu lolo ingwa hi kehekeheki tarisaki tulu ne tiraki na gwatuivanua hi. Vake te takwanahavaki a tangaloi ranahe lai tabetabekikamu tea, tulu mo tiraki na gwatuivanua hi tulu mo gahaki na gwia tina garumiu, ne kwareki a kaimatai lakwara kwara vae rana tagahuri. Vae lo taroki a rongoana hati ne maravuti maira.” Vunu i Jisas mo horara tivarea kwara rana heretuva rana matangwasaraki kwara hika i God u tuku boloki vae ne hugwe koro na bulana tangaloi, vake kwara rana vakahiki na tangaloi hinea rau lenga.

⁴

⁵

⁶A ngwalagelo ramo tiraki ramo vano laliki lo gwatugwatui-vanua savira ramo heretuvaki na Roro Karea, vake ramo vakahiki na tangaloi hinea rau lenga vataha na mahagweki.

⁷I Herot [13] hinea u hugwe koro na vanua Galili* mo rongo savi na kinau aira vano hi ramo vaiana, mo domi lengalengakinia, huri a tangaloi ratuaki rau viti “I Sione a tangaloi na bavtaes tangaloi u ahi taliku.”

⁸Tuaki rau viti kwara i Elaesa u vanamai, tuaki rau viti kwara a tangaloi* duruduruki katukwale tiura hinea tuai, u ahi taliku.

⁹Vae i Herot u viti kwara, “I Sione, nu hora tangaloi rau tai utuhi na gwatuna ba. ?Aia ihe tangaloi hika nomo rongo na kinau aira vano hi huria?” Vae mo seseaka kwara ne tagai Jisas.

¹⁰A kaihora* kokona ramo mulemai ramo viti savi na kinau lakwai Jisas hinea ramo vai. I Jisas mo lavira ramo huria ramo lakao aira kahera rau huri na hala vaki lo gwatuivanua a hinaki Betsaeta.

¹¹Lolona a vao ramo rongo na roroga ramo huri haro i Jisas. I Jisas mo lai tabetabekinira, mo kwahakwaha maira mo vitiviti huri kwara hika i God u tuku boloki vae ne hugwe koro na bulana tangaloi. Vake mo vakahikinira hinea rau lengaia kwara rana ahi.

¹²Lolona a mataniaho mo hivo, u garagarani kwara ne soro, a nona ngwalagelo hangavulu dongwana kairua ramo vanamai vaki maia, ramo kwaha rau viti kwara, “Ko hora na tangaloi rana vano. Rana vano te vaki lo gwatuivanua maira, vake te vaki lo vanua a tokakivanua eia dalidali na vanua hika, rana soro te hinaka rana kani, vake rana soro te tanotano na maturua rana maturu eia, huri hika a vanua vuroki.”

¹³Vae i Jisas mo kwaha maira mo viti kwara, “I kamu tulu bete te hinaka lakwara rana kani.” Ramo daraki ramo viti kwara, “I kami keu hagovi na bereti* kailima, a ika kairua, aira hi vohoki. ?Ko lengaikami kwara kena vano kena voli hinaka huri na vao doluaki hika?”

¹⁴Rau viti kwehi huri a ngwera kehekeheki kwara te u tari vakailima. I Jisas mo kwaha mana nona ngwalagelo mo viti kwara, “Tulu viti lakwa na tangaloi rana hugu ngavu kailima kehe lo gwatu katukwale.”

¹⁵A nona ngwalagelo ramo viti kwehi lakwa na tangaloi, vae a tangaloi ramo hugu hokinia hi.

¹⁶Vunu i Jisas mo lavi na bereti hi kailima mana ikaki kairua, mo lalangao vaki lolo taetae mo lagwaki God huri. Vunu mo volo utuutuhira mo betekira lakwa na nona ngwalagelo kwara rana hileki lakwa na tangaloi.

¹⁷Aira vunu ramo kani vae rau kugwa. Vunu a nona ngwalagelo ramo vileki na hinaka hinea a tangaloi ramo kani dore, ramo hokonira tilolo kete hangavulu dongwana kairua.

¹⁸Vakatukwale lolona i Jisas mo toko tiutangaroa aia kahea, a nona ngwalagelo ramo vanamai vaki maia. Mo uduhuri kinira kwara, “?A vao rau viti kwara i nau ihe?”

¹⁹Ramo daraki lakwae rau viti kwara, “Ratuaki rau viti kwara i nigo i Sione a tangaloi na bavtaes tangaloi. Tuaki rau viti kwara i nigo i Elaesa. Tuaki rau viti kwara i nigo a tangaloi* duruduruki katukwale tiura hinea tuai, u ahi taliku.”

