Read West Ambae SIONE 10 Bible Online

SIONE 10 - West Ambae bible

SIONE 10

¹Hikani i Jisas mo viti kwara, “Kareaki na viti lakwakamu, a tangaloi hinea he soro te lo mataiara na ara* na sivsivi u soro lo hala dolua, aia a tangaloi na babalua, vake aia a tangaloi uabalu tangaloi.

²Vae a tangaloi u soro lo mataiara, aia a kaitagahuri na sivsivi.

³A tangaloi u tagahuri na mataiara hini, vae tigwaravu u takahi na katamaki lakwae. A kaitagahuri na sivsivi mo kware na bulana sivsivi kina hinaga katukwale kehe, ramo rongo na dilaona, vunu mo tomuakinira tivarea.

⁴Mo tomuakinira tivarea, vunu u lakao tomua tiura, a sivsivi rau huria takuni, huri rau kikilai na dilaona.

⁵Ranahe huri na tangaloi te dolua vake huri rahe kikilai na dilaona tea, vae rana kwalao tiua.”

⁶I Jisas mo viti na tavaluileo hika lakwara, vae rahe kikilai tea kwara u tuku viti naha lakwara.

⁷Hikani i Jisas mo kwaha maira taliku mo viti kwara, “Kareaki na viti lakwakamu, a mataiara na sivsivi, i nau.

⁸Aira hinea rau vanamai tomuakiau aira a tangaloi na babalua, vake aira a tangaloi uabalu tangaloi, vae a sivsivi rahe rongohurira tea.

⁹A mataiara, i nau. Diko te sivsivi ne soro lalahiau ne ahi, ne soro tilolo ara [16] lolona, ne soro tivarea ne hagwe a hinaka rau karekarea.

¹⁰A tangaloi babalua u vanamai kehekeheki kwara vae ne baluki na sivsivi, ne ua mateira, ne magarakinira. Vae i nau nu vanamai kwara na hile a ahiana lakwara, vae a ahiana hi ne raburabu kina karekarea.

¹¹“A kaitagahuri karea na sivsivi, i nau, vae nu tirakiau kwara na mate huri na bulagu sivsivi.

¹²A tangaloi u boloki huri kaivoli aia hete kaitagahuri na sivsivi, vake a sivsivi hete bulana. Vae mo tagai na kwiriu ovi mo vanamai mo tiraki na sivsivi vano hi mo kwalao tiura vunu a kwiriu ovi mo tio talahakinira mo kani ratuaki vae ratuaki rau kwalao girigiri.

¹³A tangaloi boloki hi va kwalao huri aia a tangaloi boloki huri kaivoli kehekeheki, vae he domi huri na sivsivi te vohoki.

¹⁴I nau a kaitagahuri karea na sivsivi. Hokinia i Tamagu u kikilaiau, i nau nu kikilai i Tamagu, vae hokinia hini i nau nu kikilai na bulagu sivsivi, aira rau kikilaiau. Vae i nau nu tirakiau kwara na mate hurira.

¹⁶A bulagu sivsivi ratuaki vake eia hinea rau tikei lolo ara na sivsivi hika. Vae nana lavira vake, ranari rongohuri na dilaogu, ranari bulu katukwale, a noga kaitagahuri ne katukwale.

¹⁷“I Tamagu u lagwa maiau haburu huri kwara na tirakiau na mate, vunu kwara na lavi na maurianagu taliku.

¹⁸Hete tangaloi kwara ne lavi na maurianagu tiau, vae i nau sibogu nu tirakiau kwara na mate. I nau a nogu bakotoana eia kwara na tirakiau na mate, vake a nogu bakotoana eia kwara na lavi na maurianagu taliku. I Tamagu aia u viti kwara nana vai kwehi.”

¹⁹A gwaloana noi Isrel* ramo makwahekwahe taliku huri na leo vano hi.

²⁰U rusa rau viti “!Aia a tanungwe hati luna! !U reraka! ?Kworoho tulu mo toko rongohuria?”

²¹Vae ratuaki rau viti kwara, “A tangaloi a tanungwe hati lolo gwatuna nehe kwaha lai tea hokinia hika. A tanungwe hati nehe vakahiki lavi na tangaloi tea hinea a matana u dodo.”