²⁰I Jisas mo uduhuri kinira kwara, “?Vae i kamu tulu viti kwara i nau ihe?” I Pita mo daraki lakwae mo viti kwara, “I nigo i Vurae* hinea i God u tuliki terekakinia kwara ne hokakinia vanamai.”

²¹Vunu i Jisas mo surira mo viti kwara rana hatu viti na kinau hi lakwa na tangaloi.

²²Mo hoke na leona vake mo viti kwara, “I nau a Natu* na Tangaloi vae nana rongo hati haburu. A ngwarasea* maira, a tangaloi* lingilingi lalakua mana tangaloi* kikikila na Uliuli* Kokona maira rana bega kiau, rana kwohi mateiau. Vae i God ne rakatiau na ahi taliku lo rani kaitoluki.”

²³Hikani i Jisas mo kwaha maira aira vunu, mo viti kwara, “Diko te tangaloi u lengaia kwara ne huriau, ne tiraki na nona domidomi sibona, ne kwali na kaibetuna vataha na rani ne huriau.

²⁴Diko te tangaloi ne uti na mamaurianana, vae ne vai salakinia, vae ihe hinea ne tiraki na mamaurianana huriau, vae ne ahi.

²⁵Diko te tangaloi u lai savi na vivilagoki na varamana doluaki, vae diko a mamaurianana ne sala, vae nehe hagwe na kinau te vohoki.

²⁶Diko a tangaloi u maemae kwara ne matangwasarakiau mana nogu leo, vae i nau a Natu* na Tangaloi na mulemai lo nogu hahaviada, aia hi a hahaviada noi Tamagu mana nona kaihora kokona maira tina taetae, vae lo taro hi i nau na maemae kwara na matangwasarakinia.

²⁷Kareaki na viti lakwakamu, ratuaki rau tu hike maiau ranahe mate tea tarisaki hi rana taga kwara i God u hugwe koro na bulana tangaloi.”

²⁸Mo viti na kinau vano hika, vunu a kwiki katukwale koro takuni tiua hi, i Jisas mo lavi i Pita, i Sione mai Semis, ramo huria hake vaki lo vuti kwara ne tiutangaroa.

²⁹Lolona mo toko tiutangaroa, a nakona mo bohi mo dolua, a lugwana mo lotu u kwaka haburu.

³⁰Heheriki hini a tangaloi kairua takwahini, raru mo toko kwaha maia. A tangaloi kairua hi, i Mosis mai Elaesa.

³¹Raru mo maravuti lo hahaviada na taetae, raru mo toko kwahakwaha mai Jisas kwara nehe tuai tea ne vakakukwere na domi i God kina kana mateana lolo gwatuivanua lakua Serusalem.

³²I Pita mai rabuluina a mataga rau maturuturu ramo maturu, vae ramo rada hika ramo tagai na hahaviada noi Jisas, mana tangaloi kairua raru mo tu maia.

³³Lolona a tangaloi kairua hi raru mo tiraki i Jisas, i Pita mo kwaha maia, mo viti kwara, “Hugwe*, mo karea i kami hike. Vae kena vai na ingwa haleki kaitolu, katukwale huriko, katukwale huri i Mosis, katukwale huri i Elaesa.” He kikilai tea kwara u viti a havakinau.

³⁴Mo toko kwaha radu nga, a taenalangi mo vanamai mo malumalu korora. Lolona a ngwalagelo ramo taga kwara a taenalangi hi mo kalu korora, rau mataku haburu.

³⁵Vunu a dilao mo tangi lolo taenalangi mo viti kwara, “Hikani i Natugu, aia hi nu mataia. Tulu rongohuria.”

³⁶Lolona a dilao hi mo tatangi mo rovo, ramo tagai Jisas aia kahea. Lo taro aia hini a ngwalagelo vano hi rau hugu butu rahe viti na kinau te vohoki lakwa na tangaloi kwara te katukwale huri na kinau hi ramo tagaia.

³⁷Mavukona ramo duvule tina vuti, a vao lakua ramo vanamai vaki mai Jisas.

³⁸A tangaloi katukwale mo ngara karakara tina vao hi mo viti kwara, “Tisa, nu lengaia haburu kwara kona tagai natugu, huri aia hi vohoki nomo bavae.

³⁹Taroki a tanungwe hati mo vanamai tiluna u huira haburu, u vaia u ngara karakara, a tarabehina mo rurururu, a gavina ramo vilaiki. A tanungwe hati hi u vai bulakikinia haburu, u eno luna tuai, vae lo taroki mo vanamai tiluna hi, u madi kwara ne tirakinia taliku.

⁴⁰I nau nu kwaha mana nomu ngwalagelo kwara rana livutia letiu, vae rahe vai lai tea.”

⁴¹I Jisas mo daraki mo viti kwara, “I kamu a hava tangaloi hika nomiu hauhuriana u tikei. !Tulu vaivai nomiu! ?Na va loli maikamu tarisaki ave? ?Nari va rongo karea kikamu kihokua?” Vunu mo kwaha mana tangaloi hi mo viti kwara, “Ko lavi natumu vanamai vaki hike.”

⁴²A natu ngwera hi mo toko vanamai, a tanungwe hati hi mo suria mo sovi tilo tano mo rururu. Vae i Jisas mo hora na tanungwe hati hi letiu, mo vakahiki na natu ngwera hi, mo lavia lakwai tamana taliku.

⁴³Hikani a tangaloi savia rau idila haburu kina huirana lakua noi God. A tangaloi rau idila radu nga kina kinau vunuhia hi i Jisas mo vaira, vae lolona hi i Jisas mo kwaha mana nona ngwalagelo kwara,

⁴⁴“Hika na viti na kinau hika lakwakamu. !A lolomiu ne hatu bongi kinia! I nau a Natu* na Tangaloi vae a tangaloi ne tirakiau tilo huirana nona tangaloi maira.”

⁴⁵Vae rahe kikilai na domikiana na leo hi tea, huri i God u tavunikinia tiura kwara rana hatu kikilaia, vae rau mataku kwara rana uhia huri na kinau hi.

⁴⁶A ngwalagelo ramo toko viroro mulekinira kwara ihe hi tiura u lakua karakara.

⁴⁷I Jisas u kikilai na domiga, hikani mo lavi na natu kelekele, mo vaia mo tu tavaluki tiua,

⁴⁸mo viti lakwara kwara, “Te tangaloi ne lai tabetabeki na natu kelekele hika lo hinagu, u lai tabetabekiau. Ihe hinea u lai tabetabekiau, u lai tabetabekinia hinea mo horeau vake. Aia hinea evina karakara tikamu doluaki aia u lakua karakara.”

⁴⁹I Sione mo kwaha mo viti kwara, “Hugwe*, keu tagai na tangaloi u tuku livu a tanungwe hati maira lo hinamu, vae kemo suria huri aia hete lo noda bulubulu.”

⁵⁰I Jisas mo viti lakwae mana nona ngwalagelo ratuaki vake kwara, “Tulu hatu suria, huri ihe hi hete noda tavaluivuro aia buluida.”

⁵¹A taro mo toko garagarani kwara i Jisas ne mule tagaulu vaki lolo taetae, mo domi utu mo tau hala vaki lo gwatuivanua lakua Serusalem.

⁵²Mo hora na tangaloi na leo tomuakinia, vae ramo tiraki ramo vano vaki lo gwatuivanua katukwale Sameria* kwara rana vai rarai na kinau savia tarae.

⁵³Vae a tangaloi takwa-hi rahe lengaia tea kwara rana lavia vaki tataga, huri u matangwasara kwara ne vano vaki lo gwatuivanua lakua Serusalem.

⁵⁴Lolona a ngwalagelo kairua hi i Semis mai Sione raru mo tagai na kinau hika raru mo viti kwara, “Hugwe*. ?Ku lengaia kwara keru ne kware na kabu ne hivo tina taetae ne kao letiukinira? [14]”

⁵⁵I Jisas mo halebohi mo surirarua. [15]

⁵⁶Vunu i Jisas mana nona ngwalagelo ramo hena vaki lo gwatuivanua dolua.

⁵⁷Hikani ramo lakao lo halaga, a tangaloi katukwale mo kwaha mai Jisas mo viti kwara, “Kona vano takwanahavaki i nau na huriko eia.”

⁵⁸I Jisas mo viti lakwae kwara, “A karivi a gwarangaga eia, a manu a unuga eia, [16] vae i nau a Natu* na Tangaloi a tanotanogu tikei kwara na ngwalulu na mabu.”

⁵⁹I Jisas mo kwaha mana tangaloi dolua vake mo viti kwara, “Ko huriau.” Vae a tangaloi hi mo viti “Hugwe*, ko tirakiau na mule na tanomi i tamagu ba.”

⁶⁰I Jisas mo kwaha mo viti kwara, “Ko tiraki na tangaloi a domiga rau mate hoki na tangaloi u mate rana tano kaga tamate kahera. I nigo ko vano ko heretuva ko matangwasaraki kwara hika i God u tuku boloki vae ne hugwe koro na bulana tangaloi.”

⁶¹Vunu a tangaloi dolua vake mo viti kwara, “Hugwe, i nau na huriko, vae ko tirakiau na mule na kwaha duduli rabelagu ba.”

⁶²I Jisas mo viti lakwae kwara “Ihe hi mo hago lo vohe na aga, vae u matabari laliki, a tangaloi hi he taritarisa tea kwara ne mulemai kina tangaloi hinea i God u hugwe koroa.”