²²A taroki mo maravuti huri na Kanikani* na Domihagwe na Vakakokonaki na Ingwa Kokona noi God [17] lo gwatuivanua Serusalem. A taro hi lo vanua Isrel* aia a taro na toroana.

²³I Jisas u lakao laliki lo varada na titiba na Vanua* Kokona noi God hinea rau kwarekinia a Varada nona Hugwe Lakua i Solomon. [18]

²⁴A gwaloana noi Isrel ramo vileki dalidalia ramo kwaha maia ramo viti kwara, “?Kona vaikami kena toko va lengalengakinia, vae rovonaki kihokua? Ko viti bakotoki lakwakami. ?I nigo i Vurae*?”

²⁵I Jisas mo daraki mo viti kwara, “Nu viti lakwakamu ba, vae tulu he hauhuri tea lugu. A bolokiana hi nomo toko vaira lo hina i Tamagu rau hago leo huriau.

²⁶Vae i kamu tulu he hauhuri tea lugu, huri i kamu hete bulagu sivsivi.

²⁷A bulagu sivsivi rau rongohuri na leogu, vae i nau nu kikilaira, aira rau huriau.

²⁸I nau nu hile na ahiana vaki tuai lakwara, vae ranahe mate lai te vohoki. Hete katukwale kwara ne vai lai ne reveira tiau.

²⁹I Tamagu aia u betera lakweau, aia u huira karakara sileti na tangaloi savia, vake a tangaloi nehe reve lavira tea tina kaba i Tamagu. [19]

³⁰I nau mai Tamagu i kamirua a tangaloi katukwale.”

³¹Hikani a gwaloana noi Isrel ramo rakorako vatu taliku kwara rana vohoia.

³²I Jisas mo kwaha maira mo viti kwara, “I nau nu vai na bolokiana karekarea u rusa lo nakomiu, aira hi i Tamagu mo betera lakweau kwara na vai. ?Vae tulu vai kwara tulu ne vohoiau huria makive?”

³³Ramo daraki lakwae ramo viti kwara, “Kehe vai te kwara kena vohoiko huri na bolokiana karea, vae keu vai kwara kena vohoiko huri ku tuku kwahakwaha rahe karea te vovohi God. I nigo a tangaloi vohoki, vae ku tuku viti sibomu kwara i nigo i God.”

³⁴I Jisas mo kwaha maira mo viti kwara, “U uliana ba lo nomiu Tangwata* hinea i God mo viti ‘I kamu a takaro.’

³⁵I kita vunu tau kikilai kwara a leo lo Uliuli* Kokona tanahe vai lai tea kwara tana taua letiu. Vae a Tangwata u viti huri na tangaloi hinea a leo i God u maravuti maira, mo kwarekinira kwara ‘a takaro’.

³⁶Vae i nau, i Tamagu aia u mataiau mo horeau vaki lo varamana. ?Kworoho hini i kamu tulu mo toko viti kwara nu kwahakwaha rahe karea te vovohi God huri nomo viti kwehi kwara i nau i Natu i God?

³⁷Diko i nau nohe vai te bolokiana noi Tamagu, tulu hatu hauhuri lugu.

³⁸Vae diko i nau nu vaira, diko tulu he hauhuri te lugu huri na nogu leo, vae u taritarisa kwara tulu ne hauhuri lo nogu bolokiana. Diko tulu vai kwehi, vae tulu ne kikilai ne karea kwara i Tamagu aia u toka lugu, vunu vake i nau nu toka lui Tamagu.”

³⁹Hikani ramo vai taliku kwara rana kwiribibia, vae hetea, u ahi tiura.

⁴⁰I Jisas u lakao utuhi na Kwai Sotan taliku vaki lo vanua hinea i Sione mo toko vai bavtaes eia tomua, mo hugu takwahini.

⁴¹A tangaloi rusa rau vanamai vaki maia ramo viti kwara, “I Sione he vai te kaivosangi lalakua vohoki, vae vatavataha na kinau hi mo toko vitira huri na tangaloi hikani, rau kareaki.”

⁴²Vae a tangaloi u rusa haburu rau hauhuri luna takwa-hi.